আই পি এলৰ এই খেলসমূহৰ ফলাফলৰ লগে লগেই বৰ্তমান স্পষ্ট হৈ পৰিছে অৰেঞ্জ আৰু পাৰ্পল কেপৰ দৌৰত থকা খেলুৱৈসকলৰ তালিকা
ক্ৰীড়াপ্ৰেমীৰ ব্যাপক উৎসাহ-উদ্দীপনাৰ মাজতে সমাপ্ত হ’ল আই পি এল ২০২৬-ৰ লীগ পৰ্যায়ৰ খেলসমূহ । এই পৰ্যায়ৰ অন্তিমখন গুৰুত্বপূৰ্ণ মেচত ৰাজস্থান ৰয়েলছে (RR) মুম্বাই ইণ্ডিয়ানছক (MI) পৰাস্ত কৰি প্লে-অফৰ স্থান সুৰক্ষিত কৰে । আনহাতে, আন এখন মেচত দিল্লী কেপিটেলছে (DC) কলকাতা নাইট ৰাইডাৰ্ছক (KKR) হৰুৱাই এক জয়ৰে চলিত ছিজনৰ সামৰণি মাৰে । এই খেলসমূহৰ ফলাফলৰ লগে লগেই বৰ্তমান স্পষ্ট হৈ পৰিছে অৰেঞ্জ আৰু পাৰ্পল কেপৰ দৌৰত থকা খেলুৱৈসকলৰ তালিকা ।
পাৰ্পল কেপৰ দৌৰ : ভুৱনেশ্বৰ-ৰাবাডাৰ শীৰ্ষস্থান, দৌৰত আছে আৰ্চাৰো
চলিত ছিজনত সৰ্বাধিক উইকেট সংগ্ৰহকাৰীৰ তালিকাত অৰ্থাৎ পাৰ্পল কেপৰ দৌৰত এতিয়াও যুঁজখন অত্যন্ত কঠিন হৈ আছে । বৰ্তমান ৰয়েল চেলেঞ্জাৰ্ছ বেংগালুৰুৰ (RCB) ভুৱনেশ্বৰ কুমাৰ আৰু গুজৰাট টাইটানছৰ (GT) কাগিছ’ ৰাবাডাই ২৪টাকৈ উইকেট লৈ যুটীয়াভাৱে শীৰ্ষ স্থানত অক্ষুণ্ণ আছে ।
আনহাতে, ৰাজস্থান ৰয়েলছৰ জোফ্ৰা আৰ্চাৰে মুম্বাই ইণ্ডিয়ানছৰ বিৰুদ্ধে ১৭ ৰানত ৩টা উইকেট লৈ এক চমকপ্ৰদ বলিং প্ৰদৰ্শন কৰে । এই প্ৰদৰ্শনৰ জৰিয়তে তেওঁ মুঠ ২১টা উইকেটেৰে তালিকাৰ তৃতীয় স্থানলৈ জাঁপ মাৰিছে । তেওঁৰ পাছতেই ১৯টা উইকেট লৈ চতুৰ্থ স্থানত নিজৰ স্থিতি বজাই ৰাখিছে গুজৰাট টাইটানছৰ তাৰকা স্পীনাৰ ৰছিদ খানে । এতিয়া প্লে-অফৰ মেচসমূহত এই বলাৰসকলৰ মাজত খিতাপৰ যুঁজখন অধিক তীব্ৰতৰ হৈ পৰিব ।
অৰেঞ্জ কেপৰ দৌৰ : গুজৰাট টাইটানছৰ আধিপত্য আৰু চতুৰ্থ স্থানৰ তীব্ৰ যুঁজ
সৰ্বাধিক ৰান সংগ্ৰহকাৰী বেটছমেনৰ তালিকাত অৰ্থাৎ অৰেঞ্জ কেপৰ দৌৰত গুজৰাট টাইটানছৰ খেলুৱৈৰ আধিপত্য দেখিবলৈ পোৱা গৈছে । বৰ্তমান ৬৩৮ ৰানেৰে তালিকাৰ প্ৰথম স্থানত আছে বি ছাই সুৰ্দৰ্শন আৰু ৬১৬ ৰানেৰে দ্বিতীয় স্থানত আছে অধিনায়ক শুভমন গীল । ইফালে চানৰাইজাৰ্ছ হায়দৰাবাদৰ হেনৰিখ ক্লাচেন ৬০৬ ৰানৰ সৈতে তৃতীয় স্থানত অৱস্থান কৰিছে ।
অৱশ্যে আটাইতকৈ আকৰ্ষণীয় যুঁজ দেখিবলৈ পোৱা গৈছে তালিকাৰ চতুৰ্থ স্থানক লৈ । কলকাতা নাইট ৰাইডাৰ্ছৰ বিৰুদ্ধে দিল্লী কেপিটেলছৰ কে এল ৰাহুলে ৬০ ৰানৰ এক দায়িত্ববাহী ইনিংছ খেলি মুঠ ৫৯৩ ৰান সম্পূৰ্ণ কৰে আৰু ছিজনৰ এক শক্তিশালী সামৰণি মাৰি চতুৰ্থ স্থান দখল কৰে । আনহাতে, ৰাজস্থান ৰয়েলছৰ যুৱ বেটছমেন বৈভৱ সূৰ্যবংশীয়ে মুম্বাইৰ বিৰুদ্ধে মাত্ৰ ৪ ৰানতে আউট হ’বলগা হয় । ফলত তেওঁ ৫৮৩ ৰানতে থমকি ৰয় আৰু তালিকাৰ পঞ্চম স্থানলৈ পিছলি পৰে ।
আইপিএল ২০২৬ এতিয়া আটাইতকৈ ৰোমাঞ্চকৰ পৰ্যায় অৰ্থাৎ প্লে-অফৰ দিশে আগবাঢ়িছে । এতিয়া প্লে-অফৰ খেলসমূহত এই তাৰকাসকলৰ প্ৰদৰ্শনেই স্থিৰ কৰিব যে অৱশেষত অৰেঞ্জ আৰু পাৰ্পল কেপ কাৰ নামত হ’ব ।
লগতে পঢ়ক : ‘টি-২০ত মই ২০০ ৰান কৰিম’— ক্ৰিকেট বিশ্বক কঁপাই ১৫ বছৰীয়া বৈভৱ সূৰ্যবংশীৰ ডাঙৰ ঘোষণা!
