উচ্চতম ন্যায়ালয়ে জাৰি কৰা এক শেহতীয়া নিৰ্দেশনাই সমগ্ৰ দেশৰ শিক্ষা জগতত ব্যাপক প্ৰতিক্ৰিয়াৰ সৃষ্টি কৰিছে
শিক্ষক যোগ্যতা পৰীক্ষা বা TET-ক লৈ উচ্চতম ন্যায়ালয়ে জাৰি কৰা এক শেহতীয়া নিৰ্দেশনাই সমগ্ৰ দেশৰ শিক্ষা জগতত ব্যাপক প্ৰতিক্ৰিয়াৰ সৃষ্টি কৰিছে । আদালতে স্পষ্ট কৰি দিছে যে চাকৰিত বৰ্তি থাকিবলৈ আৰু পদোন্নতি লাভ কৰিবলৈ এতিয়াৰ পৰা TET উত্তীৰ্ণ হোৱাটো বাধ্যতামূলক । এই ৰায়দানে লাখ লাখ শিক্ষকৰ ভৱিষ্যতক লৈ এক গভীৰ অনিশ্চয়তা আৰু উদ্বেগৰ সৃষ্টি কৰিছে ।
কি নিৰ্দেশ দিছে উচ্চতম ন্যায়ালয়ে ?
আদালতে TET উত্তীৰ্ণ হোৱাৰ বাবে এক নিৰ্ধাৰিত সময়সীমা বান্ধি দিছে । যিসকল শিক্ষকে এতিয়াও এই পৰীক্ষাত উত্তীৰ্ণ হ’ব পৰা নাই, তেওঁলোকে ৩১ আগষ্ট, ২০২৮ তাৰিখৰ ভিতৰত বাধ্যতামূলকভাৱে পৰীক্ষাত উত্তীৰ্ণ হ’ব লাগিব । পূৰ্বতে এই সময়সীমা ৩১ আগষ্ট, ২০২৭ লৈ আছিল যদিও তাক বৰ্তমান এসছৰৰ বাবে বৃদ্ধি কৰা হৈছে ।
প্ৰভাৱিত হ’ব ২০ লাখৰো অধিক শিক্ষক-
দেশৰ বিভিন্ন ৰাজ্য যেনে উত্তৰ প্ৰদেশ, মধ্য প্ৰদেশ, ঝাৰখণ্ড আৰু ৰাজস্থানত বহু শিক্ষক আছে যিসকলে বছৰৰ পিছত বছৰ ধৰি পাঠদান কৰি আহিছে, কিন্তু তেওঁলোকে আজিও TET উত্তীৰ্ণ হ’ব পৰা নাই । এক প্ৰাথমিক অনুমান অনুসৰি, সমগ্ৰ দেশত প্ৰায় ২০ লাখতকৈ অধিক শিক্ষক এই নতুন নীতিৰ দ্বাৰা প্ৰভাৱিত হ’ব পাৰে । কেৱল উত্তৰ প্ৰদেশতে প্ৰায় ১.৮৬ লাখ শিক্ষকৰ চাকৰিৰ ওপৰত প্ৰভাৱ পৰিব পাৰে বুলি চৰ্চা চলিছে ।
চাকৰিৰ সংকট আৰু অৱসৰৰ চিন্তা-
আদালতৰ ৰায় অনুসৰি, নিৰ্ধাৰিত সময়সীমাৰ ভিতৰত যদি কোনো শিক্ষকে TET উত্তীৰ্ণ হ’ব নোৱাৰে, তেন্তে তেওঁলোকে চাকৰিত বৰ্তি থকাটো কঠিন হৈ পৰিব । এনে পৰিস্থিতিত বহু শিক্ষকে চাকৰি এৰিবলগীয়া হোৱা বা অৱসৰ গ্ৰহণ কৰাৰ দৰে কঠোৰ সিদ্ধান্ত ল’বলগীয়া হ’ব পাৰে । অৱশ্যে, যিসকল শিক্ষকৰ চাকৰিৰ কালসীমা অতি কম বাকী আছে, তেওঁলোকে কিছু সকাহ পাব পাৰে বুলি আশা কৰা হৈছে । কিন্তু পদোন্নতিৰ ক্ষেত্ৰত TET উত্তীৰ্ণ হোৱাটো সকলোৰে বাবে অপৰিহাৰ্য হৈ থাকিব ।
শিক্ষক সংগঠনৰ প্ৰতিবাদ আৰু সংগ্ৰামৰ হুংকাৰ-
এই ৰায়দানৰ পিছতে শিক্ষক সংগঠনসমূহ ক্ষুব্ধ হৈ পৰিছে । সংগঠনসমূহে চৰকাৰক আহ্বান জনাইছে যে দীৰ্ঘদিন ধৰি সেৱা আগবঢ়াই অহা শিক্ষকসকলৰ স্বাৰ্থৰ প্ৰতি লক্ষ্য ৰাখি চৰকাৰে কোনো বিশেষ ব্যৱস্থা বা অধ্যাদেশৰ জৰিয়তে এই নিয়ম শিথিল কৰিব লাগে । এই প্ৰশ্নটো লৈ শিক্ষকসকলে আগন্তুক দিনত আইনী যুঁজৰ লগতে গণতান্ত্ৰিক উপায়েৰে পথৰ পৰা সংসদলৈ আন্দোলন গঢ়ি তোলাৰ হুংকাৰ দিছে । কিছু সংগঠনে উচ্চতম ন্যায়ালয়ত ‘কিউৰেটিভ পিটিচন’ দাখিল কৰাৰো পৰিকল্পনা কৰিছে ।
ৰাজ্যসমূহক বছৰত দুবাৰ TET অনুষ্ঠিত কৰাৰ নিৰ্দেশ-
শিক্ষকসকলক পৰ্যাপ্ত সুযোগ প্ৰদান কৰাৰ উদ্দেশ্যে উচ্চতম ন্যায়ালয়ে ৰাজ্য চৰকাৰসমূহক নিৰ্দেশ দিছে যে প্ৰতি বছৰে কমেও দুবাৰকৈ TET পৰীক্ষা অনুষ্ঠিত কৰিব লাগে । এই ব্যৱস্থাই শিক্ষকসকলক তেওঁলোকৰ যোগ্যতা প্ৰমাণ কৰিবলৈ আৰু চৰকাৰী নিয়ম মানি চলিবলৈ সহায় কৰিব বুলি আশা কৰা হৈছে ।
লগতে পঢ়ক : স্কুলীয়া শিক্ষাত উত্তৰ-পূবৰ শীৰ্ষত অসম, দেশৰ ভিতৰতে আটাইতকৈ পিছপৰা স্থানত মেঘালয় : পি জি আই প্ৰতিবেদন
