ক্ৰিকেট জ্বৰত আক্ৰান্ত গুৱাহাটী । নিউজীলেণ্ডৰ বিৰুদ্ধে তৃতীয়খন টি-২০ত অংশগ্ৰহণৰ বাবে গুৱাহাটীত উপস্থিত ভাৰতীয় দল । কাইলৈ বৰ্ষাপাৰাত শৃংখলা দখলৰ লক্ষ্যৰে নামিব সূৰ্য ব্ৰিগেড ।
ভাৰত আৰু নিউজীলেণ্ডৰ মাজত চলি থকা টি-২০ শৃংখলাৰ তৃতীয়খন গুৰুত্বপূৰ্ণ মেচৰ বাবে সম্পূৰ্ণ সাজু হৈ উঠিছে গুৱাহাটীৰ বৰ্ষাপাৰা ক্ৰিকেট ষ্টেডিয়াম । দেওবাৰে এই ষ্টেডিয়ামত অনুষ্ঠিত হ’ব ভাৰত-নিউজীলেণ্ডৰ হাই ভল্টেজ মেচ । শৃংখলাত ধাৰাবাহিক বিজয়ৰ লক্ষ্যৰে বৰ্ষাপাৰাত নামিব সূৰ্য ব্ৰিগেড । এই মেচৰ বাবে ইতিমধ্যে গুৱাহাটীৰ লগতে ৰাজ্যৰ ভিন্ন প্ৰান্তৰ ক্ৰিকেট প্ৰেমীসকলৰ মাজত উত্তেজনাই বিৰাজ কৰিছে ।
ইতিমধ্যে শৃংখলাত ২-০ ব্যৱধানত আগবাঢ়ি থকা ভাৰতীয় দলৰ বাবে কাইলৈৰ খেলখন হ’ব শৃংখলা দখলৰ সোণালী সুযোগ । আনহাতে, এদিনীয়া শৃংখলাত ইতিহাস ৰচনা কৰা কিৱি বাহিনীৰ বাবে এইখন হ’ব অস্তিত্ব ৰক্ষাৰ যুঁজ ।
গুৱাহাটীত উপস্থিত ভাৰতীয় দল-
দেওবাৰে অনুষ্ঠিত হ’বলগীয়া তৃতীয়খন টি-২০ আন্তঃৰাষ্ট্ৰীয়ত অংশগ্ৰহণৰ উদ্দেশ্যে আজি বিয়লি গুৱাহাটীত উপস্থিত হয় ভাৰত আৰু নিউজীলেণ্ডৰ ক্রিকেট দল দুটা । বিয়লি প্ৰায় ৫ বজাত ভাৰতীয় দলটোৱে বৰঝাৰস্থিত লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমান বন্দৰত অৱতৰণ কৰে ।
মুখ্য প্ৰশিক্ষকৰ লগতে সহায়ক ষ্টাফসহ উপস্থিত হোৱা ভাৰতীয় দলটোক বিমান বন্দৰত অনুৰাগী আৰু কৰ্তৃপক্ষই উষ্ম আদৰণি জনায় । ভাৰতীয় দলটোৰ পাছতে নিউজীলেণ্ডৰ দলটোও আহি গুৱাহাটীত উপস্থিত হয় । বিমান বন্দৰৰ পৰা কটকটীয়া নিৰাপত্তাৰ মাজেৰে দুয়োটা দলকে পোনে পোনে মহানগৰীৰ হোটেল ৰেডিছন ব্লুলৈ লৈ যোৱা হয় । কাইলৈ বৰ্ষাপাৰা ক্ৰিকেট ষ্টেডিয়ামত হ’বলগীয়া এই গুৰুত্বপূৰ্ণ মেচখনক লৈ এতিয়া ক্ৰীড়াপ্ৰেমীৰ মাজত ব্যাপক উৎসাহ দেখিবলৈ পোৱা গৈছে ।
বিজয়ৰ ধাৰা অক্ষুণ্ণ ৰখাৰ লক্ষ্য সূৰ্য বাহিনীৰ-
নাগপুৰত অনুষ্ঠিত শৃংখলাৰ প্ৰথমখন মেচত অভিষেক শৰ্মাৰ বিস্ফোৰক বেটিঙৰ সহায়ত ভাৰতে ৪৮ ৰাণত জয়লাভ কৰিছিল । শুকুৰবাৰে ৰায়পুৰত অনুষ্ঠিত হোৱা দ্বিতীয়খন মেচত ঈশান কিষণ আৰু অধিনায়ক সূৰ্যকুমাৰ যাদৱৰ বিস্ফোৰক বেটিঙৰ সহায়ত ভাৰতে নিউজীলেণ্ডক অতি সহজেই ৭ উইকেটত পৰাস্ত কৰে । এতিয়া দেওবাৰে গুৱাহাটী মেচত জয়ী হ’লেই ভাৰতে শৃংখলাটো দখল কৰিবলৈ সক্ষম হ’ব ।
বৰ্ষাপাৰাৰ পিটচ-
গুৱাহাটীৰ বৰ্ষাপাৰা ষ্টেডিয়ামৰ পিটচ সাধাৰণতে বেটাৰৰ বাবে উপযোগী বুলি জনা যায় । কাইলৈও এই পিটচত ৰাণৰ বৰষুণ হোৱাৰ পূৰ্ণ সম্ভাৱনা আছে । অৱশ্যে, সন্ধিয়াৰ ভাগত নিয়ৰ পৰাৰ সম্ভাৱনা থকা বাবে টছত জয়ী হোৱা দলটোৱে ফিল্ডিং কৰাৰ সিদ্ধান্ত লোৱাৰ সম্ভাৱনা অধিক ।
ভাৰতৰ সম্ভাব্য মূল একাদশ :
বৰ্ষাপাৰা টি-২০ৰ বাবে ভাৰতীয় দলৰ সাম্ভাব্য মূল একাদশ- অভিষেক শৰ্মা, সঞ্জু চেমচন ( উইকেটকীপাৰ), ঈশান কিষণ, সূৰ্যকুমাৰ যাদৱ (অধিনায়ক), হাৰ্দিক পাণ্ডিয়া, ৰিংকু সিং, শিৱম ডুবে, অক্ষৰ পেটেল/বৰুণ চক্ৰৱৰ্তী, যশপ্ৰীত বুমৰাহ, অৰ্শদীপ সিং আৰু কুলদীপ যাদৱ ।
লগতে পঢ়ক : টি-২০ বিশ্বকাপৰ পৰা আনুষ্ঠানিকভাৱে বাহিৰ বাংলাদেশী দল.. প্ৰৱেশ ঘটিল এই দলৰ
