২০২৬ চনৰ বংগ বিধানসভা নিৰ্বাচনত তৃণমূল কংগ্ৰেছে ২২৬ খনতকৈও অধিক আসন লাভ কৰিব বুলি দাবী কৰে মমতাই

পশ্চিমবংগ বিধানসভা নিৰ্বাচনত তৃণমূল কংগ্ৰেছে ২৯১খন আসনৰ বাবে প্ৰাৰ্থী তালিকা ঘোষণা কৰিছে । মুখ্যমন্ত্ৰী মমতা বেনাৰ্জীয়ে উল্লেখ কৰে যে অনিত থাপাৰ নেতৃত্বাধীন বিজেপিএমে দাৰ্জিলিঙৰ তিনিখন আসনত প্ৰতিদ্বন্দ্বিতা কৰিব ।

ভৱানীপুৰৰ পৰা প্ৰতিদ্বন্দ্বিতা কৰিব মুখ্যমন্ত্ৰী মমতা বেনাৰ্জীয়ে । টিএমচিৰ প্ৰাৰ্থীৰ তালিকা প্ৰকাশ কৰি পশ্চিমবংগৰ মুখ্যমন্ত্ৰী মমতা বেনাৰ্জীয়ে নিৰ্বাচন আয়োগে বিজেপিৰ হৈ “খেল” খেলিছে বুলি অভিযোগ কৰে আৰু তেওঁলোকে বিজেপিৰ হৈ পোনপটীয়াকৈ প্ৰচাৰ চলাব লাগে বুলি উল্লেখ কৰে । ২০২৬ চনৰ বংগ বিধানসভা নিৰ্বাচনত তৃণমূল কংগ্ৰেছে ২২৬ খনতকৈও অধিক আসন লাভ কৰিব বুলি দাবী কৰে মমতাই ।

২০২১ৰ বিধানসভা নিৰ্বাচনত বিজেপিৰ শুভেন্দু অধিকাৰীৰ হাতত নন্দিগ্ৰামৰ আসনত পৰাস্ত হৈছিল মুখ্যমন্ত্ৰী মমতা বেনাৰ্জী । ইয়াৰ পাছতে ভৱানীপুৰ উপ-নিৰ্বাচনত জয়ী হৈ বিধানসভাত প্ৰৱেশ কৰে তেওঁ । এইবাৰ নন্দিগ্ৰামৰ আসনত প্ৰতিদ্বন্দ্বিতা নকৰাৰ সিদ্ধান্ত লৈছে মমতাই । আজি দলত যোগদান কৰা পবিত্ৰা কাৰ্কেক নন্দিগ্ৰামৰ টিকট প্ৰদান কৰিছে তৃণমূল কংগ্ৰেছে । পবিত্ৰা বিৰোধী নেতা সুবেন্দু অধিকাৰীৰ ঘনিষ্ঠ সহযোগী আছিল আৰু ২০২১ চনৰ বিধানসভা নিৰ্বাচনত জয়লাভৰ ক্ষেত্ৰত গুৰুত্বপূৰ্ণ ভূমিকা পালন কৰিছিল । ২০২১ চনত টিএমচিৰ এগৰাকী কৰ্মীৰ হত্যাকাণ্ডৰ গোচৰত গ্ৰেপ্তাৰ হৈছিল তেওঁক ।

মুৰ্ছিদাবাদ জিলাৰ ভাৰতপুৰ আসনৰ পৰা মুস্তাফিজুৰ ৰহমানক প্ৰক্ষেপ কৰিছে টিএমচিয়ে । এই আসনখন বাবৰি বিবাদৰ সূচনা কৰা বিধায়ক হুমায়ুন কবীৰৰ হাতত আছিল । কালিম্পং আৰু কুৰ্চেয়ং দাৰ্জিলিঙৰ আসন অনিত থাপাৰ নেতৃত্বাধীন  বিজিপিএমক এৰি দিছে টিএমচিয়ে ।

তৃণমূল কংগ্ৰেছে ডুম ডম উত্তৰ আসনৰ পৰা চন্দ্ৰিমা ভট্টাচাৰ্য, কামাৰহাটী আসনৰ পৰা মদন মিত্ৰ, কলকাতা বন্দৰৰ আসনৰ পৰা ফিৰহাদ হাকিম, বেলেঘাটা আসনৰ পৰা কুনাল ঘোষ, শ্যামপুকুৰ আসনৰ পৰা ড০ শশী পাঞ্জা, হাবৰা আসনৰ পৰা জ্যোতিপ্ৰিয়া মল্লিকক প্ৰক্ষেপ কৰিছে । পশ্চিম বংগৰ নিৰ্বাচনত টিএমচিৰ ২৯১গৰাকী প্ৰাৰ্থীৰ ভিতৰত ৫২গৰাকী মহিলা, ৯৫গৰাকী অনুসূচিত জাতি আৰু অনুসূচিত জনজাতিৰ আৰু ৪৭গৰাকী সংখ্যালঘু ।

লগতে পঢ়ক : কংগ্ৰেছত আন এক মোক্ষম আঘাত, ৰাইজৰ দলত যোগদান জ্যেষ্ঠ নেতা আবুল মিয়াৰ

বিজেপি নেতা শুভেন্দু অধিকাৰীক দুটা সমষ্টিৰ পৰা টিকট প্ৰদান কৰা হৈছে । নন্দিগ্ৰাম হৈছে মমতা বেনাৰ্জীক ক্ষমতালৈ অনা আৰু মুখ্যমন্ত্ৰী হোৱাৰ ক্ষেত্ৰত গুৰুত্বপূৰ্ণ ভূমিকা পালন কৰা অঞ্চল ।

বংগ বিধানসভা নিৰ্বাচনৰ বাবে বিজেপিয়ে সোমবাৰে প্ৰকাশ কৰিলে প্ৰথমখন প্ৰাৰ্থী তালিকা । এই তালিকাত ১৪৪ গৰাকী প্ৰাৰ্থী আছে । বিজেপি নেতা শুভেন্দু অধিকাৰীক দুটা সমষ্টিৰ পৰা টিকট প্ৰদান কৰা হৈছে । ভৱানীপুৰৰ লগতে নন্দিগ্ৰামৰ পৰাও প্ৰতিদ্বন্দ্বিতা কৰিব সুবেন্দুৱে । ইফালে ভৱানীপুৰৰ বৰ্তমানৰ বিধায়ক মমতা বেনাৰ্জী । সেয়ে ভৱানীপুৰত হয়তো পুনৰ এবাৰ মমতা বনাম শুভেন্দুৰ হাই ভল্টেজ যুঁজ দেখা যাব পাৰে । মমতা বেনাৰ্জীয়ে ক’ত প্ৰতিদ্বন্দ্বিতা কৰিব সেয়া এতিয়াও স্পষ্ট হোৱা নাই যদিও ভৱানীপুৰৰ পৰা পুনৰ প্ৰতিদ্বন্দ্বিতা কৰিব পাৰে বুলি ধাৰণা কৰা হৈছে ।

উল্লেখ্য যে, ভৱানীপুৰ আসনৰ পৰা তিনিবাৰকৈ জয়লাভ কৰিছে মমতা বেনাৰ্জীয়ে । ২০১১ চনত বংগত চি পি এম চৰকাৰৰ পতন ঘটি মমতা বেনাৰ্জীৰ তৃণমূল কংগ্ৰেছ ক্ষমতালৈ আহিছিল । নন্দিগ্ৰাম হৈছে মমতা বেনাৰ্জীক ক্ষমতালৈ অনা আৰু মুখ্যমন্ত্ৰী হোৱাৰ ক্ষেত্ৰত গুৰুত্বপূৰ্ণ ভূমিকা পালন কৰা অঞ্চল । সেই সময়ত শুভেন্দু অধিকাৰী তেওঁৰ ঘনিষ্ঠ সহযোগী আছিল । পৰৱৰ্তী সময়ত অধিকাৰীও তাৰ পৰাই বিধায়ক হয় । কিন্তু ২০২১ চনৰ বিধানসভা নিৰ্বাচনত পৰিস্থিতি সলনি হয় । শুভেন্দুৱে বিজেপিত যোগদান কৰে আৰু বিজেপিয়ে তেওঁক মমতা বেনাৰ্জীৰ বিৰুদ্ধে নিৰ্বাচনত থিয় কৰাই । এই প্ৰত্যাহ্বান গ্ৰহণ কৰি মমতাই নিজৰ পুৰণি আসন এৰি নন্দিগ্ৰামৰ পৰা প্ৰতিদ্বন্দ্বিতা কৰাৰ সিদ্ধান্ত লয় ।

এই সমষ্টিত নিৰ্বাচনত জয়ী হোৱাৰ বাবে আত্মবিশ্বাসী আছিল মমতা বেনাৰ্জী । অৱশ্যে তাৰ বিপৰীতহে ঘটিল । ইয়াত “দিদি” নিৰ্বাচনত পৰাজিত হয় । ১৯৫৬ টা ভোটত পৰাস্ত হয় মমতা । কিন্তু তেওঁৰ দল টিএমচিয়ে ৰাজ্যখনত শক্তিশালী প্ৰদৰ্শন কৰি একেৰাহে তৃতীয়বাৰৰ বাবে ক্ষমতা দখল কৰে । ২০২১ চনৰ নিৰ্বাচনত মমতা বেনাৰ্জী নেতৃত্বাধীন টিএমচিয়ে ২১৫খন আসন লাভ কৰাৰ বিপৰীতে বিজেপিয়ে ৭৭খন আসন লাভ কৰিছিল ।

নন্দিগ্ৰামত পৰাজয়ৰ পিছত মমতা বেনাৰ্জীয়ে আসনখন ত্যাগ কৰে । পৰৱৰ্তী সময়ত ভৱানীপুৰৰ পৰা উপ-নিৰ্বাচনত প্ৰতিদ্বন্দ্বিতা কৰি ৫০ হাজাৰৰো অধিক ভোটৰ ব্যৱধানত জয়লাভ কৰে । ভৱানীপুৰক মমতা বেনাৰ্জীৰ দুৰ্গ বুলি গণ্য কৰা হয় ।

উল্লেখ্য যে, এসময়ত মমতা বেনাৰ্জীৰ ঘনিষ্ঠ শুভেন্দু অধিকাৰীয়ে প্ৰথমবাৰৰ বাবে ২০০৬ চনত টিএমচিৰ টিকটত কান্তি দক্ষিণৰ আসনত প্ৰতিদ্বন্দ্বিতা কৰি নিৰ্বাচনত জয়ী হয় । ইয়াৰ পিছত ২০০৯ চনৰ লোকসভা নিৰ্বাচনত তামলুক সমষ্টিৰ পৰা প্ৰতিদ্বন্দ্বিতা কৰি জয়ী হয় । ২০১৪ চনৰ নিৰ্বাচনতো তেওঁ নিজৰ আসন অক্ষুণ্ণ ৰাখে ।

২০১৬ চনৰ নিৰ্বাচনত তেওঁ নন্দিগ্ৰামৰ আসন জয়লাভ কৰি মমতা বেনাৰ্জী চৰকাৰৰ পৰিবহণ মন্ত্ৰী হৈছিল । মমতা বেনাৰ্জী চৰকাৰত তেওঁক গুৰুত্বপূৰ্ণ নেতা হিচাপে গণ্য কৰা হৈছিল । ২০২১ চনৰ নিৰ্বাচনত পৰিস্থিতি সলনি হৈ বিজেপিত যোগদান কৰে অধিকাৰীয়ে । বিজেপিত যোগদান কৰাৰ পিছত মমতাৰ ঘনিষ্ঠ সহযোগী শুভেন্দু হৈ পৰে তেওঁৰ তীব্ৰ প্ৰতিদ্বন্দ্বী ।

লগতে পঢ়ক : বিজেপিয়ে প্ৰকাশ কৰিলে ১৪৪ জনীয়া প্ৰথমখন প্ৰাৰ্থী তালিকা, ‘দিদি’ৰ বিৰুদ্ধে যুঁজত সুবেন্দু অধিকাৰী