১৯ বছৰ অনূৰ্ধ্ব বিশ্বকাপ ২০২৬ত ভাৰতৰ যুৱ দলটোৱে পুনৰবাৰ নিজৰ বিস্ফোৰক শৈলী প্ৰদৰ্শন কৰিছে । বৈভৱ সূৰ্য্যবংশী আৰু আয়ুষ মাহাত্ৰেৰ বিস্ফোৰক বেটিং ।

আই চি চি ১৯ বছৰ অনূৰ্ধ্ব বিশ্বকাপ ২০২৬ত ভাৰতৰ যুৱ দলটোৱে পুনৰবাৰ নিজৰ বিস্ফোৰক প্ৰদৰ্শন প্ৰমাণ কৰিলে । শনিবাৰে টিম ইণ্ডিয়াই নিউজীলেণ্ডৰ বিৰুদ্ধে গ্ৰুপ পৰ্যায়ৰ অন্তিমখন খেল খেলে । এই মেচত ভাৰতীয় দলটোৱে সহজেই নিউজীলেণ্ডক পৰাস্ত কৰে । ভাৰতৰ বলিং আক্ৰমণত নিউজীলেণ্ডৰ বেটছমেনসকলক দিশহাৰা হৈ পৰে আৰু দলটো অতি কম স্ক’ৰতে অল আউট হয় । ইয়াৰ পাছতে তাৰকা বেটছমেন বৈভৱ সূৰ্যবংশী আৰু অধিনায়ক আয়ুষ মাহাত্ৰেৰ বিস্ফোৰক ইনিংছৰ সহায়ত ভাৰতে মেচখনত সহজ বিজয় সাব্যস্ত কৰে ।

বুলাৱায়োত অনুষ্ঠিত এই মেচখন বৰষুণৰ বাবে ৩৭ অভাৰলৈ হ্ৰাস কৰা হয় । টছত জয়ী হৈ ভাৰতে প্ৰথমে বলিং কৰিবলৈ সিদ্ধান্ত লয় যদিও বৰষুণে আৰম্ভণিতে খেলত বাধা জন্মাই আৰু খেল তিনি অভাৰ কৰ্তন কৰা হয় । মেচখন পুনৰ আৰম্ভ হয় যদিও বৰষুণে পুনৰ খেল বন্ধ কৰে, যাৰ ফলত আৰু ১০ অভাৰকৈ হ্ৰাস কৰিবলগীয়া হয় । ইয়াৰ পিছতে ভাৰতীয় বলাৰসকলে শক্তিশালী প্ৰদৰ্শন আগবঢ়াই ৩৬.২ অভাৰত নিউজীলেণ্ডক ১৩৫ ৰানত অল আউট কৰে । নিউজীলেণ্ডৰ বেটিং প্ৰদৰ্শন অতি দুৰ্বল আছিল । দলটোৱে ভাৰতীয় বলিঙৰ সন্মুখত তিষ্ঠিব নোৱাৰি সঘনাই উইকেট হেৰুৱাইছিল । দলটোৰ হৈ কেলাম চেমছনে অপৰাজিত ৩৭ ৰান সংগ্ৰহ কৰাৰ বিপৰীতে চেলভিন সঞ্জয়াই ২৮ ৰান সংগ্ৰহ কৰে । আন কোনো বেটছমেনে ২৫ ৰানৰ সীমাতো উপনীত হোৱাত ব্যৰ্থ হয় ।

ভাৰতৰ হৈ আৰ এছ এম্ব্ৰিছে চাৰিটা উইকেট দখল কৰে । হেনিল পেটেলে তিনিটা উইকেট লয় । আন বলাৰসকলেও উজ্জবল বলিং কৰি নিউজীলেণ্ডক ডাঙৰ স্ক’ৰ গঢ়াত বাধা দিয়ে । খিলান পেটেল, মহম্মদ ইনান আৰু কনিষ্ক চৌহানে এটাকৈ উইকেট দখল কৰে ।

বৈভৱ সূৰ্য্যবংশী আৰু আয়ুষ মাহাত্ৰেৰ বিস্ফোৰক বেটিং-

লক্ষ্য অুসৰণ কৰি ভাৰতীয় দলটোৱে আগ্ৰাসী ৰূপ ধাৰণ কৰে । এৰন জৰ্জে ৬টা বলত ৭ ৰান সংগ্ৰহ কৰি উইকেট বিসৰ্জন দিয়ে । ইয়াৰ পিছতে অ’পেনাৰ বৈভৱ সূৰ্য্যবংশী আৰু অধিনায়ক আয়ুষ মাহাত্ৰেই বিস্ফোৰক বেটিং কৰে । মাত্ৰ ৩৯টা বলত দ্বিতীয় উইকেটৰ বাবে ৭৬ ৰানৰ অংশীদাৰিত্ব গঢ়ি খেলখন সম্পূৰ্ণৰূপে ভাৰতৰ পক্ষলৈ আনে দুয়োজনে । বৈভৱ সূৰ্যবংশীয়ে ২৩টা বলত ৪০ ৰান সংগ্ৰহ কৰে । তেওঁৰ এই বিস্ফোৰক ইনিংছত ২টা চাৰি আৰু ৩টা ছযয় আছিল । তেওঁৰ ষ্ট্ৰাইক ৰেট আছিল ১৭৩.৯১ । অধিনায়কোচিত ইনিংছ খেলা আয়ুষ মাহাত্ৰেই ২৭টা বলত ৫৩টা ৰান সংগ্ৰহ কৰে, য’ত ২টা চাৰি আৰু ৬টা শক্তিশালী ছয় আছিল ।

ইয়াৰ পিছতে বিহান মালহোত্ৰাই অপৰাজিত ১৭ আৰু বেদান্ত ত্ৰিবেদীয়ে অপৰাজিত ১৩ ৰান কৰি দলটোক জয়ৰ দিশে আগুৱাই লৈ যায় । টীম ইণ্ডিয়াই ৩টা উইকেট হেৰুৱাই ১৩.৩ অভাৰত (৮১ বল) বিজয় লক্ষ্যত উপনীত হয় ।

লগতে পঢ়ক : অষ্ট্ৰেলিয়াৰ বিৰুদ্ধে টেষ্টৰ বাবে ঘোষণা ভাৰতীয় দল, অসমৰ এইগৰাকী খেলুৱৈয়ে পালে সুযোগ…

দক্ষিণ আফ্ৰিকাৰ বিৰুদ্ধে ১৯ বছৰ অনুৰ্ধ ভাৰতীয় দলটোক নেতৃত্ব দি বৈভৱ সূৰ্যবংশী শৃংখলা জয় কৰা আটাইতকৈ কম বয়সীয়া অধিনায়ক হিচাপে পৰিগণিত হৈছে । বৈভৱে ১৯টা বলত অৰ্ধশতক অৰ্জন কৰে ।

ভাৰতৰ যুৱ বেটছমেন বৈভৱ সূৰ্যবংশীয়ে পেছাদাৰী ক্ৰিকেটত প্ৰৱেশ কৰাৰ পিছৰে পৰা ইটোৰ পিছত সিটো অভিলেখ ভংগ কৰি ইতিহাস ৰচনা কৰি আহিছে । ইতিমধ্যে নিজৰ বেটেৰে ধাৰাবাহিকভাৱে কৃতিত্ব অৰ্জন কৰি বৈভৱে এতিয়া অধিনায়কত্বৰ এক নতুন মাইলৰ খুঁটিত উপনীত হৈছে । দক্ষিণ আফ্ৰিকা ভ্ৰমণত ১৯ বছৰ অনুৰ্ধ ভাৰতীয় দলটোক নেতৃত্ব দি বৈভৱ সূৰ্যবংশী শৃংখলা জয় কৰা আটাইতকৈ কম বয়সীয়া অধিনায়ক হিচাপে পৰিগণিত হৈছে । মাত্ৰ ১৪ বছৰ বয়সতে প্ৰথমবাৰৰ বাবে অধিনায়কত্ব কৰা ক্ৰিকেট বিস্ময় বৈভৱৰ নেতৃত্বত ভাৰতে দ্বিতীয়খন এদিনীয়াত দক্ষিণ আফ্ৰিকাক ৮ উইকেটত (ডি এল এছৰ পদ্ধতিত) পৰাস্ত কৰি তিনিখন মেচৰ শৃংখলাত ২-০ ব্যৱধানত অগ্ৰগতি লাভ কৰে ।

১৯ অনুৰ্ধ ভাৰতীয় দলৰ অধিনায়ক আয়ুষ মাহাত্ৰে আৰু সহ-অধিনায়ক বিহান মালহোত্ৰাৰ আঘাতৰ বাবে বৈভৱ সূৰ্যবংশীক এই শৃংখলাৰ বাবে দলৰ বাঘজৰী দিয়া হৈছিল । ইতিমধ্যে ইমান কম বয়সতে অধিনায়ক হৈ বৈভৱে বিশ্ব অভিলেখ গঢ়িছিল । এতিয়া এই শৃংখলা জয় কৰি তেওঁ নতুন ইতিহাসৰ সৃষ্টি কৰিছে । উল্লেখ্য যে, বতৰে দুয়োখন মেচতে বিধি-পথালি দিছিল যাৰ ফলত মেচ চুটি হৈছিল । অৱশ্যে দুয়োখনতেই ভাৰতীয় দলে জয়লাভ কৰে ।

অধিনায়ক বৈভৱৰ বেটিং বিক্ৰম-

প্ৰথমখন মেচত বৈভৱ সূৰ্যবংশী ব্যৰ্থ হোৱাৰ বিপৰীতে দ্বিতীয়খন মেচত যুৱ অধিনায়কগৰাকীয়ে প্ৰায় অকলেই দক্ষিণ আফ্ৰিকাৰ পৰাজয়ত অৰিহণা যোগায় । ভাৰতীয় দলক জয়ী হ’বলৈ ২৪৬ ৰানৰ প্ৰয়োজন হৈছিল যদিও টি-২০ ক্ৰিকেটৰ দৰে বিস্ফোৰক বেটিঙেৰে বৈভৱ সূৰ্যবংশীয়ে এই ৫০ অভাৰৰ মেচখনৰ প্ৰথম আঠ অভাৰতে দলটোক শক্তিশালী আৰম্ভণি দিয়ে । খেলপথাৰলৈ অহাৰ লগে লগে বৈভৱে ৬ৰ বৰষুণ নমাই ১৯টা বলত অৰ্ধশতক অৰ্জন কৰে । নৱম অভাৰৰ প্ৰথম বলত আউট হোৱাৰ পূৰ্বে বৈভৱে মাত্ৰ ২৪টা বলত ৬৮ ৰান সংগ্ৰহ কৰে, য’ত আছিল ১০টা ছয় আৰু এটা চাৰি ।

বৈভৱৰ উইকেটৰ পতনৰ সময়ত ভাৰতীয় দলৰ স্ক’ৰ আছিল ৯৫ । ইয়াৰ পিছতে অভিজ্ঞান কুণ্ডু (৪৮ নট আউট) আৰু বেদান্ত ত্ৰিবেদীয়ে (৩১ নট আউট) ভাৰতৰ ইনিংছৰ দায়িত্ব লয় । কিন্তু বেয়া বতৰৰ বাবে দুবাৰকৈ খেলখন স্থগিত ৰখাৰ ফলত ভাৰতীয় দলে ডি এল এছ নিয়মৰ অধীনত ২৭ অভাৰত ১৭৪ ৰানৰ লক্ষ্য লাভ কৰে । ২৪ অভাৰত অভিজ্ঞান আৰু বেদান্তই মেচখনত ভাৰতৰ জয় নিশ্চিত কৰে আৰু শৃংখলা দখল কৰে ।

ইয়াৰ পূৰ্বে ফাষ্ট বলাৰ কিষাণ সিঙে শক্তিশালী প্ৰদৰ্শনেৰে দক্ষিণ আফ্ৰিকাৰ বেটিং অৰ্ডাৰ ভাঙি পেলায় । দক্ষিণ আফ্ৰিকাই মাত্ৰ ৫৭ ৰানত শীৰ্ষ তিনিটা উইকেট হেৰুৱাইছিল, এই আটাইকেইটা উইকেট কিষানে দখল কৰে । চতুৰ্থ স্থানৰ বেটছমেন জেছন ৰ’লেছে (১১৪) এটা মূৰত ধৈৰ্য সহকাৰে খেলি দলটোক সন্মানজনক ২৪৫ ৰানলৈ লৈ যাবলৈ সক্ষম হয় । যুৱ বেটছমেনগৰাকীয়ে শতক অৰ্জন কৰি ১১৪ ৰানত আউট হয় । ৪৮ অভাৰত তেওঁৰ উইকেটো কিষান সিঙৰ হাতত পতন ঘটে । বলাৰগৰাকীয়ে ৮.৩ অভাৰত ৪/৪৬ত স্পেলৰ অন্ত পেলায় ।

লগতে পঢ়ক : ক্ৰিকেটাৰ মহম্মদ ছামীলৈ নিৰ্বাচন আয়োগৰ জাননী… ভাতৃৰ সৈতে শুনানিৰ বাবে চমন

১৫ জানুৱাৰীৰ পৰা জিম্বাবুৱে আৰু নামিবিয়াত অনুষ্ঠিত হ’বলগা ১৯ অনুৰ্ধ বিশ্বকাপৰ বাবে ভাৰতীয় দল ঘোষণা । ইয়াৰ পূৰ্বে দক্ষিণ আফ্ৰিকাৰ বিৰুদ্ধে অনুষ্ঠিত হ’ব লগা শৃংখলাৰ বাবেও ঘোষণা কৰা হৈছে দল ।

ভাৰতীয় ক্ৰিকেট নিয়ন্ত্ৰণ ব’ৰ্ডে শনিবাৰে ১৯ বছৰ অনুৰ্ধ বিশ্বকাপৰ বাবে ভাৰতীয় দল ঘোষণা কৰে । আয়ুষ মাহাত্ৰেক দলৰ অধিনায়ক হিচাপে দায়িত্ব দিয়াৰ বিপৰীতে বিহান মালহোত্ৰাক সহ-অধিনায়ক হিচাপে দায়িত্ব দিয়া হৈছে । বিস্ফোৰক বেটছমেন বৈভৱ সূৰ্যবংশীকো দলত অন্তৰ্ভুক্ত কৰা হৈছে । এই প্ৰতিযোগিতাৰ পূৰ্বে অহা বছৰৰ আৰম্ভণিতে তিনিখন মেচৰ এদিনীয়া শৃংখলাৰ বাবে দক্ষিণ আফ্ৰিকা ভ্ৰমণ কৰিব ভাৰতীয় দলে । ১৯ বছৰ অনুৰ্ধ বিশ্বকাপৰ বাবে নিৰ্বাচিত হোৱা একেটা দলেই এই ছিৰিজতো খেলিব ।

গ্ৰুপ বিত ভাৰত-

১৫ জানুৱাৰীৰ পৰা ৬ ফেব্ৰুৱাৰীলৈ জিম্বাবুৱে আৰু নামিবিয়াত অনুষ্ঠিত হ’ব ১৯ অনুৰ্ধ বিশ্বকাপ । ১৬টা দলক চাৰিটা গ্ৰুপত বিভক্ত কৰা হৈছে । পাঁচ বাৰৰ ১৯ বছৰ অনুৰ্ধ বিশ্বকাপ বিজয়ী ভাৰতক নিউজীলেণ্ড, আমেৰিকা, বাংলাদেশৰ সৈতে গ্ৰুপ বিত স্থান দিয়া হৈছে । ১৫ জানুৱাৰীত ভাৰতে আমেৰিকাৰ বিৰুদ্ধে অভিযান আৰম্ভ কৰিব । তাৰ পিছত ১৭ জানুৱাৰীত বাংলাদেশ আৰু ২৪ জানুৱাৰীত নিউজিলেণ্ডৰ বিৰুদ্ধে খেলিব ভাৰতীয় দলে । প্ৰতিযোগিতাৰ ফাইনেল খেল হাৰাৰেত অনুষ্ঠিত হ’ব ।

দক্ষিণ আফ্ৰিকা ভ্ৰমণৰ বাবে দলৰ অধিনায়ক বৈভৱ-

বিশ্বকাপৰ পূৰ্বে ভাৰতীয় তিনিখন মেচৰ এদিনীয়া শৃংখলাৰ বাবে দক্ষিণ আফ্ৰিকা ভ্ৰমণ কৰিব । ১৯ বছৰ অনুৰ্ধ এদিনীয়া বিশ্বকাপৰ পূৰ্বে ভাৰতৰ বাবে এই শৃংখলা অতি গুৰুত্বপূৰ্ণ । বিচিচিআইয়ে ঘোষণা কৰে যে আয়ুষ মাহাত্ৰে আৰু বিহান মালহোত্ৰাই এই শৃংখলাত নেখেলে । দুয়োগৰাকীয়ে আঘাতৰ সৈতে যুঁজি আছে । ফলস্বৰূপে ব’ৰ্ডে বৈভৱ সূৰ্য্যবংশীক অধিনায়ক আৰু এৰন জৰ্জক সহ-অধিনায়ক হিচাপে নিযুক্তি দিছে । ৩ জানুৱাৰী, ৫ জানুৱাৰী আৰু ৭ জানুৱাৰীত উইলোম’ৰ পাৰ্কত অনুষ্ঠিত হ’ব এই তিনিখন মেচ ।

দক্ষিণ আফ্ৰিকা ভ্ৰমণৰ বাবে ভাৰতীয় দল :

বৈভৱ সূৰ্য্যবংশী (অধিনায়ক), এৰন জৰ্জ (সহ-অধিনায়ক), বেদান্ত ত্ৰিবেদী, অভিজ্ঞান কুণ্ডু (উইকেটকীপাৰ), হৰবংশ সিং (উইকেটকীপাৰ), আৰ. এছ অম্বৰীশ, কনিষ্ক চৌহান, খিলান এ পেটেল, মহম্মদ আনন, হেনিল পেটেল, ডি দীপেশ, কিষাণ কুমাৰ সিং, উধৱ মোহন, যুৱৰাজ গোহিল, ৰাহুল কুমাৰ ।

১৯ বছৰ অনুৰ্ধৰ এদিনীয়া বিশ্বকাপৰ ভাৰতীয় দল :

আয়ুষ মাহত্ৰে (অধিনায়ক), বিহান মালহোত্ৰা (সহ-অধিনায়ক), বৈভৱ সূৰ্য্যবংশী, এৰন জৰ্জ, বেদান্ত ত্ৰিবেদী, অভিজ্ঞান কুণ্ডু (উইকেটকীপাৰ), হৰবংশ সিং (উইকেটকীপাৰ), আৰ. অম্বৰীশ, কনিষ্ক চৌহান, খিলান এ পেটেল, মহম্মদ এনান, হেনিল পেটেল, ডি দীপেশ, কিষাণ কুমাৰ সিং, উধৱ মোহন ।

লগতে পঢ়ক : চেম্পিয়নছ ট্ৰফী, এছিয়া কাপৰ পৰা আৰম্ভ কৰি ভাৰতৰ বিশ্বকাপ জয়লৈকে… ২০২৫ চনৰ ১০টা স্মৰণীয় ক্ৰিকেট মুহূৰ্ত

ৰাষ্ট্ৰীয় বাল পুৰস্কাৰৰেৰে সন্মানিত ক্ৰিকেট বিস্ময় বৈভৱ সূৰ্যবংশী ।ৰাষ্ট্ৰপতি মুৰ্মুৱে এই বঁটাৰে সন্মানিত কৰে তেওঁক ।

১৪ বছৰীয়া ক্ৰিকেটাৰ বৈভৱ সূৰ্য্যবংশীক প্ৰধানমন্ত্ৰীৰ ৰাষ্ট্ৰীয় বাল পুৰস্কাৰেৰে সন্মানিত কৰা হৈছে । ৰাষ্ট্ৰপতি দ্ৰৌপদী মুৰ্মুৱে শুকুৰবাৰে সূৰ্যবংশীক এই বঁটা প্ৰদান কৰে । অনুষ্ঠানৰ পিছতে বৈভৱে প্ৰধানমন্ত্ৰী নৰেন্দ্ৰ মোদীক সাক্ষাৎ কৰে । প্ৰধানমন্ত্ৰীগৰাকীয়ে বৈভৱক প্ৰশংসা কৰে । এই বঁটা পাঁচৰ পৰা ১৮ বছৰৰ ভিতৰৰ শিশুক দিয়া হয় আৰু এই বয়সৰ শিশু তথা কিশোৰৰ বাবে ই সৰ্বোচ্চ অসামৰিক সন্মান ।

ক্ৰীড়া শাখাত বৈভৱক প্ৰদান কৰা হয় এই বঁটা-

সাহস, কলা আৰু সংস্কৃতি, পৰিৱেশ, উদ্ভাৱন, বিজ্ঞান আৰু প্ৰযুক্তি, সমাজ সেৱা, ক্ৰীড়া আদি বিভিন্ন শাখাত অসাধাৰণ কৃতিত্বৰ বাবে বছৰি এই বঁটা প্ৰদান কৰা হয় । ক্ৰীড়া শাখাত বৈভৱ সূৰ্যবংশীক এই বঁটা প্ৰদান কৰা হয় । ১৫ জানুৱাৰীৰ পৰা আৰম্ভ হ’বলগীয়া ১৯ বছৰ অনুৰ্ধ বিশ্বকাপৰ বাবে প্ৰস্তুতি চলোৱাৰ সময়তে বাওঁহতীয়া বেটছমেন বৈভৱ সূৰ্যবংশীয়ে ভাৰতীয় ১৯ বছৰ অনুৰ্ধৰ বাকী দলৰ সৈতে যোগদান কৰি জিম্বাবুৱেলৈ ৰাওনা হোৱাৰ সম্ভাৱনা আছে ।

নিজৰ প্ৰদৰ্শনেৰে আপ্লুত কৰিছে বৈভৱে-

শেহতীয়াকৈ বৈভৱ সূৰ্যবংশীয়ে ক্ৰিকেট জগতৰ দৃষ্টি আকৰ্ষণ কৰিছিল যেতিয়া তেওঁ লিষ্ট এ ক্ৰিকেটত শতক অৰ্জন কৰা আটাইতকৈ কম বয়সীয়া বেটছমেন হিচাপে পৰিগণিত হয় । বিজয় হাজাৰে ট্ৰফীৰ এখন খেলত তেওঁ মাত্ৰ ৮৪টা বলত ১৯০ ৰানৰ বিস্ফোৰক ইনিংছ খেলে । ১৫টা ছয় কোবাই মাত্ৰ ৩৬টা বলতে শতক অৰ্জন কৰে বৈভৱে । তেওঁৰ ইনিংছে বলাৰসকলক সম্পূৰ্ণৰূপে বিমোৰত পেলাইছিল ।

এছিয়া কাপৰ বাবে ভাৰতীয় ১৯ বছৰ অনুৰ্ধ দলৰ অংশ আছিল বৈভৱ-

শেহতীয়াকৈ সমাপ্ত হোৱা ১৯ বছৰ অনুৰ্ধ এছিয়া কাপৰ ফাইনেলত পাকিস্তানৰ বিৰুদ্ধে মেচখনৰ অংশ আছিল বৈভৱ সূৰ্য্যবংশী । ১০টা বলত ২৬ ৰানত আউট হয় তেওঁ । অৱশ্যে এই হতাশা অতিক্ৰম কৰি তেওঁ বিজয় হাজাৰে ট্ৰফীত জিলিকি উঠিল । তালিকা এ ক্ৰিকেটত ভাৰতৰ হৈ চতুৰ্থ দ্ৰুততম শতক অৰ্জন কৰে বৈভৱ সূৰ্যবংশীয়ে ।

লগতে পঢ়ক : ২০২৫ বৰ্ষত আন্তঃৰাষ্ট্ৰীয় ক্ৰিকেটত এইসকল বেটছমেনে বিস্তাৰ কৰিলে আধিপত্য…