শ্বাহে দাবী কৰে যে বিজেপিয়ে ইতিমধ্যে অনুপ্ৰৱেশকাৰীসকলক চিনাক্ত কৰিছে আৰু তেওঁলোকৰ বিৰুদ্ধে কঠোৰ ব্যৱস্থা গ্ৰহণৰ প্ৰতিশ্ৰুতি দিছে

বিধানসভা নিৰ্বাচনৰ বাবে আজি নিৰ্বাচনী প্ৰচাৰৰ অন্তিম দিন । মঙলবাৰে পাথাৰকান্দিত এক নিৰ্বাচনী প্ৰচাৰ সভাত অংশ লয় কেন্দ্ৰীয় গৃহমন্ত্ৰী অমিত শ্বাহে । সভাত ভাষণ প্ৰদান কৰি অমিত শ্বাহে কংগ্ৰেছক তীব্ৰ আক্ৰমণ কৰে । তেওঁ কয় যে ভাৰতীয় জনতা পাৰ্টিয়ে অসমক “অনুপ্ৰৱেশকাৰী শাসিত অঞ্চল” হ’বলৈ নিদিয়ে আৰু আগন্তুক বিধানসভা নিৰ্বাচনত বিজেপি চৰকাৰ নিৰ্বাচিত কৰিবলৈ ভোটাৰসকলক আহ্বান জনায় ।

বিৰোধীয়ে ভোট বেংকৰ ৰাজনীতি কৰা বুলি অভিযোগ উত্থাপন কৰি কংগ্ৰেছ নেতা ৰাহুল গান্ধীক লক্ষ্য কৰি শ্বাহে কয়, “মই আজি ইয়াৰ পৰাই ঘোষণা কৰিছো, ৰাহুল বাবা, কথাটো স্পষ্টকৈ শুনি লওক, আমি অসমক অনুপ্ৰৱেশকাৰীৰ অধিকৃত অঞ্চল হ’বলৈ নিদিও ।” শ্বাহে দাবী কৰে যে বিজেপিয়ে ইতিমধ্যে অনুপ্ৰৱেশকাৰীসকলক চিনাক্ত কৰিছে আৰু তেওঁলোকৰ বিৰুদ্ধে কঠোৰ ব্যৱস্থা গ্ৰহণৰ প্ৰতিশ্ৰুতি দিছে । তেওঁ কয়, “বিজেপি চৰকাৰ নিৰ্বাচিত কৰক । আমি ইতিমধ্যে অনুপ্ৰৱেশকাৰীসকলক চিনাক্ত কৰিছো । এতিয়া তেওঁলোকক এজন এজনকৈ উচ্ছেদ কৰাৰ সময় আহি পৰিছে ।” তেওঁ লগতে কয় যে যদি অসম, পশ্চিমবংগ আৰু ত্ৰিপুৰাত বিজেপি নেতৃত্বাধীন চৰকাৰ থাকে, তেন্তে অনুপ্ৰৱেশ সম্পূৰ্ণৰূপে বন্ধ হ’ব ।

দলটোৰ সাংস্কৃতিক কাৰ্যসূচীৰ ওপৰত আলোকপাত কৰি শ্বাহে কয়, “কেৱল বিজেপিৰহে কৰিমগঞ্জক ‘শ্ৰীভূমি’ হিচাপে নামকৰণ কৰাৰ সংকল্প আছে ।” ইয়াৰ বিপৰীতে ৰাজনৈতিক ক্ষমতা লাভৰ বাবে কংগ্ৰেছে অনুপ্ৰৱেশকাৰীৰ ওপৰত নিৰ্ভৰ কৰা বুলি তেওঁ সমালোচনা কৰে । ৰাহুল গান্ধীক কটাক্ষ কৰি শ্বাহে আঞ্চলিক আৱেগৰ প্ৰতি তেওঁৰ বুজাপৰাক লৈ প্ৰশ্ন উত্থাপন কৰে । তেওঁ কয়, “যিসকলৰ শিপা ইটালীত আছে, তেওঁলোকে কেনেকৈ ‘শ্ৰীভূমি’ৰ গুৰুত্ব বুজি পাব ?”

কেন্দ্ৰীয় চৰকাৰৰ পদক্ষেপসমূহৰ কথা উল্লেখ কৰি শ্বাহে অসমীয়া আৰু বাংলা ভাষাক ধ্ৰুপদী ভাষাৰ মৰ্যাদা দিয়াৰ বাবে প্ৰধানমন্ত্ৰী নৰেন্দ্ৰ মোদীক কৃতিত্ব দিয়ে । তেওঁ নাগৰিকত্ব সংশোধনী আইনৰ সমৰ্থন কৰি কংগ্ৰেছে ৰাজনৈতিক লাভৰ বাবে ইয়াৰ বিৰোধিতা কৰা বুলি অভিযোগ কৰে । শ্বাহে অভিযোগ কৰে, “যেতিয়াই আমি CAAৰ কথা কওঁ, কংগ্ৰেছে ইয়াৰ বিৰোধিতা কৰে । এক ষড়যন্ত্ৰৰ জৰিয়তে তেওঁলোকে এই অঞ্চলটোক অনুপ্ৰৱেশকাৰী শাসিত অঞ্চললৈ ৰূপান্তৰিত কৰিবলৈ চেষ্টা কৰিছিল । তেওঁলোকে ১৯৫০ চনৰ অনুপ্ৰৱেশকাৰী (অসমৰ পৰা বহিষ্কাৰ) আইন বাতিল কৰিছিল আৰু পিছলৈ ১৯৮৩ চনত অনুপ্ৰৱেশকাৰীসকলক আশ্ৰয় দিবলৈ আইএমডিটি আইন প্ৰৱৰ্তন কৰিছিল ।”

তেওঁ আৰু কয় যে অসম আৰু চুবুৰীয়া ৰাজ্যসমূহৰ বিজেপি নেতৃত্বাধীন চৰকাৰসমূহে অনুপ্ৰৱেশ ৰোধ কৰিবলৈ সমন্বিত পদক্ষেপ গ্ৰহণ কৰিব । তেওঁ দৃঢ়তাৰে কয়, “যেতিয়াই অসম, বংগ আৰু ত্ৰিপুৰাত বিজেপি-এনডিএ চৰকাৰ গঠন হ’ব, অনুপ্ৰৱেশ বন্ধ হ’ব । আমি পদ্ধতিগতভাৱে প্ৰতিজন অনুপ্ৰৱেশকাৰীক চিনাক্ত কৰি বহিষ্কাৰ কৰিম ।” তেওঁ লগতে কয় যে এনে উপাদানবোৰে থলুৱা লোকৰ চাকৰি, ৰেচন আৰু জীৱিকাৰ প্ৰতি ভাবুকি কঢ়িয়াই আনে ।

লগতে পঢ়ক : বটদ্ৰৱালৈ আহি গীতা চুই শপত খাবলৈ গৌৰৱ গগৈক প্ৰত্যাহ্বান মুখ্যমন্ত্ৰীৰ

প্ৰধানমন্ত্ৰী নৰেন্দ্ৰ মোদীয়ে অভিযোগ কৰে যে কংগ্ৰেছ দলটোৱে কেৱল নিজৰ স্বাৰ্থৰহে চিন্তা কৰে আৰু তেওঁলোকৰ চৰকাৰৰ দিনত অসমক উন্নয়নৰ পৰা বঞ্চিত কৰিছিল

কংগ্ৰেছক তীব্ৰ সমালোচনা কৰি সোমবাৰে প্ৰধানমন্ত্ৰী নৰেন্দ্ৰ মোদীয়ে অভিযোগ উত্থাপন কৰে যে দলটোৱে কেৱল নিজৰ স্বাৰ্থৰহে চিন্তা কৰে আৰু তেওঁলোকৰ চৰকাৰৰ দিনত অসমক উন্নয়নৰ পৰা বঞ্চিত কৰিছিল । বিজেপি প্ৰাৰ্থী শিলাদিত্য দেৱৰ সমৰ্থনত হোজাইত এক নিৰ্বাচনী জনসভাক সম্বোধন কৰি প্ৰধানমন্ত্ৰী মোদীয়ে কংগ্ৰেছক দলক তীক্ষ্ণ সমালোচনা কৰে । লগতে জিলাখনত বিদ্যুৎ যোগান অক্ষুণ্ণ ৰখাৰ ক্ষেত্ৰত এনডিএ চৰকাৰৰ প্ৰচেষ্টাক প্ৰশংসা কৰে তেওঁ ।

অসমক বিদ্যুতৰ ক্ষেত্ৰত এখন আৰ্হি ৰাজ্য হিচাপে অভিহিত কৰি তেওঁ উল্লেখ কৰে যে কেন্দ্ৰীয় চৰকাৰে ‘প্ৰধানমন্ত্ৰী সূৰ্য ঘৰ মুফ্ট যোজনা’ৰ অধীনত সৌৰ পেনেল স্থাপনৰ বাবে ৭০,০০০ ৰ পৰা ৮০,০০০ টকা পৰ্যন্ত সাহায্য প্ৰদান কৰিছে । হোজাইৰ পৌৰ সমস্যাসমূহৰ কথা উল্লেখ কৰাৰ লগতে প্ৰধানমন্ত্ৰী মোদীয়ে কংগ্ৰেছক “পৰিয়াল প্ৰথম” নীতি গ্ৰহণ কৰাৰ বাবেও সমালোচনা কৰে ।

২০২৬ৰ অসম বিধানসভা নিৰ্বাচনত এনডিএৰ বিজয় সন্দৰ্ভত আস্থা প্ৰকাশ কৰি প্ৰধানমন্ত্ৰীয়ে কয়, “হোজাই হওক বা পূব অথবা পশ্চিম কাৰ্বি আংলঙেই হওক, আপোনালোক প্ৰতিটো অঞ্চলৰ পৰাই ব্যাপক উৎসাহেৰে ইয়াত উপস্থিত হৈছে । এই পৰিৱেশে প্ৰমাণ কৰে যে অসমে বিজেপি-এনডিএক এক বৃহৎ বিজয় উপহাৰ দিয়াৰ সিদ্ধান্ত লৈছে । প্ৰতিটো অঞ্চলৰ উন্নয়ন এনডিএৰ বাবে অগ্ৰাধিকাৰ । সেইবাবেই আমাৰ চৰকাৰে আৰম্ভণিতেই হোজাইক সুকীয়া জিলা হিচাপে ঘোষণা কৰিছিল । কিন্তু কংগ্ৰেছে অসমক সমস্যাত পেলাই থৈছিল আৰু উন্নয়নৰ পৰা বঞ্চিত কৰিছিল । যেতিয়ালৈকে কংগ্ৰেছ অসমত ক্ষমতাত আছিল, তেওঁলোকে কেৱল নিজৰ স্বাৰ্থৰ কথাহে চিন্তা কৰিছিল ।”

তেওঁ লগতে কয়, “এফালে বিজেপি আৰু এনডিএৰ ডাবল ইঞ্জিন চৰকাৰে অসমৰ প্ৰতিটো পৰিয়ালৰ জীৱন উন্নত কৰিবলৈ কাম কৰি আছে, আনফালে কংগ্ৰেছ কেৱল দুটা পৰিয়ালৰ ভৱিষ্যত গঢ়াত ব্যস্ত । এটা পৰিয়াল হৈছে দিল্লীত থকা ৰাজ পৰিয়াল আৰু আনটো অসমৰ এক পৰিয়াল । তেওঁলোকৰ শ্লোগান হৈছে ‘পৰিয়াল প্ৰথম’ ।”

কংগ্ৰেছে কেৱল “মিছা আৰু দুৰ্নীতি”ৰ ওপৰত গুৰুত্ব দিয়ে বুলি অভিযোগ তুলি তেওঁ গান্ধী পৰিয়ালক “আটাইতকৈ দুৰ্নীতিপৰায়ণ পৰিয়াল” বুলি অভিহিত কৰে । মোদীয়ে কয়, “পৰিয়ালকেন্দ্ৰিক ৰাজনীতিৰ বাহিৰে তেওঁলোকৰ কোনো শক্তি নাই । সেইবাবেই তেওঁলোকে দুটা কথাৰ ওপৰত গুৰুত্ব দিয়ে— মিছা কথা আৰু দুৰ্নীতি । দিল্লীত থকা তেওঁলোকৰ ৰাজকীয় পৰিয়ালটো আটাইতকৈ দুৰ্নীতিগ্ৰস্ত পৰিয়াল । তেওঁলোকৰ বিৰুদ্ধে হাজাৰ হাজাৰ কোটি টকাৰ দুৰ্নীতিৰ গোচৰ চলি আছে । পৰিয়ালটো জামিনত বাহিৰত আছে ।”

উল্লেখ্য যে, হোজাইত বিজেপিৰ শিলাদিত্য দেৱৰ হৈ আজি নিৰ্বাচনী প্ৰচাৰ চলায় প্ৰধানমন্ত্ৰীগৰাকীয়ে । এই আসনখন বৰ্তমান বিজেপি বিধায়ক ৰামকৃষ্ণ ঘোষৰ দখলত আছে ।

লগতে পঢ়ক : কংগ্ৰেছে অনুপ্ৰৱেশকাৰীক সুৰক্ষা দি খিলঞ্জীয়াক বিপদত পেলাইছে : বৰপেটাৰ পৰা প্ৰধানমন্ত্ৰী মোদীৰ গৰ্জন