ফিফা বিশ্বকাপৰ ইতিহাসত লিঅ’নেল মেছিৰ মহাকাব্যিক অভিলেখ
বিশ্বকাপৰ এখন গুৰুত্বপূৰ্ণ মেচত অ’ষ্ট্ৰিয়াৰ বিৰুদ্ধে চমৎকাৰ প্ৰদৰ্শন কৰি মেছিয়ে বিশ্বকাপ ইতিহাসৰ আটাইতকৈ ডাঙৰ ৰেকৰ্ড নিজৰ নামত কৰে
ফুটবল বিশ্বৰ সৰ্বকালৰ অন্যতম শ্ৰেষ্ঠ খেলুৱৈ লিঅ’নেল মেছিয়ে পুনৰ এবাৰ প্ৰমাণ কৰিলে যে কিয় তেওঁক ফুটবলৰ যাদুকৰ বুলি কোৱা হয় । ডালাছত অনুষ্ঠিত হোৱা বিশ্বকাপৰ এখন গুৰুত্বপূৰ্ণ মেচত অ’ষ্ট্ৰিয়াৰ বিৰুদ্ধে চমৎকাৰ প্ৰদৰ্শন কৰি মেছিয়ে বিশ্বকাপ ইতিহাসৰ আটাইতকৈ ডাঙৰ ৰেকৰ্ড নিজৰ নামত কৰে । মেচখনত আৰ্জেণ্টিনাৰ অধিনায়কগৰাকীয়ে দুটাকৈ গ’ল কৰি জাৰ্মানীৰ প্ৰাক্তন তাৰকা মিৰ’শ্লাভ ক্ল’ছাক পিছ পেলাই বিশ্বকাপৰ ইতিহাসত সৰ্বাধিক গ’ল কৰা একমাত্ৰ খেলুৱৈ হিচাপে পৰিগণিত হয় ।
মেছিৰ এই অনবদ্য প্ৰদৰ্শনৰ সহায়ত আৰ্জেণ্টিনাই অ’ষ্ট্ৰিয়াক ২-০ ব্যৱধানত পৰাস্ত কৰি কোনো মেচত পৰাজিত নোহোৱাকৈয়ে বিশ্বকাপৰ নকআউট ৰাউণ্ডত প্ৰৱেশ কৰে ।
পেনাল্টী মিছৰ পিছত মেছিৰ মেজিক
খেলৰ আৰম্ভণি অৱশ্যে আৰ্জেণ্টিনা আৰু মেছিৰ বাবে বৰ সুখকৰ নাছিল । মেচৰ প্ৰথম ভাগতেই লাউটাৰ’ মাৰ্টিনেশ্যক বক্সৰ ভিতৰত ফাউল কৰাৰ বাবে আৰ্জেণ্টিনাই এটা পেনাল্টী লাভ কৰিছিল । ষ্টেডিয়ামত উপস্থিত ৭০ হাজাৰতকৈও অধিক দৰ্শকে ভাবিছিল যে মেছিয়ে পেনাল্টীৰ জৰিয়তেই ইতিহাস সৃষ্টি কৰিব, কিন্তু মেছিৰ কিকটো গ’ল প’ষ্টৰ সোঁফালেদি বাহিৰলৈ গুচি যায় । মেছিৰ এই পেনাল্টী মিছত অ’ষ্ট্ৰিয়াৰ শিবিৰে সকাহ পাই যদিও আৰ্জেণ্টিনাৰ অনুৰাগীসকল কিছু নিৰাশ হয় ।
কিন্তু মেছিৰ দৰে মহান খেলুৱৈক এটা পেনাল্টী মিছে বেছি সময় ধৰি ৰাখিব নোৱাৰে । হাফ টাইম শেষ হোৱাৰ ঠিক আগে আগে মেছিয়ে ডি-বক্সৰ কাষৰ পৰা বল লৈ অ’ষ্ট্ৰিয়াৰ ডিফেণ্ডাৰক ফাকি দি এটা সুন্দৰ গ’লেৰে দলক ১-০ ত আগুৱাই নিয়ে । এইটো আছিল মেছিৰ ১৭ নম্বৰ বিশ্বকাপ গ’ল, যাৰ লগে লগে তেওঁ ক্ল’ছাক অতিক্ৰম কৰি বিশ্ব ৰেকৰ্ড গঢ়ে ।
জাষ্ট ফণ্টেইন আৰু জাইৰাজিনহোৰ ক্লাবত মেছি
এই ঐতিহাসিক গ’লটোৰ সৈতে মেছিয়ে আন এক অনন্য অভিলেখো স্পৰ্শ কৰে । তেওঁ বিশ্বকাপৰ একেৰাহে ছয়খন মেচত গ’ল কৰা ইতিহাসৰ মাত্ৰ তৃতীয়গৰাকী খেলুৱৈ হৈ পৰে । ইয়াৰ পূৰ্বে ফ্ৰান্সৰ জাষ্ট ফণ্টেইন আৰু ব্ৰাজিলৰ জাইৰাজিনহোৱেহে এই কৃতিত্ব অৰ্জন কৰিবলৈ সক্ষম হৈছিল ।
ষ্টপেজ টাইমত ১৮ নম্বৰ বিশ্বকাপ গ’ল
হাফ টাইমৰ পিছত অ’ষ্ট্ৰিয়াই ছাবিটজাৰ আৰু মাৰ্কো আৰ্নাউটোভিচৰ আক্ৰমণৰ সহায়ত প্ৰত্যাৱৰ্তনৰ চেষ্টা চলাইছিল যদিও আৰ্জেণ্টিনাৰ গ’লৰক্ষক এমিলিয়ানো মাৰ্টিনেশ্যৰ সজাগতাৰ বাবে তেওঁলোক সফল হ’ব নোৱাৰিলে । মেচৰ একেবাৰে শেষ মুহূৰ্তত অৰ্থাৎ ষ্টপেজ টাইমত মেছিয়ে সুযোগৰ সদ্ব্যৱহাৰ কৰি নিজৰ দ্বিতীয়টো আৰু বিশ্বকাপ কেৰিয়াৰৰ ১৮ নম্বৰটো গ’ল কৰে । চলিত টুৰ্নামেণ্টত এয়া মেছিৰ পঞ্চমটো গ’ল ।
নকআউটত ডিফেণ্ডিং চেম্পিয়ন আৰ্জেণ্টিনা
গ্ৰুপ ‘জে’ত একেৰাহে দ্বিতীয়টো জয়ৰ সৈতে ডিফেণ্ডিং চেম্পিয়ন আৰ্জেণ্টিনাই নকআউট পৰ্যায় সুনিশ্চিত কৰিলে । এই জয়ে প্ৰমাণ কৰিলে যে আৰ্জেণ্টিনা এইবাৰো বিশ্বকাপ জয়ৰ আটাইতকৈ ডাঙৰ দাবীদাৰ । গ্ৰুপ পৰ্যায়ৰ শেষৰখন খেলত অহা ২৭ জুনত জৰ্ডানৰ বিৰুদ্ধে অৱতীৰ্ণ হ’ব আৰ্জেণ্টিনা ।
লগতে পঢ়ক : বিশ্বকাপৰ ড্ৰেছিং ৰুমত ইৰান ফুটবল দলৰ আৱেগিক বাৰ্তা; চকু সেমেকিল বিশ্ববাসীৰ!