ঘৰুৱা দৰ্শকৰ সন্মুখতে বেলজিয়ামৰ হাতত নিৰ্লজ্জ পৰাজয়ৰ সন্মুখীন হৈ বিশ্বকাপৰ পৰা বাহিৰ হ’ল অহংকাৰী আমেৰিকাৰ । খেলপথাৰতে খঙত টিঙিৰিতুলা হৈ পৰিল প্ৰশিক্ষক পচেটিনো ।

ফীফা ৱৰ্ল্ড কাপ ২০২৬-ৰ সহ-আয়োজক দল ইউনাইটেড ষ্টেটছ অব আমেৰিকা (USA)-ৰ যাত্ৰা অত্যন্ত হতাশাজনকভাৱে সমাপ্ত হ’ল । মঙলবাৰে ছিয়েটলৰ ছিয়েটল ষ্টেডিয়ামত অনুষ্ঠিত ৰাউণ্ড অৱ ১৬-ৰ এখন হাই-ভল্টেজ খেলত বেলজিয়ামে ঘৰুৱা দল আমেৰিকাক ৪-১ ব্যৱধানত ধূলিসাৎ কৰে । এই বৃহৎ পৰাজয়ৰ লগে লগে ঘৰুৱা দৰ্শকৰ সন্মুখত বিশ্বকাপৰ খিতাপ অৰ্জন কৰাৰ ইউএছএ-ৰ সপোন ভাঙি চুৰমাৰ হয় ।

বেলজিয়ামৰ এই ঐতিহাসিক বিজয়ৰ মূল নায়ক আছিল তাৰকা খেলুৱৈ চাৰ্লছ ডি কেটেলেৰে । তেওঁ আমেৰিকাৰ দুৰ্বল ডিফেঞ্চৰ সম্পূৰ্ণ সুযোগ গ্ৰহণ কৰি নিজেই দুটাকৈ গ’ল কৰাৰ লগতে আন এটা গ’ল কৰাত গুৰুত্বপূৰ্ণ সহায় কৰে ।

এই অনবদ্য বিজয়ৰ সৈতে বেলজিয়ামে কোৱাৰ্টাৰ ফাইনেলত নিজৰ স্থান সুৰক্ষিত কৰিলে, য’ত অহা শনিবাৰে কেলিফৰ্ণিয়াৰ ইংলউডত তেওঁলোকৰ মুখামুখি হ’ব শক্তিশালী স্পেইন ।

খঙত অগ্নিশৰ্মা আমেৰিকাৰ প্ৰশিক্ষক

নিজৰ দলৰ অতি নিম্নমানৰ প্ৰদৰ্শন আৰু খেলুৱৈসকলৰ ধাৰাবাহিক ভুলৰ বাবে আমেৰিকাৰ মুখ্য প্ৰশিক্ষক মৌৰিচিঅ’ পচেটিনো খেলপথাৰতে খঙত অগ্নিশৰ্মা হৈ পৰে । আমেৰিকান দলে গ’ল খোৱাৰ পিছত পচেটিনোৱে খঙৰ ভমকত ডাগআউটৰ বেঞ্চৰ সন্মুখত থকা এটা ৰেকত প্ৰচণ্ড জোৰেৰে গোৰ মাৰি দিয়ে, যাৰ ফলত তাত থকা পানীৰ বটলসমূহ উফৰি যায় । তেওঁৰ এই ক্ৰোধে স্পষ্টকৈ বুজাই দিছিল যে তেওঁ আমেৰিকান ডিফেণ্ডাৰসকলৰ প্ৰদৰ্শনক লৈ কিমান হতাশ আছিল ।

ঘৰুৱা মাটিত আমেৰিকাৰ প্ৰতিৰক্ষাৰ ডাঙৰ ব্যৰ্থতা

এই গুৰুত্বপূৰ্ণ মেচখনৰ বাবে তাৰকা ফৰৱাৰ্ড ফলাৰিন বালোগুনৰ প্ৰত্যাৱৰ্তনে আমেৰিকান দলটোক এক ডাঙৰ সকাহ দিছিল । ৰেড কাৰ্ডৰ বাবে বালোগুনক নিষিদ্ধ কৰা হৈছিল যদিও ফীফাই এক বিতৰ্কিত সিদ্ধান্তৰ জৰিয়তে তেওঁৰ নিলম্বন প্ৰত্যাহাৰ কৰিছিল । কিন্তু তাৰ পিছতো আমেৰিকাই ঘৰুৱা মাটিত আশা অনুসৰি খেল প্ৰদৰ্শন কৰিব নোৱাৰিলে ।

প্ৰথম অৰ্ধত আমেৰিকাৰ ৰক্ষনৰ ভুলৰ বাবেই বেলজিয়ামে দুটা গ’ল কৰাৰ সুযোগ পায় । ইয়াৰ পিছত দ্বিতীয় অৰ্ধৰ আৰম্ভণিতে আমেৰিকান গ’লৰক্ষক মেট ফ্ৰীজৰ এটা ডাঙৰ ভুলে ইউএছএ-ৰ প্ৰত্যাৱৰ্তনৰ সকলো আশা নোহোৱা কৰি পেলায় ।

খেলখনত মালিক টিলমেনে প্ৰথম অৰ্ধৰ মাজভাগত এটা অনবদ্য ফ্ৰী-কিকৰ সহায়ত গ’ল কৰি স্ক’ৰ ১-১ কৰিছিল । চলিত বিশ্বকাপত ফ্ৰী-কিকৰ পৰা এয়া তেওঁৰ দ্বিতীয়টো গ’ল আছিল । অৱশ্যে আমেৰিকান খেলুৱৈ আৰু দৰ্শকৰ এই আনন্দ বেছি পৰলৈ স্থায়ী নহ’ল । খেল পুনৰ আৰম্ভ হোৱাৰ মাত্ৰ ৬১ ছেকেণ্ডৰ ভিতৰতে বেলজিয়ামে আন এটা গ’ল দি পুনৰ অগ্ৰগতি লাভ কৰে । এই আকস্মিক গ’লটোৱে আমেৰিকাক মানসিকভাৱে ভাঙি পেলায় আৰু ইয়াৰ পিছত তেওঁলোক মেচলৈ ঘূৰি অহাত ব্যৰ্থ হয় ।

লগতে পঢ়ক : ২০২৬ বিশ্বকাপৰ আটাইতকৈ ডাঙৰ বিতৰ্ক! ট্ৰাম্পৰ হস্তক্ষেপত সলনি হ’ল ফিফাৰ নিয়ম?

ফিফা বিশ্বকাপ: স্পেইনৰ বিৰুদ্ধে গুৰুত্বপূৰ্ণ মেচৰ পূৰ্বে ক্ৰিষ্টিয়ানো ৰোনাল্ডোলৈ মাতৃৰ আৱেগিক বাৰ্তা

ফুটবল বিশ্বৰ সৰ্বকালৰ অন্যতম শ্ৰেষ্ঠ খেলুৱৈ ক্ৰিষ্টিয়ানো ৰোনাল্ডো এতিয়া ব্যস্ত তেওঁৰ কেৰিয়াৰৰ সম্ভৱতঃ অন্তিমখন ফিফা বিশ্বকাপত । ৰাউণ্ড অৱ ১৬-ৰ এক হাই-ভল্টেজ মেচত পৰ্তুগাল মুখামুখি হ’ব শক্তিশালী স্পেইনৰ । এই অগ্নিপৰীক্ষাৰ ঠিক পূৰ্বে পৰ্তুগীজ তাৰকাগৰাকীয়ে লাভ কৰিছে এক বিশেষ মৰম আৰু আশীৰ্বাদ । ৰোনাল্ডোৰ মাতৃ মাৰিয়াই ছচিয়েল মিডিয়াৰ জৰিয়তে পুত্ৰ তথা সমগ্ৰ দলটোলৈ এক হৃদয়স্পৰ্শী বাৰ্তা প্ৰেৰণ কৰিছে ।

মাৰিয়াই তেওঁৰ অফিচিয়েল ইনষ্টাগ্ৰাম হেণ্ডেলত পৰ্তুগাল দলটোক উৎসাহিত কৰি লিখিছে, “আমাৰ ৰাষ্ট্ৰীয় দলটোলৈ শুভকামনা, আমি সকলোৱে একেলগে আছোঁ ।” মাতৃৰ এই বাৰ্তাই এতিয়া অনুৰাগীসকলৰ মাজতো ব্যাপক চৰ্চা লাভ কৰিছে ।

ক্ৰোৱেছিয়াক পৰাস্ত কৰি ৰাউণ্ড অৱ ১৬ ত পৰ্তুগাল

ৰাউণ্ড অৱ ৩২-ৰ এখন অত্যন্ত ৰোমাঞ্চকৰ খেলত ক্ৰোৱেছিয়াক ২-১ ব্যৱধানত পৰাস্ত কৰি পৰ্তুগালে এই পৰ্যায়ত প্ৰৱেশ কৰিছে । মেচখনৰ একেবাৰে শেষ মুহূৰ্তত অৰ্থাৎ ইনজুৰী টাইমত যুৱ তাৰকা গনচালো ৰামোছে এটা দৰ্শনীয় বিজয়সূচক গ’ল দি দলৰ বিশ্বকাপৰ খিতাপ অৰ্জনৰ আশা সজীৱ ৰাখে ।

কোচ ৰবাৰ্টো মাৰ্টিনেজৰ তত্ত্বাৱধানত থকা পৰ্তুগাল দলে এইবাৰ ইতিহাস ৰচনা কৰাৰ লক্ষ্য লৈছে । দেশৰ ফুটবল ইতিহাসত প্ৰথমবাৰৰ বাবে একেৰাহে দ্বিতীয়বাৰ বিশ্বকাপৰ কোৱাৰ্টাৰ ফাইনেলত প্ৰৱেশ কৰিবলৈ সাজু হৈছে দলটো । অৱশ্যে পৰিসংখ্যা অনুসৰি, ২০০৬ চনৰ পিছত পৰ্তুগালে বিশ্বকাপৰ নকআউট পৰ্যায়ত একেৰাহে দুখন মেচত জয়লাভ কৰিব পৰা নাই ।

সন্মুখত শক্তিশালী স্পেইনৰ প্ৰত্যাহ্বান

পৰ্তুগালৰ কোৱাৰ্টাৰ ফাইনেলৰ পথত আটাইতকৈ ডাঙৰ প্ৰাচীৰ হৈ থিয় দিছে লুইচ ডি লা ফুয়েন্টেৰ স্পেইন দল । সমগ্ৰ প্ৰতিযোগিতাতে স্পেইনে অত্যন্ত আক্ৰমণাত্মক আৰু দমনীয় ফুটবল খেলিছে । ৰাউণ্ড অৱ ১৬ ত প্ৰৱেশ কৰাৰ পূৰ্বে তেওঁলোকে অষ্ট্ৰিয়াক ৩-০ ব্যৱধানত ধূলিস্যাৎ কৰিছিল ।

এই মেচখনত স্পেইনে এক অনন্য ৰেকৰ্ডো গঢ়িছে । ২০১৪ চনৰ বিশ্বকাপ ফাইনেলত জাৰ্মানীৰ পিছত স্পেইন এনে প্ৰথমটো দল হৈ পৰিছে, যিয়ে নকআউট মেচত প্ৰতিপক্ষক এটা শ্বটো টাৰ্গেটত ল’বলৈ দিয়া নাই ।

২০১৮ চনৰ ৰাছিয়া বিশ্বকাপত এই দুই চিৰবৈৰী দল অন্তিমবাৰৰ বাবে মুখামুখি হৈছিল । সেই ঐতিহাসিক মেচখনত ক্ৰিষ্টিয়ানো ৰোনাল্ডোৱে এটা স্মৰণীয় হেট্ৰিক অৰ্জন কৰি খেলখন ৩-৩ গ’লত ড্ৰ’ কৰিবলৈ সক্ষম হৈছিল ।

এতিয়া সমগ্ৰ বিশ্বৰ চকু থাকিব ক্ৰিষ্টিয়ানো ৰোনাল্ডোৰ ওপৰত । অনুৰাগীসকলে আশা কৰিছে যে তেওঁলোকৰ কিংবদন্তি অধিনায়কজনে পুনৰ এবাৰ জিলিকি উঠিব আৰু দলক কোৱাৰ্টাৰ ফাইনেললৈ লৈ গৈ নিজৰ বিদায়ী বিশ্বকাপৰ যাত্ৰা আৰু অলপ দীঘলীয়া কৰিব ।

লগতে পঢ়ক : নেইমাৰৰ পাছত ক্রিষ্টিয়ানো ৰোনাল্ডোৱেও ল’ব নেকি অৱসৰ!

বিশ্বকাপৰ মাজভাগতে ফিফাৰ অনুশাসন সমিতিয়ে সকলোকে আচৰিত কৰি এক নাটকীয় সিদ্ধান্ত গ্ৰহণ কৰে

ফিফা বিশ্বকাপ ২০২৬ত এতিয়া খেলপথাৰৰ মেচতকৈয়ো চৰ্চাৰ শীৰ্ষলৈ আহিছে এটা প্ৰশাসনিক সিদ্ধান্ত । আমেৰিকাৰ তাৰকা ষ্ট্ৰাইকাৰ ফ’লাৰিন বাল’গুনৰ ৰেড কাৰ্ড বাতিল কৰাক লৈ সমগ্ৰ ফুটবল বিশ্বতে এক অভূতপূৰ্ব বিতৰ্কৰ সৃষ্টি হৈছে । ইউৰোপীয় ফুটবলৰ সৰ্বোচ্চ নিয়ন্ত্ৰক সংস্থা UEFA-ই ফিফাৰ এই সিদ্ধান্তক তীব্ৰ ভাষাৰে গৰিহণা দিছে । UEFA-ৰ মতে, এই কাৰ্য ‘খেলৰ নিৰপেক্ষতাৰ ওপৰত এক পোনপটীয়া আক্ৰমণ’ ।

মিডিয়া ৰিপৰ্ট অনুসৰি, এই সমগ্ৰ বিতৰ্কৰ আঁৰত আছে আমেৰিকাৰ ৰাষ্ট্ৰপতি ড’নাল্ড ট্ৰাম্পৰ পোনপটীয়া হস্তক্ষেপ । জানিব পৰা মতে, ট্ৰাম্পে ফিফাৰ সভাপতি জিয়ানী ইনফেন্টিনোৰ সৈতে ব্যক্তিগতভাৱে কথা পাতি বাল’গুনৰ শাস্তি পুনৰ বিবেচনা কৰিবলৈ হেঁচা প্ৰয়োগ কৰিছিল, যাৰ পিছতে ফিফাই নিজৰ নিয়ম সলনি কৰিবলৈ বাধ্য হয় ।

আচলতে খেলপথাৰত কি হৈছিল?

ৰাউণ্ড অব্-৩২ৰ এখন গুৰুত্বপূৰ্ণ মেচত আমেৰিকাই বচনিয়া আৰু হাৰ্জেগোভিনাক ২-০ গ’লত পৰাস্ত কৰিছিল । কিন্তু মেচখনৰ ৬৪ মিনিটত আমেৰিকাৰ ফ’লাৰিন বাল’গুনে বচনিয়াৰ ডিফেণ্ডাৰ তাৰিক মুহাৰেমোভিচক বিপজ্জনকভাৱে ‘ষ্টাডছ’ দেখুৱাই টেক্ল কৰে । ইয়াৰ লগে লগে ৰেফাৰীয়ে বাল’গুনক পোনপটীয়াকৈ ‘ৰেড কাৰ্ড’ দেখুৱাই খেলপথাৰৰ পৰা উলিয়াই দিয়ে ।

ফিফাৰ নিয়ম অনুসৰি, কোনো খেলুৱৈয়ে পোনপটীয়া ৰেড কাৰ্ড পালে তেওঁ স্বয়ংক্ৰিয়ভাৱে পৰৱৰ্তী মেচখনৰ পৰা বাহিৰ হ’ব লাগে । এই নিয়ম অনুসৰি, বেলজিয়ামৰ বিৰুদ্ধে হ’বলগীয়া হাই-ভল্টেজ ৰাউণ্ড অব্-১৬ৰ মেচখনত বাল’গুনে খেলিব নোৱাৰিলেহেঁতেন ।

ফিফাৰ ইউ-টাৰ্ণ: ৰেড কাৰ্ডৰ সলনি ‘প্ৰ’বেচন’!

বিশ্বকাপৰ মাজভাগতে ফিফাৰ অনুশাসন সমিতিয়ে সকলোকে আচৰিত কৰি এক নাটকীয় সিদ্ধান্ত গ্ৰহণ কৰে । বাল’গুনৰ ওপৰত থকা এখন মেচৰ বাধ্যতামূলক নিষেধাজ্ঞা উঠাই দি ইয়াক এবছৰীয়া ‘প্ৰ’বেচন পিৰিয়ড’লৈ ৰূপান্তৰ কৰা হয় । ইয়াৰ অৰ্থ হ’ল বাল’গুনে চলিত বিশ্বকাপৰ আটাইকেইখন মেচতে খেলিব পাৰিব আৰু তেওঁৰ ওপৰত থকা নিষেধাজ্ঞা বিশ্বকাপৰ সমাপ্তিৰ পিছতহে কাৰ্যকৰী হ’ব ।

‘ফিফাই সীমা পাৰ কৰিলে’ – জাঙুৰ খাই উঠিল UEFA

ফিফাৰ এই সিদ্ধান্তৰ পিছতে সোমবাৰে এক চৰকাৰী বিবৃতি জাৰি কৰি তীব্ৰ ক্ষোভ উজাৰে ইউৰোপীয় ফুটবল সংস্থাই (UEFA )। তেওঁলোকে কয়:

“ৰেড কাৰ্ড পোৱাৰ পিছত এখন মেচৰ বাবে নিলম্বন হোৱাটো কোনো ঐচ্ছিক নিয়ম নহয়, এয়া বাধ্যতামূলক । প্ৰতিযোগিতাৰ মাজভাগত কেৱল এজন বিশেষ খেলুৱৈৰ বাবে নিয়ম সলনি কৰাটোৱে ফুটবলৰ বিশ্বাসযোগ্যতা শেষ কৰি পেলাইছে । যেতিয়া নিয়মৰ ৰক্ষকসক নিজেই ৰাজনৈতিক চাপত নিয়ম সলনি কৰে, তেতিয়া খেলৰ নিৰপেক্ষতা বিপন্ন হৈ পৰে ।”

UEFA-ই ফিফাৰ এই পদক্ষেপক ‘অকল্পনীয়, বুজিব নোৱাৰা আৰু সম্পূৰ্ণ অন্যায়’ বুলি অভিহিত কৰিছে ।

ড’নাল্ড ট্ৰাম্পৰ ফোনকল আৰু ৰাজনৈতিক হস্তক্ষেপৰ অভিযোগ

এই বিতৰ্কই গুৰুতৰ ৰূপ ধাৰণ কৰাৰ কাৰণ হ’ল ইয়াৰ সৈতে সাঙোৰ খাই পৰিছে হোৱাইট হাউচ । কেইবাটাও আন্তঃৰাষ্ট্ৰীয় সংবাদ মাধ্যমৰ দাবী অনুসৰি, আমেৰিকাৰ ৰাষ্ট্ৰপতি ড’নাল্ড ট্ৰাম্পে নিজেই ফিফাৰ মুৰব্বী জিয়ানী ইনফেন্টিনোক ফোন কৰি বাল’গুনৰ গোচৰটোত ৰেহাই দিবলৈ কৈছিল । কেৱল সেয়াই নহয়, আমেৰিকাৰ বৈদেশিক মন্ত্ৰী মাৰ্কো ৰুবিঅ’ইও ৰাজহুৱাকৈ এই বিষয়টোক লৈ মন্তব্য কৰিছিল । এই ৰাজনৈতিক হস্তক্ষেপে এতিয়া বিশ্ব ক্ৰীড়াত এক ক’লা অধ্যায়ৰ সূচনা কৰাৰ আশংংকা কৰা হৈছে ।

ইফালে ফিফাৰ এই একচক্ষীয়া সিদ্ধান্তক লৈ ফুটবল জগতৰ তাৰকা আৰু প্ৰশিক্ষকসকলৰ মাজতো ব্যাপক অসন্তুষ্টি দেখিবলৈ পোৱা গৈছে ।

লগতে পঢ়ক : বিশ্বকাপৰ পৰা বাহিৰ হ’ল ব্ৰাজিল; নেইমাৰৰ অৱসৰ ঘোষণা

ফিফাৰ তথ্য অনুসৰি জাৰ্মানী আৰু ইকুৱেডৰৰ মেচখনৰ জৰিয়তে এইবাৰৰ বিশ্বকাপ পৰিণত হৈছে ইতিহাসৰ সৰ্বাধিক দৰ্শকে উপভোগ কৰা সংস্কৰণত

ফিফা বিশ্বকাপ ২০২৬-এ ক্ৰীড়া জগতত এক নতুন ইতিহাস ৰচনা কৰিছে । ২৫ জুন, বৃহস্পতিবাৰে অনুষ্ঠিত গ্ৰুপ-ই ৰ মেচত জাৰ্মানী আৰু ইকুৱেডৰৰ মাজৰ ৰোমাঞ্চকৰ যুঁজখনে কেৱল খেলপথাৰতেই নহয়, ষ্টেডিয়ামৰ গেলাৰীতো এক নতুন অভিলেখ গঢ়িবলৈ সক্ষম হয় ।

ভংগ হ’ল ১৯৯৪ চনৰ দৰ্শকৰ অভিলেখ

ফিফাৰ ৱেবছাইটৰ তথ্য অনুসৰি, জাৰ্মানী আৰু ইকুৱেডৰৰ মেচখনৰ জৰিয়তে এইবাৰৰ বিশ্বকাপ পৰিণত হৈছে ইতিহাসৰ সৰ্বাধিক দৰ্শকে উপভোগ কৰা সংস্কৰণত ।

নতুন অভিলেখ : ৩,৬০৫,৩৫৭ জন দৰ্শক

পূৰ্বৰ অভিলেখ : ৩,৫৮৭,৫৩৮ জন দৰ্শক (আমেৰিকা যুক্তৰাষ্ট্ৰ, ১৯৯৪)

নিউ জাৰ্ছিত অনুষ্ঠিত মেচখনৰ দ্বিতীয়াৰ্ধত ষ্টেডিয়ামৰ স্ক্ৰীণত এই নতুন অভিলেখৰ কথা আনুষ্ঠানিকভাৱে প্ৰদৰ্শন কৰা হয় । ফিফাই প্ৰকাশ কৰা মতে, “মাত্ৰ ছাপন্নখন মেচ অনুষ্ঠিত হোৱাৰ পাছতেই ফিফা বিশ্বকাপ ২০২৬-এ ইতিমধ্যে যিকোনো পৰ্যায়ৰ সৰ্বমুঠ দৰ্শকৰ উপস্থিতিৰ পূৰ্বৰ অভিলেখ ভংগ কৰিছে ।”

চাৰিবাৰৰ চেম্পিয়ন জাৰ্মানীক হৰুৱাই ইকুৱেডৰৰ চমক

নিউয়ৰ্ক/নিউ জাৰ্ছি ষ্টেডিয়ামত অনুষ্ঠিত খেলখনত ফুটবল অনুৰাগীয়ে এক ডাঙৰ অঘটনৰ সাক্ষী হয় । শক্তিশালী জাৰ্মানীক ২-১ গ’লত পৰাস্ত কৰি ইকুৱেডৰে ‘ৰাউণ্ড অৱ ৩২’ বা নকআউট পৰ্যায়লৈ যোগ্যতা অৰ্জন কৰে ।

খেলৰ আৰম্ভণিতেই মাত্ৰ ১.৪৯ মিনিটত লিয়ৰয় ছানেই এটা সুন্দৰ গ’ল দি জাৰ্মানীক অগ্ৰগতি প্ৰদান কৰে । এইটো জাৰ্মানীৰ বিশ্বকাপৰ ইতিহাসৰ দ্বিতীয় দ্ৰুততম গ’ল হিচাপে পৰিগণিত হয় । নৱম মিনিটত নিলছন এংগুলাই দূৰৰ পৰা মৰা এক শক্তিশালী শ্বটেৰে জাৰ্মানীৰ গ’লৰক্ষক মেনুৱেল নিউৱাৰক পৰাস্ত কৰি খেলখন ১-১ ত সমতালৈ আনে ।

৭৭ মিনিটত এটা কৰ্ণাৰৰ পৰা অহা বলত কেভিন ৰড্ৰিগেজে শূন্যতে যুঁজ দি বলটো নিয়ন্ত্ৰণলৈ আনে আৰু গঞ্জালো প্লাটাই অতি দ্ৰুততাৰে ইয়াক গ’ললৈ পৰিৱৰ্তিত কৰি ইকুৱেডৰৰ বিজয় নিশ্চিত কৰে ।

খেলৰ শেষৰ ফালে সংযোজিত ৭ মিনিট অতিৰিক্ত সময়ত জাৰ্মানীয়ে ক্ৰমাগত আক্ৰমণ চলাইছিল যদিও ইকুৱেডৰৰ ৰক্ষণভাগে অতি দৃঢ়তাৰে নিজৰ অগ্ৰগতি বৰ্তাই ৰাখে । এই বিজয়ৰ লগে লগে ইকুৱেডৰে তেওঁলোকৰ ফুটবল ইতিহাসত ২০০৬ চনৰ পাছত দ্বিতীয়বাৰৰ বাবে বিশ্বকাপৰ গ্ৰুপ পৰ্যায় অতিক্ৰম কৰি নকআউটত প্ৰৱেশ কৰিবলৈ সক্ষম হৈছে ।

লগতে পঢ়ক : ফিফা বিশ্বকাপ ২০২৬ : স্কটলেণ্ডক পৰাস্ত কৰি নকআউটত চাম্বা বয়জ, নেইমাৰৰ আৱেগিক প্ৰত্যাৱৰ্তন

ফিফা বিশ্বকাপ ২০২৬ : মিয়ামী ষ্টেডিয়ামত অনুষ্ঠিত গ্ৰুপ-C ৰ এখন গুৰুত্বপূৰ্ণ মেচত ব্ৰাজিলে স্কটলেণ্ডক ৩-০ ব্যৱধানত পৰাস্ত কৰে

ফিফা বিশ্বকাপ ২০২৬ত ব্ৰাজিলৰ ফুটবল দলৰ অপ্ৰতিৰোধ্য গতি অব্যাহত আছে । বৃহস্পতিবাৰে মিয়ামী ষ্টেডিয়ামত অনুষ্ঠিত গ্ৰুপ-C ৰ এখন গুৰুত্বপূৰ্ণ মেচত ব্ৰাজিলে স্কটলেণ্ডক ৩-০ ব্যৱধানত পৰাস্ত কৰে । এই বৃহৎ বিজয়েৰে ব্ৰাজিলে গ্ৰুপৰ শীৰ্ষ স্থান দখল কৰি নকআউট ৰাউণ্ডত নিজৰ স্থান সুৰক্ষিত কৰিছে ।

খেলখনত সকলোৰে চকু আছিল দীৰ্ঘদিনৰ বিৰতিৰ পিছত বিশ্বকাপৰ মঞ্চত ভৰি থোৱা তাৰকা ফুটবলাৰ নেইমাৰৰ ওপৰত । কিন্তু মায়ামীৰ খেলপথাৰত আচল যাদু দেখুৱালে ব্ৰাজিলৰ নতুন তাৰকা ভিনিচিয়াছ জুনিয়ৰ-এ । তেওঁৰ দুৰ্দান্ত দুটা গ’লে স্কটিছ দলটোৰ সকলো আশা ভংগ কৰিলে ।

এলিয়েনৰ ভৱিষ্যদ্বাণী আৰু ব্ৰাজিলৰ আক্ৰমণাত্মক আৰম্ভণি

মেচখনৰ পূৰ্বে মিয়ামী চহৰত এটা অদ্ভুত ভৱিষ্যদ্বাণীয়ে ব্যাপক চৰ্চা লাভ কৰিছিল । এজন ব্ৰাজিলিয়ান জ্যোতিষীয়ে দাবী কৰিছিল যে খেল চলি থকা অৱস্থাত ষ্টেডিয়ামত এলিয়েন নামিব পাৰে । অৱশ্যে, খেলপথাৰত কোনো মহাকাশৰ জীৱ দেখা নগ’ল যদিও হেড কোচ কাৰ্লো এন্সেলোটিৰ ব্ৰাজিল দলৰ প্ৰদৰ্শন কোনো অলৌকিক ঘটনাতকৈ কম নাছিল ।

৬৪,৪৭৮ গৰাকী দৰ্শকেৰে ভৰি থকা ষ্টেডিয়ামত খেলৰ ১০ মিনিটৰ ভিতৰতে ব্ৰাজিলে মেচৰ নিয়ন্ত্ৰণ হাতলৈ লয় । স্কটলেণ্ডৰ ডিফেণ্ডাৰ স্কট মেককেণাৰ এটা মাৰাত্মক ভুলৰ সুযোগ গ্ৰহণ কৰি ৰায়নে বল কাঢ়ি ভিনিচিয়াছ জুনিয়ৰক পাছ দিয়ে । ৰিয়েল মাদ্ৰিদৰ এই তাৰকা ষ্ট্ৰাইকাৰে স্কটিছ গ’লকীপাৰ এংগাছ গানক ধূলি দি সহজেই বল নেটত সুমুৱাই দিয়ে (১-০) । এই টুৰ্ণামেণ্টত এইটো ভিনিচিয়াছৰ চতুৰ্থটো গ’ল আছিল ।

প্ৰথম হাফতে ব্ৰাজিলৰ আধিপত্য

প্ৰথম গ’লৰ পিছত ভিনিচিয়াছে আন এটা গ’ল দিছিল যদিও VAR সমীক্ষাত ফাউল ধৰা পৰাত সেয়া বাতিল কৰা হয় । ইয়াৰ পাছতো স্কটলেণ্ডৰ ওপৰত ব্ৰাজিলৰ হেঁচা অলপো হ্ৰাস পোৱা নাছিল । প্ৰথম হাফৰ ঠিক শেষৰ মুহূৰ্তত ব্ৰুনো গুইমাৰেছৰ এটা নিখুঁত ক্ৰছত ভিনিচিয়াছ জুনিয়ৰে এক সুন্দৰ হেডাৰেৰে ব্ৰাজিলৰ অগ্ৰগতি ২-০ লৈ বৃদ্ধি কৰে ।

দ্বিতীয় হাফত কুনহাৰ গ’ল আৰু নেইমাৰৰ এণ্ট্ৰি

দ্বিতীয় হাফতো ব্ৰাজিলৰ তীব্ৰ আক্ৰমণ অব্যাহত থাকে । খেলৰ এক সুন্দৰ মুভৰ সহায়ত গুইমাৰেছৰ পাছ লাভ কৰি ৱলভাৰহেম্পটন ওৱাণ্ডাৰাৰ্ছৰ ষ্ট্ৰাইকাৰ মেথিয়াছ কুনহাই ব্ৰাজিলৰ হৈ তৃতীয়টো গ’ল দিয়ে ।

নেইমাৰৰ প্ৰত্যাৱৰ্তন-

মেচখনৰ আটাইতকৈ আৱেগিক মুহূৰ্তটো তেতিয়া আহে, যেতিয়া চাবষ্টিটিউচন ব’ৰ্ডত নেইমাৰৰ নম্বৰ জিলিকি উঠে । ২০২৩ চনৰ অক্টোবৰ মাহৰ পিছত প্ৰথমবাৰৰ বাবে বিশ্বকাপৰ মঞ্চত প্ৰৱেশ কৰা ৩৪ বছৰীয়া এই কিংবদন্তি খেলুৱৈগৰাকীক সমগ্ৰ ষ্টেডিয়ামে থিয় হৈ হাত চাপৰিৰে আদৰণি জনায় । নিজৰ চুটি কেমিঅ’ প্ৰদৰ্শনত নেইমাৰে কিছুমান আকৰ্ষণীয় টাচ আৰু ড্ৰিবলিঙেৰে অনুৰাগীৰ মন জয় কৰে ।

গ্ৰুপ-C ৰ পইণ্ট তালিকাৰ স্থিতি

এই বিজয়ৰ সৈতে ব্ৰাজিলে গ্ৰুপ-C ত মুঠ ৭ পইণ্ট লাভ কৰি প্ৰথম স্থানত থাকিল । আনহাতে, এই গ্ৰুপৰে আন এখন মেচত মৰক্কোৱে হাইতিক ৪-২ ব্যৱধানত পৰাস্ত কৰি দ্বিতীয় স্থান লাভ কৰে । এই পৰাজয়ৰ সৈতে স্কটলেণ্ডৰ বিশ্বকাপ ২০২৬-ৰ যাত্ৰা গ্ৰুপ ৰাউণ্ডতে সমাপ্ত হ’ল ।

লগতে পঢ়ক : ক্ৰিষ্টিয়ানো ৰোনাল্ডোৰ ইতিহাস; ২৪ ঘণ্টাৰ ভিতৰতে ভংগ মেছিৰ বিশ্ব অভিলেখ

এই জয়ৰ সৈতে দুবাৰৰ চেম্পিয়ন ফ্ৰান্স দলটোৱে নকআউট পৰ্যায়ত নিজৰ স্থান নিশ্চিত কৰিবলৈ সক্ষম হয়

ফিফা বিশ্বকাপ ২০২৬-ত নিজৰ দমনীয় প্ৰদৰ্শন অব্যাহত ৰাখি ফ্ৰান্সে ইৰাকক ৩-০ ব্যৱধানত পৰাস্ত কৰে । এই জয়ৰ সৈতে দুবাৰৰ চেম্পিয়ন ফ্ৰান্সে নকআউট পৰ্যায়ত নিজৰ স্থান নিশ্চিত কৰিবলৈ সক্ষম হয় । ২৩ জুন, মঙলবাৰে ফিলাডেলফিয়া ষ্টেডিয়ামত অনুষ্ঠিত খেলখনত ফ্ৰান্সৰ হৈ কিলিয়ান এমবাপে দুটা আৰু ওচমানে ডেম্বেলেই এটা গ’ল কৰে ।

খেলখন কেৱল ফ্ৰান্সৰ প্ৰদৰ্শনৰ বাবেই নহয়, বেয়া বতৰ আৰু ধাৰাসাৰ বৰষুণৰ বাবেও চৰ্চালৈ আহে । প্ৰথমাৰ্ধ শেষ হোৱাৰ পাছত ধুমুহাৰ সতৰ্কবাণীৰ বাবে খেলখন দুঘণ্টাতকৈও অধিক সময় স্থগিত ৰখা হয় । খেলপথাৰত পানী জমা হৈ পৰাত পুনৰ আৰম্ভ কৰাৰ পূৰ্বে গ্ৰাউণ্ড ষ্টাফসকলে যথেষ্ট পৰিশ্ৰম কৰিবলগীয়া হয় । দীৰ্ঘ অপেক্ষাৰ অন্তত খেল পুনৰ আৰম্ভ হয় আৰু ফ্ৰান্সে নিজৰ আধিপত্য অটুট ৰাখে ।

নিজৰ ১০০ সংখ্যক আন্তঃৰাষ্ট্ৰীয় খেল খেলি থকা কিলিয়ান এমবাপেই ১৪ মিনিটত গ’ল কৰি ফ্ৰান্সক আৰম্ভণিতে অগ্ৰগতি প্ৰদান কৰে । দ্বিতীয়াৰ্ধৰ ৫৪ মিনিটত ইৰাকৰ ডিফেণ্ডাৰ জাইদ তহচিনৰ ভুলৰ সুযোগ লৈ এমবাপেই আন এটা গ’ল কৰে আৰু স্ক’ৰ ২-০ কৰে । পাছত ওচমানে ডেম্বেলেই তৃতীয় গ’ল দি ফ্ৰান্সৰ জয় নিশ্চিত কৰে ।

এই দুটা গ’লৰ সৈতে এমবাপেৰ বিশ্বকাপত মুঠ গ’লৰ সংখ্যা ১৬ টালৈ বৃদ্ধি পায় । ইয়াৰ সৈতে তেওঁ জাৰ্মানীৰ কিংবদন্তি মিৰোস্লাভ ক্লোজৰ সমকক্ষ হয় আৰু ব্ৰাজিলৰ তাৰকা ৰোনাল্ডোক অতিক্ৰম কৰে । এতিয়া তেওঁৰ আগত আছে কেৱল আৰ্জেণ্টিনাৰ অধিনায়ক লিয়েনেল মেছি, যাৰ নামত বিশ্বকাপত ১৮টা গ’ল আছে ।

২০১৮ চনত বিশ্বকাপ জয় কৰা আৰু ২০২২ চনত ফাইনেলত প্ৰৱেশ কৰা ফ্ৰান্সক এইবাৰো খিতাপৰ শক্তিশালী দাবীদাৰ হিচাপে গণ্য কৰা হৈছে । এমবাপে, ডেম্বেলে আৰু ডেচিৰে ডোৱেৰ দৰে তাৰকাৰ উপস্থিতিয়ে দলটোক অধিক শক্তিশালী কৰি তুলিছে ।

আনহাতে, ইৰাকৰ বাবে খেলখন হতাশাজনক হৈ পৰে । দলটোৰ তাৰকা ষ্ট্ৰাইকাৰ আয়মেন হুছেইন ২৬ মিনিটত আঘাত পাই খেলপথাৰৰ বাহিৰলৈ যাবলগীয়া হয় । তেওঁৰ স্থানত আলী অল-হামদীক নমোৱা হয় । ইৰাকে বিশ্বকাপত মাত্ৰ দ্বিতীয়বাৰৰ বাবে অংশগ্ৰহণ কৰিছে আৰু এই পৰাজয়ে তেওঁলোকৰ যাত্ৰা অধিক কঠিন কৰি তুলিছে ।

লগতে পঢ়ক : ফিফা বিশ্বকাপৰ ইতিহাসত লিঅ’নেল মেছিৰ মহাকাব্যিক অভিলেখ