ক্ৰিষ্টিয়ানো ৰোনাল্ডো, লিয়নেল মেছিৰ পৰা আৰম্ভ কৰি গুইলেৰ্মো অ’চোৱালৈকে- জানক কেনেকৈ এই তাৰকাসকলে ২০২৬ বিশ্বকাপত বয়সক প্ৰত্যাহ্বান জনাইছে
প্ৰায় ডেৰ দশক আগলৈকে ৩০ বছৰ অতিক্ৰম কৰাৰ লগে লগে খেলুৱৈসকলক বৃদ্ধ বুলি গণ্য কৰা হৈছিল । কিন্তু এতিয়া সময় সলনি হ’ল ! আজিৰ তাৰিখত বিজ্ঞান আৰু আধুনিক প্ৰশিক্ষণৰ সহায়ত খেলুৱৈসকলে নিজৰ কেৰিয়াৰ দীঘলীয়া কৰিবলৈ সক্ষম হৈছে ।
ফুটবলৰ জগতৰ মহান খেলুৱৈ পেলে, মাৰাডোনা আৰু জিনেদিন জিদানো ৩৭ বছৰ বয়সত ফুটবলৰ পৰা অৱসৰ লৈছিল । বিৰাট কোহলী (৩৭ বছৰ), ৰোহিত শৰ্মা (৩৮ বছৰ), লিয়নেল মেছি (৩৯ বছৰ) আৰু ক্ৰিষ্টিয়ানো ৰোনাল্ডো (৪১ বছৰ)ৰ দৰে খেলুৱৈসকলকো প্ৰশংসা কৰিবই লাগিব, যিয়ে বয়স প্ৰত্যাহ্বান জনাইছে আৰু ২০২৬ চনতো তেওঁলোকৰ প্ৰভাৱ অক্ষুণ্ণ ৰাখিছে ।
২০২৬ চনৰ ফিফা বিশ্বকাপত এনে বহুতো খেলুৱৈ দেখা গৈছে, যিয়ে নিজৰ বয়সক পৰাস্ত কৰি উজলি উঠাৰ লগতে চলিত এই প্ৰতিযোগিতাত ৰাজত্ব কৰিছে ।
ক্ৰিষ্টিয়ানো ৰোনাল্ডো (৪১ বছৰ): এতিয়াও অপ্ৰতিৰোধ্য
পৰ্তুগীজ অধিনায়ক CR7-ৰ গতি আৰু দক্ষতা এতিয়াও সমগ্ৰ বিশ্বৰ ফুটবল অনুৰাগীৰ বাবে বিস্ময় । ২৩৯খন আন্তঃৰাষ্ট্ৰীয় মেচত ১৪৫টা গ’ল কৰি তেওঁ অভিলেখ সৃষ্টি কৰিছে । একেৰাহে ৬খন বিশ্বকাপত গ’ল কৰা তেওঁ বিশ্বৰ প্ৰথমজন খেলুৱৈ । চলিত বিশ্বকাপত তেওঁৰ নামত ১০টা গ’ল আছে ।
ভোজিনহা (৪০ বছৰ): কেপ ভাৰ্ডেৰ চুপাৰষ্টাৰ
মাত্ৰ ৫ লাখ জনসংখ্যাৰ দেশ কেপ ভাৰ্ডে আজি ফুটবল জগতত চৰ্চিত হৈছে ৪০ বছৰীয়া গ’লৰক্ষক ভোজিনহাৰ বাবে । ৪০ বছৰ ১২ দিন বয়সত বিশ্বকাপত অভিষেক কৰি তেওঁ এক নতুন অভিলেখ গঢ়িলে । ইনষ্টাগ্ৰামত তেওঁৰ অনুগামীৰ সংখ্যা ১৬ মিলিয়নলৈ বৃদ্ধি পোৱাটোৱেই তেওঁৰ জনপ্ৰিয়তাৰ প্ৰমাণ ।
লিয়নেল মেছি (৩৯ বছৰ): ফুটবলৰ জীৱন্ত কিংবদন্তি
চলিত বিশ্বকাপত বয়সক অৱজ্ঞা কৰি সকলোৰে দৃষ্টি আকৰ্ষণ কৰা নামবোৰৰ ভিতৰত লিয়নেল মেছি অন্যতম । ৩৯ বছৰ বয়সতো মেছিৰ দক্ষতা আৰু গ’ল কৰাৰ ক্ষমতা পূৰ্বতকৈও যেন অধিক চোকা হৈ পৰিছে । এই বিশ্বকাপত তেওঁ নিজৰ প্ৰদৰ্শনৰ জৰিয়তে আকৌ এবাৰ প্ৰমাণ কৰিলে যে তেওঁ কেৱল এজন খেলুৱৈ নহয়, বৰঞ্চ ফুটবলৰ এক জীৱন্ত কিংবদন্তি । মেছিয়ে চলিত বিশ্বকাপত এটা হেট্ৰিকসহ ৫টা গ’লেৰে ২০২৬ ফিফা বিশ্বকাপৰ সৰ্বোচ্চ গ’লদাতাৰ তালিকাত শীৰ্ষত আছে আৰু ১৮টা গ’লেৰে বিশ্বকাপৰ ইতিহাসত সৰ্বাধিক গ’ল কৰা খেলুৱৈৰ অভিলেখ গঢ়িছে ।
এলয় ৰুম (৩৭ বছৰ): কুৰাচাওৰ দুৰ্ভেদ্য প্ৰাচীৰ
বিশ্বৰ আটাইতকৈ সৰু দেশ কুৰাচাওৰ গ’লপোষ্টত এলয় ৰুম এক দুৰ্ভেদ্য দেৱাল । ইকুৱেডৰৰ বিৰুদ্ধে ১৫টা ‘ছেভ’ কৰি তেওঁ টিম হাৱাৰ্ডৰ বিশ্ব অভিলেখৰ সমকক্ষ হৈছে ।
ক্ৰেগ গৰ্ডন (৪৩ বছৰ): স্কটলেণ্ডৰ অভিজ্ঞ হাত
ব্ৰাজিলৰ শক্তিশালী আক্ৰমণক ওফৰাই ৪৩ বছৰীয়া ক্ৰেগ গৰ্ডনে প্ৰমাণ কৰিলে যে অভিজ্ঞতাৰ কোনো বিকল্প নাই । ব্ৰাজিলে একেৰাহে কমেও ৮টা শ্বট টার্গেটৰ দিশে মাৰিছিল, কিন্তু ক্ৰেগ গৰ্ডনে ৮টাৰ ভিতৰত ৫টাকৈ শ্বট ৰক্ষা কৰে । বিশ্বকাপ খেলা বিশ্বৰ দ্বিতীয়গৰাকী আটাইতকৈ বয়সীয়াল খেলুৱৈ হিচাপে তেওঁ নিজৰ নাম খোদিত কৰিছে ।
গুইলেৰ্মো অ’চোৱা (৪০ বছৰ): মেক্সিকোৰ মেমো
মেক্সিকোৰ বাবে এই বিশ্বকাপত কোনো গ’ল নোখোৱাৰ আঁৰত আছে অ’চোৱাৰ হাত । তেওঁ ঘোষণা কৰিছে যে এয়া তেওঁৰ শেষ বিশ্বকাপ আৰু তেওঁ নিজৰ শেষ খেলখন স্মৰণীয় কৰি ৰাখিবলৈ সাজু ।
লুকা মড্রিচ আৰু মেনুৱেল নয়্যৰ: চিৰসেউজ তাৰকা
ক্ৰোয়েছিয়াৰ ‘হৃদস্পন্দন’ লুকা মড্রিচ আৰু জাৰ্মানীৰ ‘চুইপাৰ কীপাৰ’ মেনুৱেল নয়্যৰ-এই দুই কিংবদন্তিয়ে নিজৰ পঞ্চমখন বিশ্বকাপত খেলি আছে । তেওঁলোকৰ নেতৃত্ব আৰু দক্ষতা এতিয়াও নতুন প্ৰজন্মৰ খেলুৱৈসকলৰ বাবে আদৰ্শ । মেনুৱেল নয়্যৰক তেওঁৰ অসাধাৰণ গতিৰ বাবে ‘চুইপাৰ কীপাৰ’ বুলিও কোৱা হয় ।
এইসকল ফুটবল তাৰকাৰ ওপৰিও চলিত বিশ্বকাপত উৰুগুৱেৰ ফাৰ্নাণ্ডো মুছলেৰা (৪০ বছৰ), জাপানৰ ৩৯ বছৰীয়া লেফট-বেক ইউতো নাগাতোমো, ইজিপ্তৰ ৩৯ বছৰীয়া মাহদি চুলেইমান, আমেৰিকাৰ ৩৮ বছৰীয়া ডিফেণ্ডাৰ টিম ৰিম, আৰ্জেন্টিনাৰ ৩৮ বছৰীয়া ডিফেণ্ডাৰ নিকোলাছ অটামেন্দি আৰু নিউজীলেণ্ডৰ ৩৯ বছৰীয়া ডিফেণ্ডাৰ মাইকেল বক্সালৰ আদি খেলুৱৈসকলে প্ৰমাণ কৰিছে যে ইচ্ছাশক্তি আৰু সঠিক অনুশাসনে বয়সৰ সীমাবদ্ধতাক ভাঙি পেলাব পাৰে । ২০২৬ চনৰ এই বিশ্বকাপ কেৱল ট্ৰফীৰ বাবে নহয়, বৰঞ্চ এই কিংবদন্তিসকলৰ অদম্য প্ৰদৰ্শনৰ বাবেও ইতিহাসৰ পাতত সোণালী আখৰেৰে লিখা থাকিব ।
লগতে পঢ়ক : ফিফা বিশ্বকাপ ২০২৬ৰ চমক: ভংগ হ’ল সৰ্বাধিক দৰ্শকৰ পূৰ্বৰ সকলো অভিলেখ!
