হায়দৰাবাদত মাৰ্কিন ৰাষ্ট্ৰপতি ড’নাল্ড ট্ৰাম্পৰ নামেৰে নামাকৰণ কৰা হৈছে এটি বিষেশ পথ । ইয়াৰ পিছতেই সামাজিক মাধ্যমযোগে ভাৰতৰ প্ৰতি কৃজ্ঞতা জ্ঞাপন কৰিছে মাৰ্কিন ৰাষ্ট্ৰপতিগৰাকীয়ে । এই সন্মান লাভ কৰা তেওঁ প্ৰথমগৰাকী মাৰ্কিন ৰাষ্ট্ৰপতি বুলিও উল্লেখ কৰে তেওঁ ।
মাৰ্কিন ৰাষ্ট্ৰপতি চনাল্ড ট্ৰাম্পৰ নামত হায়দৰাবাদত মুকলি হ’ল এটা বিশেষ পথ । হায়দৰাবাদস্থিত আমেৰিকান কনচুলেটৰ কাষতে মুকলি কৰা পথটোৰ নাম আনুষ্ঠানিকভাৱে ‘ডনাল্ড ট্ৰাম্প এভিনিউ’ ৰখাৰ বাবে শুকুৰবাৰে ভাৰতক ধন্যবাদ জ্ঞাপন কৰিছে মাৰ্কিন ৰাষ্ট্ৰপতিগৰাকীয়ে । লগতে তেওঁ দাবী কৰে যে এই ধৰণে সন্মানিত হোৱা তেৱেঁই প্ৰথমগৰাকী আমেৰিকান ৰাষ্ট্ৰপতি ।
আমেৰিকাৰ স্বাধীনতাৰ ২৫০ বছৰ পূৰ্তি উপলক্ষে অনুষ্ঠিত ‘ফ্ৰিডম ২৫০’ উদযাপনৰ অংশ হিচাপে তেলেংগানা চৰকাৰে হায়দৰাবাদৰ ফাইনেন্সিয়েল ডিষ্ট্ৰিক্টৰ পথটোৰ নাম আনুষ্ঠানিকভাৱে পৰিৱৰ্তন কৰাৰ কেইদিনমান পিছতেই ট্ৰাম্পে এই মন্তব্য কৰে ।
ট্ৰুথ ছচিয়েলত ট্ৰাম্পে লিখে : “ভাৰতৰ হায়দৰাবাদত নতুন ড’নাল্ড ট্ৰাম্প এভিনিউ- এইদৰে সন্মানিত হোৱা প্ৰথমগৰাকী আমেৰিকান ৰাষ্ট্ৰপতি । ধন্যবাদ! ৰাষ্ট্ৰপতি ডনাল্ড জে ট্ৰাম্প ।”
এই উৎসৱত তেলেংগানাৰ উপ-মুখ্যমন্ত্ৰী ভাট্টি বিক্ৰমাৰ্কা, ভাৰতস্থিত আমেৰিকাৰ ৰাষ্ট্ৰদূত চাৰ্জিঅ’ গৰ আৰু হায়দৰাবাদত নিযুক্ত আমেৰিকাৰ কনচুল জেনেৰেল ল’ৰা উইলিয়ামছে এই পথৰ আনুষ্ঠানিক ফলক উন্মোচন কৰে । অনুষ্ঠানটোত কূটনীতিবিদ, চৰকাৰী বিষয়া আৰু কেইবাগৰাকীও উদ্যোগপতিয়ে অংশগ্ৰহণ কৰে ।
উল্লেখ্য যে, এই পথটোৰ নাম পৰিৱৰ্তনৰ সিদ্ধান্তটো প্ৰথমে ২০২৫ চনৰ ডিচেম্বৰ মাহত তেলেংগানাৰ মুখ্যমন্ত্ৰী এ ৰেৱন্ত ৰেড্ডীয়ে ঘোষণা কৰিছিল । ৰাজ্য চৰকাৰৰ বিষয়াসকলে জনোৱা মতে, হায়দৰাবাদ বৰ্তমান আমেৰিকান প্ৰযুক্তি কোম্পানী আৰু গ্ল’বেল কেপাবিলিটি চেণ্টাৰসমূহৰ বাবে এক প্ৰধান কেন্দ্ৰ হৈ পৰিছে । সেয়েহে তেলেংগানা আৰু আমেৰিকাৰ মাজত বৃদ্ধি পোৱা কৌশলগত, ব্যৱসায়িক আৰু বিনিয়োগৰ সম্পৰ্কক স্বীকৃতি দি এই পদক্ষেপ গ্ৰহণ কৰা হৈছে ।
লগতে পঢ়ক : ভাৰতলৈ আহিব ৰাষ্ট্ৰপতি ড’নাল্ড ট্ৰাম্প; আমেৰিকাৰ বৈদেশিক মন্ত্ৰী ৰুবিঅ’ৰ ঘোষণা
