এই পত্ৰখনে এতিয়া সমগ্ৰ বিশ্বৰ ফুটবল অনুৰাগীসকলক ভাবুক তথা আৱেগিক কৰি তুলিছে । ইৰান ফুটবল ফেডাৰেচনে পিছত এই নোটটো ছ’চিয়েল মিডিয়াত ৰাজহুৱা কৰাৰ লগে লগেই ই ব্যাপকভাৱে ভাইৰেল হৈ পৰে ।
চলিত ফিফা ৱৰ্ল্ড কাপ ২০২৬-ত খেলপথাৰৰ বাহিৰত ইৰানৰ ফুটবল দলে গ্ৰহণ কৰা এটা অভূতপূৰ্ব পদক্ষেপে এতিয়া জোকাৰি গৈছে সমগ্ৰ ক্ৰীড়াবিশ্ব । সোমবাৰে (২১ জুন) শক্তিশালী বেলজিয়ামৰ বিৰুদ্ধে ০-০ গলত ড্ৰ খেলাৰ পিছত, ইৰানী খেলুৱৈসকলে লছ এঞ্জেলছৰ বিখ্যাত ছ’ফাই ষ্টেডিয়ামৰ (SoFi Stadium) ড্ৰেছিং ৰুমত এটা অতি আৱেগিক নোট এৰি থৈ যায় । এই পত্ৰখনে এতিয়া সমগ্ৰ বিশ্বৰ ফুটবল অনুৰাগীসকলক ভাবুক তথা আৱেগিক কৰি তুলিছে ।
এই নোটটো কেৱল আয়োজকসকলক ধন্যবাদ জনোৱাতে আৱদ্ধ নাছিল, বৰঞ্চ ইয়াত নিজৰ দেশ, সমৰ্থক আৰু বিশ্ব শান্তিৰ প্ৰতি থকা গভীৰ ভাৱনাও প্ৰতিফলিত হৈছিল । ইৰান ফুটবল ফেডাৰেচনে পিছত এই নোটটো ছ’চিয়েল মিডিয়াত ৰাজহুৱা কৰাৰ লগে লগেই ই ব্যাপকভাৱে ভাইৰেল হৈ পৰে ।
নোটটোত কি লিখা আছিল ?
ষ্টেডিয়ামৰ কৰ্তৃপক্ষক উদ্দেশ্যি ইৰানী দলটোৱে লিখা নোটটোত উল্লেখ আছিল :
‘হাজাৰ হাজাৰ বছৰ পুৰণি প্ৰাচীন পাৰস্যৰ পৰা আদি কৰি আজিলৈকে, ইৰানৰ আত্মা আজিও জীৱন্ত আৰু অদম্য । লছ এঞ্জেলছ, আপোনালোকৰ আতিথ্যৰ বাবে অশেষ ধন্যবাদ । আমি গৰ্বেৰে ইয়ালৈ আহিছিলো, সন্মানেৰে খেলিলো আৰু সন্মানেৰে বিদায় লৈছো ।’
ইৰানী দলটোৱে সেই হাজাৰ হাজাৰ প্ৰশংসককো ধন্যবাদ জ্ঞাপন কৰে, যিসকলে খেলৰ সময়ত ষ্টেডিয়ামখনক প্ৰায় নিজৰ ঘৰুৱা খেলপথাৰৰ দৰে কৰি তুলিছিল । উল্লেখ্য যে, লছ এঞ্জেলছ হৈছে বিশ্বৰ অন্যতম বৃহত্তম ইৰানী সম্প্ৰদায়ৰ বাসস্থান আৰু ইয়াৰ প্ৰভাৱ খেলপথাৰৰ ষ্টেণ্ডত স্পষ্টকৈ দেখা গৈছিল । দলটোৱে আৰু লিখিছে- ‘প্ৰতিগৰাকী ইৰানীক ধন্যবাদ, যিয়ে এই ১৮০ মিনিটৰ সময়ছোৱাত নিজৰ হৃদয়, কণ্ঠ আৰু আত্মেৰে আমাক সমৰ্থন কৰিলে ।’
বিশ্বৰ সন্মুখত দাঙি ধৰিলে দেশৰ বেদনা
এই নোটটোৰ শেষৰ অংশত বিশ্ববাসীৰ বাবে এটা অতি গুৰুত্বপূৰ্ণ আৰু বিশেষ বাৰ্তা আছিল । খেলুৱৈসকলে লিখিছিল, “আমি কামনা কৰোঁ যাতে সকলো দেশৰ মাজত শান্তি, সন্মান আৰু বন্ধুত্ব অটুট থাকে ।”
এই আৱেগিক বাৰ্তাটোত #168 আৰু #Minab ৰ দৰে হেচটেগো ব্যৱহাৰ কৰা হৈছিল । আচলতে এইবোৰে কিছু দিন পূৰ্বে ইৰানৰ মিনাৱ চহৰৰ এখন বিদ্যালয়ত হোৱা এক ভয়ংকৰ আক্ৰমণৰ দিশটো আঙুলিয়াই দিয়ে, যিয়ে সমগ্ৰ দেশখনক জোকাৰি গৈছিল । এইদৰে খেলুৱৈসকলে ক্ৰীড়া মঞ্চ ব্যৱহাৰ কৰি নিজৰ দেশৰ বেদনাও বিশ্বৰ সন্মুখত দাঙি ধৰিবলৈ চেষ্টা কৰে ।
চৰম প্ৰত্যাহ্বানৰ মাজত ইৰানৰ বিশ্বকাপ যাত্ৰা
প্ৰণিধানযোগ্য যে, চলিত ফিফা বিশ্বকাপত ইৰান দলৰ অভিযান সহজ নাছিল । আমেৰিকা যুক্তৰাষ্ট্ৰত বলবৎ থকা কঠোৰ ভ্ৰমণ নিষেধাজ্ঞা বাবে দলটোক ৪৮ ঘণ্টাতকৈ অধিক সময় আমেৰিকাৰ সীমান্তৰ ভিতৰত থকাৰ অনুমতি দিয়া হোৱা নাছিল । এই কাৰণেই খেলুৱৈসকলে নিজৰ বেচ কেম্প আমেৰিকাৰ পৰিৱৰ্তে মেক্সিকোৰ টিজুয়ানা চহৰত বনাবলগীয়া হৈছিল ।
প্ৰতিখন খেলৰ বাবে দলটোৱে সীমান্ত পাৰ হৈ আমেৰিকালৈ অহা-যোৱা কৰিবলগীয়া হৈছিল । কেৱল ইমানেই নহয়, একাংশ বিষয়া আৰু সহযোগী কৰ্মচাৰীয়েও ভিছা সম্পৰ্কীয় চৰম সমস্যাৰ সন্মুখীন হ’বলগীয়া হৈছিল । দলৰ তাৰকা উইংগাৰ মেহদী তোৰাবিয়ে আনকি নতুন ভিছা ল’বলৈ আমেৰিকাৰ দূতাবাসলৈকো দৌৰাদৌৰি কৰিবলগীয়া হৈছিল ।
লগতে পঢ়ক : ৯২ বছৰীয়া অপেক্ষাৰ অৱসান; বিশ্বকাপত ইজিপ্তৰ প্ৰথমটো জয়
