চৰকাৰৰ এই সিদ্ধান্তই কৌশলগতভাৱে স্পৰ্শকাতৰ চীন সীমান্তৰ ওচৰত ভাৰতীয় বায়ুসেনাৰ শক্তি বহুগুণে বৃদ্ধি কৰিব ।
পূব ভাৰতৰ আকাশী সুৰক্ষাক এক নতুন মাত্ৰা প্ৰদান কৰিবলৈ পশ্চিমবংগ চৰকাৰে এক অত্যন্ত গুৰুত্বপূৰ্ণ তথা ঐতিহাসিক সিদ্ধান্ত গ্ৰহণ কৰিছে । ৰাজ্য চৰকাৰে ভাৰতীয় বায়ুসেনাৰ সামৰিক প্ৰস্তুতি আৰু ভৱিষ্যতৰ প্ৰয়োজনসমূহৰ প্ৰতি লক্ষ্য ৰাখি দুটাকৈ গুৰুত্বপূৰ্ণ বিমান ঘাটিৰ সম্প্ৰসাৰণৰ বাবে ভূমি আৱণ্টন কৰাৰ কথা ঘোষণা কৰিছে ।
চৰকাৰী সিদ্ধান্ত অনুসৰি, ৰাজ্যৰ বিখ্যাত হাছিমাৰা এয়াৰ ফৰ্চ ষ্টেচনৰ বাবে ২৫ একৰ আৰু কলাইকুণ্ডা এয়াৰ ফৰ্চ ষ্টেচনৰ বাবে ৩৭ একৰ ভূমি আৱণ্টন কৰা হৈছে । এই অতিৰিক্ত ভূমিয়ে কৌশলগতভাৱে স্পৰ্শকাতৰ চীন সীমান্তৰ ওচৰত ভাৰতীয় বায়ুসেনাৰ শক্তি বহুগুণে বৃদ্ধি কৰিব ।
হাছিমাৰা এয়াৰবেচ: ৰাফেল আৰু S-400 ৰ শক্তিশালী দুৰ্গ
পশ্চিমবংগৰ আলিপুৰদুৱাৰ জিলাত, ভূটান সীমান্তৰ তেনেই কাষত অৱস্থিত হাছিমাৰা এয়াৰবেচ ভাৰতীয় বায়ুসেনাৰ এক অন্যতম ফৰৱাৰ্ড বেচ । এই বিমান ঘাটিৰ গুৰুত্ব অতি বিশেষ । এই ঘাটিতেই মোতায়েন আছে ভাৰতীয় বায়ুসেনাৰ আটাইতকৈ আধুনিক ৰাফেল ফাইটাৰ এয়াৰক্ৰাফ্টৰ দ্বিতীয়টো স্কোৱাড্ৰন । যিকোনো বতৰতে শত্ৰুৰ ৰাডাৰক ধূলি দি আক্ৰমণ কৰিব পৰা ৰাফেলৰ উপস্থিতিয়ে ভাৰত-চীন সীমান্তত বৰ্তমান ভাৰতক এক সুকীয়া শক্তি প্ৰদান কৰিছে ।
ইফালে এই বিমান ঘাটিত বিশ্বৰ অন্যতম শ্ৰেষ্ঠ এয়াৰ ডিফেন্স চিষ্টেম S-400 ট্ৰায়াম্ফ নিয়োগ কৰা হৈছে, যিয়ে ৪০০ কিলোমিটাৰ দূৰত্বৰ পৰাই শত্ৰুৰ বিমান, মিছাইল বা ড্ৰোন ধূলিস্যাৎ কৰিব পাৰে । উল্লেখ্য যে, ১৯৬২ চনৰ ভাৰত-চীন যুদ্ধৰ পিছত ১৯৬৩ চনত সক্ৰিয় কৰা এই বিমান ঘাটিটোৱে ভাৰতৰ উত্তৰ-পূৰ্বাঞ্চলক সংযোগ কৰা অন্যতম স্পৰ্শকাতৰ অংশ শিলিগুড়ি কৰিডৰ আৰু পূব হিমালয় অঞ্চলৰ নিৰাপত্তা নিশ্চিত কৰে ।
কি লাভ হ’ব অতিৰিক্ত ২৫ একৰ ভূমিৰ পৰা ?
চৰকাৰে প্ৰদান কৰা এই ভূমিৰ জৰিয়তে হাছিমাৰাত নতুন ৰানৱেৰ সুবিধা, আধুনিক হেংগাৰ, মেৰামতি কাৰ্যশালা আৰু সৈনিকসকলৰ বাবে উচ্চমানৰ আৱাসিক ব্যৱস্থা গঢ়ি তোলা হ’ব ।
কলাইকুণ্ডা এয়াৰবেচ : প্ৰশিক্ষণ আৰু অপাৰেচনৰ মূল কেন্দ্ৰ
পশ্চিম মেদিনীপুৰ জিলাত অৱস্থিত কলাইকুণ্ডা এয়াৰবেচ হৈছে ভাৰতীয় বায়ুসেনাৰ পূব এয়াৰ কমাণ্ডৰ এক অন্যতম বৃহৎ ফাইটাৰ আৰু প্ৰশিক্ষণ হাব । ইয়াত মূলতঃ Su-30 MKI আৰু হক ট্ৰেইনাৰ এয়াৰক্ৰাফ্টসমূহ মোতায়েন হৈ থাকে ।
এই বিমান ঘাটিটো আন্তঃৰাষ্ট্ৰীয় বিমান যুদ্ধাভ্যাসৰ বাবে বিখ্যাত । ছিংগাপুৰ এয়াৰ ফৰ্চৰ দৰে বিদেশী শক্তিৰ সৈতেও ইয়াত কেইবাটাও গুৰুত্বপূৰ্ণ দ্বিপাক্ষিক সামৰিক অনুশীলন সম্পন্ন হৈছে । ইফালে কলাইকুণ্ডাৰ ৰানৱে প্ৰায় ১০,০০০ ফুট দীঘল, যিয়ে গধুৰ পৰিবহন বিমান আৰু যুঁজাৰু বিমান- দুয়োটাকে একেলগে চম্ভালিব পাৰে ।
নতুনকৈ লাভ কৰা ৩৭ একৰ ভূমিৰ ফলত ইয়াত লজিষ্টিক ছাপৰ্ট, আৱাসিক আৰু ডাঙৰ মেৰামতিৰ সা-সুবিধাসমূহ বৃদ্ধি কৰা হ’ব, যিয়ে শান্তিকালীন আৰু যুদ্ধকালীন— দুয়োটা সময়তে এক ‘গেম চেঞ্জাৰ’ হিচাপে কাম কৰিব ।
চীনৰ প্ৰত্যাহ্বান আৰু পূব কমাণ্ডৰ ৰণনীতি
পূব ভাৰতৰ ভৌগোলিক অৱস্থিতি অত্যন্ত স্পৰ্শকাতৰ । এই অঞ্চল ভূটান, নেপাল, বাংলাদেশ আৰু চীনৰ সীমান্ত জুৰি আছে । শেহতীয়াকৈ চীনৰ ক্ৰমবৰ্ধমান কাৰ্যকলাপৰ প্ৰতি লক্ষ্য ৰাখি ভাৰতীয় বায়ুসেনাই সমগ্ৰ পূব ক্ষেত্ৰতে নিজৰ উপস্থিতি সক্ৰিয় কৰি তুলিছে ।
কেৱল বিমান ঘাটিৰ সম্প্ৰসাৰণেই নহয়, বৰঞ্চ সমগ্ৰ অঞ্চলটোত নতুন ৰাডাৰ, উন্নত যোগাযোগ প্ৰণালী আৰু লজিষ্টিক নেটৱৰ্ক শক্তিশালী কৰা হৈছে । আধুনিক যুদ্ধক্ষেত্ৰত এয়াৰবেচসমূহ কেৱল বিমান উৰুওৱা স্থান হৈ থকা নাই, বৰঞ্চ এইবোৰ কমাণ্ড চেন্টাৰ, ড্ৰোন বেচ আৰু চোৰাংচোৱা গোট হিচাপে গঢ়ি তোলা হৈছে ।
উল্লেখ্য যে, ৰাফেল আৰু S-400 ৰ দৰে শক্তিশালী সামৰিক প্ৰণালীৰে সুসজ্জিত হাছিমাৰা আৰু কলাইকুণ্ডা বিমান ঘাটিৰ এই সম্প্ৰসাৰণে আঞ্চলিক প্ৰত্যাহ্বানৰ মুখামুখি হ’বলৈ ভাৰতক এক নতুন উচ্চতালৈ লৈ যাব । পশ্চিমবংগ চৰকাৰৰ এই পদক্ষেপে স্থলসেনা, নৌসেনা আৰু বায়ুসেনাৰ মাজত এক শক্তিশালী সমন্বয় ৰক্ষাতো বিশেষ সহায় কৰিব ।
লগতে পঢ়ক : শত্ৰুৰ বুকু কঁপাই দীৰ্ঘ দূৰত্বৰ ক্ৰুজ মিছাইলৰ সফল পৰীক্ষণ ভাৰতৰ
