ঘৰুৱা মাটিত কাটাৰক ধূলিস্যাৎ কৰি কেইবাটাও অভিলেখ গঢ়িছে আয়োজক কানাডাই । লগতে চলিত ফিফা বিশ্বকাপত দ্বিতীয়টো হেটট্ৰিক অৰ্জন কৰিছে কানাডাৰ তাৰকা জনাথন ডেভিদে ।
ফিফা বিশ্বকাপ ২০২৬-ৰ গ্ৰুপ ‘বি’ৰ এখন গুৰুত্বপূৰ্ণ মেচত আয়োজক কানাডাই এক অভূতপূৰ্ব আৰু অভিলেখ সৃষ্টিকাৰী প্ৰদৰ্শন দাঙি ধৰিছে । ঘৰুৱা মাটিত কাটাৰক ৬-০ ব্যৱধানত ধূলিস্যাৎ কৰি কানাডাই বিশ্বকাপৰ ইতিহাসত তেওঁলোকৰ প্ৰথমটো জয় পঞ্জীয়ন কৰে । অত্যন্ত আধিপত্যশীলভাৱে খেলা এই মেচখনত কানাডাৰ তাৰকা খেলুৱৈ জনাথন ডেভিদে এক চমকপ্ৰদ হেট্ৰিক অৰ্জন কৰি ফুটবল ইতিহাসৰ কেইবাটাও ডাঙৰ অভিলেখ নিজৰ নামত কৰে ।
জনাথন ডেভিডৰ মেজিকেল হেট্ৰিক : মেছিৰ সৈতে একলগে নাম
মেচখনৰ ২৯ মিনিট, প্ৰথমাৰ্ধৰ অতিৰিক্ত সময় (৪৫+৩) আৰু একেবাৰে শেষৰ ফালে ৯০+২ মিনিটত গ’ল দি জনাথন ডেভিদে নিজৰ চিৰস্মৰণীয় হেট্ৰিক সম্পূৰ্ণ কৰে । ইয়াৰ লগে লগে তেওঁ চলিত বিশ্বকাপত হেট্ৰিক অৰ্জন কৰা খেলুৱৈৰ তালিকাত আৰ্জেণ্টিনাৰ কিংবদন্তি লিয়নেল মেছিৰ সৈতে চামিল হয় ।
কেৱল সেয়াই নহয়, ১৯৩০ চনৰ প্ৰথম বিশ্বকাপত আমেৰিকাৰ বাৰ্ট প্যাটেনাউডে পেৰাগুৱেৰ বিৰুদ্ধে হেট্ৰিক কৰাৰ পিছত, ডেভিড হ’ল ইউৰোপ বা দক্ষিণ আমেৰিকাৰ বাহিৰৰ আন কোনো মহাদেশীয় দলৰ হৈ বিশ্বকাপত হেট্ৰিক কৰা ইতিহাসৰ মাত্ৰ দ্বিতীয়জন খেলুৱৈ । উল্লেখ্য যে, খেলৰ ১৬ মিনিটতে কাইল লাৰিনে গ’ল দি কানাডাৰ হৈ প্ৰথম খাতা খুলিছিল ।
ভংগ হ’ল কেইবাটাও ঐতিহাসিক অভিলেখ
কানাডা আৰু কাটাৰৰ এই মেচখনে ফুটবল ইতিহাসত কেইবাটাও নতুন মাইলৰ খুঁটি স্থাপন কৰিলে :
-পাঁচ বা ততোধিক গ’লৰ অভিলেখ : ইউৰোপ আৰু দক্ষিণ আমেৰিকাৰ বাহিৰৰ প্ৰথমটো দল হিচাপে কানাডাই বিশ্বকাপৰ এখন মেচত ৫ বা তাতকৈ বেছি গ’ল দিয়াৰ বিৰল কৃতিত্ব অৰ্জন কৰে ।
-পেনাল্টী বক্সত ৯৭ টা টাচ : ১৯৬৬ চনত ফুটবলত ডাটা ট্ৰেকিং আৰম্ভ হোৱাৰ পিছত বিশ্বকাপৰ যিকোনো এখন মেচত বিপক্ষৰ পেনাল্টী বক্সৰ ভিতৰত আটাইতৈ বেছি টাচ কৰাৰ অভিলেখ গঢ়িলে কানাডাই । তেওঁলোকে কাটাৰৰ বক্সত ৯৭ বাৰ বল স্পৰ্শ কৰে ।
-প্ৰথম অৰ্ধতে আক্ৰমণৰ ধুমুহা : কেৱল প্ৰথম ৪৫ মিনিটতে কানাডাই লক্ষ্য থৈ ৮ টা শ্বট মাৰে । ১৯৯৪ চনত আৰ্জেণ্টিনাৰ বিৰুদ্ধে ৰোমানিয়াই কৰা সৰ্বাধিক শ্বটৰ অভিলেখৰ সৈতে এয়া সমকক্ষ ।
আয়োজক দেশৰ ডাঙৰ জয় : ১৯৭৮ চনৰ বিশ্বকাপত পেৰুৰ বিৰুদ্ধে আৰ্জেণ্টিনাৰ ৬-০ ব্যৱধানৰ জয়ৰ পিছত, কানাডাই প্ৰথম আয়োজক দেশ হিচাপে বিশ্বকাপৰ এখন মেচত ৬ টা গ’ল দিয়াৰ অভিলেখ গঢ়ে ।
কাটাৰৰ লজ্জাজনক ৰেকৰ্ড : একেখন মেচতে দুখন ৰেড কাৰ্ড
আনহাতে, কাটাৰৰ বাবে এই মেচখন আছিল অতি দুৰ্ভাগ্যজনক । দুৰ্বল ৰক্ষণভাগৰ উপৰিও খেলপথাৰত অনুশাসনহীনতাৰ বাবে দলটোৱে চৰম মূল্য ভৰিবলগীয়া হয় । ফুটবল পৰিসংখ্যা সংস্থা ‘অপ্টাজোছে’ জনোৱা মতে, ফিফা বিশ্বকাপৰ ইতিহাসত কাটাৰ হ’ল একেখন মেচতে দুখন ৰেড কাৰ্ড পোৱা প্ৰথমটো এছিয়ান দল ।
তদুপৰি, ১৯৬৬ চনৰ পিছত খেলৰ প্ৰথম এক ঘণ্টাৰ (৬০ মিনিট) ভিতৰতে এখন মেচত কোনো দলৰ দুজন খেলুৱৈ ৰেড কাৰ্ড পাই বহিষ্কৃত হোৱাৰ এয়া মাত্ৰ তৃতীয়টো ঘটনা । ইয়াৰ পূৰ্বে ২০০৬ চনত ইটালীৰ বিৰুদ্ধে আমেৰিকা যুক্তৰাষ্ট্ৰ আৰু ১৯৬৬ চনত জাৰ্মানীৰ বিৰুদ্ধে উৰুগুৱেৰ খেলুৱৈ এনেদৰে বহিষ্কৃত হৈছিল ।
এই ঐতিহাসিক আৰু একপক্ষীয় জয়েৰে কানাডাই এতিয়া বিশ্বকাপ ২০২৬-ৰ গ্ৰুপ ‘বি’ত নিজৰ শক্তিশালী স্থিতি ঘোষণা কৰিলে ।
লগতে পঢ়ক : নিস্তেজ ৰোনাল্ডোঃ ফেভাৰিট পৰ্তুগালক ৰোধিলে ডি আৰ কংগোৱে!
