এক তীব্ৰ উত্তেজনাপূৰ্ণ খেলৰ পিছত ডালাছ ষ্টেডিয়ামৰ গেলাৰী পৰিষ্কাৰ কৰি জাপানৰ অনুৰাগীসকলে পুনৰবাৰ বিশ্বজুৰি প্ৰশংসা বুটলিবলৈ সক্ষম হৈছে

২০২৬ চনৰ ফিফা বিশ্বকাপৰ মজিয়াত কেৱল খেলুৱৈয়েই নহয়, বৰঞ্চ নিজৰ মহানুভৱতাৰে বিশ্ববাসীৰ হৃদয় জয় কৰিছে জাপানৰ সমৰ্থকসকলে । নেদাৰলেণ্ডৰ বিৰুদ্ধে অনুষ্ঠিত হোৱা এক তীব্ৰ উত্তেজনাপূৰ্ণ খেলৰ পিছত ডালাছ ষ্টেডিয়ামৰ গেলাৰী পৰিষ্কাৰ কৰি জাপানৰ অনুৰাগীসকলে পুনৰবাৰ বিশ্বজুৰি প্ৰশংসা বুটলিবলৈ সক্ষম হৈছে । আৱৰ্জনা সংগ্ৰহ কৰি থকা ‘চামুৰাই ব্লু’ৰ সমৰ্থকসকলৰ এই ছবি আৰু ভিডিঅ’সমূহ বৰ্তমান ছচিয়েল মিডিয়াত তীব্ৰ গতিত ভাইৰেল হৈ পৰিছে ।

খেলপথাৰত ৰোমাঞ্চকৰ ড্ৰ’

গ্ৰুপ-এফৰ এই উদ্বোধনী মেচখনত জাপানে নেদাৰলেণ্ডৰ বিৰুদ্ধে ২-২ গ’লত এক ৰোমাঞ্চকৰ ড্ৰ’ খেলে । খেলৰ আৰম্ভণিতে ভাৰ্জিল ভান ডাইক আৰু ক্ৰাইচেনচিঅ’ চামৰভিলৰ গ’লেৰে ডাচ দলটোৱে দুবাৰকৈ অগ্ৰগতি লাভ কৰিছিল । কিন্তু জাপানী দলটোৱেও হাৰ নমনা মনোভাব প্ৰদৰ্শন কৰি দুয়োবাৰেই প্ৰত্যুত্তৰ দিয়ে । খেলৰ শেষৰ মুহূৰ্তত, অৰ্থাৎ ৮৮ মিনিটত দাইচি কামাদাই এটা সুন্দৰ হেডাৰেৰে গ’ল পৰিশোধ কৰি খেলখন ড্ৰ’ কৰিবলৈ সক্ষম হয় ।

খেলৰ শেষত অনুৰাগীৰ চমক

মেচখনে ফুটবল প্ৰেমীক পৰিপূৰ্ণ মনোৰঞ্জন দিয়াৰ বিপৰীতে, খেলৰ শেষৰ হুইছেল বজোৱাৰ পিছত ষ্টেডিয়ামত যি দৃশ্য দেখা গ’ল, তাক লৈহে সমগ্ৰ বিশ্বৰ অনুৰাগীসকল অধিক আপ্লুত হৈ পৰিছে । জাপানৰ জাৰ্চি পিন্ধা সমৰ্থকসকলে খেল শেষ হোৱাৰ পিছতো ষ্টেডিয়াম এৰি নগৈ গেলাৰীত পৰি থকা বটল, প্লাষ্টিক, খাদ্যৰ পেকেট আৰু অন্যান্য আৱৰ্জনাসমূহ নিজ হাতেৰে বুটলি বেগৰ ভিতৰত ভৰাবলৈ আৰম্ভ কৰে ।

সাংস্কৃতিক পৰম্পৰা আৰু সামূহিক দায়িত্ব-

বহু দেশৰ বাবে এয়া আচৰিত যেন লাগিলেও, জাপানী সমৰ্থকসকলৰ বাবে এয়া আছিল ডাঙৰ আন্তঃৰাষ্ট্ৰীয় প্ৰতিযোগিতাবোৰত তেওঁলোকে বছৰ বছৰ ধৰি মানি অহা এক স্বাভাৱিক নিয়ম । জাপানৰ এই অভ্যাসে তেওঁলোকৰ উন্নত সংস্কৃতি, পৰিষ্কাৰ-পৰিচ্ছন্নতা, অংশীদাৰী স্থানৰ প্ৰতি সন্মান আৰু সামূহিক দায়িত্ববোধকে প্ৰতিফলিত কৰে ।

পূৰ্বৰ বিশ্বকাপতো দেখুৱাইছিল এই আদৰ্শ

উল্লেখ্য যে, ২০২২ চনৰ কাটাৰ বিশ্বকাপতো জাপানী অনুৰাগীৰ এই কাৰ্যই বিশ্বজুৰি তোলপাৰ লগাইছিল । সেইবাৰ জাপানে শক্তিশালী জাৰ্মানীক ২-১ গ’লত পৰাস্ত কৰি এক ঐতিহাসিক বিজয় সাব্যস্ত কৰাৰ পিছতো উল্লাস কৰাৰ পৰিৱৰ্তে ষ্টেডিয়ামৰ নিজৰ অংশটো পৰিষ্কাৰ কৰিহে খেলপথাৰ এৰিছিল । আনকি নিজৰ দলৰ খেল নথকা মেচ যেনে— কাটাৰ আৰু ইকুৱেডৰৰ মাজৰ উদ্বোধনী খেলখনৰ পিছতো জাপানী সমৰ্থকক ষ্টেডিয়াম পৰিষ্কাৰ কৰা দেখা গৈছিল ।

২০২৬ চনৰ বিশ্বকাপতো জাপানী অনুৰাগীৰ এই অনন্য কাৰ্যই পুনৰ প্ৰমাণ কৰিলে যে খেল কেৱল জয়-পৰাজয়ৰে নহয়, বৰঞ্চ এক সুন্দৰ মানসিকতাৰো পৰিচায়ক ।

লগতে পঢ়ক : কুৰাকাওক ৭-১ গ’লত পৰাস্ত কৰি ইতিহাস ৰচনা জাৰ্মানীৰ; ব্ৰাজিলৰ অভিলেখ ভংগ

তাৰকা খেলুৱৈ তথা দলৰ মেৰুদণ্ড স্বৰূপ নেইমাৰৰ অবিহনেই আজি মৰক্কোৰ বিৰুদ্ধে ফিফা বিশ্বকাপ ২০২৬ৰ অভিযান আৰম্ভ কৰিব পাঁচবাৰৰ বিশ্ব চেম্পিয়ন ব্ৰাজিলে

উত্তৰ আমেৰিকাত তীব্ৰ উত্তেজনাৰ মাজত অব্যাহত থকা ফিফা বিশ্বকাপত শনিবাৰে হাইপ্ৰ’ফাইল মেচত অবতীৰ্ণ হ’ব পাঁচবাৰৰ বিশ্ব চেম্পিয়ন ব্ৰাজিল । গ্ৰুপ পৰ্যায়ৰ এই আকৰ্ষণীয় মেচখনত ব্ৰাজিলৰ মুখামুখি হ’ব শক্তিশালী মৰক্কো । শনিবাৰে হ’বলগীয়া আন তিনিখন খেলত কাতাৰে ছুইজাৰলেণ্ডৰ, হাইটিয়ে স্কটলেণ্ডৰ আৰু অষ্ট্ৰেলিয়াই তুৰস্কৰ বিৰুদ্ধে খেলি নিজ নিজ বিশ্বকাপ অভিযান আৰম্ভ কৰিব ।

শীৰ্ষ ১০ ৰ যুঁজ: ইতিহাস আৰু পৰিসংখ্যা

বৰ্তমানৰ ফিফা ৰেংকিঙত ব্ৰাজিল ষষ্ঠ আৰু মৰক্কো অষ্টম স্থানত আছে । গ্ৰুপ পৰ্যায়ত শীৰ্ষ ১০ টা স্থানৰ ভিতৰত থকা দুটা দলৰ মাজত হ’বলগীয়া এইখনেই একমাত্ৰ খেল ।

ইতিহাসলৈ চালে দেখা যায় যে বিশ্বকাপত ব্ৰাজিল আৰু মৰক্কো মাত্ৰ এবাৰহে মুখামুখি হৈছে । ১৯৯৮ চনৰ সেই খেলখনত ৰোণাল্ডো, ৰিভালডো আৰু বেবেটোৰ দৰে তাৰকাৰে সজ্জিত ব্ৰাজিলে মৰক্কোক ৩-০ ব্যৱধানত পৰাস্ত কৰিছিল । অৱশ্যে, শেহতীয়াকৈ ২০২৩ চনৰ এখন প্ৰীতি মেচত মৰক্কোৱে ব্ৰাজিলক ২-১ গলত হৰুৱাই এক চমকপ্ৰদ প্ৰতিশোধ লৈছিল ।

সাধাৰণতে আফ্ৰিকান দলসমূহৰ বিৰুদ্ধে ব্ৰাজিলৰ অভিলেখ অতি সুন্দৰ । বিশ্বকাপত আফ্ৰিকান দলৰ বিৰুদ্ধে খেলা ৮ খন মেচৰ ভিতৰত ৭ খনতে তেওঁলোকে জয়লাভ কৰিছে । তেওঁলোকৰ একমাত্ৰ পৰাজয় হৈছিল ২০২২ চনৰ কাটাৰ বিশ্বকাপত কেমেৰুণৰ বিৰুদ্ধে ।

Hoje é dia de estreia da Seleção na Copa do Mundo de 2026. Hoje é o começo da nossa jornada rumo ao #hexa!

RODADA #1

⏰ 18H (EUA) • 19H (BRA)
🏟️ MetLife Stadium
📍 Nova Jérsei
📺 TV Globo, GE TV, Sportv, Cazé TV, SBT e NSports #BateNoPeito pic.twitter.com/pw46vxUAFo

— brasil (@CBF_Futebol) June 13, 2026

“কোনো দলেই ফেভাৰিট নহয়” – আশ্ৰাফ হাকিমী

মৰক্কোৱে আজিলৈকে বিশ্বকাপত নিজৰ কোনো উদ্বোধনী খেল জিকিব পৰা নাই । তথাপিও, মেচৰ পূৰ্বে এক সংবাদ মেলত মৰক্কোৰ অধিনায়ক আশ্ৰাফ হাকিমীয়ে নিজৰ দলক ‘আণ্ডাৰডগ’ বুলি ভাবিবলৈ অস্বীকাৰ কৰে । ব্ৰাজিলৰ ৫ টা বিশ্ব খিতাপৰ তুলনাত মৰক্কোৰ মাত্ৰ ৫ খন মেচ জয়ৰ ইতিহাস থকাৰ প্ৰসংগত তেওঁ কয় :

“বিশ্বকাপৰ দৰে এটা মঞ্চলৈ আহিলে কোনো ফেভাৰিট দল নাথাকে । খেলখন ৫০-৫০ হ’ব । যিটো দলে সুযোগসমূহ সঠিকভাৱে ব্যৱহাৰ কৰি নিখুঁত ফুটবল খেলিব, তেওঁলোকেই জিকিব । আমি আশাবাদী যে সেই দলটো আমিয়েই হ’ম ।”

প্ৰথম মেচৰ পৰা বাদ পৰিল নেইমাৰ

ব্ৰাজিল শিবিৰৰ বাবে আটাইতকৈ ডাঙৰ খবৰটো হ’ল দলৰ তাৰকা ফৰৱাৰ্ড নেইমাৰে মৰক্কোৰ বিৰুদ্ধে উদ্বোধনী খেলখনত অংশ ল’ব নোৱাৰিব । ব্ৰাজিলৰ মুখ্য প্ৰশিক্ষক কাৰ্লো আনচেলট্টিয়ে শনিবাৰে এই কথা নিশ্চিত কৰিছে । টুৰ্নামেণ্টৰ পূৰ্বে ভৰিৰ ডিম্বাকৃতিৰ মাংসপেশীত লাভ কৰা আঘাতৰ বাবে নেইমাৰ সম্পূৰ্ণ সুস্থ হৈ উঠা নাই ।

প্ৰশিক্ষক আনচেলট্টিয়ে সংবাদ মাধ্যমৰ আগত কয় :

“নেইমাৰে খেলপথাৰলৈ সোনকালে ঘূৰি আহিবলৈ কঠোৰ পৰিশ্ৰম কৰিছে । আশা কৰিছোঁ অহা সপ্তাহৰ পৰা তেওঁ দলৰ সৈতে সম্পূৰ্ণ প্ৰশিক্ষণত ভাগ ল’ব পাৰিব ।”

অৱশ্যে ব্ৰাজিলৰ পৰৱৰ্তী মেচসমূহ ক্ৰমে ১৯ জুনত হাইটি আৰু ২৪ জুনত স্কটলেণ্ডৰ বিৰুদ্ধে অনুষ্ঠিত হ’ব । প্ৰশিক্ষকগৰাকীয়ে আশা প্ৰকাশ কৰিছে যে এই দুয়োখন খেলত নেইমাৰক দলে লাভ কৰিব ।

খিতাপৰ অন্বেষণত ব্ৰাজিল

২০০২ চনৰ পিছত ব্ৰাজিলে পুনৰ এবাৰ বিশ্বকাপ খিতাপ দখল কৰাৰ লক্ষ্যৰে খেলপথাৰত নামিব । যোৱা কেইবাটাও সংস্কৰণত ব্ৰাজিল কোৱাৰ্টাৰ ফাইনেলৰ পৰাই বিদায় ল’বলগীয়া হৈছে, কেৱল ২০১৪ চনত ঘৰুৱা মাটিত তেওঁলোকে ছেমিফাইনাল খেলিছিল ।

লগতে পঢ়ক : মেক্সিকোৰ জয় বনাম ৰেড কাৰ্ডৰ অভিলেখ! বিশ্বকাপৰ উদ্বোধনী মেচতে ইতিহাস

ফিফা বিশ্বকাপ ২০২৬-ৰ উদ্বোধনী মেচতে সৃষ্টি হয় পূৰ্বে নোহোৱা এক অভিলেখ । মেক্সিকো আৰু দক্ষিণ আফ্ৰিকাৰ মাজত অনুষ্ঠিত হোৱা এই মেচখন ফুটবল বিশ্বকাপৰ ইতিহাসত এক এক অভূতপূৰ্ব আৰু বিৰল ক্ষণৰ সাক্ষী হৈ ৰ’ল ।

চলিত বিশ্বকাপৰ উদ্বোধনী মেচখনেই আন্তঃৰাষ্ট্ৰীয় ফুটবলৰ ইতিহাসত এক অভূতপূৰ্ব আৰু বিৰল ক্ষণৰ সাক্ষী হৈ ৰ’ল । মেক্সিকোৰ বিখ্যাত আছটেকা ষ্টেডিয়ামত (Azteca Stadium) অনুষ্ঠিত খেলখনত তীব্ৰ উত্তেজনাৰ মাজতে ৩ গৰাকীকৈ খেলুৱৈক ৰেড কাৰ্ড দেখুৱাই খেলপথাৰৰ পৰা বহিষ্কাৰ কৰা হয় । বিশ্বকাপৰ ইতিহাসত ইয়াৰ পূৰ্বে উদ্বোধনী মেচত কেতিয়াও এনে ঘটনা ঘটা নাই ।

খেলখনত সহ-আয়োজক মেক্সিকোৱে দক্ষিণ আফ্ৰিকাক ২-০ গলত পৰাস্ত কৰে যদিও সমগ্ৰ খেলখনত খেলুৱৈৰ আক্ৰমণাত্মক আচৰণ আৰু ৰেড কাৰ্ডৰ বিষয়টোহে চৰ্চাৰ কেন্দ্ৰবিন্দু হৈ পৰিছে ।

উদ্বোধনী মেচত প্ৰথমবাৰ : আটাইকেইখন পোনপটীয়া ৰেড কাৰ্ড

ফুটবল বিশ্বকাপৰ ইতিহাসত এইয়াই প্ৰথমবাৰৰ বাবে উদ্বোধনী মেচতে তিনিগৰাকী খেলুৱৈ বহিষ্কৃত হৈছে । আশ্চৰ্যজনকভাৱে, আটাইকেইখন কাৰ্ডেই আছিল পোনপটীয়া । অৰ্থাৎ, কোনো এগৰাকী খেলুৱৈয়েই দুখন হালধীয়া কাৰ্ডৰ ফলত নহয়, বৰঞ্চ গুৰুতৰ ফাউলৰ বাবে পোনপটীয়াকৈ খেলপথাৰ এৰিবলগীয়া হয় । ইয়াৰ ফলত দক্ষিণ আফ্ৰিকাৰ স্পেফেলো চিথোল আৰু থেম্বা জোৱানে তথা মেক্সিকোৰ চেছাৰ মণ্টেছ অতি কমেও পৰৱৰ্তী এখন মেচৰ বাবে নিলম্বিত হৈছে ।

প্ৰথম ৰেড কাৰ্ড : দ্বিতীয়াৰ্ধৰ আৰম্ভণিতে দক্ষিণ আফ্ৰিকাৰ স্পেফেলো চিথোলে মেক্সিকোৰ ব্ৰায়ান গুটিয়ৰেজক ডি-বক্সৰ ঠিক বাহিৰতে বিপজ্জনকভাৱে বগৰাই দিয়াত প্ৰথম ৰেড কাৰ্ডখন লাভ কৰে ।

দ্বিতীয় ৰেড কাৰ্ড : খেলৰ ৮৪ মিনিটত দক্ষিণ আফ্ৰিকাৰ বিপদ আৰু বৃদ্ধি পায় । ভিডিঅ’ ৰিভিউৰ সহায় লৈ ৰেফ্ৰীয়ে থেম্বা জোৱানক মেক্সিকোৰ ৰবাৰ্টো আলভাৰাডোক মুখত আঘাত কৰাৰ অপৰাধত খেলপথাৰৰ পৰা উলিয়াই দিয়ে ।

তৃতীয় ৰেড কাৰ্ড : খেলৰ একেবাৰে শেষৰ ফালে, অৰ্থাৎ ষ্টপেজ টাইমত মেক্সিকোৰ ডিফেণ্ডাৰ চেছাৰ মণ্টেছে দক্ষিণ আফ্ৰিকাৰ খুলিছো মুডাউক ফাউল কৰাৰ বাবে ৰেড কাৰ্ডৰ সন্মুখীন হয় ।

ভংগ হ’ল বিগত বিশ্বকাপৰ অভিলেখ-

সংখ্যাৰ দিশৰ পৰা চালে, ২০২২ চনৰ কাটাৰ বিশ্বকাপৰ সমগ্ৰ প্ৰতিযোগিতাখনত মাত্ৰ ৪ খনহে ৰেড কাৰ্ড দেখুওৱা হৈছিল । কিন্তু এইবাৰ প্ৰথমখন মেচতে ৩ খন ৰেড কাৰ্ড প্ৰদৰ্শন কৰা হ’ল । ইয়াৰ পূৰ্বে ২০০৬ চনৰ জাৰ্মানী বিশ্বকাপত পৰ্তুগাল আৰু নেডাৰলেণ্ডৰ মাজৰ বিখ্যাত খেলখনত সৰ্বাধিক ৪ গৰাকী খেলুৱৈক ৰেড কাৰ্ড (যাক ‘বেটেল অৱ নুৰেমবাৰ্গ’ বুলি জনা যায়) দেখুওৱা হৈছিল । সেই খেলখনত ১৬ খন হালধীয়া কাৰ্ডো ব্যৱহাৰ হৈছিল । ২০০৬ চনৰ সেই মেচখনৰ পিছত এইখনেই বিশ্বকাপৰ আটাইতকৈ আক্ৰমণাত্মক খেল হিচাপে পৰিগণিত হৈছে ।

পৰৱৰ্তী মেচৰ সমীকৰণ

এই খেলখনৰ পিছত দক্ষিণ আফ্ৰিকাই তেওঁলোকৰ পৰৱৰ্তী মেচখন চেক গণৰাজ্যৰ বিৰুদ্ধে খেলিব । আনহাতে, বিজয়ী দল মেক্সিকোৱে গুৱাদালাজাৰাত দক্ষিণ কোৰিয়াৰ মুখামুখি হ’ব । অৱশ্যে গুৰুত্বপূৰ্ণ খেলুৱৈৰ নিলম্বনে দুয়োটা দলকে পৰৱৰ্তী মেচত কিছু চিন্তাত পেলাব ।

লগতে পঢ়ক : ফিফা বিশ্বকাপ ২০২৬: উদ্বোধনী মেচত মেক্সিকোৰ হাতত ২-০ গলত পৰাস্ত দক্ষিণ আফ্ৰিকা

খেলৰ আৰম্ভণিৰে পৰাই আয়োজক দল মেক্সিকোৱে দক্ষিণ আফ্ৰিকাৰ ওপৰত সম্পূৰ্ণ আধিপত্য বিস্তাৰ কৰা দেখা গৈছিল

ফুটবল ইতিহাসৰ আটাইতকৈ বৃহৎ মহোৎসৱ ‘ফিফা বিশ্বকাপ ২০২৬’ৰ মেক্সিকোত এক চমকপ্ৰদ আৰম্ভণি ঘটিছে । বৃহস্পতিবাৰে মেক্সিকোৰ প্ৰতিষ্ঠিত এজটেকা ষ্টেডিয়ামত অনুষ্ঠিত হোৱা টুৰ্নামেণ্টৰ উদ্বোধনী খেলখনত আয়োজক মেক্সিকোৱে দক্ষিণ আফ্ৰিকাক ২-০ গলত পৰাস্ত কৰি এক ঐতিহাসিক জয়ৰে নিজৰ অভিযান আৰম্ভ কৰে । এই উল্লাসপূৰ্ণ মেচখন উপভোগ কৰিবলৈ ষ্টেডিয়ামত ৮০,৮২৪ গৰাকী দৰ্শকৰ ভিৰ কৰিছিল ।

কুইননেছ আৰু জিমেনেজৰ চমকপ্ৰদ গল

খেলৰ আৰম্ভণিৰে পৰাই আয়োজক দল মেক্সিকোৱে দক্ষিণ আফ্ৰিকাৰ ওপৰত সম্পূৰ্ণ আধিপত্য বিস্তাৰ কৰা দেখা গৈছিল । খেলৰ মাত্ৰ ৯ম মিনিটতে লীগৰ এই ছিজনৰ টপ স্ক’ৰাৰ জুলিয়ান কুইননেছে এক আকৰ্ষণীয় গল দি মেক্সিকোক ১-০ ব্যৱধানত আগুৱাই লৈ যায় । কলম্বিয়াত জন্মগ্ৰহণ কৰা ২৯ বছৰীয়া ফৰৱাৰ্ড কুইননেছৰ বাবে এই মেচখন অতি বিশেষ আছিল, কাৰণ এই খেলৰ জৰিয়তেই তেওঁ মেক্সিকো দলৰ (এল ত্ৰী) হৈ বিশ্বকাপত অভিষেক ঘটায় ।

ইয়াৰ পিছত খেলৰ ৬৬ সংখ্যক মিনিটত অভিজ্ঞ ষ্ট্ৰাইকাৰ ৰাউল জিমেনেজে এক সুন্দৰ হেডাৰৰ জৰিয়তে দলৰ হৈ দ্বিতীয়টো গল কৰে আৰু স্ক’ৰ ২-০ লৈ বৃদ্ধি কৰে । এই গলটোৰ সৈতেই জিমেনেজে তেওঁৰ আন্তঃৰাষ্ট্ৰীয় কেৰিয়াৰৰ ৪৬ সংখ্যক গল সম্পূৰ্ণ কৰে আৰু মেক্সিকোৰ সৰ্বাধিক গলদাতাসকলৰ তালিকাৰ দ্বিতীয় স্থানত থকা জাৰেড বৰ্গেটিৰ সমকক্ষ হয় । বৰ্তমান তেওঁ শীৰ্ষ স্থানত থকা জেভিয়াৰ “চিচাৰিটো” হাৰ্নাণ্ডেজতকৈ মাত্ৰ ছয়টা গল পিছপৰি আছে ।

ৰেড কাৰ্ডৰ বৰষুণ আৰু অনুশাসনহীনতা

তীব্ৰ উত্তেজনাপূৰ্ণ এই মেচখনত খেলুৱৈসকলৰ মাজত যথেষ্ট অনুশাসনহীনতাও দেখিবলৈ পোৱা যায় । খেলপথাৰত ফাউল কৰাৰ বাবে দক্ষিণ আফ্ৰিকাৰ স্পেফেলো চিথোল আৰু থেম্বা জ্ৱানে ৰেড কাৰ্ড লাভ কৰি খেলপথাৰ এৰিবলগীয়া হয় । ফলত দক্ষিণ আফ্ৰিকাই মাত্ৰ ৯ গৰাকী খেলুৱৈৰে খেলখন শেষ কৰিবলৈ বাধ্য হয় । ইপিনে, খেলৰ একেবাৰে শেষৰ মুহূৰ্তত অৰ্থাৎ ইঞ্জুৰী টাইমত মেক্সিকোৰ ডিফেণ্ডাৰ চিজাৰ মণ্টেছেও ৰেড কাৰ্ড লাভ কৰে ।

মেক্সিকো শিবিৰত সকাহ, দক্ষিণ আফ্ৰিকাৰ পৰৱৰ্তী লক্ষ্য চেক গণৰাজ্য

২০২২ চনৰ কাটাৰ বিশ্বকাপৰ প্ৰথম ৰাউণ্ডৰ পৰাই বিদায় লৈ হতাশ হোৱা মেক্সিকো দলটোৰ বাবে এই জয় অত্যন্ত গুৰুত্বপূৰ্ণ আছিল । এই বিজয়েৰে দলটোৱে ৩ পইণ্ট লাভ কৰি গ্ৰুপ ‘এ’ত সুন্দৰ স্থান দখল কৰিছে । আনহাতে, প্ৰথম মেচতে পৰাজয়ৰ মুখ দেখা দক্ষিণ আফ্ৰিকাৰ দলটোৱে অহা বৃহস্পতিবাৰে আটলাণ্টাত চেক গণৰাজ্যৰ বিৰুদ্ধে নিজৰ দ্বিতীয়খন খেলত অৱতীৰ্ণ হ’ব ।

উল্লেখ্য যে, এইবাৰৰ ফিফা বিশ্বকাপ কেইবাটাও দিশৰ পৰা ঐতিহাসিক । ফুটবল ইতিহাসত প্ৰথমবাৰৰ বাবে সৰ্বাধিক ৪৮টা দলে এই টুৰ্নামেণ্টত অংশগ্ৰহণ কৰিছে । লগতে এই বৃহৎ প্ৰতিযোগিতাখন মেক্সিকো, কানাডা আৰু আমেৰিকা যুক্তৰাষ্ট্ৰই যৌথভাৱে আয়োজন কৰিছে ।

লগতে পঢ়ক : ৪৮ টা দল, ১০৪ খন শ্বাসৰুদ্ধকৰ মেচ… আজিৰে পৰা আৰম্ভ ফিফা বিশ্বকাপৰ মহাৰণ

এতিয়া সমগ্ৰ বিশ্ব ফুটবল জ্বৰত আক্ৰান্ত । আজিৰে পৰা আৰম্ভ হ’ব ফুটবলৰ আটাইতকৈ ডাঙৰ আৰু আটাইতকৈ ৰোমাঞ্চকৰ মহোৎসৱ ‘ফিফা বিশ্বকাপ ২০২৬’ ।

৪ বছৰীয়া দীঘলীয়া অপেক্ষাৰ অন্ত পৰিল! আজি, ১১ জুনৰ পৰা বিশ্বজুৰি আৰম্ভ হ’বলৈ গৈ আছে ফুটবলৰ আটাইতকৈ ডাঙৰ আৰু আটাইতকৈ ৰোমাঞ্চকৰ মহোৎসৱ— ‘ফিফা বিশ্বকাপ ২০২৬’ । এইবাৰ ইতিহাসত প্ৰথমবাৰৰ বাবে তিনিখন দেশ আমেৰিকা যুক্তৰাষ্ট্ৰ, কানাডা আৰু মেক্সিকোই যৌথভাৱে আয়োজন কৰিছে এই মেগা ইভেণ্ট ।

কেৱল খেলপথাৰৰ তীব্ৰ উত্তেজনাই নহয়, খেল আৰম্ভ হোৱাৰ পূৰ্বে বিশ্বৰ জনপ্ৰিয় তাৰকাসকলৰ গ্লেমাৰ আৰু মেগা পাৰফৰমেন্সেৰে কঁপিব তিনিখন দেশৰ ক্ৰীড়াংগন ।

মেক্সিকোত শ্বাকিৰাৰ ধামাকা!

ঐতিহাসিক ‘মেক্সিকো চিটি ষ্টেডিয়াম’ত অনুষ্ঠিত হ’ব মেক্সিকোৰ উদ্বোধনী অনুষ্ঠান । বিশ্বমঞ্চত প্ৰথমবাৰৰ বাবে একেলগে ধুমুহা তুলিব পপ কুইন শ্বাকিৰা আৰু বাৰ্না বয়-এ । তেওঁলোকৰ শেহতীয়া হিট ট্ৰেক “Dai Dai”-ৰ লাইভ পাৰফৰমেন্সেৰে কঁপিব ষ্টেডিয়াম । ইয়াৰ উপৰিও টাইলা, জে বলভিন আৰু মানাৰ দৰে আন্তঃৰাষ্ট্ৰীয় তাৰকাই মেক্সিকান দৰ্শকক মতলীয়া কৰিব ।

কানাডাত নোৰা ফাতেহীৰ হট্ পাৰফৰমেন্স!

কানাডাৰ ‘বিএমঅ’ ফিল্ড’-ত বহিব সুৰ আৰু নৃত্যৰ মেলা । কানাডিয়ান-আমেৰিকান তাৰকা এলানিছ মৰিছেটৰ ৰাষ্ট্ৰীয় সংগীতেৰে অনুষ্ঠানৰ শুভাৰম্ভ হ’ব । কিন্তু আটাইতকৈ ডাঙৰ আকৰ্ষণ হ’ব বলীউডৰ হাৰ্টথ্ৰব নোৰা ফাতেহী, মাইকেল বুব্লে আৰু এলেচিয়া কাৰাৰ দৰে গ্লেমাৰাছ তাৰকাসকলৰ গতিশীল নৃত্য আৰু গীতৰ মায়াজাল!

আমেৰিকাত কেটি পেৰী আৰু পপ কুইন ‘লিছা’ৰ ধুমুহা!

আমেৰিকা যুক্তৰাষ্ট্ৰৰ কেলিফৰ্ণিয়াৰ ‘লছ এঞ্জেলছ ষ্টেডিয়াম’ত অনুষ্ঠিত হ’ব ফিফাৰ মূল আনুষ্ঠানিক উদ্বোধনী অনুষ্ঠান । ইয়াত মঞ্চ কঁপাবলৈ সাজু হৈছে বিশ্বখ্যাত পপ আইকন কেটি পেৰী, ৰেপাৰ ফিউচাৰ, অনিতা আৰু কে-পপ বেণ্ড ‘ব্লেকপিংক’ৰ তাৰকা লিছা! উল্লেখ্য যে, আফ্ৰিকান পপ ষ্টাৰ টাইলা-ই এইবাৰ আমেৰিকা আৰু মেক্সিকো দুয়োখন দেশৰে উদ্বোধনী অনুষ্ঠানত নিজৰ যাদু দেখুৱাব ।

লগতে পঢ়ক : ৪৮ টা দল, ১০৪ খন শ্বাসৰুদ্ধকৰ মেচ… আজিৰে পৰা আৰম্ভ ফিফা বিশ্বকাপৰ মহাৰণ