প্ৰধানমন্ত্ৰীয়ে কংগ্ৰেছক আঞ্চলিক দলসমূহৰ ওপৰত নিৰ্ভৰ কৰি জীয়াই থকা এটা পৰজীৱী ৰাজনৈতিক শক্তি বুলি অভিহিত কৰে

শনিবাৰে বেংগালুৰুত এক জনসভাত ভাষণ দি প্ৰধানমন্ত্ৰী নৰেন্দ্ৰ মোদীয়ে কংগ্ৰেছ দলক তীব্ৰ আক্ৰমণৰ লক্ষ্য কৰি লয় । বিৰোধী দলটোক মিত্ৰশক্তি আৰু জনসাধাৰণক “বিশ্বাসঘাতকতা” কৰাৰ অভিযোগ উত্থাপন কৰি প্ৰধানমন্ত্ৰীয়ে কংগ্ৰেছক আঞ্চলিক দলসমূহৰ ওপৰত নিৰ্ভৰ কৰি জীয়াই থকা এটা “পৰজীৱী ৰাজনৈতিক শক্তি” বুলি অভিহিত কৰে ।

জনবিশ্বাস হেৰুৱাইছে কংগ্ৰেছে-

আৰ্ট অৱ লিভিং ফাউণ্ডেচনৰ ৪৫ সংখ্যক বৰ্ষপূৰ্তি উদযাপনৰ বাবে কৰ্ণাটক ভ্ৰমণ কৰা প্ৰধানমন্ত্ৰীগৰাকীয়ে বিজেপি কৰ্মীসকলক সম্বোধন কৰি কয় যে কংগ্ৰেছৰ “ভুৱা গেৰাণ্টী”, দুৰ্বল শাসন আৰু আভ্যন্তৰীণ ক্ষমতাৰ যুঁজৰ বাবে সমগ্ৰ দেশতে দলটোৱে জনবিশ্বাস হেৰুৱাইছে । তেওঁ কয়, “কোনো এখন কংগ্ৰেছ শাসিত ৰাজ্য চৰকাৰে দ্বিতীয়বাৰৰ বাবে ক্ষমতালৈ অহা নাই। তেওঁলোকৰ শাসনৰ কিতাপখনত ‘সুশাসন’ৰ কোনো অধ্যায় নাই ।”

মিত্ৰশক্তিৰ সৈতে বিশ্বাসঘাতকতাৰ অভিযোগ-

প্ৰধানমন্ত্ৰীয়ে অভিযোগ কৰে যে ৰাজনৈতিক সমীকৰণ সলনি হ’লেই কংগ্ৰেছে নিজৰ মিত্ৰজোঁটৰ অংশীদাৰসকলক প্ৰতাৰণা কৰে । তামিলনাডুৰ ডিএমকেৰ উদাহৰণ দি তেওঁ কয় যে কংগ্ৰেছক এতিয়া প্ৰাসংগিক হৈ থাকিবলৈ আন কোনোবা দলৰ সহায়ৰ প্ৰয়োজন । ইয়াৰ উপৰিও নিৰ্বাচনী পৰাজয় গ্ৰহণ কৰিব নোৱাৰি কংগ্ৰেছে দেশৰ আদালত আৰু সাংবিধানিক প্ৰক্ৰিয়াক অপমান কৰা বুলিও তেওঁ তীব্ৰ ভাষাৰে সমালোচনা কৰে ।

বিজেপিৰ উত্থান আৰু উন্নয়নৰ ৰাজনীতি-

কংগ্ৰেছৰ হ্ৰাস পোৱা আসনৰ সংখ্যাৰ বিপৰীতে বিজেপিৰ প্ৰসাৰৰ কথা উল্লেখ কৰি মোদীয়ে কয়- এসময়ত ৪০০ তকৈ অধিক আসন লাভ কৰা কংগ্ৰেছে এতিয়া ১০০ ৰ সীমাও অতিক্ৰম কৰিব পৰা নাই । পশ্চিমবংগত ৩ জন বিধায়কৰ পৰা বিজেপি আজি ২০০ তকৈ অধিক বিধায়কৰ দলত পৰিণত হৈছে । কেৰালাতো বিজেপিৰ শক্তি ক্ৰমান্বয়ে বৃদ্ধি পাইছে আৰু অতি সোনকালে মিত্ৰজোঁটে সংখ্যাগৰিষ্ঠতা লাভ কৰিব ।

ৰাজ্য চৰকাৰসমূহক সমালোচনা-

কৰ্ণাটক, হিমাচল প্ৰদেশ আৰু তেলেংগানাৰ কংগ্ৰেছ চৰকাৰক লক্ষ্য কৰি প্ৰধানমন্ত্ৰীয়ে কয় যে এই ৰাজ্যসমূহত জনসাধাৰণৰ সমস্যা সমাধানৰ পৰিৱৰ্তে কেৱল নেতৃত্বৰ বিবাদ আৰু ক্ষমতাৰ যুঁজহে চলি আছে । কৰ্ণাটকৰ মুখ্যমন্ত্ৰীৰ চকীখনক লৈ চলি থকা অনিশ্চয়তাকো তেওঁ কটাক্ষ কৰে ।

শেষত প্ৰধানমন্ত্ৰীয়ে কয় যে ভাৰতৰ জনসাধাৰণে এতিয়া “কেলেংকাৰীৰ ৰাজনীতি” ত্যাগ কৰি কেৱল “স্থিৰতা আৰু উন্নয়ন”কহে বাছি লৈছে, যাৰ প্ৰমাণ শেহতীয়া বিভিন্ন নিৰ্বাচনী ফলাফলত প্ৰতিফলিত হৈছে ।

লগতে পঢ়ক : তামিলনাডুত ‘থালাপতি’ৰ ৰাজ্যাভিষেক, প্ৰধানমন্ত্ৰী মোদীৰ শুভেচ্ছা

নিৰ্বাচনৰ পূৰ্বে দেওবাৰে প্ৰধানমন্ত্ৰী মোদীয়ে দুৰ্নীতিৰ অভিযোগক লৈ তৃণমূল কংগ্ৰেছক তীব্ৰ সমালোচনা কৰে

পশ্চিম বংগ বিধানসভা নিৰ্বাচনৰ পূৰ্বে দেওবাৰে প্ৰধানমন্ত্ৰী নৰেন্দ্ৰ মোদীয়ে দুৰ্নীতিৰ অভিযোগক লৈ তৃণমূল কংগ্ৰেছক তীব্ৰ সমালোচনা কৰে । তেওঁ “গুণ্ডা আৰু চিণ্ডিকেট চলোৱা সমূহক” আত্মসমৰ্পণ কৰিবলৈ অন্তিম সুযোগ দি সকীয়নী প্ৰদান কৰে ।

বিষ্ণুপুৰত বিজেপিৰ এক নিৰ্বাচনী জনসভাক সম্বোধন কৰি প্ৰধানমন্ত্ৰী মোদীয়ে কয়, “মই টিএমচিৰ সকলো গুণ্ডা, চিণ্ডিকেট আৰু দুৰ্নীতিগ্ৰস্তক এক অন্তিম সুযোগ দিছো । ২৯ এপ্ৰিলৰ আগতে আপোনালোকৰ ওচৰৰ আৰক্ষী থানাত আত্মসমৰ্পণ কৰক । ৪ মে’ৰ পিছত কাকো ৰেহাই দিয়া নহ’ব । বিষ্ণুপুৰৰ মাফিয়া আৰু টিএমচিৰ চিণ্ডিকেটসমূহ, সাৱধানে শুনি লওক আৰু সহ্য কৰা নহ’ব ।”

পশ্চিম বংগৰ মহিলাসকলৰ বাবে প্ৰতিশ্ৰুতিৰ তালিকা দি তেওঁ কয় যে যদি ৰাজ্যখনত বিজেপি ক্ষমতালৈ আহে, তেন্তে মহিলাসকলে ‘মাতৃ শক্তি ভৰসা কাৰ্ড’ৰ জৰিয়তে বিনামূলীয়াকৈ ৰেচন আৰু বাৰ্ষিক ৩৬,০০০ টকা লাভ কৰিব ।

তেওঁ লগতে কয়, “ভগ্নীসকলৰ সুৰক্ষা আৰু আপোনালোকৰ সমৃদ্ধি বিজেপিৰ অগ্ৰাধিকাৰ । এতিয়াও টিএমচি চৰকাৰৰ দুৰ্নীতিৰ বাবে বংগৰ মহিলাসকলে চুবুৰীয়া ৰাজ্য অসম, ত্ৰিপুৰা, ওড়িশা আৰু বিহাৰত বিজেপি চৰকাৰৰ অধীনত লাভ কৰা সুবিধাৰ দৰে সুফল লাভ কৰা নাই । যদি বংগত বিজেপি চৰকাৰ গঠন হয়, তেন্তে দুখীয়া মহিলাসকলে বিনামূলীয়া ৰেচন পাব আৰু কোনেও তেওঁলোকৰ ৰেচন চুৰি কৰিব নোৱাৰিব ।”

প্ৰধানমন্ত্ৰীগৰাকীয়ে আৰু কয়, “বংগত বিজেপি চৰকাৰে মহিলাসকলক স্থায়ী ঘৰ নিৰ্মাণৰ বাবে প্ৰধানমন্ত্ৰী আৱাস যোজনাৰ অধীনত ১.৫ লাখ টকালৈকে সাহায্য প্ৰদান কৰিব । বৰ্তমান ‘মাতৃ শক্তি ভৰসা কাৰ্ড’ক লৈ বহুত চৰ্চা চলিছে । বংগৰ প্ৰতিগৰাকী ভগ্নী ইয়াক লৈ অতি সুখী; ইয়াৰ জৰিয়তে বংগৰ প্ৰতিগৰাকী ভগ্নীয়ে প্ৰতি বছৰে ৩৬,০০০ টকা লাভ কৰিব ।”

মুখ্যমন্ত্ৰী মমতা বেনাৰ্জীৰ টিএমচিৰ বাবে মহিলাসকল এক বৃহৎ ভোট বেংক । ২০২৬ চনৰ পশ্চিম বংগ বিধানসভা নিৰ্বাচনৰ পূৰ্বে বিজেপি আৰু টিএমচি উভয়েই মহিলা ভোটাৰসকলক আকৰ্ষণ কৰিবলৈ চেষ্টা চলাইছে ।

টিএমচিয়ে নিজাকৈ এক কল্যাণমূলক আঁচনি ‘লক্ষ্মী ভাণ্ডাৰ’ ঘোষণা কৰিছে, যাৰ অধীনত সাধাৰণ শাখাৰ মহিলাসকলে মাহে ১,৫০০ টকা আৰু অনুসূচিত জাতি/জনজাতিৰ মহিলাসকলে ১,৭০০ টকাকৈ লাভ কৰে । ইয়াৰ উপৰিও নিবনুৱা যুৱক-যুৱতীসকলক মাহিলী ১,৫০০ টকাকৈ সাহায্যৰ প্ৰতিশ্ৰুতি দিয়া হৈছে ।

লগতে পঢ়ক : তৃণমূল কংগ্ৰেছে মহিলাক প্ৰতাৰণা কৰিছেঃ মমতা চৰকাৰক কটাক্ষ প্ৰধানমন্ত্ৰী মোদীৰ

প্ৰধানমন্ত্ৰী মোদীয়ে উল্লেখ কৰে যে বিজেপি নেতৃত্বাধীন এন ডি এৰ বাবে দেশৰ স্বাৰ্থ সৰ্বোপৰি হোৱাৰ বিপৰীতে কিছুমান লোকৰ বাবে স্বাৰ্থপৰতাহে সকলো হৈ পৰে

প্ৰধানমন্ত্ৰী নৰেন্দ্ৰ মোদীয়ে শনিবাৰে মহিলা সংৰক্ষণৰ সংশোধনৰ বাবে লোকসভাত সংবিধান সংশোধনী বিধেয়কখন পৰাজিত হোৱাৰ বাবে বিৰোধী দলসমূহক তীব্ৰ সমালোচনা কৰে আৰু দেশৰ “মাতৃ তথা ভগ্নীসকলৰ” ওচৰত ক্ষমা বিচাৰি কয় যে সংসদত “নাৰী শক্তি বিধেয়কখন গৃহীত হোৱাত ব্যৰ্থ হয়”।

ৰাষ্ট্ৰক উদ্দেশ্যি দিয়া ভাষণত প্ৰধানমন্ত্ৰী মোদীয়ে কয় যে শুকুৰবাৰে সমগ্ৰ দেশৰ কোটি কোটি মহিলাৰ চকু সংসদৰ ওপৰত আছিল । তেওঁ উল্লেখ কৰে যে বিজেপি নেতৃত্বাধীন এন ডি এৰ বাবে দেশৰ স্বাৰ্থ সৰ্বোপৰি হোৱাৰ বিপৰীতে কিছুমান লোকৰ বাবে স্বাৰ্থপৰতাহে সকলো হৈ পৰে ।

তেওঁ কয়, “আজি মই এক গুৰুত্বপূৰ্ণ বিষয়ৰ ওপৰত আলোচনা কৰিবলৈ ইয়াত উপস্থিত হৈছো, বিশেষকৈ এই দেশৰ মহিলাসকলৰ বাবে । কেনেকৈ মহিলাৰ প্ৰগতি থমকি ৰৈছে, সেয়া দেশৰ প্ৰতিগৰাকী নাগৰিকে প্ৰত্যক্ষ কৰিছে, আমাৰ সৰ্বোত্তম প্ৰচেষ্টাৰ পিছতো আমি সফল হ’ব নোৱাৰিলোঁ । নাৰী শক্তি অধিনিয়মত সংশোধন কৰিব পৰা নগ’ল । ইয়াৰ বাবে মই দেশৰ সকলো মাতৃ আৰু ভগ্নীৰ ওচৰত ক্ষমা বিচাৰিছো ।”

তেওঁ লগতে কয়, “আমাৰ বাবে দেশৰ স্বাৰ্থই সৰ্বোপৰি । কিন্তু যেতিয়া কিছুমান লোকৰ বাবে দলীয় স্বাৰ্থই সকলো হৈ পৰে, যেতিয়া দলীয় স্বাৰ্থই দেশৰ স্বাৰ্থক চেৰ পেলাই যায়, তেতিয়া নাৰী শক্তি তথা দেশৰ স্বাৰ্থই ইয়াৰ পৰিণাম ভোগ কৰিবলগীয়া হয় । এইবাৰো ঠিক সেয়াই ঘটিল ।”

তেওঁ অভিযোগ কৰে যে কংগ্ৰেছ, ডি এম কে, টি এম চি আৰু সমাজবাদী পাৰ্টিৰ দৰে দলসমূহৰ “স্বাৰ্থকেন্দ্ৰিক ৰাজনীতিৰ” বাবে দেশৰ মহিলাসকলে মূল্য ভৰিবলগীয়া হৈছে । প্ৰধানমন্ত্ৰী মোদীয়ে কয় যে এগৰাকী মহিলাই সকলো পাহৰি যাব পাৰে, কিন্তু নিজৰ অপমান কেতিয়াও পাহৰি নাযায় ।

তেওঁ কয়, “কালি সমগ্ৰ দেশৰ কোটি কোটি মহিলাৰ চকু সংসদৰ ওপৰত আছিল । মহিলাৰ স্বাৰ্থত উত্থাপন কৰা এই প্ৰস্তাৱটো যেতিয়া পৰাস্ত হৈছিল, তেতিয়া কংগ্ৰেছ, ডি এম কে, এছ পি আৰু টি এম চিৰ দৰে দলবোৰে হাত চাপৰি বজোৱা দেখি গভীৰ দুখ পাইছো । মহিলাৰ অধিকাৰ কাঢ়ি লৈ তেওঁলোকে ডেস্কত চপৰিয়াইছিল । সেইবোৰ কেৱল চাপৰি নাছিল, সেইবোৰ আছিল মহিলাৰ মৰ্যাদা আৰু আত্মসন্মানৰ ওপৰত কৰা আঘাত ।”

উল্লেখ্য যে, শুকুৰবাৰে লোকসভাত বিৰোধী দলসমূহে সংবিধান সংশোধনী বিধেয়কখনৰ বিৰুদ্ধে ভোটদান কৰে । লোকসভাত সংবিধান (এশ একত্রিশতম সংশোধনী) বিধেয়ক, সীমা নিৰ্ধাৰণ বিধেয়ক আৰু কেন্দ্ৰীয় শাসিত অঞ্চল আইন (সংশোধনী) বিধেয়কখন একেলগে গৃহীত কৰিবলৈ লোৱা হৈছিল । তিনিখন বিধেয়কৰ বিতৰ্কৰ অন্তত সংবিধান সংশোধনী বিধেয়কখনৰ বিভাজন ভোটত ২৯৮ জন সদস্যই সমৰ্থনত আৰু ২৩০ জনে বিৰুদ্ধে ভোটদান কৰে ।

লগতে পঢ়ক : বিৰোধীয়ে নিজৰ পাপৰ শাস্তি নিশ্চিতভাৱে পাবঃ মহিলা সংৰক্ষণ বিধেয়ক সন্দৰ্ভত প্ৰধানমন্ত্ৰী মোদী

দেশবাসীক সম্বোধন কৰি দিয়া ভাষণত দেশৰ মহিলাসকলৰ ওচৰত ক্ষমা বিচাৰে প্ৰধানমন্ত্ৰী মোদীয়ে

প্ৰধানমন্ত্ৰী নৰেন্দ্ৰ মোদীয়ে শনিবাৰে দেশবাসীক সম্বোধন কৰি দিয়া ভাষণত দেশৰ মহিলাসকলৰ ওচৰত ক্ষমা বিচাৰে । মহিলাৰ অধিকাৰৰ পৰা বঞ্চিত কৰা দলসমূহৰ স্বাৰ্থপৰ ৰাজনীতিৰ বাবে তেওঁ প্ৰত্যক্ষভাৱে কংগ্ৰেছ, ডি এম কে, টি এম চি, সমাজবাদী পাৰ্টিক দোষাৰোপ কৰে ।

সংসদত যেতিয়া মহিলা সংৰক্ষণ বিধেয়ক ভোটদানৰ বাবে আহিছিল, তেতিয়া বিৰোধীয়ে বাধা দিছিল । কংগ্ৰেছ আৰু ইয়াৰ মিত্ৰ দলে বিধেয়কৰ বিৰুদ্ধে ভোট দিয়াত বিধেয়কখন গৃহীত নহ’ল । প্ৰধানমন্ত্ৰী মোদীয়ে কয় যে এই দলসমূহে বিভিন্ন অজুহাত দেখুৱাই দেশক বিপথে পৰিচালিত কৰিবলৈ চেষ্টা কৰিছিল । তেওঁ অভিযোগ কৰে যে কংগ্ৰেছ সদায় মহিলা সংৰক্ষণৰ বিৰোধী আৰু সদায় এনে প্ৰচেষ্টাত বাধাৰ সৃষ্টি কৰে ।

ক্ষমা খুজিলে প্ৰধানমন্ত্ৰী মোদীয়ে-

সকলো প্ৰচেষ্টা সত্ত্বেও বিধেয়কখন গৃহীত কৰিব পৰা নগ’ল বুলি মন্তব্য কৰে প্ৰধানমন্ত্ৰীগৰাকীয়ে । তেওঁ দেশৰ মাতৃ-ভগ্নীসকলৰ ওচৰত ইয়াৰ বাবে ক্ষমা বিচাৰে । তেওঁ কয় যে ভাৰতৰ নাৰীসকলৰ ক্ষমতা স্তব্ধ কৰি তেওঁলোকৰ সপোনবোৰ নিৰ্মমভাৱে প্ৰত্যাখ্যান কৰা হ’ল ।

প্ৰধানমন্ত্ৰী মোদীয়ে কয় যে যেতিয়া একাংশ দলে ৰাষ্ট্ৰৰ স্বাৰ্থতকৈ নিজৰ স্বাৰ্থক অগ্ৰাধিকাৰ দিয়ে, তেতিয়া ইয়াৰ পৰিণাম মহিলা আৰু দেশে ভুগিবলগীয়া হয় । সংসদত যেতিয়া এই প্ৰস্তাৱ পৰাজিত হৈছিল, তেতিয়া একাংশ বিৰোধী দলে উল্লাস আৰু হাত চাপৰি বজাইছিল । এয়া কেৱল হাতচাপৰি নহয়, নাৰীৰ স্বাভিমান আৰু আত্মসন্মানৰ ওপৰত প্ৰত্যক্ষ আক্ৰমণ ।

লগতে দেশৰ মহিলাসকলে এই ঘটনা কেতিয়াও পাহৰিব নোৱাৰে বুলি মন্তব্য কৰে প্ৰধানমন্ত্ৰীগৰাকীয়ে । এই নেতাসকল যেতিয়াই তেওঁলোকৰ মাজলৈ যাব তেতিয়াই তেওঁলোকে উত্তৰ দিব লাগিব । তেওঁ স্পষ্টকৈ উল্লেখ কৰে যে মহিলাৰ অধিকাৰৰ বিৰোধিতা কৰাৰ বাবে এই দলসমূহে নিশ্চয়কৈ শাস্তি লাভ কৰিব আৰু জনসাধাৰণেও তেওঁলোকক এটা শিক্ষা দিব ।

প্ৰধানমন্ত্ৰী মোদীয়ে কয় যে এই বিধেয়কখনক বাধা দি বিৰোধীয়ে কেৱল নাৰীকে নহয়, সংবিধান প্ৰণয়নকাৰীসকলৰ আৱেগকো অপমান কৰিছে । তেওঁ কয় যে এই বিধেয়কখন একবিংশ শতিকাৰ ভাৰতীয় মহিলাসকলক এক নতুন সুযোগ আৰু নতুন উচ্চতা দিয়াৰ প্ৰয়াস ।

লগতে পঢ়ক : বিৰোধীৰ বাধাৰ বাবেই গৃহীত নহ’ল মহিলা সংৰক্ষণ বিধেয়ক, ক্ষুদ্ৰ ৰাজনীতি কৰাৰ অভিযোগ প্ৰধানমন্ত্ৰী মোদীৰ

প্ৰধানমন্ত্ৰী নৰেন্দ্ৰ মোদীয়ে তৃণমূল কংগ্ৰেছক তীব্ৰ সমালোচনা কৰি অভিযোগ কৰে যে শাসকীয় দলটোৱে ‘বামপন্থী’সকলৰ শাসন শৈলীকে অনুকৰণ কৰিছে

শনিবাৰে প্ৰধানমন্ত্ৰী নৰেন্দ্ৰ মোদীয়ে তৃণমূল কংগ্ৰেছক তীব্ৰ সমালোচনা কৰি অভিযোগ কৰে যে শাসকীয় দলটোৱে ‘বামপন্থী’সকলৰ শাসন শৈলীকে অনুকৰণ কৰিছে আৰু পশ্চিমবংগত কোনো অৰ্থপূৰ্ণ পৰিৱৰ্তন অনাত ব্যৰ্থ হৈছে । মুৰ্ছিদাবাদত এক জনসভাত ভাষণ দি প্ৰধানমন্ত্ৰী মোদীয়ে কয় যে বংগৰ ৰাজনৈতিক ইতিহাসত বাৰে বাৰে প্ৰতিষ্ঠিত শক্তিসমূহৰ পতন দেখা গৈছে আৰু তেওঁ দৃঢ়তাৰে কয় যে ৰাজ্যখনৰ জনসাধাৰণে এতিয়া একেদৰেই তৃণমূল কংগ্ৰেছকো প্ৰত্যাখ্যান কৰিব ।

প্ৰধানমন্ত্ৰীগৰাকীয়ে কয়, “স্বাধীনতাৰ পিছৰে পৰা বংগক প্ৰত্যাহ্বান জনোৱা প্ৰতিগৰাকী ব্যক্তিৰ অহংকাৰ চূৰ্ণ-বিচূৰ্ণ হৈছে । প্ৰথমে ব্ৰিটিছ, তাৰ পিছত কংগ্ৰেছ আৰু শেষত বামপন্থীসকলৰ অহংকাৰৰ পতন হোৱা দেখা গৈছে । এতিয়া বংগৰ ৰাইজৰ হাতত তৃণমূলৰ অহংকাৰো চূৰ্ণ হ’ব ।” তেওঁ অভিযোগ কৰে যে ‘মা মাটি মানুহ’ৰ প্ৰতিশ্ৰুতিৰে ক্ষমতালৈ অহাৰ পিছত তৃণমূল কংগ্ৰেছে সেই লক্ষ্য পূৰণত ব্যৰ্থ হৈছে আৰু তাৰ পৰিৱৰ্তে বামপন্থীসকলৰ দৰেই আচৰণ কৰিছে ।

প্ৰধানমন্ত্ৰী মোদীয়ে কয়, “অত্যধিক আশা আৰু উৎসাহেৰে— ‘মা মাটি মানুহ’ৰ শ্লোগানত ভোল গৈ ৰাইজে তৃণমূল কংগ্ৰেছক এটা সুযোগ দিছিল; কিন্তু ক্ষমতাত বহাৰ লগে লগে তৃণমূল বামপন্থীসকলৰ ‘কাৰ্বন কপি’ হৈ পৰিল ।” লগতে তেওঁ দলটোক দুৰ্নীতিৰ জাল বিস্তাৰ কৰাৰ অভিযোগ উত্থাপন কৰি কয় যে পূৰ্বৰ চৰকাৰৰ সৈতে জড়িত উপাদানসমূহ বৰ্তমানৰ চৰকাৰৰ দিনতো চলি আছে । তেওঁ লগতে কয়, “বামপন্থীৰ সৈতে জড়িত সকলো গুণ্ডা আৰু ছিণ্ডিকেট এতিয়া তৃণমূললৈ স্থানান্তৰিত হৈছে… অস্ত্ৰ-শস্ত্ৰ, নিচাযুক্ত দ্ৰব্য আৰু গৰু সৰবৰাহৰ পৰা আৰম্ভ কৰি পূৰ্বে বামপন্থীৰ আমোলত থকা ‘কাট মানি’ আৰু কমিচন লোৱা ব্যৱস্থালৈকে সকলোবোৰৰ দায়িত্ব এতিয়া তৃণমূলে লৈছে ।”

শাসন আৰু ৰাষ্ট্ৰীয় সুৰক্ষাৰ ওপৰত বিজেপিৰ স্থিতি দোহাৰি প্ৰধানমন্ত্ৰী মোদীয়ে কয় যে দলটোৱে পশ্চিমবংগত UCC ৰূপায়ণ কৰিবলৈ সংকল্পবদ্ধ । তেওঁ কয়, “ৰাষ্ট্ৰৰ সুৰক্ষা আমাৰ বাবে প্ৰথম অগ্ৰাধিকাৰ । বিজেপিয়ে বংগত UCC ৰূপায়ণ কৰিবলৈ আৰু তুষ্টিকৰণৰ ৰাজনীতি চিৰদিনৰ বাবে সমাপ্ত কৰিবলৈ সংকল্প লৈছে ।” বিজেপিৰ নিৰ্বাচনী প্ৰচাৰক এক বহল ৰাজনৈতিক লক্ষ্য বুলি অভিহিত কৰি প্ৰধানমন্ত্ৰীগৰাকীয়ে কয় যে বংগত দলটোৰ এই যুঁজ তৃণমূলৰ “জংঘল ৰাজ” আৰু “ছিণ্ডিকেট ৰাজ”ৰ অন্ত পেলোৱাৰ বাবে ।

তেওঁ কয়, “বিজেপিয়ে লোৱা এই সংকল্প কেৱল নিৰ্বাচনী প্ৰতিশ্ৰুতি নহয়; ই তৃণমূলৰ ‘জংঘল ৰাজ’ আৰু ‘ছিণ্ডিকেট ৰাজ’ৰ অন্ত পৰাৰ সংকেতহে ।” তেওঁ লগতে কয় যে নিৰ্বাচনৰ পিছত ৰাজ্যখনৰ পৰিস্থিতি সলনি হ’ব আৰু ইয়াৰ বাবে জবাবদিহিতা নিশ্চিত কৰা হ’ব । প্ৰধানমন্ত্ৰী মোদীয়ে হুংকাৰ দি কয়, “বংগৰ জীয়ৰীসকল এতিয়া সুৰক্ষিত হ’ব । বংগৰ যিসকলে দুৰ্নীতিগ্ৰস্তসকলক আশ্ৰয় দিছে তেওঁলোকে সাৱধান হওক: ৪ মে’ৰ পিছত আপোনালোকে তেওঁলোকক পলায়ন কৰা দেখিব ।”

লগতে পঢ়ক : প্ৰথমে হাঁহি, পিছত হাতযোৰ কৰি সম্ভাষণ; সংসদত ৰাহুল গান্ধীৰ সৈতে বাৰ্তালাপ প্ৰধানমন্ত্ৰী মোদীৰ