শনিবাৰে প্ৰধানমন্ত্ৰী নৰেন্দ্ৰ মোদীয়ে প্ৰধানমন্ত্ৰীৰ অৰ্থনৈতিক উপদেষ্টা পৰিষদৰ সদস্যসকলৰ সৈতে এক উচ্চস্তৰীয় বৈঠকত মিলিত হয়

সমগ্ৰ বিশ্বই যেতিয়া ভূ-ৰাজনৈতিক উত্তেজনা, বাণিজ্যৰ অনিশ্চয়তা আৰু অৰ্থনৈতিক মন্থৰতাৰ সৈতে যুঁজি আছে, তেনে সময়তে ভাৰতীয় অৰ্থনীতিয়ে এক অভূতপূৰ্ব সফলতা অৰ্জন কৰিছে । সদ্যপ্ৰকাশিত চৰকাৰী তথ্য অনুসৰি, ২০২৫-২৬ বিত্তীয় বৰ্ষৰ চতুৰ্থ ত্ৰৈমাসিকত ভাৰতৰ অৰ্থনৈতিক বিকাশৰ হাৰে বজাৰৰ সকলো প্ৰত্যাশাকে অতিক্ৰম কৰি ৭.৮ শতাংশ স্পৰ্শ কৰিছে । এই ডাঙৰ সফলতাৰ পটভূমিত শনিবাৰে প্ৰধানমন্ত্ৰী নৰেন্দ্ৰ মোদীয়ে ‘প্ৰধানমন্ত্ৰীৰ অৰ্থনৈতিক উপদেষ্টা পৰিষদ’ৰ সদস্যসকলৰ সৈতে এক উচ্চস্তৰীয় বৈঠকত মিলিত হয় ।

বিশ্বজনীন সংকট আৰু দেশীয় সংস্কাৰৰ ওপৰত আলোচনা-

বৈঠকত প্ৰধানমন্ত্ৰী আৰু উপদেষ্টা পৰিষদৰ সদস্যসকলে গোলকীয় অস্থিৰতাৰ মাজতেও ভাৰতৰ অৰ্থনৈতিক বিকাশক কেনেকৈ অধিক গতিশীল কৰিব পাৰি, সেই সন্দৰ্ভত বিভিন্ন নতুন ধাৰণা আৰু কৌশলগত পদক্ষেপৰ বিষয়ে বিশদভাৱে আলোচনা কৰে । বিশেষকৈ দেশত ‘জীৱন ধাৰণৰ সহজতা’ আৰু ‘ব্যৱসায় কৰাৰ সহজতা’ বৃদ্ধিৰ বাবে প্ৰয়োজনীয় সংস্কাৰসমূহৰ ওপৰত বিশেষ গুৰুত্ব আৰোপ কৰা হয় । ইয়াৰ উপৰিও, বৰ্তমান চলি থকা পশ্চিম এছিয়াৰ সংঘাতৰ ফলত ভাৰত তথা বিশ্ব অৰ্থনীতিত কি প্ৰভাৱ পৰিব পাৰে, সদস্যসকলে তাৰো এক সামগ্ৰিক মূল্যায়ন প্ৰধানমন্ত্ৰীৰ সন্মুখত দাঙি ধৰে । এই বৈঠকখন এনে এক গুৰুত্বপূৰ্ণ সময়ত অনুষ্ঠিত হৈছে যেতিয়া বিশ্বৰ অন্যান্য উন্নত অৰ্থনীতিসমূহ অসমান বিকাশৰ ধাৰাৰে গতি কৰিছে ।

অৰ্থনৈতিক স্থিতিস্থাপকতাৰ বাবে প্ৰধানমন্ত্ৰীৰ ৭ টা বিশেষ আহ্বান-

পশ্চিম এছিয়াৰ সংঘাতৰ পৰা সৃষ্টি হ’ব পৰা ইন্ধনৰ নাটনি আৰু মূল্যবৃদ্ধিৰ সৈতে মোকাবিলা কৰিবলৈ যোৱা মাহতে প্ৰধানমন্ত্ৰী মোদীয়ে দেশবাসীক এক বিশেষ ৭ দফীয়া আহ্বান জনাইছিল । তেওঁ অৰ্থনৈতিক স্থিতিস্থাপকতা বৃদ্ধিৰ বাবে নাগৰিকসকলক ঘৰৰ পৰা কাম কৰা প্ৰক্ৰিয়াক অগ্ৰাধিকাৰ দিবলৈ, ইন্ধনৰ ব্যৱহাৰ হ্ৰাস কৰিবলৈ আৰু এবছৰৰ বাবে বিদেশ ভ্ৰমণ পৰিহাৰ কৰিবলৈ অনুৰোধ জনায় । ইয়াৰ উপৰিও তেওঁ স্বদেশী সামগ্ৰী গ্ৰহণ কৰা, ৰন্ধন তেলৰ ব্যৱহাৰ হ্ৰাস কৰা, প্ৰাকৃতিক কৃষিক আকোৱালি লোৱা আৰু সোণ ক্ৰয় সীমিত কৰাৰ ওপৰত গুৰুত্ব দিয়ে ।

পেট্ৰ’ল-ডিজেলৰ নিৰ্ভৰশীলতা আৰু মূল্যৰ তাৰতম্য কমাবলৈ তেওঁ ভাৰতৰ পৰিবহণ ব্যৱস্থাত পৰিৱৰ্তন অনাৰ আহ্বান জনায় । প্ৰধানমন্ত্ৰীয়ে নাগৰিকসকলক উপলব্ধ স্থানত মেট্ৰ’ আৰু ৰাজহুৱা পৰিবহণ ব্যৱহাৰ কৰিবলৈ, ব্যক্তিগত বাহনৰ প্ৰয়োজন হ’লে কাৰপুলিং কৰিবলৈ, সামগ্ৰী কঢ়িয়াবলৈ ৰেল পৰিবহণক অগ্ৰাধিকাৰ দিবলৈ আৰু সম্ভৱপৰ ঠাইত বৈদ্যুতিক বাহনৰ ব্যৱহাৰ বৃদ্ধি কৰিবলৈ বিশেষ অনুৰোধ জনায় ।

পৰিসংখ্যাত ভাৰতৰ অৰ্থনৈতিক সফলতা-

৫ জুনত চৰকাৰে মুকলি কৰা চৰকাৰী তথ্যই ভাৰতৰ মজবুত অৰ্থনৈতিক ভেটিৰ কথাকে প্ৰমাণ কৰিছে । ২০২৬ বিত্তীয় বৰ্ষৰ চতুৰ্থ ত্ৰৈমাসিকত ভাৰতৰ প্ৰকৃত মুঠ ঘৰুৱা উৎপাদন (GDP) বছৰি ৭.৮ শতাংশ হাৰত বৃদ্ধি পাইছে, আনহাতে সমগ্ৰ বছৰটোৰ বিকাশৰ হাৰ ৭.৭ শতাংশ নিৰ্ধাৰণ কৰা হৈছে । স্থিৰ মূল্যত প্ৰকৃত জিডিপি চতুৰ্থ ত্ৰৈমাসিকত ৮৭.৭৭ লাখ কোটি টকা বুলি অনুমান কৰা হৈছে, যিটো যোৱা বিত্তীয় বৰ্ষৰ একেটা ত্ৰৈমাসিকত ৮১.৪০ লাখ কোটি টকা আছিল । আনহাতে এই ত্ৰৈমাসিকৰ বাবে নামমাত্ৰ জিডিপি ৯৪.৬৫ লাখ কোটি টকা বুলি অনুমান কৰা হৈছে, যিয়ে ৯.১ শতাংশ বিকাশ প্ৰদৰ্শন কৰিছে ।

সমগ্ৰ ২০২৬ বিত্তীয় বৰ্ষৰ বাবে, প্ৰকৃত জিডিপি ৩২৩.১২ লাখ কোটি টকা হ’ব বুলি অনুমান কৰা হৈছে, যিটো পূৰ্বৰ বিত্তীয় বৰ্ষৰ তুলনাত ৭.৭ শতাংশ বিকাশৰ হাৰ প্ৰতিফলিত কৰে । একেদৰে নামমাত্ৰ জিডিপি ৩৪6.৩৬ লাখ কোটি টকা বুলি অনুমান কৰা হৈছে, যিটো পূৰ্বৱৰ্তী বৰ্ষৰ তুলনাত ৮.৯ শতাংশ বৃদ্ধি পাইছে ।

অৰ্থনৈতিক কাৰ্যকলাপৰ এক গুৰুত্বপূৰ্ণ মাপকাঠি অৰ্থাৎ মুঠ মূল্য সংযোজনৰ ক্ষেত্ৰতো সুন্দৰ প্ৰদৰ্শন দেখা গৈছে । পূৰ্ণ বিত্তীয় বৰ্ষত প্ৰকৃত জিভিএ ৭.৯ শতাংশ আৰু নামমাত্ৰ জিভিএ ৯.১ শতাংশ বৃদ্ধি পাব বুলি আশা কৰা হৈছে । কেৱল চতুৰ্থ ত্ৰৈমাসিকতে প্ৰকৃত জিভিএ বৃদ্ধিৰ হাৰ আছিল ৭.৯ শতাংশ আৰু নামমাত্ৰ জিভিএ ৯.৯ শতাংশ বৃদ্ধি পাইছিল ।

কোনবোৰ খণ্ডই ধৰি ৰাখিলে বিকাশৰ গতি ?

চৰকাৰী তথ্য অনুসৰি, ভাৰতৰ এই ক্ষিপ্ৰ বিকাশৰ মূল চালিকা শক্তি আছিল অৰ্থনীতিৰ দ্বিতীয়ক (ম্যানুফেকচাৰিং) আৰু তৃতীয়ক (সেৱা) খণ্ড । স্থিৰ মূল্যত এই খণ্ড দুটাৰ বিকাশৰ হাৰ আছিল ক্ৰমে ৮.৮ শতাংশ আৰু ৯.৩ শতাংশ । আনহাতে, মূলতঃ কৃষি আৰু মীনপালনৰ সৱল সমৰ্থনত প্ৰাথমিক খণ্ডই ৩.২ শতাংশ বিকাশ পঞ্জীয়ন কৰিবলৈ সক্ষম হৈছে ।

অৰ্থনৈতিক বিশেষজ্ঞসকলৰ মতে, বিশ্বজুৰি চলি থকা তীব্ৰ অৰ্থনৈতিক মন্থৰতা আৰু ভূ-ৰাজনৈতিক উত্তেজনাৰ মাজত ভাৰতৰ এই বাৰ্ষিক বিকাশ সঁচাকৈয়ে প্ৰশংসনীয় । এই প্ৰদৰ্শনে অনাগত দিনত ভাৰতক বিশ্বৰ এক অন্যতম সুস্থিৰ আৰু শক্তিশালী অৰ্থনীতি হিচাপে প্ৰতিষ্ঠা কৰিব বুলি আশা কৰা হৈছে ।

লগতে পঢ়ক : পৰিৱেশ সুৰক্ষা আৰু বহনক্ষম উন্নয়নৰ সংকল্প প্ৰধানমন্ত্ৰী মোদীৰ, ‘এক পেড় মা কে নাম’ পদক্ষেপৰ প্ৰশংসা

অনাতাৰ অনুষ্ঠান ‘মন কী বাত’ত দেশৰ ক্ৰীড়াক্ষেত্ৰৰ এক অভূতপূৰ্ব সাফল্যৰ কথাৰে নিজৰ বক্তব্য আৰম্ভ কৰে প্ৰধানমন্ত্ৰীয়ে

প্ৰধানমন্ত্ৰী নৰেন্দ্ৰ মোদীয়ে দেওবাৰে তেওঁৰ জনপ্ৰিয় অনাতাৰ অনুষ্ঠান ‘মন কী বাত’ত দেশৰ ক্ৰীড়াক্ষেত্ৰৰ এক অভূতপূৰ্ব সাফল্যৰ কথাৰে নিজৰ বক্তব্য আৰম্ভ কৰে । অলপতে ৰাঁচীত অনুষ্ঠিত ২৯ সংখ্যক ৰাষ্ট্ৰীয় ছিনিয়ৰ এথলেটিক্ছ ফেডাৰেচন প্ৰতিযোগিতা ২০২৬ ত ভাৰতীয় এথলিটসকলৰ অনবদ্য প্ৰদৰ্শনক প্ৰশংসা কৰি প্ৰধানমন্ত্ৰীয়ে কয় যে মাত্ৰ দুদিনৰ ভিতৰতে ১০০ মিটাৰ দৌৰৰ ৰাষ্ট্ৰীয় অভিলেখ তিনিবাৰকৈ ভংগ হৈছে । এই ঐতিহাসিক ক্ষণক চুই চাই প্ৰধানমন্ত্ৰীয়ে দেশৰ দুই তাৰকা স্প্ৰীণ্টাৰ গুৰিন্দৰবীৰ সিং আৰু অনিমেষ কুজুৰৰ সৈতে পোনপটীয়া বাৰ্তালাপত মিলিত হয় ।

প্ৰধানমন্ত্ৰীৰ সৈতে ক্ৰীড়াবিদদ্বয়ৰ বাৰ্তালাপ :

ক্ৰীড়াংগনৰ প্ৰতিদ্বন্দ্বিতা আৰু বন্ধুত্ব অনুষ্ঠানত প্ৰধানমন্ত্ৰী মোদীৰ সৈতে হোৱা বাৰ্তালাপত গুৰিন্দৰবীৰ সিং আৰু অনিমেষ কুজুৰে তেওঁলোকৰ কঠিন অনুশীলন, পাৰস্পৰিক বন্ধুত্ব আৰু ট্ৰেকৰ স্বাস্থ্যকৰ প্ৰতিযোগিতাৰ বিষয়ে মুকলিকৈ কথা পাতে । ভাৰতীয় নৌসেনাত কৰ্মৰত গুৰিন্দৰবীৰে প্ৰধানমন্ত্ৰীক কয় যে খেলপথাৰৰ বাহিৰত তেওঁলোক অত্যন্ত ভাল বন্ধু আৰু অনুশীলনীৰ সময়ত ইজনে সিজনক সহায় কৰে, কিন্তু যেতিয়াই ট্ৰেকত দৌৰ আৰম্ভ হয়, তেতিয়া তেওঁলোক কেৱল নিষ্ঠাবান প্ৰতিদ্বন্দ্বী ।

প্ৰধানমন্ত্ৰীৰ আগত গুৰিন্দৰবীৰে শ্বেয়াৰ কৰিলে ল’ৰালিৰ আৱেগিক কাহিনী কথা প্ৰসংগত ২৫ বছৰীয়া খেলুৱৈ গুৰিন্দৰবীৰে প্ৰধানমন্ত্ৰী মোদীৰ আগত নিজৰ ল’ৰালি কালৰ এটা আৱেগিক স্মৃতি ৰোমন্থন কৰে । তেওঁ জনায় যে সৰুতে যেতিয়া তেওঁৰ মতাকে দূৰদৰ্শন (টিভি) চোৱাত বাধা দি পঢ়া-শুনাত গুৰুত্ব দিবলৈ কৈছিল, তেতিয়া তেওঁ মাকক দৃঢ়তাৰে কৈছিল যে এদিন মাকে তেওঁক দূৰদৰ্শনৰ পৰ্দাত দেখিবলৈ পাব । আজি সমগ্ৰ দেশে তেওঁৰ সাফল্য টিভিত দেখা পাইছে । ক্ৰীড়াবিদগৰাকীয়ে আনন্দৰে কয়, “আজি যেতিয়া তেওঁলোকে মোক দূৰদৰ্শনত দেখে, মোৰ বৰ ভাল লাগে ।”

ৰাঁচীত কেনেকৈ সৃষ্টি হৈছিল ইতিহাস ?

ৰাঁচীৰ ট্ৰেকত এইবাৰ এক বিৰল ড্ৰামা দেখিবলৈ পোৱা গৈছিল । প্ৰতিযোগিতাখনৰ ছেমি ফাইনেলত গুৰিন্দৰবীৰে ১০.১৭ ছেকেণ্ড লৈ সাময়িকভাৱে এটা নতুন ৰাষ্ট্ৰীয় অভিলেখ গঢ়িছিল, কিন্তু তাৰ কিছু সময় পিছতে সতীৰ্থ স্প্ৰীণ্টাৰ অনিমেষ কুজুৰে ১০.১৫ ছেকেণ্ডৰ প্ৰচেষ্টাৰে তাক অতিক্ৰম কৰে । অৱশ্যে ফাইনেলত গুৰিন্দৰবীৰে ১০.০৯ ছেকেণ্ডৰ এক চাঞ্চল্যকৰ আৰু ঐতিহাসিক সমাপ্তিৰে দৃঢ়তাৰে নিজৰ অভিলেখ পুনৰ ঘূৰাই আনে । ইয়াৰ লগে লগে তেওঁ ১০.১০ ছেকেণ্ডৰ সীমা অতিক্ৰম কৰা ভাৰতৰ প্ৰথমগৰাকী পুৰুষ স্প্ৰীণ্টাৰ হিচাপে পৰিগণিত হয় ।

কমনৱেলথ-এছিয়ান গেমছলৈ যোগ্যতা অৰ্জন আৰু ক্ৰীড়া মন্ত্ৰীৰ অভিনন্দন গুৰিন্দৰবীৰৰ এই উল্লেখনীয় প্ৰচেষ্টাই কেৱল ৰাষ্ট্ৰীয় অভিলেখেই নতুনকৈ নিলিখিলে, বৰঞ্চ ইয়াৰ জৰিয়তে তেওঁ আৰু অনিমেষ দুয়োজনে গ্লাছগো কমনৱেলথ গেমছ আৰু এছিয়ান গেমছৰ বাবেও যোগ্যতা অৰ্জন কৰিবলৈ সক্ষম হৈছে ।

এই অভূতপূৰ্ব সাফল্যৰ পিছতে কেন্দ্ৰীয় ক্ৰীড়া মন্ত্ৰী মনসুখ মাণ্ডৱীয়ায়ো ছচিয়েল মিডিয়া প্লেটফৰ্ম ‘X’ (পূৰ্বৰ টুইটাৰ) ত খেলুৱৈগৰাকীক অভিনন্দন জনায়। মন্ত্ৰীগৰাকীয়ে লিখে— “১০.০৯ ছেকেণ্ড! গুৰিন্দৰবীৰ সিং, আপুনি ইতিহাস পুনৰ লিখিলে। সমগ্ৰ দেশে আপোনাক লৈ অত্যন্ত গৌৰৱি !” প্ৰধানমন্ত্ৰীৰ ‘মন কী বাত’ত আজি এই দুই ক্ৰীড়াবিদৰ কাহিনীয়ে সমগ্ৰ দেশবাসীক অনুপ্ৰাণিত কৰি তুলিছে ।

লগতে পঢ়ক : দিল্লীত প্ৰধানমন্ত্ৰী মোদীক সাক্ষাৎ মুখ্যমন্ত্ৰী ড০ হিমন্ত বিশ্ব শৰ্মাৰ

প্ৰধানমন্ত্ৰীগৰাকীয়ে দেশৰ সম্পদৰ ওপৰত পৰা বোজা হ্ৰাস কৰিবলৈ সকলোকে সামূহিক দায়িত্ব ল’বলৈ অনুৰোধ জনায়

পশ্চিম এছিয়াৰ বৰ্তমানৰ উত্তপ্ত পৰিস্থিতি আৰু ইয়াৰ ফলত দেশৰ অৰ্থনীতিত পৰিব পৰা প্ৰভাৱক লৈ দেশবাসীক সজাগ হ’বলৈ আহ্বান জনাইছে প্ৰধানমন্ত্ৰী নৰেন্দ্ৰ মোদীয়ে । সোমবাৰে গুজৰাটৰ বদোদৰাত এক বিশাল জনসভাত ভাষণ দি প্ৰধানমন্ত্ৰীগৰাকীয়ে দেশৰ সম্পদৰ ওপৰত পৰা বোজা হ্ৰাস কৰিবলৈ সকলোকে সামূহিক দায়িত্ব ল’বলৈ অনুৰোধ জনায় ।

প্ৰধানমন্ত্ৰীয়ে উল্লেখ কৰে যে ক’ভিড মহামাৰী আৰু গোলকীয় অৰ্থনৈতিক প্ৰত্যাহ্বানৰ পিছত পশ্চিম এছিয়াৰ শেহতীয়া সংঘাত বিশ্বৰ বাবে আন এক ডাঙৰ সংকট । তেওঁ কয়, “ভাৰত এই অশান্ত পৰিস্থিতিৰ পৰা অস্পৰ্শ নহয় । গোলকীয় যোগান শৃংখলা ব্যাহত হোৱাৰ লগতে আমদানি কৰা সামগ্ৰীৰ মূল্য বৃদ্ধি পাইছে । এনে সময়ত আমি সকলোৱে একগোট হৈ বৈদেশিক মুদ্ৰাৰ ব্যয় হ্ৰাস কৰাটো প্ৰয়োজনীয় ।”

আমদানি হ্ৰাস আৰু স্বনিৰ্ভৰশীলতাৰ ওপৰত গুৰুত্ব-

প্ৰধানমন্ত্ৰী মোদীয়ে খাৰুৱা তেলৰ ওপৰত নিৰ্ভৰশীলতা কম কৰিবলৈ পেট্ৰ’ল-ডিজেলৰ ব্যৱহাৰত মিতব্যয়ী হ’বলৈ পৰামৰ্শ দিয়ে । তেওঁ ৰাইজক ৰাজহুৱা পৰিবহণ ব্যৱহাৰ কৰা, কাৰ-পুলিং কৰা আৰু বৈদ্যুতিক বাহনক অগ্ৰাধিকাৰ দিবলৈ আহ্বান জনায় । ইয়াৰ উপৰিও, বৈদেশিক মুদ্ৰা ৰাহি কৰিবলৈ বৰ্তমানৰ বাবে সোণ ক্ৰয় স্থগিত ৰাখিবলৈও তেওঁ দেশবাসীক অনুৰোধ কৰে ।

দৈনন্দিন জীৱনত সৰু সংকল্পৰ শক্তি-

“যিদৰে টোপাল টোপাল পানীৰে কলহ ভৰে, তেনেদৰে আমাৰ সৰু সৰু পদক্ষেপে দেশৰ অৰ্থনীতি সবল কৰিব,”—প্ৰধানমন্ত্ৰীয়ে এইদৰে মন্তব্য কৰে । তেওঁ চৰকাৰী আৰু ব্যক্তিগত উভয় খণ্ডতে ডিজিটেল প্ৰযুক্তি ব্যৱহাৰ কৰি ভাৰ্চুৱেল মিটিং আৰু ‘ৱৰ্ক ফ্ৰম হোম’ সংস্কৃতি গ্ৰহণ কৰিবলৈ উৎসাহিত কৰে ।

‘ভোকাল ফৰ লোকেল’ক জনআন্দোলন কৰাৰ আহ্বান-

বিদেশী সামগ্ৰীৰ পৰিৱৰ্তে স্থানীয় সামগ্ৰী আদৰি ল’বলৈ আহ্বান জনাই মোদীয়ে কয় যে ‘ভোকাল ফৰ লোকেল’ক কেৱল শ্লোগান নহয়, বৰঞ্চ এক জনআন্দোলনত পৰিণত কৰিব লাগে । ইয়াৰ দ্বাৰা দেশৰ থলুৱা উদ্যোগীসকল উপকৃত হ’ব আৰু আমদানিৰ নিৰ্ভৰশীলতা হ্ৰাস পাব ।

প্ৰধানমন্ত্ৰীয়ে দেশবাসীক আশ্বাস দি কয় যে যিদৰে ভাৰতে ক’ভিডৰ দৰে ভয়াবহ সংকট অতিক্ৰম কৰিছিল, একেদৰে সমূহীয়া প্ৰচেষ্টাৰে এই বৰ্তমানৰ প্ৰত্যাহ্বানো অতিক্ৰম কৰিবলৈ সক্ষম হ’ব । চৰকাৰে জনসাধাৰণৰ ওপৰত যাতে গোলকীয় সংকটৰ প্ৰভাৱ নূন্যতম হয়, তাৰ বাবে অহৰহ কাম কৰি আছে বুলিও তেওঁ উল্লেখ কৰে ।

লগতে পঢ়ক : পশ্চিম এছিয়াৰ সংকটক লৈ উদ্বিগ্ন প্ৰধানমন্ত্ৰী; দেশবাসীক পুনৰ “ভকেল ফৰ লোকেল” হোৱাৰ আহ্বান