ড’নাল্ড ট্ৰাম্পৰ বিস্ফোৰক মন্তব্য

দেওবাৰে থাইলেণ্ড আৰু কম্বোডিয়াৰ নেতাই তেওঁলোকৰ সেনাৰ মাজত বৰ্ধিত যুদ্ধবিৰতি চুক্তি স্বাক্ষৰ কৰে।এই উপলক্ষে আমেৰিকাৰ ৰাষ্ট্ৰপতি ড’নাল্ড ট্ৰাম্পো উপস্থিত থাকে।

ৰাষ্ট্ৰপতি গৰাকীয়ে কয় যে তেওঁৰ প্ৰশাসনে সেই আঠখন যুদ্ধৰ ভিতৰত এখন আছিল যিখন মাত্ৰ আঠ মাহৰ ভিতৰতে শেষ কৰিছিল অৰ্থাৎ গড়ে প্ৰতিমাহে এখনকৈ যুদ্ধ শেষ হয়।

তেওঁ কয় যে এতিয়া মাত্ৰ এখন হে যুদ্ধ বাকী আছে, যিখন শেহতীয়াকৈ পাকিস্তান আৰু আফগানিস্তানৰ মাজত আৰম্ভ হৈছে।ট্ৰাম্পে এই সমস্যা শীঘ্ৰে সমাধান কৰিব বুলি আস্থা প্ৰকাশ কৰে।

তেওঁ লগতে কয় যে, ‘মই দুয়োখন দেশকে জানো।পাকিস্তানৰ ফিল্ড মাৰ্শ্বাল আৰু প্ৰধানমন্ত্ৰী দুয়োজনেই অতি ভাল মানুহ। মই নিশ্চিত যে মই এই কথাটো অতি সোনকালে সমাধান কৰিম।’

তেওঁ আৰু কয় যে, ‘কোৱাটো উচিত নহয় যে এইটো মোৰ চখ,কাৰণ এইটো এটা অতি গুৰুতৰ বিষয়।কিন্তু সঁচা কথা ক’বলৈ গ’লে মই ইয়াত ভাল আৰু মই এইবোৰ কৰি ভাল পাওঁ।যদিও এই কাম ৰাষ্ট্ৰসংঘই (UN) কৰিব লাগে, কিন্তু তেওঁলোকে নকৰে।’

ৰাষ্ট্ৰসংঘক ইতিকিং কৰি তেওঁ কয় যে, ‘মই ভাষণ দি থকাৰ সময়ত ৰাষ্ট্ৰসংঘই আনকি মোৰ টেলিপ্ৰম্পটাৰটোও বন্ধ কৰি দিছিল।মই টেলিপ্ৰম্প্টাৰ নোহোৱাকৈ কথা ক’ব লগা হ’ল।তেওঁলোক সেইবোৰত ভাল’।

‘এস্কেলেটৰটোৱেও ভালদৰে কাম কৰা নাছিল; বন্ধ হৈ গৈছিল।কিন্তু ৰাষ্ট্ৰসংঘৰ বহুত সম্ভাৱনা আছে, তেওঁলোকে কিবা এটা কৰিলে ভাল আছিল।এই বিষয়ত তেওঁলোকে আমাক সহযোগ কৰা নাছিল।’

লগতে পঢ়ক: ড’নাল্ড ট্ৰাম্পৰে আলোচনা স্থগিত; ৰাছিয়ান নিউক্লিয়াৰ ফৰ্চক অনুশীলনৰ নিৰ্দেশ পুটিনৰ

প্ৰধানমন্ত্ৰী মোদীক প্ৰশংসাৰে ওপচালে ট্ৰাম্পে

সোমবাৰে ইজিপ্তত গাজাৰ শান্তি সন্দৰ্ভত অনুষ্ঠিত এক সন্মিলনত ভাৰত আৰু প্ৰধানমন্ত্ৰী নৰেন্দ্ৰ মোদীক প্ৰশংসাৰে ওপচালে আমেৰিকাৰ ৰাষ্ট্ৰপতি ড’নাল্ড ট্ৰাম্পে । তেওঁ কয় যে ভাৰত আৰু পাকিস্তান এতিয়া বহুত ভালকৈ একেলগে থাকিব । এই কথা কোৱাৰ লগে লগে মঞ্চৰ আঁৰত থিয় হৈ থকা পাকিস্তানৰ প্ৰধানমন্ত্ৰী শ্বেহবাজ শ্বৰীফৰ ফালে ঘূৰি ‘হয় নে নহয়’ বুলিও সোধে ট্ৰাম্পে ?

ইয়াৰ পিছতে পাকিস্তানৰ প্ৰধানমন্ত্ৰী শ্বৰীফে মূৰ জোকাৰি হ’ব বুলি উত্তৰ দিয়ে, যাৰ ফলত অনুষ্ঠানত উপস্থিত থকা নেতা আৰু সংবাদ মাধ্যমৰ মাজত লঘু হাঁহিৰ পৰিৱেশৰ সৃষ্টি হয় । ইয়াৰ ভিডিঅ’ ছ’চিয়েল মিডিয়াত ভাইৰেল হৈ পৰিছে ।

ভাষণত ট্ৰাম্পে কেমেৰাত হাঁহি হাঁহি কয়, “ভাৰত এখন মহান দেশ, যাৰ শীৰ্ষত আছে মোৰ এজন অতি ভাল বন্ধু । আৰু তেওঁ এটা ডাঙৰ কাম কৰিছে । মই ভাবো পাকিস্তান আৰু ভাৰত একেলগে বহুত ভালদৰে থাকিব ।”

ইজিপ্তৰ ৰাষ্ট্ৰপতি আব্দেল ফাত্তাহ আল চিছিৰ সৈতে গাজা শান্তি সন্মিলনৰ সহ-অধ্যক্ষতা কৰি থকা ট্ৰাম্পে পাকিস্তানৰ সামৰিক নেতৃত্বক প্ৰশংসা কৰি কয় যে আঞ্চলিক শান্তি নিৰ্ভৰ কৰে ভাল বন্ধুসকলে ভাল কাম কৰাৰ ওপৰত ।

আমেৰিকাৰ ৰাষ্ট্ৰপতিগৰাকীয়ে এই সন্মিলনত ভাষণ দিবলৈ পাকিস্তানৰ প্ৰধানমন্ত্ৰীকো আমন্ত্ৰণ জনায় । ভাষণত শ্বেহবাজ শ্বৰীফে ভাৰত আৰু পাকিস্তানৰ মাজত পাৰমাণৱিক যুদ্ধ বন্ধ কৰাৰ বাবে ট্ৰাম্পক কৃতিত্ব দিয়ে । তেওঁ কয় যে সেই চাৰিদিনত এই ভদ্ৰলোক আৰু তেওঁৰ দলটোৱে হস্তক্ষেপ নকৰা হেতেন দুয়োখন পাৰমাণৱিক ৰাষ্ট্ৰৰ মাজত যুদ্ধ ইমানেই তীব্ৰতৰ হ’ল হেঁতেন যে কি হৈছিল সেই কথা ক’বলৈ কোনো জীয়াই নাথাকিলহেঁতেন ।

ইয়াৰ পূৰ্বে ভাৰত আৰু পাকিস্তানৰ মাজত যুদ্ধবিৰতিৰ কৃতিত্ব পুনৰ ল’লে ট্ৰাম্পে । ইজৰাইলৰ সংসদ নেচেটত তেওঁ নিজৰ ভাষণৰ সামৰণিত কয় যে তেওঁ সমাধান কৰা আঠটা বিবাদৰ ভিতৰত এইটো অন্যতম বিবাদ । দৰাচলতে ১০ মে’ত ভাৰত আৰু পাকিস্তানৰ মাজত যুদ্ধবিৰতিৰ পিছৰে পৰা ট্ৰাম্পে তাৰ কৃতিত্ব লৈ আহিছে । অৱশ্যে ভাৰতে বাৰে বাৰে স্পষ্ট কৰি দিছে যে দুয়োখন দেশৰ সেনাৰ ডিজিএমঅ’ৰ মাজত আলোচনাৰ অন্তত এই চুক্তিত উপনীত হৈছে ৷ ইয়াত তৃতীয় পক্ষৰ হস্তক্ষেপ নাই ।

লগতে পঢ়ক : ট্ৰাম্পৰ প্ৰচেষ্টাৰ শলাগ ল’লে প্ৰধানমন্ত্ৰী মোদীয়ে; নেতানিয়াহুক লৈয়ো কৰিলে বিশেষ মন্তব্য