আজি ভাৰত-অষ্ট্ৰেলিয়াৰ টি ২০ শৃংখলাৰ প্ৰথমখন মেচ

এদিনীয়া শৃংখলাৰ পিছত ভাৰতীয় দলটো এইবাৰ টি ২০ শৃংখলাৰ বাবে সাজু হৈছে । আজিৰে পৰা অষ্ট্ৰেলিয়াৰ বিৰুদ্ধে পাঁচখন মেচৰ টি-২০ শৃংখলা খেলিব ভাৰতীয় দলে । এই শৃংখলাৰ প্ৰথমখন মেচ কেনবেৰাৰ মেনুকা অভালত অনুষ্ঠিত হ’ব । এই ছিৰিজ ভাৰতৰ যুৱ খেলুৱৈসকলৰ বাবে নিজকে প্ৰমাণ কৰাৰ এক সুন্দৰ সুযোগ হ’ব । কিন্তু প্ৰথমখন মেচ আৰম্ভ হোৱাৰ পূৰ্বে আটাইতকৈ ডাঙৰ প্ৰশ্নটো হ’ল প্ৰথমখন টি-২০ত ভাৰতৰ মূল একাদশত কোন কোন থাকিব ?

গীল-অভিষেকে মুকলি কৰিব ইনিংছ-

শুভমন গীল আৰু অভিষেক শৰ্মাৰ যুটিয়ে ভাৰতে ইনিংছ মুকলি কৰাৰ সম্ভাৱনা আছে । দুয়োজন খেলুৱৈয়ে তেওঁলোকৰ সোঁ-বাওঁ হাতৰ সংমিশ্ৰণেৰে পাৱাৰপ্লেত আক্ৰমণাত্মক আৰম্ভণি প্ৰদান কৰিবলৈ সক্ষম । গীলৰ ক্লাছিক টাইমিং আৰু অভিষেকৰ নিৰ্ভীক খেল এই খেলপথাৰত গুৰুত্বপূৰ্ণ বুলি প্ৰমাণিত হ’ব পাৰে । শেহতীয়াকৈ অভিষেক শৰ্মাই উৎকৃষ্ট ফৰ্মত আছে আৰু দল পৰিচালনাই তেওঁক ধাৰাবাহিকভাৱে সুযোগ দিব বিচাৰিছে ।

তিলক নে ছেমছন- কোনে পাব সুযোগ ?

এই টি ২০ শৃংখলাত মিডল অৰ্ডাৰত দলৰ মেৰুদণ্ড হিচাপে প্ৰমাণিত হ’ব পাৰে তিলক বাৰ্মা । সীমিত অভাৰৰ ক্ৰিকেটত পৰিপক্কতা প্ৰদৰ্শন কৰিছে বাওঁহাতৰ বেটছমেনগৰাকীয়ে । উইকেটকীপাৰৰ ভূমিকাত সঞ্জু ছেমছন আৰু জিতেশ শৰ্মাৰ মাজৰ পৰা নিৰ্বাচন কৰাৰ প্ৰত্যাহ্বানৰ সন্মুখীন হৈছে দল পৰিচালনা । অষ্ট্ৰেলিয়াৰ পৰিস্থিতিত ছেমছনৰ অভিজ্ঞতা অধিক, গতিকে তেওঁৰ সুবিধা পাব পাৰে । তেওঁৰ বহুমুখী বেটিঙে মিডল অৰ্ডাৰক গতিশীলতা প্ৰদান কৰে ।

ইফালে হাৰ্দিক পাণ্ডিয়াৰ অনুপস্থিতিত শিৱম ডুবে আৰু অক্ষৰ পেটেল দলৰ প্ৰাথমিক অল-ৰাউণ্ডাৰ হিচাপে পৰিগণিত হ’ব । শিৱম ডুবে নিজৰ শক্তিশালী হিটিং আৰু ছিম বলিঙৰ জৰিয়তে খেলপথাৰত ভাৰসাম্য আনে । ইফালে অক্ষৰ পেটেল সঠিক বলিং আৰু উপযোগী বেটিঙৰ বাবে মূল একাদশত নিৰ্বাচন প্ৰায় নিশ্চিত ।

বুমৰাহক সমৰ্থন কৰিব অৰ্শদীপ-হৰ্ষিতে-

ফাষ্ট বলিং বিভাগত টিম ইণ্ডিয়াৰ এক শক্তিশালী ত্ৰিকোণীয় যুটী আছে । অৰ্শদীপ সিঙে যশপ্ৰীত বুমৰাহৰ সৈতে নতুন বল চম্ভালিব, আনহাতে হৰ্ষিত ৰাণাই তৃতীয় বেগী বলাৰ হিচাপে অভিষেক ঘটোৱাৰ সুযোগ পাব পাৰে । শেহতীয়া এদিনীয়া শৃংখলাত হৰ্ষিতে সকলোকে আপ্লুত কৰিছিল । তেওঁৰ আক্ৰমণাত্মক বলিং অষ্ট্ৰেলিয়াৰ পিটছত ফলপ্ৰসূ বুলি প্ৰমাণিত হ’ব পাৰে ।

স্পীনত কুলদীপৰ সম্ভাৱনা-

স্পীন বিভাগত কুলদীপ যাদৱ আৰু বৰুণ চক্ৰৱৰ্তীৰ মাজত ঘনিষ্ঠ প্ৰতিযোগিতা । অৱশ্যে অষ্ট্ৰেলিয়াত কুলদীপৰ উৎকৃষ্ট অভিলেখ আছে । তেওঁ গড়ে ১৬.৫০ আৰু ইকনমি ৫.৫০ ৰে বলিং কৰিছে । তেওঁৰ অভিজ্ঞতাৰ প্ৰতি লক্ষ্য ৰাখি দলে হয়তো কুলদীপৰ ওপৰত নিৰ্ভৰ কৰিব । অক্ষৰ পেটেল দ্বিতীয় স্পীনাৰ হিচাপে দলত থাকিব ।

ভাৰতৰ সাম্ভাব্য মূল একাদশ-

সূৰ্যকুমাৰ যাদৱ (অধিনায়ক), শুভমনন গীল, অভিষেক শৰ্মা, তিলক বাৰ্মা, সঞ্জু ছেমছন (উইকেটকীপাৰ), অক্ষৰ পেটেল, হৰ্ষিত ৰাণা, যশপ্ৰীত বুমৰাহ, অৰ্শদীপ সিং, কুলদীপ যাদৱ ।

লগতে পঢ়ক : আজি মহিলা ক্ৰিকেট বিশ্বকাপৰ প্ৰথমখন ছেমিফাইনেল; বৰ্ষাপাৰাত ইংলেণ্ড-দক্ষিণ আফ্ৰিকাৰ যুঁজ

ভাৰতক গতাবই লাগিব এছিয়া কাপৰ ট্ৰফী

শেহতীয়াকৈ ভাৰতীয় দলটোৱে পাকিস্তানক পৰাস্ত কৰি এছিয়া কাপ ২০২৫ত জয়লাভ কৰে । এই জয়ৰ পাছতে ভাৰতীয় দলটোৱে এছিয়ান ক্ৰিকেট কাউন্সিলৰ মুৰব্বী মহছিন নাকৱীৰ পৰা এছিয়া কাপৰ ট্ৰফী গ্ৰহণ কৰিবলৈ অস্বীকাৰ কৰে । ইয়াৰ পিছতে নাকভিয়ে ট্ৰফী লৈ ডুবাইৰ এখন হোটেললৈ উভতি আহে । পাকিস্তানলৈ ঘূৰি যোৱাৰ পূৰ্বে তেওঁ এ চি চিৰ কাৰ্যালয়ত এই ট্ৰফী থৈ গৈছিল । কিন্তু নাকভিয়ে ভাৰতীয় দলৰ হাতত ট্ৰফী গতাই দিবলৈ অস্বীকাৰ কৰে । নকভিয়ে সূৰ্যকুমাৰ যাদৱক এ চি চিৰ কাৰ্যালয়লৈ আহি ট্ৰফী সংগ্ৰহ কৰিবলৈ কৈছিল ।

শেহতীয়াকৈ ভাৰতীয় ক্ৰিকেট নিয়ন্ত্ৰণ ব’ৰ্ডে এ চি চিৰ মুৰব্বী মহছিন নাকভিলৈ আনুষ্ঠানিক ইমেইল প্ৰেৰণ কৰি বিজয়ী দলটোক অতি সোনকালে ট্ৰফী প্ৰদান কৰিবলৈ জনাইছে । এক সাক্ষাৎকাৰত বিচিচিআইৰ সচিব দেৱজিৎ শইকীয়াই কয় যে, “আমি এ চি চিলৈ পত্ৰ লিখি চেম্পিয়ন দলটোক ট্ৰফী প্ৰদান কৰিবলৈ অনুৰোধ জনাইছো । আমি তেওঁলোকৰ সঁহাৰিৰ বাবে অপেক্ষা কৰি আছো । সঁহাৰি যদি নেতিবাচক হয় বা নাহে তেন্তে আমি আইচিচিলৈ লিখিম । আমি খোজৰ পিছত খোজ আগবাঢ়িছো আৰু আগুৱাই যাম ।”

দেৱজিৎ শইকীয়াই স্পষ্ট কৰি দিছে যে যদি মহছিন নাকভিয়ে এছিয়া কাপৰ ট্ৰফী ঘূৰাই দিবলৈ সন্মত নহয় তেন্তে বি চি চি আইয়ে কঠোৰ ব্যৱস্থা গ্ৰহণ কৰিব । শইকীয়াই স্পষ্ট কৰি দিয়ে যে এছিয়া কাপৰ ট্ৰফী যদি ভাৰতক ঘূৰাই নিদিয়ে তেন্তে বি চি চি আইয়ে আন্তঃৰাষ্ট্ৰীয় ক্ৰিকেট পৰিষদলৈ পত্ৰ লিখিব । উল্লেখ্য যে, মহছিন নাকভি পাকিস্তান ক্ৰিকেট ব’ৰ্ডৰো অধ্যক্ষ ।

বিগত ২৮ ছেপ্টেম্বৰত ডুবাইৰ ডুবাই আন্তঃৰাষ্ট্ৰীয় ক্ৰিকেট ষ্টেডিয়ামত অনুষ্ঠিত এছিয়া কাপ ২০২৫ৰ ফাইনেলত সূৰ্যকুমাৰ যাদৱৰ নেতৃত্বত ভাৰতীয় দলটোৱে পাকিস্তানক ৫ উইকেটত পৰাস্ত কৰে । ভাৰতীয় খেলুৱৈসকলে ইতিমধ্যে স্পষ্ট কৰি দিছিল যে মহছিন নাকভিৰ পৰা তেওঁলোকে ট্ৰফী গ্ৰহণ নকৰে । দলটোৱে এমিৰেটছ ক্ৰিকেট ব’ৰ্ডৰ ভাইচ চেয়াৰমেনে তেওঁলোকক এই ট্ৰফী প্ৰদানৰ অনুৰোধ জনাইছিল ।

লগতে পঢ়ক : দক্ষিণ আফ্ৰিকা এৰ বিৰুদ্ধে শৃংখলাত দললৈ ঋষভ পন্টৰ প্ৰত্যাৱৰ্তন; কান্ধত গধুৰ দায়িত্ব

টি২০ বিশ্বকাপ ২০২৬

অহা বছৰ টি২০ বিশ্বকাপৰ দশম সংস্কৰণ অনুষ্ঠিত হ’ব । ভাৰত আৰু শ্ৰীলংকাই যৌথভাৱে এই প্ৰতিযোগিতা আযোজন কৰিব । এই প্ৰতিযোগিতাত মুঠ ২০ টা দলে অংশগ্ৰহণ কৰিব । ইতিমধ্যে  ইয়াৰে ১৯ টা দল নিশ্চিত কৰা হৈছে । ওমান আৰু নেপালে যৌথভাৱে এই প্ৰতিযোগিতাৰ বাবে যোগ্যতা অৰ্জন কৰিছে । টি-২০ বিশ্বকাপৰ বাবে নেপাল ক্ৰিকেট দলে তৃতীয়বাৰৰ বাবে যোগ্যতা অৰ্জন কৰিছে ।

উল্লেখ্য যে, এছিয়া-ইষ্ট পেচিফিক কোৱালিফায়াৰ ৰাউণ্ডৰ জৰিয়তে টি২০ বিশ্বকাপ ২০২৬ৰ বাবে তিনিটা দলৰ সিদ্ধান্ত লোৱা হ’ব, ইয়াৰে দুটা দলে নিজৰ স্থান নিশ্চিত কৰিছে, মাত্ৰ এটা দল বাকী আছে । অনাগত দিনত অন্তিমটো দলৰ সিদ্ধান্ত লোৱা হ’ব ।

এছিয়া-ইষ্ট পেচিফিক কোৱালিফায়াৰৰ গ্ৰুপ পৰ্যায়ৰ অন্ত পেলাই ছুপাৰ ৬ ৰাউণ্ডত ওমান আৰু নেপাল ক্ৰিকেট দলে নিজৰ আকৰ্ষণীয় প্ৰদৰ্শন অব্যাহত ৰাখিছে । চুপাৰ ৬ ৰাউণ্ডৰ তিনিওখন মেচতে জয়লাভ কৰে নেপালে । ফাইনেলত প্ৰৱেশ কৰি নেপালে বিশ্বকাপৰ টিকট নিশ্চিত কৰে । এই প্ৰতিযোগিতাত তৃতীয়বাৰৰ বাবে প্ৰৱেশ কৰিছে নেপালে । দলটোৱে শেষবাৰৰ বাবে ২০২৪ চনত টি-২০ বিশ্বকাপত অংশগ্ৰহণ কৰিছিল, য’ত ভাৰত চেম্পিয়ন হৈছিল ।

ওমান ক্ৰিকেট দলৰ কথা ক’বলৈ গ’লে ছুপাৰ ৬ৰ তিনিওখন মেচতে জয়লাভ কৰিছে দলটোৱে । শীৰ্ষত অন্ত পেলাই টি২০ বিশ্বকাপ ২০২৬ৰ বাবে যোগ্যতা অৰ্জন কৰে ওমানে । এতিয়া ইউ এ ই প্ৰতিযোগিতাখনৰ বাবে যোগ্যতা অৰ্জন কৰা ২০ সংখ্যক দল হ’ব পাৰে ।

এতিয়া ইউ এ ই, জাপান, কাটাৰে টি২০ বিশ্বকাপ ২০২৬ৰ বাবে যোগ্যতা অৰ্জনৰ অন্তিম দল হোৱাৰ সুযোগ লাভ কৰিছে । দলসমূহৰ মাজত বাকী থকা মেচসমূহ গুৰুত্বপূৰ্ণ । যদিহে ইউ এ ই ক্ৰিকেট দলে জাপানৰ বিৰুদ্ধে খেলখনত জয়লাভ কৰে তেন্তে বিশ্বকাপৰ বাবে যোগ্যতা অৰ্জন কৰিব ।

চলিত মাহৰ আৰম্ভণিতে জিম্বাবুৱে আৰু নামিবিয়াই টি-২০ বিশ্বকাপ আফ্ৰিকা কোৱালিফায়াৰৰ পৰা প্ৰতিযোগিতাখনৰ বাবে যোগ্যতা অৰ্জন কৰিছিল । বৰ্তমান ইউ এ ই, জাপান আৰু কাটাৰে অৰ্হতাৰ বাবে প্ৰতিদ্বন্দ্বিতা কৰিছে । এছিয়া-ইএপি কোৱালিফায়াৰৰ ছুপাৰ ছিক্স ৰাউণ্ডত নেপাল আৰু ওমানৰ হাতত পৰাস্ত হোৱা ইউ এ ইয়ে ছামোয়াক পৰাস্ত কৰাৰ পিছত তৃতীয় স্থানত আছে । চতুৰ্থ স্থানত আছে জাপান । কাটাৰৰ সম্ভাৱনা কিছু কঠিন কাৰণ ছামোয়াক পৰাস্ত কৰিব লাগিব যদিও তাৰ পিছত বাকী দুটা টীম দুখন মেচত পৰাস্ত হ’ব লাগিব ।

টি-২০ বিশ্বকাপ ২০২৬ৰ বাবে যোগ্যতা অৰ্জন কৰা দলসমূহঃ

ভাৰত, শ্ৰীলংকা, আফগানিস্তান, অষ্ট্ৰেলিয়া, বাংলাদেশ, ইংলেণ্ড, দক্ষিণ আফ্ৰিকা, আমেৰিকা, ৱেষ্ট ইণ্ডিজ, আয়াৰলেণ্ড, নিউজীলেণ্ড, পাকিস্তান, কানাডা, ইটালী, নেদাৰলেণ্ড, নামিবিয়া, জিম্বাবুৱে, নেপাল, ওমান ।

লগতে পঢ়ক : “বিদেশত খেলাৰ দৰে হ’ব”; গুৱাহাটীত ভাৰত-দক্ষিণ আফ্ৰিকাৰ টেষ্ট মেচৰ পূৰ্বে ক’লে অশ্বিনে