দক্ষিণ আফ্ৰিকা এৰ বিৰুদ্ধে শৃংখলাত দললৈ ঋষভ পন্টৰ প্ৰত্যাৱৰ্তন; কান্ধত গধুৰ দায়িত্ব

ঋষভ পন্টৰ প্ৰত্যাৱৰ্তন

দক্ষিণ আফ্ৰিকা এৰ বিৰুদ্ধে চাৰিদিনীয়া দুখন মেচ খেলিব ইণ্ডিয়া এ দলে । এই শৃংখলাৰ বাবে ইতিমধ্যে ইণ্ডিয়া এ দল ঘোষণা কৰা হৈছে । ঋষভ পন্টক ভাৰতীয় এ দলৰ অধিনায়ক হিচাপে নিযুক্তি দিয়াৰ বিপৰীতে ছাই সুদৰ্শনক উপ-অধিনায়ক হিচাপে নিযুক্তি দিয়া হৈছে । দুয়োখন খেলৰ বাবে পৃথক পৃথক দল বাছনি কৰা হৈছে যদিও ঋষভ পন্ট আৰু ছাই সুদৰ্শনক দুয়োটা দলৰে অধিনায়ক আৰু উপ-অধিনায়ক হিচাপে নিযুক্তি দিয়া হৈছে ।

আঘাতৰ পৰা সুস্থ হৈ এ দললৈ উভতিছে ভাৰতীয় উইকেটকীপাৰ বেটছমেন ঋষভ পন্ট । ইংলেণ্ড ভ্ৰমণত মানচেষ্টাৰ টেষ্টৰ সময়ত ঋষভে সোঁ ভৰিৰ আঙুলিত আঘাত পাইছিল । আঘাত বাবে তেওঁ অভাল টেষ্টৰ পৰা বাহিৰ হৈছিল ।

২০২৫ চনৰ এছিয়া কাপত আঘাতৰ বাবে ঋষভ পণ্ট দলৰ পৰা বাহিৰ হয়, য’ত ভাৰতে পাকিস্তানক পৰাস্ত কৰি খিতাপ দখল কৰে । ৱেষ্ট ইণ্ডিজৰ বিৰুদ্ধে ঘৰুৱা টেষ্ট শৃংখলাৰ দুখন মেচৰ পৰাও তেওঁ দলৰ বাহিৰত থাকে । বৰ্তমানৰ অষ্ট্ৰেলিয়া ভ্ৰমণৰো তেওঁ অংশ নহয় । এতিয়া অনুৰাগীৰ বাবে ঋষভ উভতি অহাটো এটা ভাল খবৰ ।

৩০ অক্টোবৰৰ পৰা ভাৰত এ আৰু দক্ষিণ আফ্ৰিকা এৰ মাজত চাৰিদিনীয়া প্ৰথমখন খেল অনুষ্ঠিত হ’ব । ৬ নৱেম্বৰৰ পৰা দুয়োটা দলৰ মাজত চাৰিদিনীয়া দ্বিতীয়খন খেল আৰম্ভ হ’ব । দুয়োখন মেচ বেংগালুৰুস্থিত বিচিচিআইৰ চেণ্টাৰ অৱ এক্সেলেন্স খেলপথাৰত অনুষ্ঠিত হ’ব । দক্ষিণ আফ্ৰিকাৰ বিৰুদ্ধে টেষ্ট শৃংখলাৰ বাবে এই মেচসমূহ অতি গুৰুত্বপূৰ্ণ । দক্ষিণ আফ্ৰিকাই ১৪ নৱেম্বৰৰ পৰা ভাৰতৰ বিৰুদ্ধে দুখন মেচৰ টেষ্ট শৃংখলা খেলিব । ইয়াৰ উপৰিও দুয়োটা দলৰ মাজত তিনিখন এদিনীয়া আৰু ৫খন টি-২০ মেচ অনুষ্ঠিত হ’ব ।

দক্ষিণ আফ্ৰিকাৰ বিৰুদ্ধে প্ৰথমখন চাৰিদিনীয়া খেলৰ বাবে ভাৰত এ দল :

ঋষভ পন্ট (অধিনায়ক/উইকেটকীপাৰ), আয়ুষ মাহাত্ৰে, এন জগদীশন (উইকেটকীপাৰ), ছাই সুদৰ্শন (সহ-অধিনায়ক), দেৱদত্ত পাডিক্কাল, ৰজত পাতিদাৰ, হৰ্ষ ডুবে, তনুষ কোটিয়ান, মানৱ সুথাৰ, অংশুল কম্বোজ, যশ ঠাকুৰ, আয়ুষ বদোনী আৰু সৰণশ জৈন ।

দক্ষিণ আফ্ৰিকাৰ বিৰুদ্ধে দ্বিতীয়খন চাৰিদিনীয়া খেলৰ বাবে ভাৰত এ দল :

ঋষভ পন্ট (অধিনায়ক/উইকেটকীপাৰ), কে এল ৰাহুল, ধ্ৰুৱ জুৰেল (উইকেটকীপাৰ), ছাই সুদৰ্শন (সহ-অধিনায়ক), দেৱদত্ত পাডিক্কাল, ৰুতুৰাজ গাইকোৱাদ, হৰ্ষ ডুবে, তনুষ কোটিয়ান, মানৱ সুথাৰ, খলীল আহমেদ, গুৰনুৰ ব্ৰাৰ, অভিমন্যু ইশ্বৰন, প্ৰসিদ্ধ কৃষ্ণ, মহম্মদ চিৰাজ আৰু আকাশ দীপ ।

লগতে পঢ়ক : ৰুদ্ধ হোৱা নাই ছেমি ফাইনেলৰ পথ ! একেৰাহে তিনিটাকৈ পৰাজয়ৰ পিছতো সজীৱ ভাৰতীয় দলৰ আশা