শান্তি প্ৰস্তাৱৰ প্ৰথম পৰ্যায়ত সন্মতি প্ৰকাশ ইজৰাইল-হামাছৰ; ট্ৰাম্পৰ ঘোষণা
শান্তি প্ৰস্তাৱৰ প্ৰথম পৰ্যায়ত সন্মতি প্ৰকাশ ইজৰাইল-হামাছৰ
আমেৰিকাৰ ৰাষ্ট্ৰপতি ড’নাল্ড ট্ৰাম্পে এক ঐতিহাসিক ঘোষণা কৰি কয় যে ইজৰাইল আৰু হামাছে তেওঁৰ শান্তি প্ৰস্তাৱৰ প্ৰথম পৰ্যায়ত সন্মতি প্ৰকাশ কৰিছে । ট্ৰাম্পে ইয়াক “আৰব আৰু মুছলমান দেশ, ইজৰাইল, আশে-পাশে থকা সকলো দেশ আৰু আমেৰিকাৰ বাবে এক মহান দিন” বুলি অভিহিত কৰে । ছ’চিয়েল মিডিয়াত পোষ্ট কৰি ট্ৰাম্পে কয় যে, “ইয়াৰ অৰ্থ হ’ল সকলো পণবন্দীক অতি সোনকালে মুকলি কৰি দিয়া হ’ব আৰু ইজৰাইলী বাহিনী আঁতৰি যাব । এয়া হৈছে এক শক্তিশালী আৰু স্থায়ী শান্তিৰ দিশত প্ৰথম পদক্ষেপ ।”
আমেৰিকাৰ ৰাষ্ট্ৰপতি ড’নাল্ড ট্ৰাম্পে ঘোষণা কৰে যে ইজৰাইল আৰু হামাছে তেওঁৰ ২০ দফীয়া গাজা শান্তি প্ৰস্তাৱৰ প্ৰথম পৰ্যায়ত সন্মতি প্ৰকাশ কৰিছে । ট্ৰাম্পে ইয়াক “ঐতিহাসিক আৰু অভূতপূৰ্ব” পদক্ষেপ বুলি অভিহিত কৰি কয় যে ই দুবছৰীয়া যুদ্ধৰ অন্ত পেলোৱাৰ দিশত এক মাইলৰ খুঁটি হিচাবে বিবেচিত হৈছে । কাটাৰ, ইজিপ্ত, তুৰ্কীৰ দৰে মধ্যস্থতাকাৰী দেশক ধন্যবাদ জনাই ট্ৰাম্পে কয় যে, “শান্তি কঢ়িয়াই অনাসকল ধন্য ।” ইজিপ্তৰ সংবাদ মাধ্যমৰ বাতৰি অনুসৰি, গাজালৈ মানৱীয় সাহায্য প্ৰদানৰ ক্ষেত্ৰত দুয়োপক্ষই চুক্তিত সহমতত উপনীত হৈছে । এই প্ৰক্ৰিয়াত সকলো পক্ষৰ সৈতে ন্যায্য ব্যৱহাৰ কৰা হ’ব বুলিও তেওঁ উল্লেখ কৰে ।
ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে কয় যে তেওঁলোকে পণবন্দীসকলক ঘূৰাই আনিব । ট্ৰাম্পে এই সপ্তাহৰ শেষৰ ফালে মধ্যপ্ৰাচ্যলৈ যাত্ৰা কৰিব পাৰে বুলিও ইংগিত দিয়ে । তেওঁ কয়, “মই হয়তো সপ্তাহৰ শেষত তালৈ যাম, হয়তো দেওবাৰে । সম্ভৱতঃ মই ইজিপ্তলৈ যাম, কিন্তু গাজালৈয়ো যাব পাৰোঁ ।” ট্ৰাম্পে পূৰ্বে কৈছিল যে তেওঁ এই সপ্তাহৰ শেষৰ ফালে মধ্যপ্ৰাচ্যলৈ যাব পাৰে ।
চুক্তিখনৰ মূল কথা-
-গাজাত তাৎক্ষণিক যুদ্ধবিৰতি
-সকলো পণবন্দীক মুকলি কৰি দিয়া
-হামাছৰ নিৰস্ত্ৰকৰণ
-ইজৰাইলী বাহিনীৰ পৰ্যায়ক্ৰমে প্ৰত্যাহাৰ
লগতে পঢ়ক : ভাৰত আৰু অষ্ট্ৰেলিয়াৰ মাজত সাক্ষৰিত হ’ল কেইবাখনো প্ৰতিৰক্ষা চুক্তি