কাটাৰৰ ৰাজধানীত ইজৰাইলৰ বৃহৎ আক্ৰমণ

ইজৰাইলে মঙলবাৰে কাটাৰৰ ৰাজধানী ডোহাত হামাছৰ শীৰ্ষ নেতাসকলক লক্ষ্য কৰি বৃহৎ আক্ৰমণ চলাই । ইজৰাইলৰ বিষয়াসকলে এই তথ্য নিশ্চিত কৰিছে । তথ্য অনুসৰি ইজৰাইলৰ নিৰাপত্তা সংস্থা শ্বিন বেটে এই অভিযান চলাইছিল ।

সংবাদ মাধ্যমৰ বাতৰি অনুসৰি,বৈঠক কৰি থকা নেতাসকলক আমেৰিকাৰ ৰাষ্ট্ৰপতি ডনাল্ড ট্ৰাম্পৰ অনুমোদনৰ পিছতে লক্ষ্য কৰি লোৱা হয়, যিসকলে যুদ্ধবিৰতি সন্দৰ্ভত আমেৰিকাৰ শেহতীয়া প্ৰস্তাৱ সন্দৰ্ভত আলোচনা কৰা বুলি জানিব পৰা গৈছে ।

অৱশ্যে ইজৰাইলৰ প্ৰধানমন্ত্ৰী নেতানিয়াহুৱে এই অভিযানক স্বতন্ত্ৰ অভিযান বুলি অভিহিত কৰে । তেওঁ ছ’চিয়েল মিডিয়া প্লেটফৰ্ম এক্সত লিখিছে, “হামাছৰ শীৰ্ষ সন্ত্ৰাসবাদী নেতাসকলৰ বিৰুদ্ধে আজিৰ এই পদক্ষেপটো আছিল সম্পূৰ্ণ স্বতন্ত্ৰ ইজৰাইলী অভিযান । ইজৰাইলে ইয়াক আৰম্ভ কৰিছিল, ইজৰাইলে ইয়াক চলাইছিল আৰু ইজৰাইলে ইয়াৰ সম্পূৰ্ণ দায়িত্ব লৈছে ।”

এই আক্ৰমণৰ পিছতে দোহাৰ আকাশত ক’লা ধোঁৱাৰ ডাৱৰ দেখা যায় । কাটাৰৰ বিষয়াসকলেও এই আক্ৰমণ নিশ্চিত কৰিছে । অৱশ্যে এই আক্ৰমণত কোনো লোক হাত-হত হৈছে নে নাই সেয়া এতিয়াও স্পষ্ট হোৱা নাই । ইয়াৰ পিছতে এতিয়া দোহাৰ ৰাজপথত উত্তেজনা আৰু ভয়ৰ পৰিবেশে বিৰাজ কৰিছে ।

উল্লেখ্য যে, ২০২৩ চনৰ ৭ অক্টোবৰত ইজৰাইলৰ ওপৰত হামাছে আক্ৰমণ কৰাৰ পিছত ইয়াক ইহুদী দেশখনে কাটাৰত সংঘটিত কৰা দ্বিতীয়টো বৃহৎ আক্ৰমণ বুলি অভিহিত কৰা হৈছে ।

এই আক্ৰমণৰ সবিশেষ এতিয়াও স্পষ্ট হোৱা নাই যদিও ইজৰাইলী সেনাৰ মুখপাত্ৰই কয় যে ইজৰাইলৰ বায়ুসেনাই এই আক্ৰমণ সংঘটিত কৰিছে । এই সময়ছোৱাত কাটাৰ এয়াৰৱেজৰ বিমান সেৱা স্বাভাৱিকভাৱে দোহাত চলি থকাৰ বিপৰীতে কমেও এখন কাটাৰ বায়ুসেনাৰ বিমানে দেশখনৰ নিৰাপত্তা নিৰীক্ষণ কৰিবলৈ উৰা মাৰিছিল ।

লগতে পঢ়ক : প্ৰতিবাদত উত্তাল নেপালত ভয়াৱহ পৰিস্থিতি… প্ৰধানমন্ত্ৰী কে পি শৰ্মা অলিৰ পদত্যাগ

য়েমেনত ইজৰাইলৰ বিমান আক্ৰমণ

ইজৰাইলে পুনৰবাৰ য়েমেনৰ ৰাজধানী ছানাত বিমান আক্ৰমণ চলাইছে । জানিব পৰা মতে, হুথী বিদ্ৰোহী নিয়ন্ত্ৰিত চৰকাৰৰ প্ৰধানমন্ত্ৰী আহমেদ আল ৰাহাৱী এই আক্ৰমণত নিহত হৈছে । ইয়াৰ সমান্তৰালকৈ আন বহু মন্ত্ৰীয়েও এই আক্ৰমণত প্ৰাণ হেৰুৱাইছে বুলি প্ৰকাশ পাইছে ।

হুথী বিদ্ৰোহীয়ে কয় যে ২০২৪ চনৰ আগষ্ট মাহৰ পৰা আল-ৰহৱী হুথী নেতৃত্বাধীন চৰকাৰখনৰ প্ৰধানমন্ত্ৰী আছিল । বিগত এটা বছৰত চৰকাৰৰ কাৰ্যকলাপ আৰু কৰ্মক্ষমতাৰ মূল্যায়নৰ বাবে আয়োজন কৰা নিয়মীয়া কৰ্মশালাৰ সময়ত তেওঁক আন মন্ত্ৰীসকলৰ সৈতে লক্ষ্য কৰি লোৱা হৈছিল । একে সময়তে ইজৰাইলী সেনাই য়েমেনৰ ছানা অঞ্চলৰ হৌথী সন্ত্ৰাসবাদী শাসনৰ সামৰিক ঘাটিত নিখুঁত আক্ৰমণ চলাইছিল বুলিও কয় ।

বিদ্ৰেহী সংগঠনটোৰ শীৰ্ষ নেতাসকলে এটা এপাৰ্টমেণ্টত ৰাষ্ট্ৰীয় পৰ্যায়ত সম্প্ৰচাৰিত ভাষণ কাৰ্যসূচী চাই থকাৰ সময়তে এই বিমান আক্ৰমণ সংঘটিত হয় । য়েমেনৰ এটা চেনেলে প্ৰকাশ কৰা অনুসৰি হুথী প্ৰধানমন্ত্ৰী আল ৰাহৱী তেওঁৰ কেইবাজনো সহায়কৰ সৈতে এটা এপাৰ্টমেণ্টত আছিল । এই আক্ৰমণত হুথীৰ প্ৰতিৰক্ষা মন্ত্ৰী মহম্মদ নাছেৰ আল আথিফি আৰু মুখ্য সেনাধ্যক্ষ মহম্মদ আব্দ আল কৰিম আল গামাৰীও নিহত হোৱাৰ সম্ভাৱনা আছে ।

হামাছৰ সমৰ্থনত ইজৰাইললৈ ক্ষেপণাস্ত্ৰ নিক্ষেপ কৰি আহিছে হুথীয়ে-

গাজাত হামাছৰ বিৰুদ্ধে যুদ্ধৰ সময়ত হুথীয়ে বাৰে বাৰে ইজৰাইললৈ ক্ষেপণাস্ত্ৰ নিক্ষেপ কৰি আহিছে । হুথী বিদ্ৰোহীসকলে কয় যে এই আক্ৰমণসমূহ পেলেষ্টাইনীসকলৰ সৈতে সংহতি প্ৰদৰ্শনৰ বাবে সংঘটিত কৰা হৈছে । কিন্তু য়েমেনৰ পৰা নিক্ষেপ কৰা বেছিভাগ ক্ষেপণাস্ত্ৰ আকাশমাৰ্গতে ইজৰাইলে বাধা দিয়াত ছিন্নভিন্ন হৈ পৰে । হুথী পৰিচালিত স্বাস্থ্য মন্ত্ৰালয় আৰু চৰকাৰী বিষয়াৰ মতে, চলিত সপ্তাহৰ আৰম্ভণিতে ইজৰাইলৰ আক্ৰমণে ছানাৰ কেইবাটাও অঞ্চলক লক্ষ্য কৰি লৈছিল । এই আক্ৰমণত কমেও ১০ জন লোক নিহত হোৱাৰ লগতে ১০২ জন আহত হয় ।

ট্ৰাম্প প্ৰশাসনৰ সৈতে বুজাবুজি-

ইয়াৰ পূৰ্বে ইজৰাইল আৰু আমেৰিকাই য়েমেনত বিদ্ৰোহীৰ অধীনস্থ অঞ্চলত বোমা বিস্ফোৰণ কৰিছিল । ইয়াৰ ভিতৰত আছিল ছানা আৰু কৌশলগত উপকূলীয় চহৰ হোদেইডা । ইজৰাইলৰ আক্ৰমণৰ বাবে মে’ মাহত ছানা বিমানবন্দৰ সেৱা বন্ধ হৈ পৰিছিল । ট্ৰাম্প প্ৰশাসনে মে’ মাহত হুথীৰ সৈতে চুক্তিৰ কথা ঘোষণা কৰিছিল । ইয়াৰ অধীনত তেওঁলোকে লোহিত সাগৰত জাহাজৰ ওপৰত আক্ৰমণ বন্ধ কৰাৰ বিনিময়ত বিমান আক্ৰমণ বন্ধ কৰি দিয়াৰ চুক্তি কৰিছিল । অৱশ্যে বিদ্ৰোহীসকলে কয় যে এই চুক্তিত ইজৰাইলৰ সৈতে জড়িত ঘাটিসমূহত আক্ৰমণ বন্ধ কৰাৰ কথা অন্তৰ্ভুক্ত কৰা হোৱা নাই ।

লগতে পঢ়ক : ড্ৰেগনৰ দেশত ৰঙা দলিচাৰে আদৰণি প্ৰধানমন্ত্ৰী মোদীক… এছ চি অ’ বৈঠকত কৰিব অংশগ্ৰহণ

ইজৰাইলৰ বিমান আক্ৰমণত জোকাৰি গ’ল ছানা…

ইজৰাইলে য়েমেনৰ ৰাজধানী ছানাত বিমান আক্ৰমণ চলাই ইৰাণ সমৰ্থিত হুটী বিদ্ৰোহীৰ বিমান আক্ৰমণৰ প্ৰত্যুত্তৰ দিছে। দেওবাৰে ছানাৰ অধিকাংশ আৱাসিক এলেকাত বিস্ফোৰণৰ শব্দ শুনা গৈছিল।

ইজৰাইলৰ এই আক্ৰমণত বহু ঠাই লক্ষ্য কৰি লোৱা হৈছিল,য’ত আছে হেজিয়াজ বিদ্যুৎ কেন্দ্ৰ আৰু এটা গেছ ষ্টেচন। অৱশ্যে এই আক্ৰমণ সন্দৰ্ভত ইজৰাইলৰ পৰা কোনো আনুষ্ঠানিক বিবৃতি দিয়া হোৱা নাই।

এই আক্ৰমণত দুজন লোক নিহত হোৱাৰ লগতে পাঁচজনতকৈ অধিক লোক আহত হয়।আহত লোকসকলক চিকিৎসালয়ত ভৰ্তি কৰোৱা হৈছে।

ৰাজধানীৰ লোক সকলে কয় যে সমগ্ৰ চহৰখনতে বিস্ফোৰণৰ শব্দ শুনা গৈছিল,ৰাষ্ট্ৰপতি ভৱন আৰু বন্ধ সামৰিক একাডেমীৰ ওচৰতো বিস্ফোৰণ সংঘটিত হয়।ৰাজধানীৰ ছাবিক চৌহদৰ সমীপতো ক’লা ধোঁৱা দেখিবলৈ পোৱা গৈছে।

পেলেষ্টাইনীসকলৰ সৈতে সংঘাত বৃদ্ধি পোৱাৰ পিছৰে পৰা লোহিত সাগৰত ইজৰাইলৰ বাণিজ্যিক ক্ষতিসাধন কৰিবলৈ হুটী বিদ্ৰোহীয়ে ড্ৰোন আৰু মিছাইলেৰে ইজৰাইলৰ জাহাজত অহৰহ আক্ৰমণ চলাই আহিছে।

লগতে পঢ়ক: পূৰ্ণগতিত চলিছে গগণযান মিছনৰ প্ৰস্তুতি;  স্প্লেছডাউনৰ সফল পৰীক্ষণ ISROৰ

হামাছৰ কামাণ্ডাৰ বশৰ থাবেটক হত্যা

ইজৰাইলৰ প্ৰতিৰক্ষা বাহিনীয়ে দেওবাৰে ঘোষণা কৰে যে তেওঁলোকে হামাছৰ অস্ত্ৰ নিৰ্মাণৰ মুখ্য কাৰ্যালয়ত তেওঁলোকৰ উন্নয়ন আৰু প্ৰকল্প বিভাগৰ অধিনায়ক বশৰ থাবেটক হত্যা কৰিছে।

হামাছৰ অস্ত্ৰ নিৰ্মাণ সঁজুলিৰ গৱেষণা আৰু বিকাশৰ দায়িত্বত আছিল থাবেট।আইডিএফে কয় যে তেওঁলোকে সন্ত্ৰাসবাদী আন্তঃগাঁথনি, উগ্ৰপন্থী, সুৰংগ আদিৰ স্থান নিৰ্ণয় কৰি ধ্বংস কৰিছে।

এই আক্ৰমণত ইজৰাইলৰ বায়ুসেনাও জড়িত আছিল, যিয়ে সন্ত্ৰাসবাদীৰ সামৰিক কমপ্লেক্স আৰু অন্যান্য সন্ত্ৰাসবাদী আন্তঃগাঁথনিকে ধৰি প্ৰায় ৭৫টা সন্ত্ৰাসবাদী আত্মগোপন স্থানত আক্ৰমণ কৰিছে।

আইডিএফে এক্সত এটা পোষ্টত দি কৈছে যে, “হত্যা কৰা লোকজন বশৰ থাবেট, যি হামাছৰ অস্ত্ৰ উৎপাদন মুখ্য কাৰ্যালয়ৰ উন্নয়ন আৰু প্ৰকল্প বিভাগৰ অধিনায়ক আছিল”।

“তেওঁ হামাছৰ অস্ত্ৰ নিৰ্মাণ যন্ত্ৰৰ গৱেষণা আৰু বিকাশৰ দায়িত্বত আছিল, যিয়ে তেওঁলোকৰ অস্ত্ৰ-শস্ত্ৰৰ মজুত পুনৰুদ্ধাৰ আৰু বৃদ্ধিৰ কাম কৰিছিল।”

পোষ্টটোত আৰু কৈছিল যে, “আইডিএফৰ সৈন্যই সন্ত্ৰাসবাদীৰ আন্তঃগাঁথনি ধ্বংস কৰিলে, সন্ত্রাসবাদী আৰু সুৰংগটো ধৰা পেলাই ধ্বংস কৰে”৷

“ভাৰতীয় বায়ুসেনাই সেই সন্ত্ৰাসবাদী সংগঠনবোৰক লক্ষ্য কৰি লৈছিল যিয়ে আইডিএফৰ জোৱানক আক্ৰমণ কৰিবলৈ ওলাইছিল আৰু প্ৰায় ৭৫টা সন্ত্ৰাসবাদী আত্মগোপন স্থানত আক্ৰমণ কৰে, ইয়াৰ ভিতৰত সন্ত্ৰাসবাদী সামৰিক চৌহদ আৰু অতিৰিক্ত সন্ত্ৰাসবাদী আন্তঃগাঁথনি আছিল।”

ইজৰাইল সেনাই কমেও ১১৫ জন পেলেষ্টাইনীক হত্যা কৰে,য’ত ৯২ জন সাহায্যপ্ৰাৰ্থী আৰু দুজন অসামৰিক প্ৰতিৰক্ষা সহায়ক কৰ্মীও আছে।

লগতে পঢ়ক: ব্ৰিটেইন আৰু মালদ্বীপলৈ যাব প্ৰধানমন্ত্ৰী মোদী; বাণিজ্যিক চুক্তিত লাগিব মোহৰ

ইজৰাইল আৰু ছিৰিয়াৰ মাজত যুদ্ধবিৰতি ঘোষণা

শনিবাৰে পুৱাই ছিৰিয়া আৰু ইজৰাইলৰ মাজত এক গুৰুত্বপূৰ্ণ যুদ্ধবিৰতি চুক্তি হৈছে। এই চুক্তিৰ কথা আমেৰিকাৰ ৰাষ্ট্ৰদূত টম বেৰেকে ঘোষণা কৰিছে।

দক্ষিণ ছিৰিয়াৰ ছুৱায়দা প্ৰদেশত ড্ৰুজ সংখ্যালঘু আৰু বেদুইন জনগোষ্ঠীৰ মাজত চলি থকা হিংসাত্মক সংঘৰ্ষৰ পিছত এই চুক্তি কৰা হৈছে। এই সংঘৰ্ষত শ শ লোক নিহত হোৱাৰ লগতে হাজাৰ হাজাৰ লোক গৃহহীন হৈ পৰে।

এই চুক্তিখনে তুৰ্কি, জৰ্ডান আৰু অন্যান্য চুবুৰীয়া দেশৰ সমৰ্থন লাভ কৰিছে, যিয়ে অঞ্চলটোত শান্তি আৰু প্ৰগতিৰ আশাৰ সৃষ্টি কৰিছে।

টম বেৰেকে ছ’চিয়েল প্লেটফৰ্ম এক্সত কৈছে যে, ‘ড্ৰুজ, বেডুইন আৰু চুন্নী সম্প্ৰদায়ক অস্ত্ৰ-শস্ত্ৰ এৰি আন সংখ্যালঘুৰ সৈতে যোগ দি এখন নতুন, সংযুক্ত ছিৰিয়া নিৰ্মাণ কৰক, যিয়ে ওচৰ-চুবুৰীয়াৰ লগত শান্তি আৰু সমৃদ্ধিৰে জীয়াই থাকে।’

তেওঁ অৱশ্যে চুক্তিখনৰ সবিশেষ সন্দৰ্ভত বিতংভাৱে কোৱা নাই।দেওবাৰৰ পৰা ছুৱেইদাত ড্ৰুজ মিলিচীয়া আৰু স্থানীয় চুন্নী বেদুইন জনগোষ্ঠীৰ মাজত সংঘৰ্ষ চলি আছিল ইয়াৰ পিছত ছিৰিয়াৰ সেনাই শান্তি পুনৰুদ্ধাৰৰ নামত ইয়াৰ মাজত জপিয়াই পৰে যদিও ইয়াক বেদুইন গোটসমূহক সমৰ্থন কৰা দেখা গ’ল।

ইয়াৰ প্ৰতিক্ৰিয়া স্বৰূপে ইজৰাইলে ড্ৰুজ সম্প্ৰদায়ক সুৰক্ষা প্ৰদানৰ বাবে ছিৰিয়াৰ সেনাবাহিনীৰ ওপৰত বিমান আক্ৰমণ চলায়।

ইজৰাইলৰ ড্ৰুজ সম্প্ৰদায়ক আনুগত্যশীল সংখ্যালঘু বুলি গণ্য কৰা হয়, যিসকলক প্ৰায়ে তাত থকা সেনাবাহিনীত বৃহৎ সংখ্যক অন্তৰ্ভুক্ত কৰা হয়।

এই সংঘৰ্ষত শ শ লোকৰ মৃত্যু হয় আৰু চৰকাৰী বাহিনীয়ে ড্ৰুজ সাধাৰণ নাগৰিকক হত্যা, লুটপাত আৰু ঘৰ জ্বলাই দিয়াৰ অভিযোগ উত্থাপন হয়।

লগতে পঢ়ক: BRICS ক ধমকি ডনাল্ড ট্ৰাম্পৰ; ‘জিনিয়াছ এক্ট’ সন্দৰ্ভত ডাঙৰ মন্তব্য