গুজৰাট টাইটানছৰ আধিপত্য

আই পি এল ২০২৫ৰ ফাইনেলত ৰয়েল চেলেঞ্জাৰছ বেংগালুৰু (আৰ চি বি)য়ে পঞ্জাব কিংছক ৬ ৰানত পৰাস্ত কৰি প্ৰথমবাৰৰ বাবে আই পি এল খিতাপ দখল কৰে । যদিও আৰ চি বিয়ে আই পি এলৰ ট্ৰফী জয় কৰিবলৈ সক্ষম হৈছে, তথাপিও অৰেঞ্জ কেপ আৰু পাৰ্পল কেপত গুজৰাট টাইটানছৰ খেলুৱৈয়ে আধিপত্য বিস্তাৰ কৰিছে ।

ছাই সুদৰ্শনৰ দখলত অৰেঞ্জ কেপ-

ছাই সুদৰ্শনে এই ছিজনত নিজৰ বেটিং প্ৰদৰ্শনেৰে সকলোকে আপ্লুত কৰে । তেওঁ ১৫খন মেচত ১৫৬.১৭ ষ্ট্ৰাইক ৰেটত ৭৫৯ ৰান আৰু গড়ে ৫৪.২১ ৰান সংগ্ৰহ কৰে, য’ত এটা শতক আৰু ছটা অৰ্ধশতক অন্তৰ্ভুক্ত আছে । শুভমন গীলৰ সৈতে সুদৰ্শনে বহু মেচত গুজৰাট টাইটানছক শক্তিশালী আৰম্ভণি দিয়ে । অৱশ্যে এলিমিনেটৰত মুম্বাই ইণ্ডিয়ানছৰ বিৰুদ্ধে পৰাজয়ৰ পিছতে গুজৰাটৰ যাত্ৰাৰ অন্ত পৰে । ছাই সুদৰ্শনে এলিমিনেটৰ মেচতো ভাল প্ৰদৰ্শন কৰি ৮০ ৰান সংগ্ৰহ কৰিছিল যদিও আউট হোৱাৰ পিছত দলটো বিজয় লক্ষ্যত উপনীত হোৱাত ব্যৰ্থ হয় ।

কোহলীও আছিল দৌৰত-

আৰ চি বিৰ বিৰাট কোহলীও অৰেঞ্জ কেপৰ দৌৰত আছিল । ফাইনেলৰ পূৰ্বে কোহলীয়ে অৰেঞ্জ কেপ লাভ কৰাৰ সুযোগ পাইছিল যদিও সুদৰ্শনক পিছ পেলাবলৈ ব্যৱধান অধিক আছিল । চূড়ান্ত খেলখনত কোহলীয়ে ৪৩ ৰান সংগ্ৰহ কৰি এই দৌৰত পিছ পৰি ৰয় । কোহলীয়ে ১৫ টা ইনিংছত ১৪৪.৭১ ষ্ট্ৰাইক ৰেটত ৬৫৭ ৰান সংগ্ৰহ কৰি এই ছিজনত সৰ্বাধিক ৰান সংগ্ৰহকাৰীৰ তালিকাত তৃতীয় স্থান দখল কৰে । মুম্বাই ইণ্ডিয়ানছৰ সূৰ্যকুমাৰ যাদৱে অৰেঞ্জ কেপ দৌৰত ১৬খন খেলত ৭১৭ ৰান সংগ্ৰহ কৰি দ্বিতীয় স্থান দখল কৰে ।

প্ৰসিদ্ধ কৃষ্ণৰ দখলত পাৰ্পল কেপ-

পাৰ্পল কেপৰ দৌৰত আছিল আৰ চি বিৰ অষ্ট্ৰেলিয়ান বেগী বলাৰ জোছ হেজলউড । তেওঁ পাৰ্পল কেপ লাভ কৰাৰ ভাল সুযোগ পাইছিল । হেজেলউডে ১২খন মেচত ২২টা উইকেট দখল কৰে । ফাইনেলত তেওঁ মাত্ৰ এটা উইকেটহে দখল কৰিবলৈ সক্ষম হয় । ফাইনেল মেচত যদি হেজেলউডে ৫টা উইকেট দখল কৰিলেহেঁতেন তেন্তে পাৰ্পল কেপ তেওঁৰ দখলত থাকিলহেতেন । অৱশ্যে গুজৰাট টাইটানছৰ বলাৰ প্ৰসিদ্ধ কৃষ্ণই ২৫টা উইকেটৰে শীৰ্ষত থাকি পাৰ্পল কেপ লাভ কৰে ।

লগতে পঢ়ক : বিৰাট কোহলীৰ চকুত চকুপানী… চেম্পিয়ন হৈয়ে ষ্টেডিয়ামতে কান্দি উঠিল তাৰকাগৰাকী

কিমান দামী আই পি এলৰ ট্ৰফী ?

ইণ্ডিয়ান প্ৰিমিয়াৰ লীগত এতিয়ালৈকে ৭টা ভিন্ন দল চেম্পিয়ন হৈছে । চেন্নাই ছুপাৰ কিংছ আৰু মুম্বাই ইণ্ডিয়ানছে ৫ বাৰকৈ আই পি এলৰ ট্ৰফী জয় কৰিছে । আই পি এলৰ ট্ৰফীৰ ডিজাইন অতি বিশেষ, যিটো দেখাত বিশ্বকাপৰ ট্ৰফীতকৈয়ো কম নহয় । কিয় নহ’ব, কাৰণ আই পি এল বিশ্বৰ আটাইতকৈ ধনী ক্ৰিকেট লীগ । ২০২৫ চনত ৰয়েল চেলেঞ্জাৰছ বাংগালুৰু আৰু পঞ্জাব কিংছৰ ভিতৰত কোনো এটা দলে খিতাপ দখল কৰি ইতিহাস সৃষ্টি কৰিবলৈ সাজু হৈছে । কিয়নো ইয়াৰ পূৰ্বে এই দুটা দলৰ কোনোৱে কেতিয়াও আই পি এলৰ খিতাপ লাওভ কৰিবলৈ সক্ষম ৰহোৱা নাই । আই পি এল ২০২৫ৰ বিজয়ী লাভ কৰাৰ আগতে জানি লওক IPL ট্ৰফীৰ দাম কিমান ?

আই পি এলৰ ট্ৰফীৰ দাম কিমান ?

ভাৰতীয় ক্ৰিকেট নিয়ন্ত্ৰণ ব’ৰ্ডে কেতিয়াও প্ৰকাশ কৰা নাই আই পি এল ট্ৰফীৰ প্ৰকৃত ব্যয় । আই পি এল চেম্পিয়ন দলক দিয়া ট্ৰফীৰ ডিজাইন অৰা (Orra) নামৰ এটা গহনা কোম্পানীয়ে কৰে । ২০০৮ চনৰ পৰাই অৰা কোম্পানীয়ে আই পি এল ট্ৰফী নিৰ্মাণ কৰি আহিছে । সংবাদ মাধ্যমৰ খবৰ অনুসৰি আই পি এল ট্ৰফীৰ খৰচ ৩০-৫০ লাখ টকা বুলি ধাৰণা কৰা হৈছে ।

আই পি এলৰ ট্ৰফী সম্পূৰ্ণ সোণ-ৰূপেৰে নিৰ্মিত নহয় । আচলতে ইয়াক সোণ, ৰূপ আৰু এলুমিনিয়ামকে ধৰি আন বহুতো ধাতু মিহলাই তৈয়াৰ কৰা হয় । ট্ৰফীত গোল্ড পলিচ লগোৱা হয়, যাৰ ফলত ইয়াৰ চিকচিকিয়া ৰূপ দেখা যায় । যিটো দলেই এই ট্ৰফী নাপাওক কিয়, ইয়াক নিজৰ ট্ৰফী কেবিনেটত এনেদৰে সজাই ৰাখে যেন ই এক ডাঙৰ কৃতিত্ব । ইয়াক ক্ৰীড়া জগতৰ আটাইতকৈ দামী ট্ৰফীৰ ভিতৰত গণ্য কৰা হয় ।

কোনে পাব আই পি এল ২০২৫ৰ ট্ৰফী ?

আই পি এল ২০২৫ৰ ফাইনেল ৰয়েল চেলেঞ্জাৰছ বেংগালুৰু আৰু পঞ্জাব কিংছৰ মাজত অনুষ্ঠিত হ’ব । আৰ চি বি আৰু পঞ্জাৱ দলে এতিয়ালৈকে ইণ্ডিয়ান প্ৰিমিয়াৰ লীগৰ খিতাপ অৰ্জন কৰিব পৰা নাই । গতিকে ২০২৫ চনত আই পি এলে অষ্টমটো চেম্পিয়ন দল পোৱাটো নিশ্চিত । বংগালোৰে এতিয়ালৈকে চূড়ান্ত তিনিওখন মেচতে পৰাস্ত হোৱাৰ বিপৰীতে পঞ্জাবে এতিয়ালৈকে একমাত্ৰ ফাইনেলত পৰাস্ত হৈছে । এই মেচত সকলোৰে দৃষ্টি বিৰাট কোহলী, শ্ৰেয়াছ আয়াৰ আৰু জোছ হেজলউডৰ দৰে বিখ্যাত খেলুৱৈৰ ওপৰত থাকিব ।

লগতে পঢ়ক : আজি আই পি এলৰ খিতাপ দখলৰ যুঁজত নামিব পঞ্জাৱ-বেংগালুৰু; কোনে মাৰিব শেষ হাঁহি ?

আজি নিৰ্ণয় হ’ব আই পি এলৰ দ্বিতীয় ফাইনেলিষ্ট

আজি আহমেদাবাদৰ নৰেন্দ্ৰ মোদী ষ্টেডিয়ামত অনুষ্ঠিত হ’বলগীয়া ইণ্ডিয়ান প্ৰিমিয়াৰ লীগ ২০২৫ৰ কোৱালিফায়াৰ ২ মেচত মুম্বাই ইণ্ডিয়ানছ (এম আই)ৰ মুখামুখি হ’ব পাঞ্জাব কিংছ (পি বি কে এছ) । এই মেচখন ছেমি ফাইনেলৰ দৰে হ’ব, য’ত দুয়োটা দলৰ পৰাজয়ৰ অৰ্থ হ’ব প্ৰতিযোগিতাখনৰ পৰা বাহিৰ হোৱা । ৩ জুনত ফাইনেলত পোনপটীয়াকৈ আৰ চি বিৰ বিৰুদ্ধে খেলিব বিজয়ী দলটোৱে ।

ৰয়েল চেলেঞ্জাৰ্ছ বেংগালুৰু (আৰ চি বি)ৰ বিৰুদ্ধে একপক্ষীয় কোৱালিফায়াৰ ১ত ৮ উইকেটত পৰাস্ত হৈ পঞ্জাব কিংছৰ আত্মবিশ্বাস কিছু কমি গৈছে । এতিয়া অধিনায়ক শ্ৰেয়াছ আয়াৰ নেতৃত্বাধীন দলটোৱে আই পি এলৰ প্ৰথম খিতাপ জয়ৰ আশাত মৰণপন যুঁজত অৱতীৰ্ণ হ’ব ।

আনহাতে মুম্বাই ইণ্ডিয়ানছে এলিমিনেটৰত গুজৰাট টাইটানছক পৰাস্ত কৰি ষষ্ঠটো খিতাপৰ দিশে আৰু এখোজ আগুৱাই গৈছে । ইতিহাসে দেখুৱাইছে যে পঞ্জাৱ কিংছ আৰু অন্যান্য দলতকৈ আই পি এল নকআউটৰ এই পৰ্যায়ত খেলাৰ অভিজ্ঞতা মুম্বাই ইণ্ডিয়ানছৰ বেছি আৰু এইটোৱেই হাৰ্দিক পাণ্ডিয়া নেতৃত্বাধীন দলটোক এই মেচত সামান্য সুবিধা প্ৰদান কৰিছে ।

একে সময়তে পঞ্জাব কিংছৰ হৈ অধিনায়ক আয়াৰ আৰু প্ৰশিক্ষক ৰিকি পণ্টিঙৰ মিছন হ’ব নিজৰ দলটোক পূৰ্বৰ পৰাজয়ৰ পৰা উদ্ধাৰ কৰি পুনৰ শক্তিশালী কৰা, বিশেষকৈ বলিং আক্ৰমণত । অৰ্শদীপ সিঙৰ ওপৰত অতিৰিক্ত চাপ স্পষ্টকৈ দেখা পোৱাৰ বিপৰীতে মাৰ্কো জেন্সেন আৰু আই পি এলৰ সৰ্বোচ্চ উইকেট দখলকাৰী যুজবেন্দ্ৰ চাহালৰ অনুপস্থিতিয়ে আৰ চি বিৰ বিৰুদ্ধে পি বি কে এছৰ বলিং আক্ৰমণে সংগ্ৰাম কৰিবলগা হৈছিল ।

মুম্বাই ইণ্ডিয়ানছৰ কথা ক’বলৈ গ’লে ৰোহিত শৰ্মাই গুজৰাটৰ বলিং আক্ৰমণৰ বিৰুদ্ধে বিস্ফোৰক বেটিং কৰি দলটোক জয়ৰ দিশে আগুৱাই লৈ যায় । এনে পৰিস্থিতিত পাঞ্জাৱৰ ভুলৰ কোনো সুৰুঙা নাথাকিব । এই পৰ্যন্ত মুম্বাইৰ প্ৰদৰ্শন প্ৰায় প্ৰতিটো বিভাগতে উৎকৃষ্ট । ৰোহিত, যশপ্ৰীত বুমৰাহ, সূৰ্যকুমাৰ যাদৱ, তিলক বাৰ্মা আৰু হাৰ্দিক পাণ্ডিয়াই দলটোক শক্তিশালী কৰি তুলিছে ।

ইয়াৰ উপৰিও নতুন খেলুৱৈ জনী বেয়াৰষ্টো আৰু ৰিচাৰ্ড গ্লিছনেও দলটোৰ বাবে গুৰুত্বপূৰ্ণ অৱদান আগবঢ়াইছে । বিশেষকৈ গুজৰাটৰ বিৰুদ্ধে গ্লিছনৰ বলিঙে গুৰুত্বপূৰ্ণ ভূমিকা পালন কৰিছিল । প্ৰায়ে নৰেন্দ্ৰ মোদী ষ্টেডিয়ামৰ খেলপথাৰত উচ্চ স্ক’ৰিং খেল অনুষ্ঠিত হয়, গতিকে দুয়োটা দলৰ বলাৰৰ পৰিকল্পনা ইয়াত গুৰুত্বপূৰ্ণ বুলি প্ৰমাণিত হ’ব পাৰে ।

পঞ্জাৱ কিংছৰ সম্ভাৱ্য মূল একাদশ : প্ৰভসিমৰণ সিং, প্ৰিয়ংশ আৰ্য, জোছ ইংলিছ (উইকেটকীপাৰ), শ্ৰেয়াছ আয়েৰ (অধিনায়ক), নেহাল ৱাধেৰা, শশাংক সিং, মাৰ্কাছ ষ্টয়নিছ, আজমতুল্লাহ উমৰজাই, হৰপ্ৰীত ব্ৰাৰ, কাইল জেমিছন, আৰ্শদীপ সিং ।

মুম্বাই ইণ্ডিয়ানছৰ সম্ভাৱ্য মূল একাদশ : ৰোহিত শৰ্মা, জনী বেয়াৰষ্ট’ (উইকেটকীপাৰ), সূৰ্য্যকুমাৰ যাদৱ, তিলক বাৰ্মা, হাৰ্দিক পাণ্ডিয়া (অধিনায়ক), নমন ধীৰ, ৰাজ অংগদ বাৱা, মিচেল ছেণ্টনাৰ, ৰিচাৰ্ড গ্লিছন, যশপ্ৰীত বুমৰাহ, ট্ৰেণ্ট বৌল্ট ।

লগতে পঢ়ক : ‘খেলত হে হাৰিছো, যুদ্ধত নহয়…; পৰাস্ত হোৱাৰ পাছত খেলপথাৰক দোষাৰোপ শ্ৰেয়াছ আয়াৰৰ

আই পি এল প্লে অফত কোন কাৰ মুখামুখি হ’ব ?

ইণ্ডিয়ান প্ৰিমিয়াৰ লীগ ২০২৫ৰ অন্তিমখন লীগ মেচত ৰয়েল চেলেঞ্জাৰছ বেংগালুৰু (আৰ চি বি)য়ে লক্ষ্ণৌ ছুপাৰ জায়েন্টছ (এল এছ জি)ক ৬ উইকেটত পৰাস্ত কৰি পইণ্ট তালিকাৰ শীৰ্ষ ২ত উপনীত হৈছে । এই মেচখনৰ লগে লগে প্লে অফৰ সমগ্ৰ সমীকৰণ স্পষ্ট হৈ পৰিছে । মুম্বাই, আৰ চি বি, গুজৰাট আৰু পঞ্জাৱ কিংছে প্লে অফৰ বাবে যোগ্যতা অৰ্জন কৰিছে । এতিয়া প্লে অফত কোনটো দলে কাৰ লগত প্ৰতিযোগিতাত অৱতীৰ্ণ হ’ব ?

পইণ্ট টেবুলৰ শেহতীয়া অৱস্থান-

এতিয়া ১৯ পইণ্টেৰে পইণ্ট তালিকাৰ শীৰ্ষত আছে পঞ্জাব কিংছ । একে সময়তে ১৯ পইণ্টেৰে দ্বিতীয় স্থানত আছে আৰ চি বিও । পঞ্জাৱৰ ৰান ৰেট ভাল । সেইবাবেই দলটো প্ৰথম স্থানত আছে । একে সময়তে ১৮ পইণ্টেৰে তৃতীয় স্থানত গুজৰাট আৰু ১৬ পইণ্টেৰে চতুৰ্থ স্থানত আছে মুম্বাই । উল্লেখ্য যে আই পি এলত শীৰ্ষ ২টা স্থানত থকা দলে ফাইনেল খেলাৰ দুটা সুযোগ পায় ।

প্লে অফত কোন কাৰ মুখামুখি হ’ব-

২৯ মে’ত অনুষ্ঠিত হ’ব আই পি এলৰ প্ৰথমখন কোৱালিফায়াৰ । এই দিনটোত টেবুলৰ শীৰ্ষ দুটা দল অৰ্থাৎ পঞ্জাব কিংছ আৰু আৰ চি বি মুখামুখি হ’ব । এই খেলখন চণ্ডীগড়ত অনুষ্ঠিত হ’ব । জয়ী হোৱা দলটোৱে ফাইনেলত প্ৰৱেশ কৰিব কিন্তু পৰাজিত দলটোৱে আৰু এটা সুযোগ পাব ।

৩০ তাৰিখে তৃতীয় আৰু চতুৰ্থ স্থানৰ দলৰ মাজত সংঘৰ্ষ হ’ব । কোৱালিফায়াৰ ২ত যি দল পৰাস্ত হয় সেই দলৰ যাত্ৰা শেষ হ’ব । কিন্তু বিজয়ী দলটোৱে কোৱালিফায়াৰ-১ৰ পৰাজয়ী দলৰ বিৰুদ্ধে আন এখন মেচ খেলিব । এই মেচখন ১ জুনত আহমেদাবাদত অনুষ্ঠিত হ’ব । আনহাতে কোৱালিফায়াৰ-২ৰ বিজয়ী দলটোৱে ৩ জুনত ফাইনেল খেলিব ।

আৰ চি বি বনাম এল এছ জি-

টছত জয়লাভ কৰি আৰ চি বিয়ে প্ৰথমে বলিং কৰাৰ সিদ্ধান্ত লয় । এই মেচখনত টিম ডেভিদ আৰু জোছ হেজলউডে খেলা নাছিল । প্ৰথমে বেটিং কৰিবলৈ ওলাই আহিল লক্ষ্ণৌ । পণ্টৰ অপৰাজিত ১১৮ ৰানৰ ভিত্তিত লক্ষ্ণৌৱে আৰ চি বিক ২২৮ ৰানৰ লক্ষ্য নিৰ্ধাৰণ কৰি দিয়ে । ইয়াৰ প্ৰতিক্ৰিয়া স্বৰূপে আৰ চি বিয়ে ১৯ নং অভাৰত জিতেশ শৰ্মাৰ ৮৫ ৰানৰ ধুমুহাময় অপৰাজিত ইনিংছৰ ভিত্তিত জয়লাভ কৰে ।

লগতে পঢ়ক : লক্ষ্ণৌত ঋষভ পণ্টৰ ধুমুহা… বেংগালুৰুৰ বিৰুদ্ধে ৫৪ টা বলত অৰ্জন কৰিলে শতক