ড° হিমন্ত বিশ্ব শৰ্মাই অসমৰ মুখ্যমন্ত্ৰী হিচাপে তেওঁৰ একেৰাহে দ্বিতীয়টো কাৰ্যকালৰ বাবে শপত গ্ৰহণ কৰে
মঙলবাৰে এক ভব্য অনুষ্ঠানৰ মাজত ড° হিমন্ত বিশ্ব শৰ্মাই অসমৰ মুখ্যমন্ত্ৰী হিচাপে তেওঁৰ একেৰাহে দ্বিতীয়টো কাৰ্যকালৰ বাবে শপত গ্ৰহণ কৰে । গুৱাহাটীৰ খানাপাৰাস্থিত পশু চিকিৎসা মহাবিদ্যালয়ৰ খেলপথাৰত অনুষ্ঠিত এই শপত গ্ৰহণ অনুষ্ঠানত দেশৰ প্ৰধানমন্ত্ৰী নৰেন্দ্ৰ মোদী, কেন্দ্ৰীয় গৃহমন্ত্ৰী অমিত শ্বাহ, প্ৰতিৰক্ষামন্ত্ৰী ৰাজনাথ সিং আৰু এন ডি এ শাসিত বিভিন্ন ৰাজ্যৰ মুখ্যমন্ত্ৰীসকল উপস্থিত থাকে ।
মুখ্যমন্ত্ৰী হিচাপে দায়িত্ব গ্ৰহণ কৰাৰ পিছতেই ড০ শৰ্মাক অভিনন্দন জনায় ভাৰতত নিযুক্ত ছিংগাপুৰৰ উচ্চায়ুক্ত চাইমন ৱঙে । সামাজিক মাধ্যম এক্স-ৰ জৰিয়তে ৱঙে অসমৰ প্ৰগতিৰ যাত্ৰাত ছিংগাপুৰৰ সহযোগিতা অব্যাহত থাকিব বুলি আশ্বাস প্ৰদান কৰে । তেওঁ উল্লেখ কৰে যে ড০ শৰ্মাৰ নেতৃত্বত অসমে অনাগত দিনত সফলতাৰ এক নতুন উচ্চতাত আৰোহণ কৰিব ।
শপত গ্ৰহণৰ পূৰ্বে দিনটোৰ আৰম্ভণিতে ড° শৰ্মাই শক্তিপীঠ কামাখ্যা মন্দিৰ দৰ্শন কৰি ৰাজ্যবাসীৰ শান্তি আৰু সমৃদ্ধিৰ বাবে আশীৰ্বাদ বিচাৰে । নতুন চৰকাৰৰ কেবিনেট সন্দৰ্ভত ঘোষণা কৰি তেওঁ জনায় যে ৰামেশ্বৰ তেলী, অতুল বৰা, চৰণ বড়ো আৰু অজন্তা নেওগক মন্ত্ৰীসভাত অন্তৰ্ভুক্ত কৰা হৈছে । ইয়াৰ উপৰিও ৰঞ্জিত দাসক বিধানসভাৰ অধ্যক্ষ পদৰ বাবে মনোনীত কৰা হৈছে ।
এক বাৰ্তাত মুখ্যমন্ত্ৰীগৰাকীয়ে কয় যে তেওঁৰ নতুন টিমটোৱে এক শক্তিশালী আৰু বিকশিত অসম গঢ়াৰ স্বাৰ্থত সম্পূৰ্ণ উৎসৰ্গাৰে কাম কৰি যাব । এই শপত গ্ৰহণ অনুষ্ঠানে ৰাজ্যখনৰ ৰাজনৈতিক দিশত এক গুৰুত্বপূৰ্ণ অধ্যায়ৰ সূচনা কৰিছে ।
লগতে পঢ়ক : অসমত এন ডি এ ৩.০: পুনৰ হিমন্ত যুগৰ আৰম্ভণি, মুখ্যমন্ত্ৰী হিচাপে দ্বিতীয়বাৰৰ বাবে শপত গ্ৰহণ
