ছিংগাপুৰ চৰকাৰে বিভিন্ন ছচিয়েল মিডিয়া ছাইটক তাত থকা ভাৰতীয় সমূদায়ক লক্ষ্য কৰি লোৱা সকলো আপত্তিজনক সমল ব্লক কৰিবলৈ কঠোৰ নিৰ্দেশ দিছে

ছিংগাপুৰত থকা বিভিন্ন জাতি-জনগোষ্ঠীৰ সামাজিক সংহতি আৰু সম্প্ৰীতি নষ্ট কৰিবলৈ চলোৱা এক ষড়যন্ত্ৰৰ বিৰুদ্ধে তীব্ৰ ক্ষোভ প্ৰকাশ কৰিছে দেশখনৰ চৰকাৰে । ভাৰতত থকা ছিংগাপুৰৰ উচ্চায়ুক্তই শনিবাৰে এক গুৰুত্বপূৰ্ণ ঘোষণা কৰি কয় যে ছিংগাপুৰ চৰকাৰে বিভিন্ন ছচিয়েল মিডিয়া ছাইটক তাত থকা ভাৰতীয় সমূদায়ক লক্ষ্য কৰি লোৱা সকলো আপত্তিজনক সমল (content) ব্লক কৰিবলৈ কঠোৰ নিৰ্দেশ দিছে । এই উচটনিমূলক পোষ্ট আৰু সমলসমূহ সম্ভৱতঃ চীনৰ পৰা সৃষ্টি হৈছিল বুলি উচ্চায়ুক্তই উল্লেখ কৰে ।

ছিংগাপুৰৰ গৃহ পৰিক্ৰমা মন্ত্ৰালয়ৰ এক বিবৃতি অনুসৰি, দেশখনৰ ‘অনলাইন ক্ৰিমিনেল হাৰ্মছ এক্ট ২০২৩’-ৰ অধীনত ছিংগাপুৰ আৰক্ষীয়ে ইউটিউব, ফেচবুক আৰু এক্স প্লেটফৰ্মলৈ ‘ডিজেবলিং ডাইৰেকচন’ জাৰি কৰিছে । এই নিৰ্দেশনাৰ জৰিয়তে ছিংগাপুৰৰ ব্যৱহাৰকাৰীসকলে যাতে এনে বিদ্বেষমূলক পোষ্টসমূহ চাব নোৱাৰে, তাৰ বাবে তৎকালীনভাৱে সকলো প্ৰয়োজনীয় পদক্ষেপ ল’বলৈ ছচিয়েল মিডিয়া কোম্পানীসমূহক কোৱা হৈছে ।

চৰকাৰী সূত্ৰই প্ৰকাশ কৰা মতে, যোৱা মাহত চীনৰ অনলাইন তথ্য ক্ষেত্ৰত ছিংগাপুৰৰ সাংস্কৃতিক পৰিচয় আৰু জনগোষ্ঠীয় ৰাজনীতিক লৈ এক উচটনিমূলক ধাৰণা প্ৰচাৰ কৰা হৈছিল । ইয়াৰ ঠিক পিছতে ছচিয়েল মিডিয়াত ছিংগাপুৰৰ বহুসংস্কৃতিবাদৰ আৰ্হিটোক আঘাত কৰা বহু পোষ্ট ভাইৰেল হৈ পৰে, য’ত ছিংগাপুৰক “ভাৰতীয়সকলে গ্ৰাস কৰি পেলাইছে” বুলি ভিত্তিহীন প্ৰচাৰ চলোৱা হৈছিল ।

প্ৰচাৰিত পোষ্টসমূহত দাবী কৰা হৈছিল যে ছিংগাপুৰৰ বহুজাতীয় নীতি কেৱল পশ্চিমীয়া দেশক দেখুৱাবলৈ কৰা এক প্ৰদৰ্শনহে আৰু দেশখনৰ স্থিৰতাৰ আচল কাৰণ বহুজাতীয় নীতি নহয়, বৰঞ্চ ইয়াৰ সংখ্যাগৰিষ্ঠ চীনা জনসংখ্যাহে । ইয়াৰ উপৰিও, ছিংগাপুৰত বৃদ্ধি পোৱা ভাৰতীয় মূলৰ ৰাজনীতিবিদসকলে কেৱল ভাৰতীয় প্ৰব্ৰজনকাৰীৰ স্বাৰ্থত কাম কৰিব বুলিও বিষবাষ্প বিয়পোৱা হৈছিল ।

এই সন্দৰ্ভত ছিংগাপুৰ চৰকাৰে স্পষ্ট কৰি দিছে যে তেওঁলোকে স্থানীয়তাবাদ আৰু বিদেশী-বিদ্বেষৰ তীব্ৰ বিৰোধিতা কৰে । এটা সমূদায়ক আন এটা সমূদায়ৰ বিৰুদ্ধে থিয় কৰোৱাৰ যিকোনো প্ৰচেষ্টাক দেশখনে কেতিয়াও সহ্য নকৰে ।

বিদেশী উৎসৰ পৰা অহা এনে আক্ৰমণক “দুগুণে অগ্ৰহণযোগ্য” আখ্যা দি ছিংগাপুৰ চৰকাৰে কয় যে তেওঁলোকে সামাজিক সংহতি আৰু বৰ্ণগত সম্প্ৰীতিৰ প্ৰতি অহা ভাবুকিক অতি গুৰুত্বসহকাৰে লৈছে আৰু ইয়াৰ বিৰুদ্ধে দৃঢ় পদক্ষেপ গ্ৰহণ কৰিব । ইয়াৰ লগতে, চৰকাৰে ছিংগাপুৰৰ নাগৰিকসকলক অনলাইনত কোনো তথ্য গ্ৰহণ বা প্ৰচাৰ কৰোঁতে সচেতন হ’বলৈ আৰু সমাজক বিভাজিত কৰিব বিচৰা এনে সকলো অপপ্ৰচাৰ প্ৰত্যাখ্যান কৰিবলৈ আহ্বান জনাইছে ।

লগতে পঢ়ক : ৰাষ্ট্ৰসংঘৰ সৰ্বোচ্চ সন্মানৰে বিভূষিত ভাৰতীয় সেনাৰ মেজৰ অভিলাষা বাৰাক

পূব এছিয়াৰ বাহিৰত সংযুক্ত আৰব আমিৰাতৰ পাছপৰ্ট আটাইতকৈ শক্তিশালী, কিন্তু এটা অসুবিধা হ’ল যে ইয়াৰ নাগৰিকে আমেৰিকা যুক্তৰাষ্ট্ৰত ভিছাবিহীন প্ৰৱেশৰ সুবিধা নাপায়

আপোনাৰ পাছপৰ্টে নিৰ্ধাৰণ কৰে যে আপুনি পৃথিৱীৰ কিমানখন দেশলৈ সহজে যাব পাৰে । ২০২৬ চনত আটাইতকৈ শক্তিশালী আৰু আটাইতকৈ দুৰ্বল পাছপৰ্টৰ মাজত প্ৰায় ১৭০ খন দেশৰ পাৰ্থক্য আছে । এই তথ্যসমূহ ‘হেনলী পাছপৰ্ট ইনডেক্স’ৰ ওপৰত আধাৰিত, য’ত পৰীক্ষা কৰা হয় যে কোনো এখন দেশৰ নাগৰিকে ভিছাবিহীনভাৱে কিমান ঠাইলৈ যাব পাৰে ।

ছিংগাপুৰ শীৰ্ষত, ১৯২ খন দেশত ভিছাবিহীন প্ৰৱেশ-

ছিংগাপুৰ এই তালিকাত প্ৰথম স্থানত আছে, যিখন দেশৰ নাগৰিকে ১৯২ খন দেশলৈ ভিছাবিহীনভাৱে ভ্ৰমণ কৰিব পাৰে । এই সংখ্যা আটাইতকৈ দুৰ্বল পাছপৰ্ট থকা দেশবোৰৰ তুলনাত প্ৰায় পাঁচ গুণ বেছি । আনহাতে, আটাইতকৈ দুৰ্বল পাছপৰ্ট থকা দেশসমূহৰ নাগৰিকে ৫০ খনতকৈও কম দেশলৈ ভিছাবিহীনভাৱে যাব পাৰে । এই পাৰ্থক্যই দেখুৱায় যে ভূগোল, কূটনীতি আৰু ৰাজনৈতিক সুস্থিৰতাই গোলকীয় ভ্ৰমণত কিমান প্ৰভাৱ পেলায় ।

এছিয়া আৰু ইউৰোপৰ পাছপৰ্ট আটাইতকৈ শক্তিশালী-

ছিংগাপুৰৰ পিছতে দ্বিতীয় স্থানত আছে জাপান, দক্ষিণ কোৰিয়া আৰু সংযুক্ত আৰব আমিৰাত, যিবোৰ দেশৰ নাগৰিকে ১৮৭ খন দেশলৈ ভিছাবিহীনভাৱে যাব পাৰে । পূব এছিয়াৰ বাহিৰত সংযুক্ত আৰব আমিৰাতৰ পাছপৰ্ট আটাইতকৈ শক্তিশালী, কিন্তু এটা অসুবিধা হ’ল যে ইয়াৰ নাগৰিকে আমেৰিকা যুক্তৰাষ্ট্ৰত ভিছাবিহীন প্ৰৱেশৰ সুবিধা নাপায়, যি সুবিধা ছিংগাপুৰ, জাপান আৰু দক্ষিণ কোৰিয়াই লাভ কৰে । ইয়াৰ পিছতে ইউৰোপীয় দেশসমূহ এই তালিকাত আগবাঢ়ি আছে, বিশেষকৈ নৰৱে আৰু চুইজাৰলেণ্ড, যাৰ নাগৰিকে ১৮৫ খন দেশলৈ ভিছাবিহীনভাৱে যাব পাৰে ।

ইউৰোপীয় ইউনিয়নৰ ২৭ খন দেশৰ এক উমৈহতীয়া পাছপৰ্ট ব্যৱস্থা আছে, কিন্তু প্ৰতিখন দেশৰ ভিছাবিহীন প্ৰৱেশৰ পৰিসৰ সুকীয়া । বুলগেৰিয়া আৰু ৰোমানিয়াৰ নাগৰিকে ১৭৭ খন দেশলৈ যাব পাৰে, আনহাতে চুইডেনৰ নাগৰিকে ১৮৬ খন দেশলৈ যাব পাৰে । গড়ে ইউৰোপীয় ইউনিয়নৰ শক্তি ১৮৩ খন দেশৰ সমান, যিটো মালয়েছিয়া আৰু যুক্তৰাজ্যৰ সৈতে একে । ই কানাডা (১৮২) আৰু আমেৰিকা যুক্তৰাষ্ট্ৰতকৈও (১৭৯) অলপ আগত ।

আটাইতকৈ দুৰ্বল পাছপৰ্ট-

ৰেংকিঙৰ একেবাৰে তলৰ ফালে পাছপৰ্টৰ শক্তি যথেষ্ট হ্ৰাস পায় । আটাইতকৈ দুৰ্বল পাছপৰ্ট থকা দেশৰ নাগৰিকসকলে ৫০ খনতকৈও কম দেশলৈ যাব পাৰে । এই দেশসমূহত প্ৰায়ে ৰাজনৈতিক অস্থিৰতা, অধিক প্ৰব্ৰজন বা শেহতীয়া সংঘাত দেখা যায়, যাৰ বাবে ভিছাৰ নিয়মসমূহ কঠোৰ হৈ পৰে । নাইজেৰিয়া (৪৪), ছোমালিয়া (৩২) আৰু ডেম’ক্ৰেটিক ৰিপাব্লিক অৱ কঙ্গো (৪৩)ৰ দৰে আফ্ৰিকান দেশসমূহ এই তালিকাৰ তলৰ ফালে আছে । এই দেশসমূহৰ দ্ৰুতগতিত বৃদ্ধি পোৱা জনসংখ্যা আৰু বৃহৎ প্ৰব্ৰজনকাৰী সমাজে ভিছাৰ ওপৰত নিষেধাজ্ঞা আৰোপ কৰাৰ অন্যতম কাৰণ ।

পাকিস্তানৰ পাছপৰ্ট পৃথিৱীৰ আটাইতকৈ দুৰ্বল পাছপৰ্টসমূহৰ ভিতৰত গণ্য কৰা হয় । ই ৯৮তম স্থানত আছে আৰু এই স্থান য়েমেনৰ সৈতে ভগাই লৈছে । সৰল ভাষাত ক’বলৈ গ’লে, পাকিস্তানৰ পাছপৰ্ট থকা লোকসকলে মাত্ৰ ৩১ ৰ পৰা ৩৫ খন দেশলৈহে ভিছাবিহীনভাৱে বা ‘ভিছা অন এৰাইভেল’ সুবিধাৰে ভ্ৰমণ কৰিব পাৰে । অৰ্থাৎ, তেওঁলোকৰ বাবে বিদেশ ভ্ৰমণ অতি সীমিত ।

উল্লেখ্য যে, পাছপৰ্ট ৰেংকিং কেৱল ভ্ৰমণৰ সুবিধাই নহয়, ই গোলকীয় অসমতাও প্ৰতিফলিত কৰে । আপুনি কোনখন দেশত জন্মগ্ৰহণ কৰিছে, তাৰ ওপৰত নিৰ্ভৰ কৰি আপুনি পৃথিৱীৰ কোনবোৰ অংশলৈ যাব পাৰিব সেয়া ঠিক হয় । আফ্ৰিকা, মধ্যপ্ৰাচ্য আৰু দক্ষিণ এছিয়াৰ পাছপৰ্টসমূহ সাধাৰণতে ইউৰোপ আৰু পশ্চিমীয়া দেশসমূহৰ তুলনাত দুৰ্বল । অৱশ্যে মালয়েছিয়া আৰু সংযুক্ত আৰব আমিৰাতৰ দৰে কিছু ব্যতিক্ৰম আছে, কিন্তু তেওঁলোকেও আমেৰিকাৰ দৰে ডাঙৰ দেশত ভিছাবিহীন প্ৰৱেশৰ সুবিধা নাপায় ।

ভাৰতীয় পাছপৰ্টৰ স্থিতি-

ভাৰতৰ পাছপৰ্ট এই বছৰ ৮০তম স্থানত আছে । ভাৰতীয় নাগৰিকে ৫৫ ৰ পৰা ৫৮ খন দেশলৈ ভিছাবিহীন বা ‘ভিছা অন এৰাইভেল’ সুবিধাৰে ভ্ৰমণ কৰিব পাৰে ।

লগতে পঢ়ক : তেওঁলোকে এতিয়াও উপযুক্ত মূল্য ভৰা নাইঃ ইৰানৰ ১৪ দফীয়া প্ৰস্তাৱ মানি ল’বলৈ অমান্তি ট্ৰাম্প