ভেনিজুৱেলাত সংকটৰ সময়ত ভাৰতৰ আটাইতকৈ ডাঙৰ চিন্তা হৈছে জনসাধাৰণৰ সুৰক্ষা । ভেনিজুৱেলাৰ শেহতীয়া পৰিস্থিতিক লৈ ভাৰতৰ প্ৰতিক্ৰিয়া ।
ভেনিজুৱেলাৰ শেহতীয়া পৰিস্থিতিক লৈ বিশ্বৰ দেশসমূহে উদ্বেগ প্ৰকাশ কৰিছে । চীনকে ধৰি বহু দেশে আমেৰিকাৰ এই কাৰ্যক তীব্ৰ গৰিহণা দিছে । বৈদেশিক পৰিক্ৰমা মন্ত্ৰী এছ জয়শংকৰে মঙলবাৰে (৬ জানুৱাৰী) কয় যে আমেৰিকাৰ সামৰিক অভিযান আৰু ৰাষ্ট্ৰপতি নিকোলাছ মাদুৰো আৰু তেওঁৰ পত্নীক গ্ৰেপ্তাৰ কৰাৰ পিছত ভেনিজুৱেলাত সংকটৰ সময়ত ভাৰতৰ আটাইতকৈ ডাঙৰ চিন্তা হৈছে ভেনিজুৱেলাৰ জনসাধাৰণৰ সুৰক্ষা ।
লাক্সেমবাৰ্গত অনুষ্ঠিত এক অনুষ্ঠানত ভাষণ দি এছ জয়শংকৰে সকলো পক্ষকে একেলগে বহি ভেনিজুৱেলাৰ জনসাধাৰণৰ কল্যাণৰ বাবে সমাধানৰ পথত উপনীত হ’বলৈ আহ্বান জনায় । তেওঁ আৰু কয়, “আমি কালি এটা বিবৃতি জাৰি কৰিছিলো, গতিকে মই আপোনালোকক এই বিবৃতি চাবলৈ আহ্বান জনাইছো । বিবৃতিটোৰ মূল কথাটো হ’ল যে আমি এই শেহতীয়া পৰিঘটনাসমূহৰ বাবে চিন্তিত, কিন্তু আমি সকলো সংশ্লিষ্ট পক্ষক আহ্বান জনাইছো যে এতিয়াই একেলগে বহি ভেনেজুৱেলাৰ জনসাধাৰণৰ মংগল আৰু সুৰক্ষাৰ স্বাৰ্থত সমাধান বিচাৰি উলিয়াওক, কাৰণ শেষত সেয়াই আমাৰ চিন্তা ।”
এছ জয়শংকৰে উল্লেখ কৰে যে আমি ভেনেজুৱেলাক এনে এখন দেশ হিচাপে চাব বিচাৰো যাৰ সৈতে আমাৰ বহু বছৰ ধৰি অতি ভাল সম্পৰ্ক আছে । গতিকে আমি বিচাৰো যে তাত যি ঘটনাই নহওক কিয় জনসাধাৰণ সুৰক্ষিত হৈ থাকক । ভেনিজুৱেলাৰ ৰাষ্ট্ৰপতি নিকোলাছ মাদুৰো আৰু তেওঁৰ পত্নী চিলিয়া ফ্ল’ৰেছক শেহতীয়াকৈ ৰাজধানী কাৰাকাছত আমেৰিকান সেনাই অভিযানৰ সময়ত গ্ৰেপ্তাৰ কৰি আমেৰিকালৈ লৈ যায় । ড্ৰাগছ সৰবৰাহৰ আৰু অবৈধ অস্ত্ৰ-শস্ত্ৰৰ অভিযোগত আমেৰিকাত বিচাৰৰ সন্মুখীন হ’ব মাদুৰো ।
বৈদেশিক পৰিক্ৰমা মন্ত্ৰালয়ে এক বিবৃতিত কয়, “ভেনেজুৱেলাৰ শেহতীয়া পৰিস্থিতি গভীৰ উদ্বেগজনক। আমি পৰিস্থিতিৰ ওপৰত তীক্ষ্ণ দৃষ্টি ৰাখিছো । আমি সকলো সংশ্লিষ্ট পক্ষকে শান্তি আৰু স্থিতিশীলতা নিশ্চিত কৰাৰ বাবে আলোচনাৰ জৰিয়তে শান্তিপূৰ্ণ সমাধান বিচাৰিবলৈ আহ্বান জনাইছো । কাৰাকাছত থকা ভাৰতীয় দূতাবাস ভাৰতীয় সম্প্ৰদায়ৰ সৈতে যোগাযোগত আছে আৰু সকলো ধৰণৰ সহায় আগবঢ়াব ।”
লগতে পঢ়ক : ‘সাহস আছে যদি আহা, মোক উঠাই নিয়া…’ ড’নাল্ড ট্ৰাম্পক প্ৰত্যাহ্বান কলম্বিয়াৰ ৰাষ্ট্ৰপতিৰ ?
