ভৱিষ্যৎ পৰিকল্পনাৰ কথা উল্লেখ কৰি ড০ শৰ্মাই কয় যে শপত গ্ৰহণৰ ঠিক পিছতেই নতুন চৰকাৰৰ প্ৰথমখন কেবিনেট বৈঠক অনুষ্ঠিত হ’ব
অসমত দ্বিতীয়টো কাৰ্যকালৰ বাবে সাজু হৈছে বিজেপি নেতৃত্বাধীন এনডিএ চৰকাৰ । কাইলৈ অৰ্থাৎ ১২ মে’ত গুৱাহাটীৰ খানাপাৰাস্থিত পশু চিকিৎসা মহাবিদ্যালয়ৰ খেলপথাৰত অনুষ্ঠিত হ’বলগীয়া এই ভব্য শপত গ্ৰহণ অনুষ্ঠানৰ প্ৰস্তুতিৰ বুজ লবলৈ আজি নিজেই খেলপথাৰত উপস্থিত হয় মনোনীত মুখ্যমন্ত্ৰী হিমন্ত বিশ্ব শৰ্মা ।
পৰিদৰ্শন কালত সংবাদ মাধ্যমৰ আগত শৰ্মাই জানিবলৈ দিয়ে যে দেশৰ প্ৰধানমন্ত্ৰী নৰেন্দ্ৰ মোদীয়ে আজি নিশাই গুৱাহাটীত উপস্থিত হ’ব আৰু কাইলৈৰ ঐতিহাসিক অনুষ্ঠানত মুখ্য অতিথি হিচাপে অংশগ্ৰহণ কৰিব । তেওঁ কয়, “প্ৰধানমন্ত্ৰীগৰাকী আজিনিশা গুৱাহাটীত উপস্থিত হ’ব । কাইলৈ পুৱা ১১ বজাত অসমৰ নতুন চৰকাৰে শপত গ্ৰহণ কৰিব ।”
কেৱল প্ৰধানমন্ত্ৰীয়েই নহয়, এই অনুষ্ঠানত কেন্দ্ৰীয় গৃহমন্ত্ৰী অমিত শ্বাহ, প্ৰতিৰক্ষামন্ত্ৰী ৰাজনাথ সিং, বিজেপিৰ ৰাষ্ট্ৰীয় সভাপতি নীতিন নবীনৰ লগতে এনডিএ শাসিত বিভিন্ন ৰাজ্যৰ মুখ্যমন্ত্ৰীসকলো উপস্থিত থাকিব । ৰাজ্যৰ চুকে-কোণে থকা বুথ পৰ্যায়ৰ বিজেপি কৰ্যকৰ্তাৰ লগতে হাজাৰ হাজাৰ দলীয় সমৰ্থকে এই সমাৱেশত অংশ ল’ব বুলি আশা কৰা হৈছে ।
ভৱিষ্যৎ পৰিকল্পনাৰ কথা উল্লেখ কৰি ড০ শৰ্মাই কয় যে শপত গ্ৰহণৰ ঠিক পিছতেই নতুন চৰকাৰৰ প্ৰথমখন কেবিনেট বৈঠক অনুষ্ঠিত হ’ব । বিজেপিৰ নিৰ্বাচনী ইস্তাহাৰত দিয়া প্ৰতিশ্ৰুতিসমূহ আখৰে আখৰে পালন কৰাটোৱেই চৰকাৰৰ প্ৰাথমিক লক্ষ্য হ’ব বুলিও তেওঁ দৃঢ়তাৰে উল্লেখ কৰে ।
উল্লেখ্য যে, উত্তৰ-পূৰ্বাঞ্চলৰ লগতে দেশৰ বিভিন্ন প্ৰান্তৰ জ্যেষ্ঠ ৰাজনৈতিক নেতা আৰু বিশিষ্ট ব্যক্তিসকলৰ আগমনক লৈ খানাপাৰাৰ খেলপথাৰত নিৰাপত্তা ব্যৱস্থা অভূতপূৰ্বভাৱে কটকটীয়া কৰি তোলা হৈছে । বৰ্তমান যুদ্ধকালীন ক্ষিপ্ৰতাৰে চলিছে মঞ্চ সজ্জাৰ কাম ।
লগতে পঢ়ক : হিমন্ত বিশ্ব শৰ্মাৰ দ্বিতীয় ইনিংছ: কাইলৈ খানাপাৰাত ল’ব শপত, লক্ষ্য নিৰ্বাচনী ইস্তাহাৰৰ পূৰ্ণ ৰূপায়ণ
