প্ৰধানমন্ত্ৰী মোদীয়ে কয় যে চাহ শ্ৰমিকসকলক ভূমিৰ অধিকাৰ প্ৰদান কৰি দশকজুৰি তেওঁলোকে সন্মুখীন হৈ অহা এক ঐতিহাসিক অন্যায়ৰ অন্ত পেলাইছে
শুকুৰবাৰে দুদিনীয়া ভ্ৰমণসূচীৰে অসমত উপস্থিত হোৱা প্ৰধানমন্ত্ৰী নৰেন্দ্ৰ মোদীয়ে ৰাজ্যখনৰ কেইবাটাও উন্নয়মূলক প্ৰকল্পৰ শুভাৰম্ভ আৰু আধাৰশিলা স্থাপন কৰাৰ লগতে চাহ জনগোষ্ঠীৰ লোকক ভূমিৰ পট্টা প্ৰদান কৰে । গুৱাহাটীৰ জ্যোতি বিষ্ণু আন্তৰ্জাতিক কলা মন্দিৰত অনুষ্ঠিত হোৱা এক অনুষ্ঠানত আই-মাতৃৰ চৰণ স্পৰ্শ কৰি চাহ শ্ৰমিকৰ হাতত নিজ হাতে ভূমি পট্টা তুলি দিয়ে প্ৰধানমন্ত্ৰী নৰেন্দ্ৰ মোদীয়ে ।
এই অনুষ্ঠানত প্ৰধানমন্ত্ৰী মোদীয়ে কয় যে চাহ জনগোষ্ঠীৰ লোকসকলক ভূমিৰ অধিকাৰ প্ৰদান কৰি দশকজুৰি তেওঁলোকে সন্মুখীন হৈ অহা এক “ঐতিহাসিক অন্যায়”ৰ অন্ত পেলাইছে । ইয়াৰ লগতে তেওঁ কংগ্ৰেছৰ বিৰুদ্ধে শাসনকালত চাহ শ্ৰমিকসকলক অৱহেলা কৰাৰ অভিযোগ উত্থাপন কৰে ।
এখন জনসভাক সম্বোধন কৰি প্ৰধানমন্ত্ৰী মোদীয়ে ২৮,২৪১ টা চাহ শ্ৰমিক পৰিয়ালক ভূমি পট্টা বিতৰণৰ কাৰ্যসূচী শুভাৰম্ভ কৰে । প্ৰধানমন্ত্ৰীগৰাকীয়ে আনুষ্ঠানিকভাৱে তিনিগৰাকী হিতাধিকাৰীক পট্টা প্ৰদান কৰি এই প্ৰক্ৰিয়াৰ আৰম্ভণি কৰে ।
প্ৰধানমন্ত্ৰীয়ে কয়, “আমি তেওঁলোকক ভূমি পট্টা প্ৰদান কৰিছোঁ আৰু চাহ বাগিচাৰ শ্ৰমিকসকলৰ প্ৰতি কৰা এক ঐতিহাসিক অন্যায়ৰ অন্ত পেলোৱাৰ বাবে মই অসম চৰকাৰক অভিনন্দন জনাইছোঁ ।”
চাহ শ্ৰমিকসকলৰ সৈতে থকা তেওঁৰ ব্যক্তিগত সম্পৰ্কৰ কথা উল্লেখ কৰি প্ৰধানমন্ত্ৰী মোদীয়ে কয় যে এই পদক্ষেপ আছিল এটা পুৰণি ঋণ পৰিশোধ কৰাৰ এক উপায় । তেওঁ কয়, “প্ৰকৃততে সকলো চাহ শ্ৰমিকক ভূমি পট্টা দি মই মোৰ ঋণহে পৰিশোধ কৰিছোঁ । আপোনালোকৰ দ্বাৰা উৎপাদিত আৰু প্ৰেৰণ কৰা চাহ বিক্ৰী কৰিয়েই মই আজি এই স্থান পাইছোঁ । মোৰ ওপৰত আপোনালোকৰ আশীৰ্বাদ আছে ।”
কংগ্ৰেছক আক্ৰমণ কৰি প্ৰধানমন্ত্ৰী মোদীয়ে অভিযোগ কৰে যে দলটোৱে নিজৰ শাসনকালত চাহ শ্ৰমিকসকলৰ কল্যাণৰ কথা আওকাণ কৰিছিল । তেওঁ লগতে দাবী কৰে যে যোৱা এটা দশকত অসমৰ উন্নয়ন উত্তৰ-পূৰ্বাঞ্চলৰ বাবে এক আৰ্হি হিচাপে আত্মপ্ৰকাশ কৰিছে আৰু ই চুবুৰীয়া পশ্চিম বংগৰ ৰাজনৈতিক পৰিৱেশতো প্ৰভাৱ পেলাইছে, য’ত এপ্ৰিল মাহত বিধানসভা নিৰ্বাচন হোৱাৰ সম্ভাৱনা আছে ।
কৃষি খণ্ডৰ বিষয়ে উল্লেখ কৰি প্ৰধানমন্ত্ৰী মোদীয়ে কয় যে চৰকাৰে কৃষকসকলক ক’ভিড-১৯ মহামাৰী আৰু আন্তঃৰাষ্ট্ৰীয় সংঘাতৰ দৰে বিশ্বব্যাপী অস্থিৰতাৰ পৰা সুৰক্ষিত কৰি ৰাখিছে । তেওঁ কয়, “আমি আমাৰ কৃষকসকলক ক’ভিড-১৯ আৰু যুদ্ধৰ দৰে গোলকীয় ঘটনাৰ পৰা আঁতৰাই ৰাখিছোঁ । কৃষকসকলক সকাহ দিবলৈ আমি সাৰত ৰাজসাহায্য হিচাপে ১২ লাখ কোটি টকা ব্যয় কৰিছোঁ ।”
আনহাতে এই অনুষ্ঠানতে প্ৰধানমন্ত্ৰীয়ে কংগ্ৰেছৰ বিৰুদ্ধে পশ্চিম এছিয়াৰ যুদ্ধ পৰিস্থিতিৰ মাজতো ভুল তথ্য প্ৰচাৰ কৰাৰ অভিযোগ উত্থাপন কৰে । কৃষি সমৰ্থনমূলক ব্যৱস্থাসমূহৰ তুলনা কৰি মোদীয়ে কয় যে ২০১৪ চনৰ আগৰ দশকত কংগ্ৰেছ চৰকাৰে ন্যূনতম সমৰ্থন মূল্য হিচাপে ৬.৫ লাখ কোটি টকা প্ৰদান কৰিছিল, আনহাতে ৰাষ্ট্ৰীয় গণতান্ত্ৰিক মিত্ৰজোঁট চৰকাৰে যোৱা দহ বছৰত ২০ লাখ কোটি টকা প্ৰদান কৰিছে ।
তেওঁ লগতে কয়, “এনডিএ চৰকাৰ সহানুভূতি আৰু সুশাসনৰ বাবে পৰিচিত । আমি সমাজৰ সকলো শ্ৰেণীৰ উন্নয়নত বিশ্বাস কৰো ।”
লগতে পঢ়ক : কংগ্ৰেছ ভুৱা প্ৰতিশ্ৰুতিৰ দোকানঃ গুৱাহাটীৰ পৰা প্ৰধানমন্ত্ৰী মোদীৰ তীব্ৰ আক্ৰমণ
