শুকুৰবাৰে নেপালৰ প্ৰধানমন্ত্ৰী হিচাপে শপত গ্ৰহণ কৰে বলেন্দ্ৰ শ্বাহে। তেওঁ অভিলেখ সংখ্যক ভোটত কে পি শৰ্মা আলীক পৰাস্ত কৰে। বলেন্দ্ৰ শ্বাহৰ এই বিজয়ক নেপালী ৰাজনীতিত এক বৃহৎ পৰিৱৰ্তন হিচাপে গণ্য কৰা হৈছে।
নেপালত যোৱা বছৰত GEN-Z এ ক্ষমতা পৰিবৰ্তনৰ যি প্ৰতিশ্ৰুতি লৈছিল,সেয়া আজি সম্পূৰ্ণ হ’ল।শুকুৰবাৰে নেপালৰ ৰাজনীতিত এক বৃহৎ পৰিৱৰ্তন ঘটিলে।শুকুৰবাৰে দেশখনৰ নতুন প্ৰধানমন্ত্ৰী হিচাপে শপত গ্ৰহণ কৰিলে ৰাষ্ট্ৰীয় স্বতন্ত্ৰ দলৰ নেতা বলেন্দ্ৰ শ্বাহে। তেওঁ নেপালৰ ৪৭ সংখ্যক প্ৰধানমন্ত্ৰী হিচাপে পৰিগণিত হৈছে।
ৰাষ্ট্ৰপতি ৰামচন্দ্ৰ পৌডেলে সংবিধানৰ ৭৬(১) অনুচ্ছেদৰ অধীনত বলেন্দ্ৰ শ্বাহক নিযুক্তি দিয়ে। শুকুৰবাৰে ৰাম নৱমী উপলক্ষে কাঠমাণ্ডুত অনুষ্ঠিত এক ভৱ্য অনুষ্ঠানত প্ৰধানমন্ত্ৰী হিচাপে শপত গ্ৰহণ কৰে বলেন্দ্ৰ শ্বাহে।কাঠমাণ্ডুত অৱস্থিত ৰাষ্ট্ৰপতি ভৱন ‘শীতল নিৱাছ’ত স্থানীয় সময় অনুসৰি ১২:৩৪ বজাত তেওঁ শপত গ্ৰহণ কৰে।
উল্লেখযোগ্য যে,এই শপত গ্ৰহণ অনুষ্ঠানটো হিন্দু ৰীতি-নীতি অনুসৰি অনুষ্ঠিত হৈছিল, য’ত ৭ গৰাকীকৈ শংখবাদকে শংখ বজাই কাৰ্যসূচীৰ আৰম্ভণি কৰে। শপত গ্ৰহণ অনুষ্ঠানৰ পিছতে অন্তৱৰ্তীকালীন প্ৰধানমন্ত্ৰী সুশীলা কাৰ্কীক বলেন্দ্ৰ শ্বাহে আকোৱালি ধৰে। যোৱা বছৰ Gen-Zৰ প্ৰতিবাদৰ পিছত নেপালী উচ্চতম ন্যায়ালয়ৰ প্ৰাক্তন মুখ্য ন্যায়াধীশ সুশীলা কাৰ্কিক অন্তৱৰ্তীকালীন প্ৰধানমন্ত্ৰী হিচাপে নিযুক্তি দিয়া হৈছিল।
শপত গ্ৰহণৰ পিছতেই প্ৰধানমন্ত্ৰী নৰেন্দ্ৰ মোদীয়ে বলেন্দ্ৰ শ্বাহক শুভেচ্ছা দি সামাজিক মাধ্যমত লিখিছে যে, ‘নেপালৰ নতুন প্ৰধানমন্ত্ৰী হিচাপে শপত গ্ৰহণ কৰাৰ বাবে বলেন্দ্ৰ শ্বাহলৈ আন্তৰিক অভিনন্দন।আপোনাৰ নিযুক্তিয়ে নেপালৰ জনসাধাৰণে আপোনাৰ নেতৃত্বৰ ওপৰত দেখুওৱা আস্থাক প্ৰতিফলিত কৰে।আপোনালোকৰ সৈতে লগ হৈ কাম কৰিবলৈ মই আগ্ৰহী হৈ আছো যাতে ভাৰত আৰু নেপালৰ মাজৰ বন্ধুত্ব আৰু সহযোগিতাই আমাৰ দুয়োখন দেশৰ জনসাধাৰণৰ লাভৰ বাবে ইয়াক আৰু অধিক উচ্চতালৈ লৈ যাব পাৰে।
লগতে পঢ়ক: আজি প্ৰধানমন্ত্ৰী হিচাপে দায়িত্ব ল’ব বলেন্দ্ৰ শ্বাহে; নেপালে লাভ কৰিব আটাইতকৈ যুৱ প্ৰধানমন্ত্ৰী
