প্ৰধানমন্ত্ৰী মোদীয়ে কয় যে ভাৰতে দুয়োখন দেশৰ জনসাধাৰণৰ সমৃদ্ধি, প্ৰগতি আৰু কল্যাণৰ বাবে নেপালৰ সৈতে কাম কৰিবলৈ প্ৰতিশ্ৰুতিবদ্ধ

প্ৰধানমন্ত্ৰী নৰেন্দ্ৰ মোদীয়ে ৫ মাৰ্চত নেপালত অনুষ্ঠিত ৰাষ্ট্ৰীয় নিৰ্বাচনত বিজয়ী ৰাষ্ট্ৰীয় স্বতন্ত্ৰ পাৰ্টিৰ শীৰ্ষ নেতাসকলৰ সৈতে টেলিফোনযোগে বাৰ্তালাপ কৰি নিৰ্বাচনী সফলতাৰ বাবে অভিনন্দন জনায় । তেওঁ আৰ এছ পিৰ সভাপতি ৰবি লামিচানে আৰু দলৰ জ্যেষ্ঠ নেতা বলেন্দ্ৰ শ্বাহৰ সৈতে বাৰ্তালাপ কৰি নিৰ্বাচনী সফলতা আৰু ৰাষ্ট্ৰীয় স্বতন্ত্ৰ পাৰ্টিৰ বিজয়ৰ বাবে অভিনন্দন জনায় । লগতে প্ৰধানমন্ত্ৰী মোদীয়ে দুয়োজন নেতালৈ নেপালত গঠন হ’বলগীয়া নতুন চৰকাৰৰ বাবে শুভেচ্ছা জ্ঞাপন কৰে ।

প্ৰধানমন্ত্ৰী মোদীয়ে কয় যে ভাৰতে দুয়োখন দেশৰ জনসাধাৰণৰ সমৃদ্ধি, প্ৰগতি আৰু কল্যাণৰ বাবে নেপালৰ সৈতে কাম কৰিবলৈ প্ৰতিশ্ৰুতিবদ্ধ । প্ৰধানমন্ত্ৰী মোদীয়ে আস্থা প্ৰকাশ কৰে যে ভাৰত আৰু নেপালৰ নতুন চৰকাৰৰ মাজত সহযোগিতা আৰু ভাগ-বতৰা কৰা প্ৰচেষ্টাৰ জৰিয়তে অনাগত বছৰবোৰত দুয়োখন দেশৰ মাজৰ সম্পৰ্কই নতুন উচ্চতাত উপনীত হ’ব । তেওঁ কয় যে দুয়োখন চুবুৰীয়া দেশৰ মাজত শক্তিশালী অংশীদাৰিত্ব আঞ্চলিক উন্নয়ন আৰু স্থিতিশীলতাৰ বাবেও অতি গুৰুত্বপূৰ্ণ ।

উল্লেখ্য যে, নেপালৰ ৰাজনীতিত এক বৃহৎ পৰিৱৰ্তন হৈছে । ৫ মাৰ্চত অনুষ্ঠিত ৰাষ্ট্ৰীয় নিৰ্বাচনত যুৱ নেতা বলেন্দ্ৰ শ্বাহে নিজৰ দুৰ্গত প্ৰবীণ ৰাজনীতিবিদ তথা প্ৰাক্তন প্ৰধানমন্ত্ৰী কে পি শৰ্মা অলীক পৰাস্ত কৰি এক বৃহৎ অঘটন ঘটাই । পেছাত এজন অভিযন্তা বলেন্দ্ৰ শ্বাহে প্ৰথমে কাঠমাণ্ডুৰ মেয়ৰ হিচাপে বিশিষ্টতা লাভ কৰিছিল আৰু এতিয়া চাৰি বছৰৰ পাছত নেপালৰ কনিষ্ঠতম প্ৰধানমন্ত্ৰী হৈ ইতিহাস ৰচনা কৰিবলৈ সাজু হৈছে । ৰাজনীতিত প্ৰৱেশ কৰাৰ আগতে তেওঁ আছিল এজন ৰেপাৰ (গায়ক) ।

লগতে পঢ়ক : আবুধাবিৰ সৰ্ববৃহৎ হিন্দু মন্দিৰত হাই এলাৰ্ট, যুদ্ধৰ মাজতে বন্ধ BAPS মন্দিৰ