মহিলা সংৰক্ষণ বিধেয়কক লৈ চৰকাৰক আক্ৰমণ কৰে কংগ্ৰেছৰ সাংসদ তথা বিৰোধী দলপতি ৰাহুল গান্ধীয়ে
বিশেষ অধিৱেশনৰ দ্বিতীয় দিনা লোকসভাত এক হূলস্থুলীয়া পৰিৱেশৰ সৃষ্টি হয় । মহিলা সংৰক্ষণ বিধেয়কক লৈ চৰকাৰক আক্ৰমণ কৰে কংগ্ৰেছৰ সাংসদ তথা বিৰোধী দলপতি ৰাহুল গান্ধীয়ে । ভাষণত ৰাহুল গান্ধীয়ে বিধেয়কখনক দলিত, মহিলা, অ’বিচিৰ অধিকাৰৰ বিৰুদ্ধে আখ্যা দিয়ে । ইয়াৰ পিছতে বিজেপি সাংসদ তথা অভিনেত্ৰী কংগনা ৰানাৱটে ৰাহুল গান্ধীক লক্ষ্য কটাক্ষ কৰি প্ৰতিক্ৰিয়া প্ৰকাশ কৰিছে ।
সংবাদ মাধ্যমৰ সৈতে হোৱা কথা-বতৰাত কংগনা ৰানাৱটে কয়, “ৰাহুল গান্ধীৰ কথা শুনিলে মূৰৰ বিষ হয় । শৈশৱত আঘাতৰ মাজেৰে তেওঁ পাৰ হৈছে । সৰুতে চাগৈ কোনো মেজিক শ্ব’ চাইছিল, আমাক সেই বিষয়ে কৈছে । এজন যাদুকৰে তেওঁক শিকলিৰে বান্ধিছিল । ৰাতি তেওঁ কঁপনি উঠিছিল । আইতাকে তেওঁক সাধু কৈছিল । এইবোৰ একেবাৰে আজেবাজে কথা । অধ্যক্ষ মহোদয়ে আনকি তেওঁক বন্ধ কৰিবলৈও কৈছিল । তাৰ পিছত ৰাহুল গান্ধীয়ে কৈছিল, আপোনালোকে ভাল পাব । এইবোৰ অৰ্থহীন কথা । মোৰ দুখ লাগে । সংসদক তেওঁ কৌতুকলৈ পৰিণত কৰিছে ।“
উল্লেখ্য য়ে, ৰাহুল গান্ধীয়ে স্পষ্টকৈ উল্লেখ কৰিছিল যে তেওঁ এই বিধেয়কখন গৃহীত হ’বলৈ নিদিয়ে । কংগ্ৰেছৰ সাংসদগৰাকীয়ে কয় যে, “এইখন মহিলা সংৰক্ষণ বিধেয়ক নহয়, কাৰণ মহিলা সংৰক্ষণ আইনখন ইতিমধ্যে ২০২৩ চনত গৃহীত হৈছিল । বৰ্তমানৰ বিধেয়কখন দেশৰ নিৰ্বাচনী মানচিত্ৰ সলনি কৰাৰ প্ৰয়াস । এই বিধেয়কখন অনুসূচিত জাতি, অনুসূচিত জনজাতি আৰু অ’বিচি সম্প্ৰদায়ৰ বিৰুদ্ধে আৰু তেওঁলোকৰ অধিকাৰ কাঢ়ি লব । চৰকাৰে ভয় খাইছে । তেওঁলোকে অসম আৰু জম্মু-কাশ্মীৰত যি কৰিলে, তেওঁলোকে এতিয়া সমগ্ৰ দেশতে কৰিব বিচাৰিছে ।”
ৰাহুল গান্ধীয়ে কয় যে এই বিধেয়কখনৰ নাৰী সবলীকৰণৰ সৈতে কোনো সম্পৰ্ক নাই । ক্ষমতা দখল কৰিবলৈ চেষ্টা চলাইছে চৰকাৰে । এই বিধেয়কখন ৰাষ্ট্ৰবিৰোধী আৰু তেওঁ ইয়াক হ’বলৈ নিদিয়ে বুলি মন্তব্য কৰে । ইয়াক লজ্জাজনক আইন আখ্যা দি ৰাহুলে কয় যে চৰকাৰে অ’বিচিৰ অধিকাৰ কাঢ়ি নিব বিচাৰে । তেওঁ চৰকাৰক কয় যে তেওঁলোকে পুৰণি আইনখন পুনৰ প্ৰৱৰ্তন কৰিলেহে তেওঁলোকক সমৰ্থন কৰিব, কিন্তু এই বিধেয়কখন নহয় ।
লগতে পঢ়ক : দ্বৈত নাগৰিকত্বৰ অভিযোগক লৈ বিপদত ৰাহুল গান্ধী, এফআইআৰ ৰুজুৰ নিৰ্দেশ
