আবেদনকাৰীৰ দাবী অনুসৰি, তেওঁৰ হাতত ব্ৰটিছ চৰকাৰৰ কিছু নথি-পত্ৰ আৰু ইমেইল আছে যিয়ে প্ৰমাণ কৰে যে ৰাহুল গান্ধী এজন ব্ৰটিছ নাগৰিক
দ্বি-নাগৰিকত্বৰ অভিযোগক লৈ পুনৰ বিপদত পৰিছে লোকসভাৰ বিৰোধী দলপতি ৰাহুল গান্ধী । বিৰোধী দলপতিগৰাকীৰ বিৰুদ্ধে দ্বৈত নাগৰিকত্ব গ্ৰহণ কৰাৰ যি অভিযোগ উত্থাপন হৈছে, সেই সন্দৰ্ভত এক তদন্তৰ প্ৰয়োজন আছে বুলি আজি এলাহাবাদ উচ্চ ন্যায়ালয়ৰ লক্ষ্ণৌ বিচাৰপীঠে মন্তব্য কৰে । উত্তৰ প্ৰদেশ চৰকাৰক এই তদন্ত নিজেই চলাবলৈ অথবা কোনো কেন্দ্ৰীয় সংস্থাক এই বিষয়টো হস্তান্তৰ কৰি তদন্ত সম্পন্ন কৰিবলৈ ন্যায়ালয়ে নিৰ্দেশ দিছে ।
বিজেপি কৰ্মী এছ ভিগ্নেশ শিৱিৰে দাখিল কৰা এক আবেদনৰ ভিত্তিত এই নিৰ্দেশ প্ৰদান কৰা হৈছে । উল্লেখযোগ্য যে লক্ষ্ণৌৰ এখন বিশেষ সাংসদ/বিধায়ক (MP/MLA) আদালতে যোৱা ২৮ জানুৱাৰীত কংগ্ৰেছ নেতাগৰাকীৰ বিৰুদ্ধে এজাহাৰ পঞ্জীয়নৰ আবেদন নাকচ কৰি যি নিৰ্দেশ দিছিল, তাক প্ৰত্যাহ্বান জনাই এই আবেদন দাখিল কৰা হৈছিল । নিম্ন আদালতে পূৰ্বে মত পোষণ কৰিছিল যে নাগৰিকত্ব সম্পৰ্কীয় বিষয়সমূহ নিষ্পত্তি কৰাৰ ক্ষেত্ৰত আদালতখনৰ কোনো এক্তিয়াৰ নাই ।
কৰ্ণাটকৰ বাসিন্দা আবেদনকাৰীজনে ভাৰতীয় ন্যায় সংহিতা (BNS), চৰকাৰী গোপনীয়তা আইন (Official Secrets Act), বিদেশী আইন আৰু পাছপৰ্ট আইনৰ বিভিন্ন ধাৰাৰ অধীনত অভিযোগ উত্থাপন কৰি এক বিতং তদন্ত তথা এজাহাৰ পঞ্জীয়নৰ দাবী জনাইছে ।
আবেদনকাৰীৰ দাবী অনুসৰি, তেওঁৰ হাতত ব্ৰটিছ চৰকাৰৰ কিছু নথি-পত্ৰ আৰু ইমেইল আছে যিয়ে প্ৰমাণ কৰে যে ৰাহুল গান্ধী এজন ব্ৰটিছ নাগৰিক । তেওঁৰ মতে, এই কাৰণেই ৰাহুল গান্ধীয়ে ভাৰতত নিৰ্বাচন খেলিবলৈ অযোগ্য আৰু তেওঁ লোকসভাৰ সদস্য হিচাপেও বাহাল থাকিব নোৱাৰে । প্ৰথম অৱস্থাত এই অভিযোগ ৰায়বেৰেলীৰ বিশেষ সাংসদ/বিধায়ক আদালতত দাখিল কৰা হৈছিল । ইয়াৰ পিছত ২০২৫ চনৰ ১৭ ডিচেম্বৰত উচ্চ ন্যায়ালয়ে এই গোচৰটো লক্ষ্ণৌলৈ স্থানান্তৰ কৰে । লক্ষ্ণৌৰ আদালতে আবেদনখন নাকচ কৰাৰ পাছতে আবেদনকাৰীয়ে পুনৰ উচ্চ ন্যায়ালয়ৰ কাষ চাপে ।
লগতে পঢ়ক : “সংবেদনশীলতাৰে সিদ্ধান্ত লওক”; ভোটদানৰ পূৰ্বে সকলো দললৈ আবেদন প্ৰধানমন্ত্ৰী মোদীৰ
