শুকুৰবাৰে ৰায়পুৰত অনুষ্ঠিত হ’ব ভাৰত-নিউজীলেণ্ডৰ দ্বিতীয়খন টি-২০ মেচ । জয়ৰ ধাৰা অব্যাহত ৰাখিবলৈ খেলপথাৰত নামিব ভাৰতীয় দল।
জয়ৰ ধাৰা অব্যাহত ৰখাৰ লক্ষ্যৰে শুকুৰবাৰে নিউজীলেণ্ডৰ বিৰুদ্ধে দ্বিতীয়খন টি-২০ত মুখামুখি হ’ব সূৰ্য ব্ৰিগেড । ইতিমধ্যে নাগপুৰত ২১ জানুৱাৰীত অনুষ্ঠিত হোৱা প্ৰথমখন মেচত লাভ কৰা বৃহৎ জয়ৰ পিছত বৰ্তমান আত্মবিশ্বাস তুংগত আছে ভাৰতীয় দলৰ । ইফালে দ্বিতীয়খন টি-২০ত সকলোৰে দৃষ্টি শীৰ্ষ ক্ৰমৰ বেটছমেন সঞ্জু চেমছন আৰু ঈশান কিষনৰ ওপৰত থাকিব । এদিনীয়া শৃংখলাত পৰাস্ত হোৱাৰ পাছত নাগপুৰত অনুষ্ঠিত হোৱা প্রথম টি-২০ত ভাৰতে ৪৮ ৰানত জয় নিশ্চিত কৰে যদিও চেমছন আৰু কিষনে বিশেষ প্ৰদৰ্শন কৰাত ব্যৰ্থ হয় ৷
বিস্ফোৰক ফৰ্মত অভিষেক শৰ্মা-
ভাৰতীয় দলৰ কেইবাটাও দুৰ্বলতা প্ৰথম টি-২০ত স্পষ্টকৈ ধৰা পৰিছে । ইয়াৰ পিছতো দলটোৰ প্ৰদৰ্শনে টি-২০ বিশ্বকাপৰ পূৰ্বে প্ৰতিদ্বন্দ্বী দললৈ বিপদজনক সংকেত প্ৰেৰণ কৰিছে, য’ত ভাৰত ডিফেণ্ডিং চেম্পিয়ন হিচাপে প্ৰৱেশ কৰিছে । ভাৰতীয় দলে টি-২০ বিশ্বকাপৰ খিতাপ ৰক্ষা কৰা প্ৰথমটো দল হ’বলৈ হ’লে বুধবাৰৰ নিশাৰ দৰে অভিষেক শৰ্মাই শীৰ্ষ ক্ৰমত আগ্ৰাসী বেটিং অব্যাহত ৰাখিব লাগিব । আনহাতে কুলদীপ যাদৱৰ অনুপস্থিতিতো বলিং বিভাগ যথেষ্ট সন্তুলিত যেন ধাৰণা হৈছে ।
নিউজীলেণ্ডে তেওঁলোকৰ বলিং প্ৰদৰ্শন আশা কৰা ধৰণৰ নাছিল বুলি জানে যদিও তেওঁলোকৰ শীঘ্ৰেই শক্তিশালী প্ৰত্যাৱৰ্তনৰ প্ৰৱণতা আছে । শেহতীয়াকৈ কিৱি দলৰ অন্যতম বেটিং মেৰুদণ্ড ডেভন কনৱে আউট হোৱাৰ ধৰণলৈ চাই দলটো অলপ চিন্তিত হোৱা যেন পৰিলক্ষিত হৈছে । এই সকলোবোৰ দুৰ্বলতা আঁতৰাই নিউজীলেণ্ডে দ্বিতীয় টি-২০ত ভাৰতীয় দলক তীব্ৰ প্ৰত্যাহ্বান জনোৱাৰ সম্ভৱনা আছে ।
কেতিয়া অনুষ্ঠিত হ’ব দ্বিতীয়খন টি-২০ মেচ ?
উল্লেখ্য যে, ২৩ জানুৱাৰী, শুকুৰবাৰে ভাৰত আৰু নিউজীলেণ্ডৰ মাজত অনুষ্ঠিত হ’ব দ্বিতীয়খন টি-২০ মেচ । ৰায়পুৰৰ শ্বহীদ বীৰ নাৰায়ণ সিং আন্তঃৰাষ্ট্ৰীয় ষ্টেডিয়ামত এই মেচ অনুষ্ঠিত হ’ব । সন্ধিয়া ৭:০০ বজাৰ পৰা আৰম্ভ হ’বলগা মেচখনৰ টছ আধা ঘণ্টা পূৰ্বে, সন্ধিয়া ৬:৩০ বজাত হ’ব ।
লগতে পঢ়ক : টি-২০ বিশ্বকাপৰ পৰা বাহিৰ হ’ল বাংলাদেশ…
