ইজৰাইল-আমেৰিকা আৰু ইৰাণৰ যুদ্ধৰ বাবে কাটাৰে তেওঁলোকৰ নিজৰ বৃহৎ এল এন জি প্লাণ্ট ৰাছ লাফান ঔদ্যোগিক চহৰত থকা এল এন জি ৰ উৎপাদন সাময়িকভাৱে বন্ধ কৰিবলগীয়া হৈছে।
ইৰাণ আৰু ইজৰাইলৰ মাজত যুদ্ধ ভয়ংকৰ হৈ পৰিছে,ইজৰাইলৰ হৈ আমেৰিকাই ইৰাণক আক্ৰমণ কৰিছে,এই সংঘাত যোৱা ৭ দিন ধৰি চলি আছে, আৰু প্ৰতিদিনেই নিৰিহ লোকৰ মৃত্যু হৈছে।ইফালে সমগ্ৰ বিশ্বই এই যুদ্ধৰ ফলত অৰ্থনৈতিকভাৱে প্ৰভাৱিত হ’ব, কাৰণ এই যুদ্ধৰ কেন্দ্ৰবিন্দু হৈছে খাৰুৱা তেল।
এতিয়া যুদ্ধৰ সপ্তম দিনটোত খাৰুৱা তেলৰ সন্দৰ্ভত এক বৃহৎ সতৰ্কবাণী ওলাইছে। কাটাৰৰ শক্তি মন্ত্ৰী সাদ আল-কাবীয়ে কয় যে মধ্যপ্ৰাচ্যৰ পৰা শক্তিৰ যোগান বন্ধ হ’লে এই সংকটে বিশ্বৰ অৰ্থনীতিক কঁপাই তুলিব পাৰে।
তেওঁ এক সাক্ষাৎকাৰত কৈছে যে, ‘যুদ্ধৰ বাবে তেল ৰপ্তানিত প্ৰভাৱিত হয় তেন্তে অহা ২ৰ পৰা ৩ সপ্তাহত খাৰুৱা তেলৰ মূল্য প্ৰতি বেৰেলত ১৫০ ডলাৰৰ ওপৰলৈ বৃদ্ধি পাব পাৰে।’ তেওঁ কয় যে, এতিয়া যুদ্ধ তৎক্ষণাত শেষ হ’লেও উৎপাদন আৰু যোগান স্বাভাৱিক মাত্ৰালৈ ঘূৰি আহিবলৈ কেইবা সপ্তাহৰ পৰা মাহৰ সময় লাগিব পাৰে।
দৰাচলতে, যুদ্ধৰ বাবে কাটাৰে নিজৰ বৃহৎ এল এন জি প্লাণ্ট ৰাছ লাফান ঔদ্যোগিক চহৰত থকা এল এন জি ৰ উৎপাদন সাময়িকভাৱে বন্ধ কৰিবলগীয়া হৈছে। ইয়াৰ ফলত বিশ্বব্যাপী গেছ যোগানৰ ক্ষেত্ৰতো উদ্বেগ প্ৰকাশ পাইছে।
বিশ্লেষণ সংস্থাৰ তথ্য অনুসৰি কাটাৰ আৰু সংযুক্ত আৰব আমিৰশ্বাহীয়ে একেলগে পাকিস্তানৰ এল এন জি আমদানিৰ ৯৯%, বাংলাদেশৰ ৭২% আৰু ভাৰতৰ ৫৩% ৰ যোগানৰ প্ৰয়োজন পূৰণ কৰে। ইফালে শুকুৰবাৰে বিয়লি প্ৰায় ৪ বজাত ব্ৰেণ্ট খাৰুৱা তেলৰ মূল্য প্ৰতি বেৰেলত ৮৬ ডলাৰলৈ বৃদ্ধি পাইছে।
লগতে পঢ়ক: ইৰাণৰ প্ৰতিশোধ; পাৰ্চী উপসাগৰত আমেৰিকাৰ টেংকাৰত ভয়ংকৰ আক্ৰমণ
