কাটাৰৰ আমিৰ শ্বেইখ তামিম বিন হামাদ আল থানী ভাৰত ভ্ৰমণত আছে । মঙলবাৰে তেওঁক সাক্ষাৎ কৰে ৰাষ্ট্ৰপতি দ্ৰৌপদী মুৰ্মুৱে । ৰাষ্ট্ৰপতি দ্ৰৌপদী মুৰ্মুৱে কাটাৰৰ সৈতে ভাৰতৰ ঐতিহাসিক সম্পৰ্ক আৰু বন্ধুত্বক গুৰুত্বপূৰ্ণ আখ্যা দিয়ে । তেওঁ কয় যে কাটাৰ আৰু ভাৰতৰ মাজত এক বিশেষ বন্ধন আছে যিটো অতি ঘনিষ্ঠ আৰু সজীৱ । তেওঁ লগতে উল্লেখ কৰে যে দুয়োখন দেশক সংযোগ কৰা পৰম্পৰাগত জাহাজসমূহে যুগ যুগ ধৰি দুয়োখন দেশৰ মাজত পৰম্পৰা, সামগ্ৰী, ধাৰণা আৰু সাংস্কৃতিক মূল্যবোধৰ আদান-প্ৰদান কৰি আহিছে ।

কাটাৰৰ ভাৰতীয় সম্প্ৰদায়ৰ প্ৰশংসা-

ৰাষ্ট্ৰপতি মুৰ্মুৱে কাটাৰত ভাৰতীয় সম্প্ৰদায়ক প্ৰশংসা কৰি কয় যে ভাৰতীয় সম্প্ৰদায়ে কাটাৰক দ্বিতীয় ঘৰ হিচাপে গঢ়ি তুলিছে আৰু স্থানীয় সমাজৰ লগত ভালদৰে মিলি গৈছে । কাটাৰৰ জনসাধাৰণৰ আতিথ্য আৰু যত্নৰ বাবে তেওঁ কৃতজ্ঞতা প্ৰকাশ কৰে ।

ৰাষ্ট্ৰপতিগৰাকীয়ে কয় যে শেহতীয়াকৈ ভাৰত আৰু কাটাৰৰ মাজত কৌশলগত অংশীদাৰিত্ব চুক্তি স্বাক্ষৰ কৰাটো দুয়োখন দেশৰ মাজৰ সম্পৰ্কক নতুন উচ্চতালৈ লৈ যোৱাৰ লগতে পাৰস্পৰিকভাৱে লাভজনক অংশীদাৰিত্ব গঢ়ি তোলাৰ বাবে তেওঁলোকৰ উমৈহতীয়া প্ৰতিশ্ৰুতিৰ সাক্ষ্য । তেওঁ ইয়াক দুয়োখন দেশৰ প্ৰতিভা, সম্পদ আৰু সংস্কৃতিৰ সহযোগিতাৰ প্ৰতীক বুলিও অভিহিত কৰে ।

আত্মবিশ্বাস প্ৰকাশ কৰিলে মুৰ্মুৱে-

ৰাষ্ট্ৰপতিগৰাকীয়ে আস্থা প্ৰকাশ কৰে যে তেওঁৰ কাটাৰ ভ্ৰমণে ভাৰত আৰু কাটাৰৰ মাজত দীৰ্ঘদিনীয়া আৰু বহুমুখী সম্পৰ্কৰ এক নতুন অধ্যায় মুকলি কৰিব, যিয়ে দুয়োখন দেশৰ জনসাধাৰণক উপকৃত কৰিব । তেওঁ দুয়োখন দেশৰ মাজত যুগ যুগ ধৰি চলি অহা বন্ধুত্ব আৰু সহযোগিতাৰ সম্পৰ্ক আৰু অধিক শক্তিশালী কৰাৰ বাবে নিজৰ দেশৰ প্ৰস্তুতি প্ৰকাশ কৰে ।

শ্বেখ তামিম বিনেও সম্পৰ্ক শক্তিশালী কৰাৰ ওপৰত গুৰুত্ব আৰোপ কৰে-

লগতে কাটাৰৰ আমিৰ শ্বেইখ তামিম বিন হামাদ আল থানীয়ে ভাৰত আৰু কাটাৰৰ মাজত সম্পৰ্ক অধিক সুদৃঢ় কৰাৰ প্ৰতিশ্ৰুতি পুনৰবাৰ উল্লেখ কৰে । তেওঁ ভাৰত চৰকাৰ আৰু জনসাধাৰণৰ প্ৰতি কৃতজ্ঞতা জ্ঞাপন কৰি কয় যে তেওঁলোকে দুয়োখন দেশৰ ঘনিষ্ঠ সম্পৰ্কক সমৰ্থন আৰু অধিক শক্তিশালী কৰিব বিচাৰে ।

আমিৰে বিগত এটা বছৰত দুয়োখন দেশৰ মাজত সহযোগিতাৰ ক্ষেত্ৰত বিশেষকৈ শক্তি খণ্ডত হোৱা উল্লেখযোগ্য অগ্ৰগতিৰ কথা কয় । বাণিজ্য আৰু পাৰস্পৰিক বিনিয়োগৰ ক্ষেত্ৰতো দুয়োখন দেশৰ মাজত গুৰুত্বপূৰ্ণ চুক্তি কৰা হৈছে বুলিও তেওঁ কয় । ইয়াৰ সমান্তৰালকৈ কাটাৰ আৰু ভাৰতৰ মাজত কৌশলগত অংশীদাৰিত্ব স্থাপনৰ বাবেও এক চুক্তিত উপনীত হয়, যিয়ে দুয়োখন দেশৰ মাজত সহযোগিতা আৰু অধিক শক্তিশালী কৰাৰ দিশত কাম কৰিব ।

মঙলবাৰে কাটাৰৰ আমিৰ শ্বেখ তামিম বিন হামাদ আল থানীক হায়দৰাবাদ হাউছত সাক্ষাৎ কৰে প্ৰধানমন্ত্ৰী মোদীয়ে । ইয়াৰ পূৰ্বে কাটাৰৰ আমিৰক ৰাষ্ট্ৰপতি ভৱনত ‘গাৰ্ড অৱ অনাৰ’ প্ৰদান কৰা হয় । তেওঁক আদৰণি জনায় ৰাষ্ট্ৰপতি দ্ৰৌপদী মুৰ্মুৱে । ইয়াত প্ৰধানমন্ত্ৰী মোদীও উপস্থিত থাকে । বৈদেশিক পৰিক্ৰমা মন্ত্ৰালয়ে ‘এক্স’ত প্ৰকাশ কৰা এটা পোষ্টত কয় যে প্ৰধানমন্ত্ৰী মোদীয়ে কাটাৰৰ আমিৰ শ্বেইখ তামিম বিন হামাদ আল-থানীক হায়দৰাবাদ হাউছত উষ্ম আদৰণি জনায় । ভাৰত-কাটাৰৰ বিশেষ অংশীদাৰিত্বৰ এয়া এক নতুন মাইলৰ খুঁটি ।

ভাৰত আৰু কাটাৰৰ মাজত স্বাক্ষৰিত গুৰুত্বপূৰ্ণ চুক্তি-

প্ৰধানমন্ত্ৰী নৰেন্দ্ৰ মোদী আৰু কাটাৰৰ আমিৰ শ্বেইখ তামিম বিন হামাদ আল থানীৰ উপস্থিতিত দিল্লীৰ হায়দৰাবাদ হাউচত ভাৰত আৰু কাটাৰৰ মাজত আয়ৰ ওপৰত কৰ পৰিহাৰ আৰু বিত্তীয় ফাঁকি প্ৰতিৰোধৰ সংশোধিত চুক্তি স্বাক্ষৰিত হয় । এই সময়ছোৱাত দুয়োগৰাকী নেতাৰ মাজত প্ৰতিনিধি পৰ্যায়ৰ আলোচনাও হয় । দুয়োজন নেতাই ইজনে সিজনক সম্ভাষণ জনাই হাত মিলাই । কাটাৰৰ আমিৰৰ এই ভ্ৰমণে দুয়োখন দেশৰ মাজত ক্ৰমবৰ্ধমান বহুমুখী অংশীদাৰিত্বক আৰু অধিক গতি প্ৰদান কৰিব বুলি আশা কৰা হৈছে ।

প্ৰতিনিধি দল পৰ্যায়ৰ আলোচনা-

বৈদেশিক পৰিক্ৰমা মন্ত্ৰী এছ জয়শংকৰ, বিত্তমন্ত্ৰী নিৰ্মলা সীতাৰমনৰ লগতে কেইবাজনো জ্যেষ্ঠ মন্ত্ৰীৰ সৈতে আলোচনাৰ নেতৃত্ব দিয়ে প্ৰধানমন্ত্ৰী মোদীয়ে । কাটাৰৰ প্ৰতিনিধি দলটোৰ নেতৃত্বত আছিল আমিৰ শ্বেইখ তামিম বিন হামাদ আল থানী । কাটাৰৰ আমিৰেও মন্ত্ৰীসকলৰ সৈতে বাৰ্তালাপ কৰে । আমিৰৰ সৈতে যোৱা কাটাৰৰ প্ৰতিনিধি দলৰ সৈতে আলোচনাত মিলিত হয় ৰাষ্ট্ৰপতি দ্ৰৌপদী মুৰ্মু । উল্লেখ্য যে, দুদিনীয়া ভ্ৰমণসূচীৰে সোমবাৰে দিল্লীত উপস্থিত হয় কাটাৰৰ আমিৰ শ্বেইখ তামিম বিন হামাদ আল থানী ।

জয়শংকৰে কাটাৰৰ আমিৰক সাক্ষাৎ কৰে-

ৰাষ্ট্ৰীয় ৰাজধানীত উপস্থিত হৈ কাটাৰৰ আমিৰক সাক্ষাৎ কৰে বৈদেশিক পৰিক্ৰমা মন্ত্ৰী এছ জয়শংকৰে । কাটাৰৰ আমিৰৰ সৈতে মন্ত্ৰী, জ্যেষ্ঠ বিষয়া আৰু ব্যৱসায়িক প্ৰতিনিধিৰে গঠিত এক উচ্চ পৰ্যায়ৰ প্ৰতিনিধি দল আছিল । ইয়াৰ পূৰ্বে ২০১৫ চনৰ মাৰ্চ মাহত তেওঁ ভাৰত ভ্ৰমণ কৰিছিল । কাটাৰত থকা ভাৰতীয় সম্প্ৰদায়ে কাটাৰৰ প্ৰগতি আৰু উন্নয়নত ইতিবাচক অৱদান আগবঢ়োৱাৰ বাবে শলাগ লৈছে ।

কাটাৰৰ আমিৰক আদৰণি জনায় প্ৰধানমন্ত্ৰী মোদীয়ে-

সোমবাৰে সন্ধিয়া কাটাৰৰ আমিৰক বিমানবন্দৰত আদৰণি জনায় প্ৰধানমন্ত্ৰী মোদীয়ে । সোমবাৰে প্ৰধানমন্ত্ৰী মোদীয়ে ‘এক্স’ত পোষ্ট কৰি কয় যে মোৰ ভাতৃ কাটাৰৰ আমিৰ প্ৰধানমন্ত্ৰী শ্বেখ তামিম বিন হামাদ আল থানীক আদৰিবলৈ বিমানবন্দৰলৈ গৈছিলো । মই তেওঁৰ সফল ভাৰত ভ্ৰমণৰ কামনা কৰিছো আৰু কাইলৈ ​​আমাৰ বৈঠকৰ বাবে আগ্ৰহী ।” বৈদেশিক মন্ত্ৰালয়ে কয় যে কাটাৰৰ আমিৰৰ এই ভ্ৰমণে “আমাৰ ক্ৰমবৰ্ধমান বহুমুখী অংশীদাৰিত্বক আৰু অধিক গতি প্ৰদান কৰিব ।”