বিধানসভা নিৰ্বাচনৰ পূৰ্বে মমতা বেনাৰ্জী চৰকাৰৰ বিৰুদ্ধে ৰণকৌশল প্ৰস্তুত কৰিছে বিজেপিয়ে
আগন্তুক বিধানসভা নিৰ্বাচনৰ বাবে পশ্চিমবংগত ৰাজনৈতিক উত্তেজনা তীব্ৰ গতিত বৃদ্ধি পাইছে । বিধানসভা নিৰ্বাচনৰ পূৰ্বে মমতা বেনাৰ্জী চৰকাৰৰ বিৰুদ্ধে ৰণকৌশল প্ৰস্তুত কৰিছে বিজেপিয়ে । ইয়াৰ মাজতে কেন্দ্ৰীয় গৃহমন্ত্ৰী অমিত শ্বাহে আজি এখন অভিযোগ পত্ৰ, “চাৰ্জশ্বীট” প্ৰকাশ কৰে । এই অভিযোগ পত্ৰত শ্বাহে তৃণমূল কংগ্ৰেছৰ ১৫ বছৰীয়া শাসনক “অৰাজকতা আৰু দুৰ্নীতিৰ যুগ” বুলি অভিহিত কৰিছে । তেওঁ উল্লেখ কৰে যে এই নিৰ্বাচন কেৱল ক্ষমতা পৰিবৰ্তনৰ বিষয় নহয়, বংগৰ আত্মাক ৰক্ষা কৰি ভয়ৰ পৰা মুক্ত কৰাৰ নিৰ্বাচন ।
অমিত শ্বাহে বংগৰ অনুপ্ৰৱেশৰ বিষয়টো তীব্ৰভাৱে উত্থাপন কৰিছে । তেওঁ উল্লেখ কৰে যে সমগ্ৰ দেশৰ নিৰাপত্তা বংগৰ নিৰ্বাচনী ফলাফলৰ সৈতে অবিচ্ছেদ্যভাৱে জড়িত । আজি দেশত অনুপ্ৰৱেশকাৰীৰ বাবে মাত্ৰ এটা প্ৰাথমিক পথ আছে, যাৰ ফলত ৰাষ্ট্ৰীয় নিৰাপত্তাৰ লগত আপোচ কৰা হৈছে । যদি বংগক অনুপ্ৰৱেশৰ পৰা মুক্ত কৰিব লাগে তেন্তে চৰকাৰ সলনি কৰাটো অতি প্ৰয়োজনীয় । অমিত শ্বাহে অভিযোগ কৰে যে মমতা বেনাৰ্জী চৰকাৰে ভোট বেংকৰ ৰাজনীতিৰ বাবে সীমান্ত অঞ্চলৰ জনগাঁথনিৰ সৈতে খেলিমেলি কৰিবলৈ অনুমতি দিছিল ।
গৃহমন্ত্ৰীগৰাকীয়ে কয় যে মমতা বেনাৰ্জীয়ে সদায় ভিক্তিম কাৰ্ড খেলি আহিছে । কেতিয়াবা ভৰি ভাঙি যায়, কেতিয়াবা মূৰত বেণ্ডেজ লগোৱা হয়, কেতিয়াবা অসুস্থ হৈ পৰে আৰু কেতিয়াবা নিৰ্বাচন আয়োগৰ সন্মুখত থিয় হৈ অসহায়তাৰ অভিনয় কৰে । তেওঁ নিৰ্বাচন আয়োগক গালি-গালাজ কৰে । কিন্তু মই তেওঁক ক’বলৈ আহিছো যে বংগৰ জনসাধাৰণে এতিয়া এই বিক্তিম কাৰ্ডৰ ৰাজনীতি সম্পূৰ্ণৰূপে বুজি পাইছে ।
কেন্দ্ৰীয় গৃহমন্ত্ৰী অমিত শ্বাহে উল্লেখ কৰে যে এই চাৰ্জশ্বীটখন টিএমচি চৰকাৰৰ ১৫ বছৰীয়া কুকৰ্মৰ সংকলন । সোণাৰ বাংলাৰ আঁৰত ছিণ্ডিকেটৰ শাসন প্ৰতিষ্ঠা কৰি বংগৰ জনসাধাৰণক শোষণ কৰা শাসন ব্যৱস্থাৰ কাহিনী । টিএমচিৰ অপশাসনৰ অধীনত বংগ দুৰ্নীতিৰ পৰীক্ষাগাৰত পৰিণত হৈছে । ওপৰৰ পৰা তললৈ অপৰাধী ছিণ্ডিকেটে ৰাইজক অতিষ্ঠ কৰিছে ।
তেওঁ উল্লেখ কৰে যে উন্নয়নৰ অভাৱৰ বাবে বংগ উদ্যোগৰ বাবে কবৰস্থানত পৰিণত হৈছে । অমিত শ্বাহে উল্লেখ কৰে যে এই চাৰ্জশ্বীট কেৱল বিজেপিৰ কণ্ঠ নহয়, বৰঞ্চ বংগৰ দুখভোগী জনসাধাৰণৰ কণ্ঠ । ২০১১ চনৰ পৰা বিজেপিয়ে এই অৰাজকতাৰ বিৰুদ্ধে যুঁজ দি আহিছে, এতিয়া ৰাইজে ইয়াৰ হিচাপ লোৱাৰ সময় আহি পৰিছে ।
লগতে পঢ়ক : ‘আমি উৰাবাতৰিৰ পৰা আঁতৰি থাকিব লাগিব’; দেশবাসীলৈ আহ্বান প্ৰধানমন্ত্ৰী মোদীৰ
