এই কৰুণ দুৰ্ঘটনাত বিমানখনত থকা আঠজন ক্ৰু মেম্বাৰৰে থিতাতে মৃত্যু হৈছে
আমেৰিকা যুক্তৰাষ্ট্ৰৰ কেলিফৰ্ণিয়াত সংঘটিত হৈছে এক ভয়াৱহ বিমান দুৰ্ঘটনা । কেলিফৰ্ণিয়াৰ ম’জাভে মৰুভূমিত অৱস্থিত এডৱাৰ্ডছ এয়াৰ ফ’ৰ্চ বেচৰ পৰা উৰণ আৰম্ভ কৰাৰ কিছু সময় পিছতেই আমেৰিকাৰ বিমান বাহিনীৰ এখন বি-৫২ ষ্ট্ৰেটোফৰ্ট্ৰেছ নামৰ গধুৰ বোমাৰু বিমান দুৰ্ঘটনাগ্ৰস্ত হয় । এই কৰুণ দুৰ্ঘটনাত বিমানখনত থকা আঠজন ক্ৰু মেম্বৰৰে থিতাতে মৃত্যু হৈছে ।
আন্তঃৰাষ্ট্ৰীয় সংবাদ মাধ্যম চিএনএন-ৰ তথ্য অনুসৰি, এটা নিয়মীয়া পৰীক্ষামূলক অভিযানত থকা বিমানখনে স্থানীয় সময় অনুসৰি প্ৰায় ১১:২০ বজাত উৰণ আৰম্ভ কৰিছিল । কিন্তু দুৰ্ভাগ্যবশত, উৰণৰ কিছু সময় পিছতেই লছ এঞ্জেলছৰ উত্তৰ-পূবত থকা দুৰ্গম সামৰিক ঘাটিটোৰ ওচৰত বিমানখন দুৰ্ঘটনাত পতিত হয় ।
এডৱাৰ্ডছ এয়াৰ ফ’ৰ্চ বেচ কৰ্তৃপক্ষই জানিবলৈ দিয়া মতে, বিমানখনত থকা আঠজন ক্ৰু মেম্বৰৰে মৃত্যু হোৱা বুলি ধৰি লোৱা হৈছে । ঘটনাৰ ভয়াৱহতাৰ প্ৰতি লক্ষ্য ৰাখি এতিয়া উদ্ধাৰ অভিযানৰ পৰিৱৰ্তে মৃতদেহ আৰু ধ্বংসাৱশেষ উদ্ধাৰ কাৰ্যসূচী আৰম্ভ কৰা হৈছে ।
আকাশলৈ উঠিল ক’লা ধোঁৱাৰ কুণ্ডলী
দুৰ্ঘটনাটোৰ লগে লগে জৰুৰীকালীন সঁহাৰি দলসমূহক ঘটনাস্থলীলৈ প্ৰেৰণ কৰা হয় । ঘাটিটোৰ বিষয়াসকলে জনোৱা মতে, বিমানখন দুৰ্ঘটনাগ্ৰস্ত হোৱাৰ পিছত আকাশলৈ ক’লা ধোঁৱাৰ এক বৃহৎ কুণ্ডলী উধাইছিল, যিটো বহু দূৰৈৰ পৰাও দৃশ্যমান হৈছিল । চিএনএনৰ সহযোগী সংবাদ প্ৰতিষ্ঠান ‘কেচিএএল’-এ প্ৰকাশ কৰা ভিডিঅ’ত ৰানৱেত এটা ডাঙৰ ক’লা দাগ আৰু ধোঁৱা ওলাই থকা দেখা গৈছে, যদিও বোমাৰু বিমানখন চূৰ্ণ-বিচূৰ্ণ হৈছে যে তাক স্পষ্টকৈ চিনাক্ত কৰা কঠিন হৈ পৰিছে ।
নিহতসকলৰ পৰিচয় আৰু সামৰিক অভিযান
চীফ মাষ্টাৰ চাৰ্জেণ্ট জছুৱা টি স্কাৰ্লকেনে জানিবলৈ দিয়া মতে, বৰ্তমান নিহতসকলৰ পৰিয়ালক খবৰ দিয়াৰ প্ৰক্ৰিয়া চলাই থকা হৈছে । এই ক্ৰু দলটোত সামৰিক কৰ্মীৰ উপৰিও চৰকাৰী অসামৰিক বিষয়া আৰু চৰকাৰী ঠিকাদাৰো অন্তৰ্ভুক্ত আছিল । বায়ু সেনাৰ তৰফৰ পৰা কোৱা হৈছে যে দুৰ্ঘটনাটোৰ সময়ত বিমানখনে এটা ৰাডাৰ আধুনিকীকৰণ কাৰ্যসূচীৰ সমৰ্থনত পৰীক্ষামূলক বিমান উৰুৱাই আছিল ।
সাময়িকভাৱে সামৰিক ঘাটিৰ কাৰ্যসূচী স্থগিত :
সামৰিক ঘাটিটো ইতিমধ্যে পুনৰ মুকলি কৰা হৈছে যদিও, কৰ্তৃপক্ষই ঘটনাটোৰ ক্ষিপ্ৰ তদন্ত আৰু দুৰ্ঘটনাস্থলীৰ পৰা ধ্বংসাৱশেষ সম্পূৰ্ণৰূপে উদ্ধাৰ কৰাৰ স্বাৰ্থত মঙলবাৰলৈকে সকলো ধৰণৰ সামৰিক অভিযান স্থগিত ৰাখিছে ।
উল্লেখযোগ্য যে, বি-৫২ ষ্ট্ৰেটোফৰ্ট্ৰেছ হৈছে আমেৰিকাৰ বিমান বাহিনীত বৰ্তমানো সক্ৰিয় হৈ থকা আটাইতকৈ পুৰণি আৰু শক্তিশালী বিমানসমূহৰ অন্যতম । ১৯৫৫ চনত প্ৰথমবাৰৰ বাবে আমেৰিকাৰ প্ৰতিৰক্ষা বাহিনীত অন্তৰ্ভুক্ত কৰা এই দীৰ্ঘ দূৰত্বৰ গধুৰ বোমাৰু বিমানখন বৰ্তমানো আমেৰিকাৰ কৌশলগত প্ৰতিৰক্ষা ব্যৱস্থাৰ এক মুখ্য স্তম্ভ হিচাপে বিবেচিত হৈ আহিছে ।
লগতে পঢ়ক : “ইৰাণ-আমেৰিকাৰ শান্তি চুক্তি সম্পন্ন, শুকুৰবাৰৰ পৰা মুকলি হ’ব হৰমুজ প্ৰণালী” ; ট্ৰাম্পৰ ডাঙৰ দাবী
