গুজৰাট টাইটানছৰ হাতত পৰাস্ত হোৱাৰ পিছত আৱেগিক হৈ খেলপথাৰতেই উচুপি উঠিল ১৫ বছৰীয়া বৈভৱ সূৰ্যবংশী।
শুকুৰবাৰে আই পি এলত খেলা দ্বিতীয়খন কোৱালিফায়াৰত গুজৰাট টাইটানছৰ হাতত পৰাস্ত হৈ ৰাজস্থান ৰয়েলছৰ দলটো বাহিৰ হয়।খেলখনত পৰাজয় বৰণ কৰাৰ পিছত ১৫ বছৰীয়া বেটছমেন বৈভৱ সূৰ্যবংশীৰ চকুত চকুলো দেখা গ’ল। ২০২৬ চনৰ আই পি এলত ১৫ বছৰীয়া বৈভৱ সূৰ্যবংশীয়ে লাভ কৰা এই অসাধাৰণ কৃতিত্ব চিৰদিনৰ বাবে স্মৰণীয় হৈ থাকিব।আই পি এল ২০২৬ৰ গোটেই প্ৰতিযোগিতাখনত বৈভৱে নিজৰ বিস্ফোৰক বেটিঙেৰে চাঞ্চল্যৰ সৃষ্টি কৰিছিল। এই ছিজনত বৈভৱে এককভাৱে ৰাজস্থান ৰয়েলছৰ সমগ্ৰ দায়িত্ব কান্ধত লৈছিল।
যেতিয়াই দলটোক তেওঁৰ প্ৰয়োজন হৈছিল, এই ১৫ বছৰীয়া বেটছমেন গৰাকীয়ে নিজৰ প্ৰচেষ্টাৰে দলটোক বিপদৰ পৰা উলিয়াই আনিছিল। কোৱালিফায়াৰ ২তো বৈভৱে ঠিক সেই কামেই কৰিলে যিটোৰ বাবে তেওঁ পৰিচিত। যদিও বৈভৱ ৯৬ ৰানত আউট হৈছিল, ইয়াৰ লগে লগে তেওঁ আৰু এটা শতক হেৰুৱাই কিন্তু তেওঁ দুৰ্দান্ত প্ৰদৰ্শনে অনুৰাগীৰ হৃদয় জয় কৰিছিল। মন কৰিবলগীয়া যে যেতিয়া ৰাজস্থানে ৭ উইকেটৰ পৰাজয়ৰ সন্মুখীন হৈছিল, তেতিয়া খেলপথাৰত বৈভৱ সম্পূৰ্ণৰূপে নিৰাশ হৈ পৰিছিল।
বৈভৱৰ চকুৰ পৰা চকুলো ওলাই আহিছিল। জাডেজাই তেওঁৰ ওচৰলৈ গৈ তেওঁক সাৱটি ধৰি সান্ত্বনা দিয়ে। আনহাতে বিপক্ষৰ অধিনায়ক শুভমন গিলেও মেচৰ পিছত এই ১৫ বছৰীয়া চমৎকাৰী খেলুৱৈ গৰাকীক সাৱটি ধৰে। দলৰ পৰাজয়ত সূৰ্যবংশী ইমানেই বিচলিত হৈ পৰিছিল যে অধিনায়ক ৰিয়ান পৰাগে এই পৰাজয়ৰ কথা ক’বলৈ উপস্থাপন অনুষ্ঠানলৈ যোৱাৰ সময়তো ডাগআউটত বহি থকা বৈভৱক হতাশ আৰু আৱেগিক যেন দেখা গৈছিল।
এই আই পি এল ছিজনত বৈভৱে ১৬খন মেচত মুঠ ৭৭৬ ৰান সংগ্ৰহ কৰি বৰ্তমান অৰেঞ্জ কেপ দখল কৰি আছে। বৈভৱৰ ইনিংছৰ বলতেই কোৱালিফায়াৰ ২ৰ সময়ত ৰাজস্থানে ২০ অভাৰত ২১৪ ৰান সংগ্ৰহ কৰিছিল।যদিও শুভমন গিলে ১০৪ ৰানৰ ইনিংছৰে নিজৰ দলটোক জয়ৰ দিশত আগুৱাই লৈ গৈছিল, তথাপিও এই মেচখনত ১৫ বছৰীয়া বৈভৱৰ বেটিং প্ৰদৰ্শনে সঁচা অৰ্থত হৃদয় জয় কৰিছিল। এই খেলখনত বৈভৱে যি পৰিপক্কতাৰে বেটিং কৰিছিল, সেইটোৱে প্ৰমাণ কৰিছে যে তেওঁ এজন প্ৰত্যাহ্বানমূলক পৰিস্থিতিৰ মাজেৰেও নিজৰ দলটোক পৰিচালিত কৰিবলৈ সক্ষম খেলুৱৈ।
লগতে পঢ়ক: ‘আমি কোৱালিফাই কৰিবই নালাগিছিল…’; পৰাজয়ৰ পিছত ৰিয়ান পৰাগৰ অদ্ভূত মন্তব্য
