ড° হিমন্ত বিশ্ব শৰ্মাই পুনৰবাৰ অসমৰ মুখ্যমন্ত্ৰী হিচাপে শপত গ্ৰহণ কৰি ৰাজ্যখনৰ শাসনভাৰ গ্ৰহণ কৰে
মঙলবাৰে অসমৰ ৰাজনৈতিক ইতিহাসত এক নতুন অধ্যায়ৰ সূচনা হ’ল । ড° হিমন্ত বিশ্ব শৰ্মাই পুনৰবাৰ অসমৰ মুখ্যমন্ত্ৰী হিচাপে শপত গ্ৰহণ কৰি ৰাজ্যখনৰ শাসনভাৰ গ্ৰহণ কৰে । প্ৰধানমন্ত্ৰী নৰেন্দ্ৰ মোদী আৰু কেন্দ্ৰীয় গৃহমন্ত্ৰী অমিত শ্বাহৰ উপস্থিতিত অনুষ্ঠিত এই গাম্ভীৰ্যপূৰ্ণ অনুষ্ঠানত বিজেপিৰ লগতে মিত্ৰদল অগপ আৰু বিপিএফৰ চাৰিজন বিধায়কেও মন্ত্ৰী হিচাপে শপত লয় ।
চৰ্চাত হিমন্ত বিশ্ব শৰ্মাৰ টুইট-
শপত গ্ৰহণৰ কিছু সময়ৰ পিছতেই মুখ্যমন্ত্ৰী ড০ হিমন্ত বিশ্ব শৰ্মাই ছচিয়েল মিডিয়াত এটা পোষ্ট কৰে, যিয়ে বৰ্তমান ৰাজনৈতিক মহলত ধুমুহাৰ সৃষ্টি কৰিছে । পশ্চিম বংগৰ নৱনিযুক্ত মুখ্যমন্ত্ৰী শুভেন্দু অধিকাৰীৰ সৈতে এটা অন্তৰংগ মুহূৰ্তৰ ফটো শ্বেয়াৰ কৰি হিমন্তই লিখিলে— “Bad days for….(You know who)”।
এই টুইটটোত তেওঁ শুভেন্দু অধিকাৰীক টেগ কৰাৰ লগতে শুভেন্দুৱেও ইয়াৰ প্ৰত্যুত্তৰত ৰসালকৈ লিখিছে— “No Prizes for Guessing, I guess” (অর্থাৎ, অনুমান কৰিবলৈ কোনো পুৰস্কাৰৰ প্ৰয়োজন নাই)।
কাৰ বাবে ‘বেয়া দিন’?
ফটোখনত দুয়োগৰাকী নেতাক অতি আনন্দিত মনেৰে আলিংগন কৰি থকা দেখা গৈছে । ৰাজনৈতিক বিশ্লেষকসকলৰ মতে, ‘You know who’ বুলি মুখ্যমন্ত্ৰী হিমন্ত বিশ্বই কাৰ ফালে আঙুলিয়াইছে সেয়া অনুমান কৰা হৈছে । বিশেষকৈ :
অনুপ্ৰৱেশকাৰীৰ বিৰুদ্ধে হুংকাৰ : অসম চৰকাৰ ইতিমধ্যে ডিটেনচন কেম্প আৰু অবৈধ অনুপ্ৰৱেশ ৰোধৰ কঠোৰ পদক্ষেপৰ বাবে চৰ্চিত । এতিয়া বংগত শুভেন্দু অধিকাৰীৰ নেতৃত্বত বিজেপি চৰকাৰ গঠন হোৱাৰ পিছত সীমান্ত সুৰক্ষা আৰু অনুপ্ৰৱেশকাৰীৰ বিৰুদ্ধে দুয়োখন ৰাজ্যই যুটীয়া ৰণনীতি গ্ৰহণ কৰাৰ ইংগিত পোৱা গৈছে ।
বিৰোধী পক্ষলৈ কটাক্ষ : শেহতীয়া নিৰ্বাচনী ফলাফলৰ পিছত এই টুইটক বিৰোধী দলসমূহৰ প্ৰতি এক তীব্ৰ প্ৰত্যাহ্বান হিচাপেও দেখা গৈছে ।
সমন্বয়ৰ নতুন যুগ-
পশ্চিম বংগ বিধানসভা নিৰ্বাচনত বিজেপিৰ ঐতিহাসিক জয়ৰ পিছত শুভেন্দু অধিকাৰী মুখ্যমন্ত্ৰী হোৱাৰ পাছত দুয়োগৰাকী শক্তিশালী নেতাৰ এইখন প্ৰথমটো গুৰুত্বপূৰ্ণ ফটো । ছচিয়েল মিডিয়া ব্যৱহাৰকাৰীসকলে ইয়াক ‘পূব ভাৰতত গেৰুৱা শক্তিৰ নতুন আৰম্ভণি’ বুলি অভিহিত কৰিছে ।
অসম আৰু বংগৰ এই নতুন মিত্ৰতাই অনাগত দিনত কেন্দ্ৰীয় চৰকাৰৰ ‘এক্ট ইষ্ট পলিচি’ৰ লগতে আইন-শৃংখলাৰ ক্ষেত্ৰত কি পৰিৱৰ্তন আনে, সেয়া লক্ষণীয় হ’ব ।
লগতে পঢ়ক : মুখ্যমন্ত্ৰী হিচাপে শপত ল’লে ড০ হিমন্ত বিশ্ব শৰ্মাইঃ নতুন চৰকাৰক শুভেচ্ছা কেন্দ্ৰীয় মন্ত্ৰীসকলৰ
