প্ৰধানমন্ত্ৰীয়ে কয়, পশ্চিম বংগ, অসম আৰু পুডুচেৰীৰ ফলাফলে কেৱল জয়কে সূচোৱা নাই, বৰঞ্চ সমগ্ৰ দেশতে এক নতুন উৎসাহৰ সঞ্চাৰ কৰিছে
প্ৰধানমন্ত্ৰী নৰেন্দ্ৰ মোদীয়ে সোমবাৰে পশ্চিম বংগ, অসম আৰু পুডুচেৰীৰ নিৰ্বাচনী ফলাফলক লৈ সন্তুষ্টি প্ৰকাশ কৰি কয় যে এই ফলাফলে সমগ্ৰ দেশতে এক ইতিবাচক আৰু উৎসাহজনক পৰিৱেশৰ সৃষ্টি কৰিছে । গুজৰাটৰ বদোদৰাত চৰ্দাৰধাম হোষ্টেল উদ্বোধন কৰি আগবঢ়োৱা ভাষণত তেওঁ দলীয় কৰ্মীসকলৰ কঠোৰ পৰিশ্ৰমক প্ৰশংসা কৰাৰ লগতে গুজৰাটৰ শেহতীয়া স্থানীয় নিকায় আৰু পঞ্চায়ত নিৰ্বাচনৰ সাফল্যকো সোঁৱৰণ কৰে ।
প্ৰধানমন্ত্ৰীয়ে কয়, “পশ্চিম বংগ, অসম আৰু পুডুচেৰীৰ ফলাফলে কেৱল জয়কে সূচোৱা নাই, বৰঞ্চ সমগ্ৰ দেশতে এক নতুন উৎসাহৰ সঞ্চাৰ কৰিছে । আপোনালোক সকলোৱে মিলি এক ইতিহাস ৰচনা কৰিছে। গুজৰাটৰ পঞ্চায়ত নিৰ্বাচনৰ ফলাফলবোৰো আছিল অতি আশ্চৰ্যকৰ আৰু এইবোৰৰ চৰ্চা এতিয়া সমগ্ৰ দেশতে চলিছে ।”
ৰাজনৈতিক স্থিৰতা আৰু অৰ্থনৈতিক বিকাশ-
গুজৰাটৰ জনসাধাৰণৰ ৰাজনৈতিক দূৰদৰ্শিতাৰ শলাগ লৈ মোদীয়ে কয় যে গুজৰাটে সদায় ৰাজনৈতিক স্থিৰতাক অগ্ৰাধিকাৰ দি আহিছে । তেওঁৰ মতে, য’তেই স্থিৰ চৰকাৰ থাকে, তাতেই অৰ্থনৈতিক বিকাশৰ গতি ত্বৰান্বিত হয় । গুজৰাটে এই সত্যটো বহু আগতেই বুজি পাইছিল বাবেই আজি ৰাজ্যখনৰ উন্নয়ন আৰু নিৰ্বাচনী ফলাফলত ইয়াৰ প্ৰতিফলন ঘটিছে । নিজৰ গৃহ ৰাজ্যলৈ আহি তেওঁ যথেষ্ট আৱেগিক হৈ পৰে আৰু কয়, “আপোনালোকৰ মাজলৈ অহাটো মোৰ বাবে ঘৰলৈ উভতি অহাৰ দৰে এক গভীৰ আনন্দৰ অভিজ্ঞতা ।”
সোমনাথত অমৃত মহোৎসৱ-
বদোদৰাৰ অনুষ্ঠানৰ পূৰ্বে প্ৰধানমন্ত্ৰীয়ে পবিত্ৰ সোমনাথ মন্দিৰত ‘সোমনাথ অমৃত মহোৎসৱ’ত অংশগ্ৰহণ কৰে । পুনৰ নিৰ্মিত সোমনাথ মন্দিৰ উদ্বোধনৰ ৭৫ বছৰ সম্পূৰ্ণ হোৱা উপলক্ষে আয়োজিত এই বিশেষ অনুষ্ঠানত তেওঁ বিশেষ মহাপূজাত অংশ লয় । ইয়াৰ উপৰিও কুম্ভাভিষেক আৰু ধ্বজাৰোহণ কাৰ্যসূচীত অংশগ্ৰহণ কৰি তেওঁ দেশৰ সমৃদ্ধি আৰু শান্তিৰ বাবে প্ৰাৰ্থনা জনায়। ভাৰতীয় সভ্যতাৰ ঐতিহ্যৰ প্ৰতীক হিচাপে সোমনাথ মন্দিৰৰ গুৰুত্বৰ কথা উল্লেখ কৰি তেওঁ এই দিনটোক ঐতিহাসিক বুলি অভিহিত কৰে ।
লগতে পঢ়ক : পশ্চিম এছিয়াৰ সংকটক লৈ উদ্বিগ্ন প্ৰধানমন্ত্ৰী; দেশবাসীক পুনৰ “ভকেল ফৰ লোকেল” হোৱাৰ আহ্বান
