তামিলনাডুৰ ৰাজনীতিত এক নতুন যুগৰ সূচনা কৰি দেওবাৰে চন্দ্ৰশেখৰ জোচেফ বিজয়ে ৰাজ্যখনৰ ১৩ সংখ্যক মুখ্যমন্ত্ৰী হিচাপে শপত গ্ৰহণ কৰে
তামিলনাডুৰ ৰাজনীতিত এক নতুন যুগৰ সূচনা কৰি দেওবাৰে চন্দ্ৰশেখৰ জোচেফ বিজয়ে ৰাজ্যখনৰ ১৩ সংখ্যক মুখ্যমন্ত্ৰী হিচাপে শপত গ্ৰহণ কৰে । চেন্নাইৰ জৱাহৰলাল নেহৰু ষ্টেডিয়ামত আয়োজিত এক অতি ভব্য অনুষ্ঠানত TVKৰ মুৰব্বীগৰাকীক ৰাজ্যপাল ৰাজেন্দ্ৰ বিশ্বনাথ আৰ্লেকাৰে পদ আৰু গোপনীয়তাৰ শপত বাক্য পাঠ কৰায় ।
প্ৰধানমন্ত্ৰীৰ শুভেচ্ছা-
নতুন মুখ্যমন্ত্ৰীগৰাকীক অভিনন্দন জনাই প্ৰধানমন্ত্ৰী নৰেন্দ্ৰ মোদীয়ে ছচিয়েল মিডিয়া প্লেটফৰ্ম এক্সত লিখিছে, “থালাপতি চি. জোচেফ বিজয়ক তামিলনাডুৰ মুখ্যমন্ত্ৰী হিচাপে শপত গ্ৰহণ কৰা বাবে অভিনন্দন । তেওঁৰ আগন্তুক কাৰ্যকালৰ বাবে শুভকামনা জনালোঁ । জনসাধাৰণৰ জীৱনৰ মান উন্নত কৰিবলৈ কেন্দ্ৰীয় চৰকাৰে তামিলনাডু চৰকাৰৰ সৈতে কাম কৰি যাব ।”
বিশিষ্ট ব্যক্তিৰ উপস্থিতি-
শপত গ্ৰহণ অনুষ্ঠানত দেশৰ কেইবাজনো শীৰ্ষ ৰাজনৈতিক নেতা আৰু চিনেমা জগতৰ তাৰকাই অংশগ্ৰহণ কৰে । লোকসভাৰ বিৰোধী দলপতি ৰাহুল গান্ধীৰ লগতে বিজয়ৰ পিতৃ-মাতৃ এছ এ চন্দ্ৰশেখৰ আৰু শোভা চন্দ্ৰশেখৰ উপস্থিত থাকে । বিশেষকৈ দক্ষিণৰ জনপ্ৰিয় অভিনেত্ৰী তৃষা কৃষ্ণনৰ উপস্থিতিয়ে অনুৰাগীৰ মাজত ব্যাপক উৎসাহৰ সৃষ্টি কৰে ।
নতুন কেবিনেট-
বিজয়ৰ সৈতে টিভিকে দলৰ ৯ জন নেতাই মন্ত্ৰী হিচাপে শপত লয় । প্ৰথমখন কেবিনেটৰ মন্ত্ৰীসকল হ’ল :
এন আনন্দ
আধৱ অৰ্জুন
কে এ চেংগোট্টাইয়ান
কে জি অৰুণৰাজ
পি ভেংকটৰমণন
আৰ নিৰ্মলকুমাৰ
ৰাজমোহন
টি কে প্ৰভু
এছ কীৰ্তনা
শপত গ্ৰহণৰ পূৰ্বে বিজয়ে নিজেই ৰাজ্যপালক আদৰণি জনাই তেওঁৰ হ’বলগীয়া মন্ত্ৰীসকলৰ সৈতে চিনাকি কৰাই দিয়ে ।
ঐতিহাসিক নিৰ্বাচনী ফলাফল-
২০২৬ চনৰ বিধানসভা নিৰ্বাচন তামিলনাডুৰ বাবে আছিল এক টাৰ্ণিং পইণ্ট । মাত্ৰ দুবছৰ পূৰ্বে গঠন হোৱা টিভিকে দলে ২৩৪ খন আসনৰ ভিতৰত ১০৮ খনত জয়লাভ কৰি এক চমক সৃষ্টি কৰে । এই ফলাফলে ৰাজ্যখনত দশকজুৰি চলি থকা ডিএমকে (DMK) আৰু এআইএডিএমকে (AIADMK) ৰ দ্বিপাক্ষিক আধিপত্যৰ সম্পূৰ্ণৰূপে অৱসান ঘটায় । এতিয়া সমগ্ৰ দেশৰ দৃষ্টি থালাপতি বিজয়ৰ নেতৃত্বত গঠিত এই নতুন চৰকাৰখনৰ ওপৰত নিবদ্ধ হৈছে ।
লগতে পঢ়ক : তামিলনাডুত ‘থালাপতি’ যুগৰ আৰম্ভণি: ত্ৰয়োদশ মুখ্যমন্ত্ৰী হিচাপে শপত গ্ৰহণ জোচেফ বিজয়ৰ
