নতুন দিল্লীত প্ৰধানমন্ত্ৰী মোদীক সাক্ষাৎ তামিলনাডুৰ মুখ্যমন্ত্ৰী বিজয়ৰ
প্ৰধানমন্ত্ৰীৰ কাৰ্যালয়ৰ পৰা প্ৰকাশিত এক প্ৰেছ বিজ্ঞপ্তি অনুসৰি, দুয়োগৰাকী নেতাৰ মাজত ৰাজ্যখনৰ কেইবাটাও গুৰুত্বপূৰ্ণ তথা স্পৰ্শকাতৰ বিষয় সন্দৰ্ভত এক দীঘলীয়া আলোচনা অনুষ্ঠিত হয়
তামিলনাডুৰ মুখ্যমন্ত্ৰী এছ. জোচেফ বিজয়ে বুধবাৰে নতুন দিল্লীস্থিত প্ৰধানমন্ত্ৰীৰ কাৰ্যালয়ত প্ৰধানমন্ত্ৰী নৰেন্দ্ৰ মোদীক এক সৌজন্যমূলক সাক্ষাৎ কৰে । প্ৰধানমন্ত্ৰীৰ কাৰ্যালয়ৰ পৰা প্ৰকাশিত এক প্ৰেছ বিজ্ঞপ্তি অনুসৰি, দুয়োগৰাকী নেতাৰ মাজত ৰাজ্যখনৰ কেইবাটাও গুৰুত্বপূৰ্ণ তথা স্পৰ্শকাতৰ বিষয় সন্দৰ্ভত এক দীঘলীয়া আলোচনা অনুষ্ঠিত হয় ।
বৈঠকৰ আৰম্ভণিতে প্ৰধানমন্ত্ৰী মোদীয়ে মুখ্যমন্ত্ৰী বিজয়ক তেওঁৰ শেহতীয়া নেদাৰলেণ্ড ভ্ৰমণৰ সময়ত ঐতিহাসিক ‘অনাইমংগলম তাম্ৰফলি’ (Anaimangalam copper plates) উদ্ধাৰ কৰি ভাৰতলৈ ঘূৰাই অনাৰ বাবে কৰা প্ৰচেষ্টাৰ শলাগ লয় আৰু ধন্যবাদ জ্ঞাপন কৰে ।
ৰাজ্যিক আবাহন গীত ‘তামিল থাই ভালথু’ক লৈ স্পষ্টীকৰণৰ দাবী-
মুখ্যমন্ত্ৰী বিজয়ে প্ৰধানমন্ত্ৰীৰ সৈতে হোৱা বৈঠকত ৰাজ্যিক আবাহন গীতৰ মৰ্যাদাৰ বিষয়টো উত্থাপন কৰে । তেওঁ উল্লেখ কৰে যে তামিলনাডুত অনুষ্ঠিত সকলো চৰকাৰী কাৰ্যসূচীৰ আৰম্ভণিতে পৰম্পৰাগতভাৱে ৰাজ্যিক আবাহন গীত ‘তামিল থাই ভালথু’ (Tamil Thai Vazhthu) গোৱা হৈ আহিছে । কিন্তু চলিত বৰ্ষৰ জানুৱাৰী মাহত কেন্দ্ৰীয় গৃহ পৰিক্ৰমা মন্ত্ৰালয়ে জাৰি কৰা এক জাননীৰ পিছত, শেহতীয়াকৈ কিছুমান চৰকাৰী অনুষ্ঠানত প্ৰথমে ৰাষ্ট্ৰীয় গীতহে পৰিৱেশন কৰা হৈছে ।
এই সন্দৰ্ভত মুখ্যমন্ত্ৰী বিজয়ৰ আহ্বান- গৃহ পৰিক্ৰমা মন্ত্ৰালয়ে যাতে এক উপযুক্ত স্পষ্টীকৰণ জাৰি কৰি চৰকাৰী কাৰ্যসূচীৰ আৰম্ভণিতে পূৰ্বৰ দৰেই ৰাজ্যিক আবাহন গীতটো গাবলৈ অনুমতি প্ৰদান কৰে ।
প্ৰতিৰক্ষাখণ্ডৰ গুৰুত্বপূৰ্ণ প্ৰকল্প স্থাপনৰ অনুৰোধ-
প্ৰেছ বিজ্ঞপ্তিটোত জনোৱা অনুসৰি, প্ৰতিৰক্ষা খণ্ডৰ আধুনিকীকৰণৰ বাবে তামিলনাডুত ‘চেণ্টাৰ ফৰ এয়াৰবৰ্ণ চিষ্টেমছ’ স্থাপন কৰাৰ বাবে মুখ্যমন্ত্ৰীগৰাকীয়ে প্ৰধানমন্ত্ৰীক অনুৰোধ জনায় । তেওঁ কয় যে ৰাজ্যখনত ‘এডভান্সড মিডিয়াম কম্বেট এয়াৰক্ৰাফ্ট’ (AMCA) ডিজাইন এণ্ড ডেভেলপমেণ্ট চেণ্টাৰ আৰু চেণ্টাৰ ফৰ এয়াৰবৰ্ণ চিষ্টেমছ স্থাপনৰ সন্দৰ্ভত যোৱা কেইবছৰমানৰ পৰা প্ৰতিৰক্ষা গৱেষণা আৰু উন্নয়ন সংস্থাৰ সৈতে আলোচনা চলি আছে, যাক ক্ষিপ্ৰতাৰে কাৰ্যকৰী কৰাটো প্ৰয়োজন ।
মেকদাতু বান্ধ প্ৰকল্প আৰু কাবেৰী জল বিবাদ-
কাবেৰী নদীৰ ওপৰত প্ৰস্তাৱিত মেকদাতু বান্ধ প্ৰকল্পক লৈ তামিলনাডুৰ তীব্ৰ আপত্তিৰ কথা মুখ্যমন্ত্ৰী বিজয়ে প্ৰধানমন্ত্ৰীৰ ওচৰত দোহাৰে । কৰ্ণাটকৰ উপ-মুখ্যমন্ত্ৰীয়ে এই প্ৰকল্পৰ ভূমি পূজা কৰাৰ সন্দৰ্ভত কৰা শেহতীয়া ঘোষণাক লৈ উদ্বেগ প্ৰকাশ কৰি তেওঁ কয় যে এই পদক্ষেপ কাবেৰী পানী বিবাদ ন্যায়াধিকৰণ (CWDT)ৰ চূড়ান্ত ৰায় আৰু উচ্চতম ন্যায়ালয়ৰ নিৰ্দেশৰ সম্পূৰ্ণ পৰিপন্থী ।
এই ঘোষণাই তামিলনাডুৰ খেতিয়কসকলৰ মাজত গভীৰ ক্ষোভ আৰু চিন্তাৰ সৃষ্টি কৰিছে । মুখ্যমন্ত্ৰী বিজয়ে প্ৰধানমন্ত্ৰী মোদীক আহ্বান জনায় যাতে কেন্দ্ৰীয় জল শক্তি মন্ত্ৰালয় আৰু কেন্দ্ৰীয় জল আয়োগক তামিলনাডু, কেৰালা আৰু পুডুচেৰীৰ দৰে সহ-অৱবাহিকা ৰাজ্যসমূহৰ সন্মতি অবিহনে এই প্ৰকল্পৰ কোনো ধৰণৰ অনুমোদন নিদিবলৈ নিৰ্দেশ জাৰি কৰে ।
শ্ৰীলংকাৰ জলসীমাত তামিল মৎস্যজীৱীৰ সুৰক্ষা-
বৈঠকত তামিলনাডুৰ মৎস্যজীৱীসকলক শ্ৰীলংকাৰ নৌসেনাৰ দ্বাৰা ক্ৰমাগতভাৱে কৰা গ্ৰেপ্তাৰ আৰু হাৰাশাস্তিৰ বিষয়টোৱে গুৰুত্ব লাভ কৰে । মুখ্যমন্ত্ৰীগৰাকীয়ে চৰকাৰী পৰিসংখ্যা দাঙি ধৰি কয় যে :
-কেৱল ২০২৬ চনৰ এই কেইমাহতে এনে ১২ টা গ্ৰেপ্তাৰৰ ঘটনা সংঘটিত হৈছে ।
-বৰ্তমান ৫৮ জন মৎস্যজীৱী শ্ৰীলংকাৰ কাৰাগাৰত বন্দী হৈ আছে ।
-তামিল মৎস্যজীৱীৰ ২৬৬ খন মাছ ধৰা নাও শ্ৰীলংকাৰ নৌসেনাই জব্দ কৰি ৰাখিছে ।
তেওঁ প্ৰধানমন্ত্ৰীক এই বিষয়ত ব্যক্তিগতভাৱে হস্তক্ষেপ কৰিবলৈ আৰু শ্ৰীলংকা চৰকাৰৰ সৈতে আলোচনা কৰি মৎস্যজীৱীসকলৰ লগতে তেওঁলোকৰ নাওসমূহ তৎকালীনভাৱে মুকলি কৰি দিবলৈ দাবী জনাবলৈ অনুৰোধ জনায় ।
প্ৰধানমন্ত্ৰী কাৰ্যালয়ৰ ফালৰ পৰাও সামাজিক মাধ্যম এক্স হেণ্ডেলত এই বৈঠকৰ এখন ছবি শ্বেয়াৰ কৰি লিখা হৈছে, “তামিলনাডুৰ মুখ্যমন্ত্ৰী থিৰু @actorvijay-এ আজি প্ৰধানমন্ত্ৰী @narendramodi-ক সাক্ষাৎ কৰে ।” দুয়োৰে এই বৈঠকক বৰ্তমানৰ ৰাজনৈতিক তথা প্ৰশাসনিক প্ৰেক্ষাপটত অতি গুৰুত্বপূৰ্ণ বুলি ধাৰণা কৰা হৈছে ।
লগতে পঢ়ক : কেৰালাৰ প্ৰাক্তন মুখ্যমন্ত্ৰী পিনাৰায়ী বিজয়ন আৰু তেওঁৰ কন্যাৰ ঘৰত ইডিৰ অভিযান