নতুন যুগৰ সূচনা কৰি শনিবাৰে ৰাজ্যখনৰ প্ৰথমগৰাকী বিজেপি মুখ্যমন্ত্ৰী হিচাপে শপত গ্ৰহণ কৰিলে শুভেন্দু অধিকাৰীয়ে
পশ্চিম বংগৰ ৰাজনৈতিক ইতিহাসত এক নতুন যুগৰ সূচনা কৰি শনিবাৰে ৰাজ্যখনৰ প্ৰথমগৰাকী বিজেপি মুখ্যমন্ত্ৰী হিচাপে শপত গ্ৰহণ কৰিলে শুভেন্দু অধিকাৰীয়ে । ২০২৬ চনৰ বিধানসভা নিৰ্বাচনত ঐতিহাসিক বিজয় সাব্যস্ত কৰাৰ পিছত, কবিগুৰু ৰবীন্দ্ৰনাথ ঠাকুৰৰ জন্মজয়ন্তীৰ পবিত্ৰ দিনটোত তেওঁ এই দায়িত্বভাৰ গ্ৰহণ কৰে ।
শপত গ্ৰহণ আৰু গুৰু প্ৰণাম প্ৰধানমন্ত্ৰী নৰেন্দ্ৰ মোদীৰ ইচ্ছা অনুসৰি ৰবীন্দ্ৰ জয়ন্তীত আয়োজন কৰা এই শপত গ্ৰহণ অনুষ্ঠানৰ পিছতেই শুভেন্দু অধিকাৰীয়ে জোৰাসাঁকো ঠাকুৰবাৰীত উপস্থিত হৈ শ্ৰদ্ধা নিবেদন কৰে । সাংবাদিকৰ সৈতে হোৱা বাৰ্তালাপত তেওঁ কয় যে কবিগুৰুৰ আশীৰ্বাদ লৈহে তেওঁ চৰকাৰী কাম-কাজ আনুষ্ঠানিকভাৱে আৰম্ভ কৰিব ।
বিজেপিৰ বিশাল জয় ২০২৬ চনৰ এই নিৰ্বাচনত মমতা বেনার্জীৰ ১৫ বছৰীয়া শাসনৰ অন্ত পেলাই বিজেপিয়ে ২০৭ খন আসনত বিশাল জয় লাভ কৰে । বিপৰীতে, তৃণমূল কংগ্ৰেছে (টিএমচি) মাত্ৰ ৮০ খন আসনতে সীমাবদ্ধ থাকিবলগীয়া হয় । উল্লেখ্য যে, শুভেন্দু অধিকাৰীয়ে ভবানীপুৰ আৰু নন্দীগ্ৰাম— এই দুয়োটা গুৰুত্বপূৰ্ণ সমষ্টিৰ পৰাই জয়লাভ কৰি নিজৰ আধিপত্য প্ৰমাণ কৰিছে ।
মুখ্যমন্ত্ৰীৰ লক্ষ্য-
বংগৰ পুনৰ নিৰ্মাণ মুখ্যমন্ত্ৰী হিচাপে শপত লৈ অধিকাৰীয়ে কয়, “মই এতিয়া সকলোৰে মুখ্যমন্ত্ৰী । বিগত বছৰবোৰত বংগৰ শিক্ষা আৰু সংস্কৃতিৰ ব্যাপক ক্ষতি হৈছে । আমাৰ লক্ষ্য হ’ল বংগক পুনৰ নিৰ্মাণ কৰা আৰু হেৰুৱা গৌৰৱ ঘূৰাই অনা ।” তেওঁ লগতে স্পষ্ট কৰি দিয়ে যে তেওঁৰ চৰকাৰ ড° শ্যামা প্ৰসাদ মুখোপাধ্যায়ৰ আদৰ্শৰে পৰিচালিত হ’ব ।
অভিলেখ সংখ্যক ভোটদান এইবাৰ পশ্চিম বংগত স্বাধীনতাৰ পিছত সৰ্বাধিক ভোটদান পৰিলক্ষিত হয় । নিৰ্বাচনৰ প্ৰথম পৰ্যায়ত ৯৩.১৯ শতাংশ আৰু দ্বিতীয় পৰ্যায়ত ৯১.৬৬ শতাংশ ভোটদানৰ সৈতে মুঠ ৯২.৪৭ শতাংশ ভোটাৰে গণতান্ত্ৰিক অধিকাৰ সাব্যস্ত কৰে ।
শপত গ্ৰহণ অনুষ্ঠানত দেশৰ ৰাজনৈতিক জগতৰ বহু গণ্য-মান্য ব্যক্তি উপস্থিত থাকে । প্ৰধানমন্ত্ৰী নৰেন্দ্ৰ মোদীৰ লগতে কেন্দ্ৰীয় মন্ত্ৰী অমিত শ্বাহ, ৰাজনাথ সিং, জে পি নাড্ডা আৰু কেইবাখনো ৰাজ্যৰ মুখ্যমন্ত্ৰী ক্ৰমে— অসমৰ হিমন্ত বিশ্ব শৰ্মা, ত্ৰিপুৰাৰ মানিক সাহা, উত্তৰাখণ্ডৰ পুষ্কৰ ধামী আৰু দিল্লীৰ ৰেখা গুপ্তাই অংশগ্ৰহণ কৰি শুভেন্দু অধিকাৰীক অভিনন্দন জনায় ।
মমতা বেনার্জীৰ দুৰ্গ খহি পৰাৰ পিছত শুভেন্দু অধিকাৰীৰ নেতৃত্বত পশ্চিম বংগই কেনেকুৱা দিশ লয়, সেয়া এতিয়া সমগ্ৰ দেশৰ বাবে চৰ্চাৰ বিষয় হৈ পৰিছে ।
লগতে পঢ়ক : ৯৮ বছৰীয়া মাখনলাল সৰকাৰৰ চৰণ স্পৰ্শ কৰি আশীৰ্বাদ ল’লে প্ৰধানমন্ত্ৰীয়ে
