তামিলনাডু বিধানসভাৰ মুঠ আসন ২৩৪ খন আৰু চৰকাৰ গঠনৰ বাবে প্ৰয়োজন ১১৮ জন বিধায়কৰ সমৰ্থন
তামিলনাডুৰ ৰাজনীতিত অৱশেষত যৱনিকা পৰাৰ দিশে কেইবাদিনীয়া উৎকণ্ঠাৰ । অভিনেতাৰ পৰা ৰাজনীতিবিদ হোৱা বিজয়ৰ মুখ্যমন্ত্ৰী হোৱাৰ পথ এতিয়া সম্পূৰ্ণৰূপে মুকলি হৈ পৰিছে । শনিবাৰে ভিচিকে (VCK) আৰু আইইউএমএল (IUML)-এ বিজয়ৰ দল TVK-ক বিনাচৰ্ত সমৰ্থন জনোৱাৰ কথা ঘোষণা কৰাৰ লগে লগে চৰকাৰ গঠনৰ বাবে প্ৰয়োজনীয় মেজিক নম্বৰ অতিক্ৰম কৰিলে বিজয়ে ।
সংখ্যাৰ অংকত টিভিকেৰ অগ্ৰগতি-
তামিলনাডু বিধানসভাৰ মুঠ আসন ২৩৪ খন আৰু চৰকাৰ গঠনৰ বাবে প্ৰয়োজন ১১৮ জন বিধায়কৰ সমৰ্থন । বিজয়ৰ দল টিভিকে-এ ১০৮ খন আসনত জয়লাভ কৰি বৃহত্তম দল হিচাপে আত্মপ্ৰকাশ কৰিছিল । যিহেতু বিজয়ে দুখন আসনৰ পৰা জিকিছে, সেয়েহে তেওঁ এখন আসন এৰিব লাগিব, যাৰ ফলত দলৰ বিধায়ক সংখ্যা হয় ১০৭। ইয়াৰ লগত যোগ হৈছে :
কংগ্ৰেছ: ৫ জন বিধায়ক
বাওঁ দল: ৪ জন বিধায়ক
ভিচিকে: ২ জন বিধায়ক
আইইউএমএল: ২ জন বিধায়ক
ইয়াৰ ফলত বিজয়ৰ হাতত এতিয়া মুঠ ১২০ জন বিধায়কৰ সমৰ্থন আছে, যিটো সংখ্যাগৰিষ্ঠতাৰ সংখ্যাতকৈ ২ জন বেছি ।
যোৱা চাৰিদিন ধৰি তামিলনাডুৰ ৰাজনীতিত এক অনিশ্চয়তাই বিৰাজ কৰিছিল । বিজয়ে কেইবাবাৰো ৰাজ্যপালক সাক্ষাৎ কৰিছিল যদিও ১১৮ জন বিধায়কৰ সমৰ্থন পত্ৰ দেখুৱাব নোৱাৰাৰ বাবে তেওঁক চৰকাৰ গঠনৰ বাবে আমন্ত্ৰণ জনোৱা হোৱ নাছিল । অৱশ্যে শনিবাৰে পুৱা টিভিকে নেতৃত্বই ভিচিকে আৰু আইইউএমএলৰ মুৰব্বীক সাক্ষাৎ কৰাৰ পিছত সমীকৰণ সলনি হয় ।
ভিচিকে-ৰ চৰ্ত আৰু দাবী
ভিচিকে-এ বৰ্তমান বিনাচৰ্ত সমৰ্থন দিছে যদিও দলটোৰ নেতা ভান্নি অৰাচুৱে সংবাদ মাধ্যমৰ আগত কয় যে তেওঁলোকে চৰকাৰত যোগদান কৰাৰ বিষয়ে পিছত সিদ্ধান্ত ল’ব । ইয়াৰ উপৰিও, বিজয়ে খালী কৰা আসনখনত ভিচিকে মুৰব্বী থোল থিৰুমাভালভানে নিৰ্বাচন খেলাটো আৰু তেওঁক উপ-মুখ্যমন্ত্ৰীৰ পদ দিয়াটো দলটোৱে বিচাৰে বুলি জানিব পৰা গৈছে ।
মাত্ৰ দুবছৰ আগতে গঠন হোৱা এটা দলে ডিএমকে আৰু এআইএডিএমকেৰ দৰে পুৰণি শক্তিক ধূলিস্যাৎ কৰি চৰকাৰ গঠন কৰিবলৈ সাজু হোৱা বিষয়টোৱে এতিয়া সমগ্ৰ দেশৰে দৃষ্টি আকৰ্ষণ কৰিছে ।
লগতে পঢ়ক : পৰিবৰ্তনৰ নতুন যুগ : শপত গ্ৰহণৰ পিছতে জোড়াসাঁকো অভিমুখে বংগৰ নৱনিযুক্ত মুখ্যমন্ত্রী
