নিৰ্বাচনমুখী ৰাজ্যসমূহ বাদ দি সকলো ৰাজ্যৰ মুখ্যমন্ত্ৰীৰ সৈতে ভিডিঅ’ কনফাৰেন্সযোগে বৈঠকত মিলিত হ’ব প্ৰধানমন্ত্ৰী মোদী
প্ৰধানমন্ত্ৰী নৰেন্দ্ৰ মোদীয়ে আজি সন্ধিয়া নিৰ্বাচনমুখী ৰাজ্যসমূহ বাদ দি সকলো ৰাজ্যৰ মুখ্যমন্ত্ৰীৰ সৈতে ভিডিঅ’ কনফাৰেন্সযোগে বৈঠকত মিলিত হ’ব । উপসাগৰীয় অঞ্চলত সংঘাত আৰম্ভ হোৱাৰ পাছত মুখ্যমন্ত্রীসকলৰ সৈতে প্রধানমন্ত্রী মোদীৰ এইখন প্রথম বৈঠক ৷ কেবিনেট সচিবালয়ে নিৰ্বাচনমুখী ৰাজ্য তামিলনাডু, পশ্চিম বংগ, অসম, কেৰালা, কেন্দ্ৰীয় শাসিত অঞ্চল পুডুচেৰীৰ মুখ্য সচিবসকলৰ সৈতে পৃথক পৃথক বৈঠকত মিলিত হ’ব ।
জানিব পৰা মতে প্ৰধানমন্ত্ৰীয়ে শুকুৰবাৰে সন্ধিয়া ভিডিঅ’ কনফাৰেন্সিঙৰ জৰিয়তে মুখ্যমন্ত্ৰীসকলৰ সৈতে সংযোগ স্থাপন কৰি সংকটৰ সৈতে মোকাবিলা কৰিবলৈ ৰাজ্যসমূহৰ প্ৰস্তুতি আৰু পৰিকল্পনা পৰ্যালোচনা কৰিব । এই পদক্ষেপৰ লক্ষ্য হৈছে “টিম ইণ্ডিয়া”ৰ মনোভাৱৰ দ্বাৰা অনুপ্ৰাণিত হৈ চৰকাৰী প্ৰচেষ্টাৰ সমন্বয় নিশ্চিত কৰা ।
ইৰাণ সংঘাতৰ ফলত উদ্ভৱ হোৱা সংকটৰ সমাধানৰ ক্ষেত্ৰত প্ৰধানমন্ত্ৰী মোদীয়ে সক্ৰিয়ভাৱে জড়িত হৈ পৰিছে । সোমবাৰে তেওঁ লোকসভাৰ সাংসদসকলক চৰকাৰৰ কাৰ্যকলাপৰ বিষয়ে অৱগত কৰে আৰু মঙলবাৰে ৰাজ্যসভাত ভাষণ দিয়ে । বুধবাৰে সৰ্বদলীয় বৈঠকত চৰকাৰৰ জ্যেষ্ঠ মন্ত্ৰীসকলে সকলো বিৰোধী দলৰ প্ৰশ্নৰ উত্তৰ দিয়ে । যিহেতু তেল আৰু গেছৰ যোগান পৰিচালনাৰ ক্ষেত্ৰত ৰাজ্যসমূহে গুৰুত্বপূৰ্ণ ভূমিকা পালন কৰে, গতিকে মোদীয়ে এতিয়া এই বিষয়ত মুখ্যমন্ত্ৰীসকলৰ সৈতে আলোচনা কৰিব ।
ইৰাণৰ সংঘাতৰ ফলত উদ্ভৱ হোৱা সংকট দীৰ্ঘদিনীয়া হ’ব পাৰে বুলি ধাৰাবাহিকভাৱে কৈ আহিছে প্ৰধানমন্ত্ৰী মোদীয়ে । তেওঁ লগতে উদ্বেগ প্ৰকাশ কৰিছে যে কিছুমান বিশেষ উপাদানে সংকটৰ শোষণৰ চেষ্টা কৰিব পাৰে আৰু ইয়াক মোকাবিলা কৰিবলৈ কঠোৰ ব্যৱস্থা গ্ৰহণ কৰিব লাগিব । তেওঁ লোকসভাত দিয়া ভাষণত এই কথাৰ ওপৰত গুৰুত্ব আৰোপ কৰে ।
লগতে পঢ়ক : ৰাজ্যত নাটনি হোৱা নাই পেট্ৰল-ডিজেলৰ, উৰাবাতৰি বিয়পোৱাসকলক সাৱধানবাণী
