জনসভাক সম্বোধন কৰি অমিত শ্বাহে অসমৰ মুখ্যমন্ত্ৰী ড০ হিমন্ত বিশ্ব শৰ্মাৰ প্ৰচেষ্টাক উচ্চ প্ৰশংসা কৰে
কেন্দ্ৰীয় গৃহমন্ত্ৰী অমিত শ্বাহে দেওবাৰে, অসমত ধাৰাবাহিকভাৱে কেইবাখনো গুৰুত্বপূৰ্ণ স্বাস্থ্য কেন্দ্ৰ উদ্বোধন কৰে । ইয়াৰ ভিতৰত আছে প্ৰাগজ্যোতিষপুৰ চিকিৎসা মহাবিদ্যালয় আৰু চিকিৎসালয়, গোলাঘাট কেন্সাৰ কেন্দ্ৰ আৰু তিনিচুকীয়া কেন্সাৰ কেন্দ্ৰ । এই পদক্ষেপ ৰাজ্যখনৰ চিকিৎসা আন্তঃগাঁথনি শক্তিশালী কৰাৰ দিশত এক গুৰুত্বপূৰ্ণ পদক্ষেপ হিচাপে চিহ্নিত হৈছে ।
জনসভাক সম্বোধন কৰি অমিত শ্বাহে অসমৰ মুখ্যমন্ত্ৰী ড০ হিমন্ত বিশ্ব শৰ্মাৰ প্ৰচেষ্টাক উচ্চ প্ৰশংসা কৰে । তেওঁ উল্লেখ কৰে যে ৰাজ্য চৰকাৰে অসমক স্বাস্থ্য খণ্ডত আত্মনিৰ্ভৰশীল কৰি তুলিবলৈ উল্লেখনীয় পদক্ষেপ গ্ৰহণ কৰিছে ।
গৃহমন্ত্ৰী শ্বাহে কয়, “স্বাস্থ্য খণ্ডত অসমক এখন সম্পূৰ্ণ ৰাজ্য হিচাপে গঢ়ি তোলাৰ বাবে হিমন্ত বিশ্ব শৰ্মাই কৰা প্ৰচেষ্টাক প্ৰশংসা কৰিছোঁ । তেওঁ নিজৰ কাৰ্যকাল শেষ হোৱাৰ পূৰ্বেই ৰাজ্যখনক স্বাস্থ্য খণ্ডত স্বাৱলম্বী কৰি তুলিছে ।”
কেন্দ্ৰীয় গৃহমন্ত্ৰীগৰাকীয়ে লগতে কয় যে দিনটোৰ ভ্ৰমণৰ সময়ত ড০ শৰ্মাই অসমত এনে এক স্বাস্থ্য ব্যৱস্থা গঢ়ি তোলাৰ পৰিকল্পনাৰ কথা ব্যক্ত কৰিছিল, য’ত কোনো এজন ৰোগীয়েই চিকিৎসাৰ বাবে ৰাজ্যৰ বাহিৰলৈ যাব নালাগে ।
অমিত শ্বাহৰ মতে, ৰাজ্য চৰকাৰৰ লক্ষ্য হৈছে চুবুৰীয়া অঞ্চলৰ ৰোগীয়েও যাতে অসমত উন্নত মানৰ চিকিৎসা লাভ কৰিব পাৰে সেয়া নিশ্চিত কৰা । তেওঁ কয়, “তেওঁ মোক কৈছিল যে তেওঁ অসমক এনেদৰে গঢ়ি তুলিব বিচাৰে যাতে এজনো ৰোগীয়ে চিকিৎসা বিচাৰি ৰাজ্যৰ বাহিৰলৈ যাব নালাগে । আমি এনে এখন ৰাজ্য গঢ়িব বিচাৰো য’ত বংগ আৰু সমগ্ৰ উত্তৰ-পূৰ্বাঞ্চলৰ দৰিদ্ৰ ৰোগীয়ে ইয়ালৈ আহি চিকিৎসা গ্ৰহণ কৰিব পাৰে ।” নতুনকৈ উদ্বোধন কৰা প্ৰতিষ্ঠানসমূহৰ গুৰুত্বৰ কথা উল্লেখ কৰি অমিত শ্বাহে কয় যে পূৰ্বতে অসম আৰু উত্তৰ-পূৰ্বাঞ্চলৰ বহু ৰোগীয়ে বিশেষকৈ কৰ্কট ৰোগৰ চিকিৎসাৰ বাবে চেন্নাই, মুম্বাই, কৰ্ণাটক আৰু দিল্লীৰ দৰে চহৰলৈ বহু দূৰ ভ্ৰমণ কৰিবলগীয়া হৈছিল ।
তেওঁ লগতে কয়, “এই প্ৰতিষ্ঠানসমূহ স্থাপন হোৱাৰ লগে লগে যিসকল ৰোগীয়ে এসময়ত চিকিৎসাৰ বাবে নিজৰ পৰিয়ালৰ পৰা বহু দূৰলৈ যাবলগীয়া হৈছিল, তেওঁলোকে এতিয়া ঘৰৰ ওচৰৰ চৰকাৰী চিকিৎসালয়তে উন্নত চিকিৎসা লাভ কৰিব পাৰিব ।”
লগতে পঢ়ক : প্ৰধানমন্ত্ৰীৰ পিছতে গুৱাহাটীত উপস্থিত কেন্দ্ৰীয় গৃহমন্ত্ৰী অমিত শ্বাহ
