যোৰহাট কেন্দ্ৰীয় কাৰাগাৰৰ সমীপত থকা এক বৃহৎ ৰাজহুৱা উদ্যান স্বৰাজ উদ্যান যোৰহাটবাসীৰ বাবে উৎসৰ্গা কৰে মুখ্যমন্ত্ৰীয়ে
মুখ্যমন্ত্ৰী ড০ হিমন্ত বিশ্ব শৰ্মাই বুধবাৰে যোৰহাট কেন্দ্ৰীয় কাৰাগাৰৰ সমীপত থকা এক বৃহৎ ৰাজহুৱা উদ্যান ‘স্বৰাজ উদ্যান’ যোৰহাটবাসীৰ বাবে উৎসৰ্গা কৰে । ১৭৫ বিঘা মাটিকালি সামৰি তথা প্ৰায় ১৫৯ কোটি টকাৰ আনুমানিক ব্যয়ৰে নিৰ্মাণ কৰা এই উদ্যানখন ভাৰতৰ স্বাধীনতা আন্দোলনত গুৰুত্বপূৰ্ণ ভূমিকা পালন কৰা উত্তৰ-পূবৰ আঠখন ৰাজ্যৰ স্বাধীনতা সংগ্ৰামীসকলৰ প্ৰতি শ্ৰদ্ধাঞ্জলি হিচাপে বিকশিত কৰা হৈছে ।
উত্তৰ-পূবৰ স্বাধীনতা সংগ্ৰামীসকলৰ অৱদানক সন্মান জনাই উদ্যানখনত বিশেষভাৱে গ্ৰেনাইটৰ স্মাৰক স্তম্ভ স্থাপন কৰা হৈছে, যাৰ লক্ষ্য হৈছে তেওঁলোকৰ উত্তৰাধিকাৰ সংৰক্ষণ কৰা আৰু ভৱিষ্যৎ প্ৰজন্মক তেওঁলোকৰ ত্যাগৰ বিষয়ে জনোৱা ।
উদ্যাখন মুকলি কৰি দিয়া ভাষণত মুখ্যমন্ত্ৰীগৰাকীয়ে কয় যে এই পদক্ষেপৰ জৰিয়তে ইতিহাস সংৰক্ষণ, অঞ্চলটোৰ বীৰসকলৰ প্ৰতি শ্ৰদ্ধাঞ্জলি জ্ঞাপন আৰু নাগৰিকৰ বাবে অৰ্থপূৰ্ণ ৰাজহুৱা স্থান সৃষ্টিৰ ক্ষেত্ৰত অসম চৰকাৰৰ দায়বদ্ধতা প্ৰতিফলিত হৈছে । উল্লেখ্য যে, আজি উদ্বোধন কৰা স্বৰাজ উদ্যানখন অঞ্চলটোৰ এক অন্যতম পৰিচিত স্থান হৈ পৰাৰ লগতে ই দৰ্শনাৰ্থীসকলৰ বাবে এক স্মৰণীয় তথা প্ৰেৰণাৰ থলী হিচাপে বিবেচিত হ’ব বুলি আশা কৰা হৈছে ।
ইফালে যোৰহাটবাসীক আন এক উপহাৰ দিয়ে মুখ্যমন্ত্ৰী হিমন্ত বিশ্ব শৰ্মাই । মুখ্যমন্ত্ৰীগৰাকীয়ে চহৰখনত মুকলি কৰে এ টি ৰোডৰ মণিৰাম দেৱান- পিয়লী বৰুৱা উৰণ সেতু । বৰুৱা চাৰিআলিৰ পৰা ভোগদৈ দলঙলৈ নিৰ্মিত হৈছে ১.২৭ কি.মি. দৈৰ্ঘৰ এই উৰণ সেতুখন । এই সেতুখনে চহৰখনৰ যানজঁট বহু পৰিমাণে নিয়ন্ত্ৰণ কৰিব বুলি আশা কৰা হৈছে । আনহাতে যোৰহাটৰ ঐতিহাসিক মইনাপৰীয়া নামঘৰৰ অতিথিশালাও উদ্বোধন কৰে মুখ্যমন্ত্ৰী ড০ হিমন্ত বিশ্ব শৰ্মাই । ১ কোটি ৫০ লাখ টকাৰ ব্যয় সাপেক্ষে নিৰ্মাণ কৰা মইনাপৰীয়া নামঘৰৰ অতিথিশালা মুকলি কৰি ৰাইজলৈ উৎসৰ্গা কৰে মুখ্যমন্ত্ৰীগৰাকীয়ে ।
লগতে পঢ়ক : জুবিন ক্ষেত্ৰক লৈ কেবিনেটৰ ডাঙৰ সিদ্ধান্ত, আলি-আয়ে-লৃগাঙত ৰাজ্যিক বন্ধ ঘোষণা
