দেওবাৰে অনুষ্ঠিত হোৱা প্ৰথমখন এদিনীয়াত কিৱিৰ বিৰুদ্ধে ৪ উইকেটত জয়লাভ ভাৰতীয় দলৰ । এই মেচত মাত্ৰ ৭ ৰানৰ বাবে শতক বঞ্চিত হয় বিৰাট কোহলী ।
জয়েৰে নতুন বছৰৰ আৰম্ভণি কৰিছে ভাৰতীয় ক্ৰিকেট দলে । বদোদৰাত ভাৰত আৰু নিউজীলেণ্ডৰ মাজত অনুষ্ঠিত হোৱা প্ৰথমখন এদিনীয়াত ভাৰতীয় দলে ৪ উইকেটত দৰ্শনীয় বিজয় সাব্যস্ত কৰে । এই জয়ৰ লগে লগে ভাৰতীয় দলটোৱে তিনিখন মেচৰ শৃংখলাত ১-০ ব্যৱধানত অগ্ৰগতি লাভ কৰে । বদোদৰাৰ কোটাম্বি ষ্টেডিয়ামত অনুষ্ঠিত হয় এই খেলখন । প্ৰথমে বেটিং কৰি নিউজীলেণ্ডে ভাৰতৰ সন্মুখত ৩০১ ৰানৰ লক্ষ্য নিৰ্ধাৰণ কৰি দিয়ে । আলহী দলৰ হৈ ডেৰিল মিচেলে ৮৪ সৰ্বাধিক ৰান সংগ্ৰহ । ইয়াৰ প্ৰত্যুত্তৰত ভাৰতে কিং কোহলীৰ ৯৩, গীলৰ ৫৬ আৰু শ্ৰেয়াছ আয়াৰৰ ৪৯ ৰানৰ সহায়ত এটা অভাৰ বাকী থকা অৱস্থাত ৬ টা উইকেট হেৰুৱাই বিজয় লক্ষ্যত উপনীত হয় । বিৰাট কোহলী প্লেয়াৰ অব দ্য মেচ বিবেচিত হয় ।
উল্লেখ্য যে, এইখন আছিল ভাৰতীয় ক্ৰিকেট দলৰ নতুন বছৰৰ প্ৰথমখন আন্তঃৰাষ্ট্ৰীয় মেচ । গীল ব্ৰিগেডে বছৰটোৰ আৰম্ভণি জয়েৰে কৰে । এই খেলখন কোটাম্বি ষ্টেডিয়ামৰ বাবেও বিশেষ আছিল, কিয়নো ইয়াত প্ৰথমবাৰৰ বাবে পুৰুষৰ আন্তঃৰাষ্ট্ৰীয় খেল অনুষ্ঠিত হৈছে ।
ভাৰতৰ ইনিংছ-
নিউজীলেণ্ডৰ ৩০১ ৰানৰ প্ৰত্যুত্তৰত ভাৰতে শক্তিশালী আৰম্ভণি কৰে । ৰোহিত আৰু গীলে স্থিৰ আৰম্ভণি কৰে । ৰোহিতৰ ফৰ্ম ভাল দেখা গৈছিল যদিও নৱম অভাৰত দলীয় ৩৯ ৰানত তেওঁৰ উইকেটৰ পতন ঘটে । ৰোহিতে ২৬ ৰান সংগ্ৰহ কৰে, য’ত দুটা ছয় আৰু তিনিটা চাৰি আছিল । ইয়াৰ পাছত বিৰাট কোহলী আৰু শুভমন গীলে বিস্ফোৰক প্ৰদৰ্শন আগবঢ়ায় । তেওঁলোকে এশ ৰানৰ অংশীদাৰিত্ব গঢ়ে । ইয়াৰ উপৰিও এই মেচতে কোহলীয়ে ২৮ হাজাৰ আন্তঃৰাষ্ট্ৰীয় ৰান সম্পূৰ্ণ কৰে । গীলেও অৰ্ধ শতক অৰ্জন কৰে । অৱশ্যে ২৭ নং অভাৰত ব্যক্তিগত ৫৬ ৰানত গীলে নিজৰ উইকেট হেৰুৱাই ।
ইয়াৰ পিছতে শ্ৰেয়াছ আয়েৰে বিৰাট কোহলীৰ সৈতে দলৰ দায়িত্ব লয় । তেওঁলোকে ৭৭ ৰানৰ অংশীদাৰিত্ব গঢ়ে । অৱশ্যে এই মেচত কোহলীয়ে মাত্ৰ ৭ ৰানৰ বাবে শতক বঞ্চিত হয় । ৪০ নং অভাৰত তেওঁৰ ৯৩ ৰানত নিজৰ উইকেট বিসৰ্জন দিয়ে । কোহলীয়ে নিজৰ ইনিংছত ৮টা চাৰি আৰু এটা ছয় কোবাই ।
ইয়াৰ পিছতে জাডেজাই মাত্ৰ চাৰিটা ৰানতে পেভিলিয়নমুখী হয় । ইয়াৰ পিছৰ অভাৰত শ্ৰেয়াছ আয়াৰো ৪৯ ৰানতে আউট হোৱাৰ লগে লগে ভাৰতৰ কিছু সমস্যাত পৰে । নিউজীলেণ্ডে ধাৰাবাহিকভাৱে ভাৰতীয় দলৰ উইকেট দখল কৰি খেলখনলৈ উভতি আহে । ইয়াৰ পাছতে হৰ্ষিত ৰাণাই ২৯ ৰানৰ এক বিস্ফোৰক প্ৰদৰ্শনেৰে ভাৰতক পুনৰ জয়ৰ দিশে আগুৱাই লৈ যায় । হৰ্ষিতৰ উইকেট পতনৰ সময়ত ভাৰতক ২২টা বলত ২২ ৰানৰ প্ৰয়োজন হৈছিল । ইয়াৰ পিছতে কে এল ৰাহুল আৰু আঘাতপ্ৰাপ্ত ৱাশ্বিংটন সুন্দৰে ৪৯ অভাৰত ভাৰতৰ জয় নিশ্চিত কৰে ।
নিউজীলেণ্ডৰ ইনিংছ-
প্ৰথমে বেটিং কৰিবলৈ আমন্ত্ৰণ পোৱা নিউজীলেণ্ডে এক সুন্দৰ আৰম্ভণি কৰে । প্ৰথম উইকেটৰ বাবে অ’পেনাৰ ডেভন কনৱে আৰু হেনৰী নিকোলছে ১১৭ ৰানৰ অংশীদাৰিত্ব স্থাপন কৰে । এই অংশীদাৰিত্বৰ সময়ছোৱাত দুয়োজন খেলুৱৈয়ে ৬০টা বলত অৰ্ধশতক অৰ্জন কৰে । এই অংশীদাৰিত্ব হৰ্ষিত ৰাণাই হেনৰী নিকোলছৰ উইকেট দখল কৰি ভংগ কৰে । নিকোলছে ৮টা চাৰিৰ সহায়ত ৬৯টা বলত ৬২ ৰান সংগ্ৰহ কৰে । ইয়াৰ পিছত হৰ্ষিতে কনৱেকো আউট কৰে । কনৱেই ৬৭টা বলত ৬টা চাৰি আৰু এটা ৬ৰ সহায়ত ৫৬ ৰান সংগ্ৰহ কৰে । ২৮ নং অভাৰত উইল ইয়ঙক আউট কৰে ছিৰাজে । ইয়ঙে ১২ ৰান সংগ্ৰহ কৰে ।
তাৰ পাছত ৩৪ নং অভাৰত কুলদীপ যাদৱে গ্লেন ফিলিপছক আউট কৰে । সেই সময়ত নিউজীলেণ্ডৰ স্ক’ৰ আছিল ১৭০ । তাৰ পাছত ৩৮ নং অভাৰত প্ৰসিদ্ধে মিচেল হেক বল্ড কৰে, তেওং ১৮ ৰান সংগ্ৰহ কৰে । ৪৩ নং অভাৰত ব্ৰেচৱেল ৰান আউট হোৱাৰ লগে লগে কিৱি বাহিনীৰ ষষ্ঠটো উইকেটৰ পতন ঘটে । তাৰ পিছৰ অভাৰত ছিৰাজে জাকাৰীক পেভিলিয়নৰ বাট দেখুৱাই । ইয়াৰ পাছতে নিউজীলেণ্ডে ৪৮ নং অভাৰত ডাঙৰ বিপৰ্যয়ৰ সন্মুখীন হ’বলগীয়া হয়, যেতিয়া ডেৰিল মিচেলে ৭১টা বলত ৮৪ ৰান কৰি আউট হয় । শেষত নিউজীলেণ্ডে ৩০০ ৰান কৰিবলৈ সক্ষম হয় ।
বদোদৰা এদিনীয়াৰ বাবে ভাৰতৰ মূল একাদশ :
শুভমন গীল (অধিনায়ক), ৰোহিত শৰ্মা, বিৰাট কোহলী, শ্ৰেয়াছ আয়েৰ, কে এল ৰাহুল (উইকেটকীপাৰ), ৱাশ্বিংটন সুন্দৰ, ৰবীন্দ্ৰ জাডেজা, হৰ্ষিত ৰানা, কুলদীপ যাদৱ, প্ৰসিদ্ধ কৃষ্ণ, মহম্মদ চিৰাজ ।
লগতে পঢ়ক : ‘ভাগ্যত লিখা কথা কোনেও কাঢ়ি নিব নোৱাৰে’;টি-২০ বিশ্বকাপৰ পৰা বাদ পৰাৰ পিছত শুভমান গিলৰ দুখ প্ৰকাশ
