টি-২০ বিশ্বকাপৰ বাবে ঘোষণা কৰা হৈছে টিম ইণ্ডিয়া । জানক এই প্ৰতিযোগিতাৰ বাবে ভাৰতীয় দলৰ কম্বিনেচন…
২০ ডিচেম্বৰ শনিবাৰে আই চি চি পুৰুষ টি-২০ বিশ্বকাপ ২০২৬ৰ বাবে ঘোষণা কৰা হয় ভাৰতীয় দল । আগন্তুক এই মেগা ইভেণ্টৰ বাবে সূৰ্যকুমাৰ যাদৱে টিম ইণ্ডিয়াৰ অধিনায়কত্ব লাভ কৰাৰ বিপৰীতে অক্ষৰ পেটেলক সহ-অধিনায়ক হিচাপে নিযুক্তি দিয়া হৈছে । শুভমন গীলক এই দলত অন্তৰ্ভুক্ত কৰা হোৱা নাই । ৭ ফেব্ৰুৱাৰীৰ পৰা ২০ মাৰ্চলৈ ভাৰত আৰু শ্ৰীলংকাই যৌথভাৱে আয়োজন কৰিব টি-২০ বিশ্বকাপ ।
২০২৬ চনৰ টি-২০ বিশ্বকাপৰ বাবে টিম ইণ্ডিয়াত অভিজ্ঞতা আৰু যুৱৰ এক শক্তিশালী মিশ্ৰণ দেখা গৈছে । সূৰ্যকুমাৰ যাদৱ, যশপ্ৰীত বুমৰাহ, হাৰ্দিক পাণ্ডিয়া আৰু অৰ্শদীপ সিঙৰ দৰে অভিজ্ঞ খেলুৱৈ দলটোৰ অংশ । অভিষেক শৰ্মা, ঈশান কিষণ, তিলক বাৰ্মা, হৰ্ষিত ৰানাৰ দৰে যুৱ তাৰকাৰ ওপৰতো আস্থা ৰাখিছে বি চি চি আইয়ে ।
টিম ইণ্ডিয়াত আছে চাৰিজন বেটছমেন, দুজন বেটিং অল-ৰাউণ্ডাৰ, দুজন স্পীন-বলিং অল-ৰাউণ্ডাৰ, তিনিজন স্পেচিয়েলিষ্ট ফাষ্ট বলাৰ, দুজন উইকেটকীপাৰ আৰু দুজন স্পেচিয়েলিষ্ট স্পীনাৰ । অভিষেক শৰ্মাই সঞ্জু চেমছনৰ সৈতে ইনিংছ মুকলি কৰাৰ সম্ভাৱনা আছে, আনহাতে ৰিংকু সিং বা শিৱম ডুবেই ফিনিছাৰ হিচাপে খেলিব পাৰে । প্ৰয়োজন হ’লে শীৰ্ষ ক্ৰমত সঞ্জুৰ ঠাইত ঈশাণকো বিবেচনা কৰা হ’ব পাৰে ।
কুলদীপ আৰু বৰুণৰ স্পীন যাদু-
বেট আৰু বল দুয়োটা ক্ষেত্ৰতে ভাল প্ৰদৰ্শনৰ দায়িত্ব অল ৰাউণ্ডাৰ হাৰ্দিক পাণ্ডিয়া, শিৱম ডুবে, অক্ষৰ পেটেল আৰু ৱাশ্বিংটন সুন্দৰৰ কান্ধত থাকিব । অভিষেক শৰ্মা, সূৰ্য্যকুমাৰ যাদৱ আৰু তিলক বাৰ্মাই বেটিঙত গুৰুত্বপূৰ্ণ ভূমিকা পালন কৰিব । কুলদীপ যাদৱ আৰু বৰুণ চক্ৰৱৰ্তীৰ স্পীনে যিকোনো দলৰ অগ্ৰগতিত ব্যাঘাত জন্মাব পাৰে । তদুপৰি এছিয়া উপমহাদেশত অনুষ্ঠিত হৈছে টি-২০ বিশ্বকাপ, য’ত পৰিস্থিতি এই দুজন স্পীনাৰৰ হৈ উঠিব পাৰে । ইফালে ফাষ্ট বলাৰ যশপ্ৰীত বুমৰাহ, হৰ্ষিত ৰানা আৰু অৰ্শদীপ সিঙৰ বিপক্ষৰ বেটিং মেৰুদণ্ড যিকোনো সময়ত ভাঙিব পৰাৰ ক্ষমতা আছে ।
আগন্তুক টি-২০ বিশ্বকাপত পাকিস্তান, আমেৰিকা যুক্তৰাষ্ট্ৰ, নামিবিয়া, নেদাৰলেণ্ডৰ সৈতে টিম ইণ্ডিয়াক গ্ৰুপ এত স্থান দিয়া হৈছে । ভাৰতৰ চাৰিওখন গ্ৰুপ মেচ বিভিন্ন স্থানত অনুষ্ঠিত হ’ব । ভাৰতীয় দলটোৱে অহা ৭ ফেব্ৰুৱাৰীত মুম্বাইৰ ৱাংখেড়ে ষ্টেডিয়ামত আমেৰিকাৰ বিৰুদ্ধে প্ৰথমখন খেল খেলিব । ইয়াৰ পিছতে ১২ ফেব্ৰুৱাৰীত দিল্লীৰ অৰুণ জেটলী ষ্টেডিয়ামত নামিবিয়াৰ বিৰুদ্ধে খেলিব । ইয়াৰ পিছত ভাৰতীয় দলটোৱে ১৫ ফেব্ৰুৱাৰীত কলম্বোৰ আৰ প্ৰেমদাছা ষ্টেডিয়ামত মুখামুখি হ’ব তীব্ৰ প্ৰতিদ্বন্দ্বী পাকিস্তানৰ বিৰুদ্ধে । অহা ১৮ ফেব্ৰুৱাৰীত আহমেদাবাদৰ নৰেন্দ্ৰ মোদী ষ্টেডিয়ামত নেদাৰলেণ্ডৰ বিৰুদ্ধে ভাৰতৰ অন্তিমখন গ্ৰুপ মেচ অনুষ্ঠিত হ’ব ।
টি-২০ বিশ্বকাপ ২০২৬ৰ বাবে ১৫ জনীয়া ভাৰতীয় দল :
সূৰ্য্যকুমাৰ যাদৱ (অধিনায়ক), অক্ষৰ পেটেল (সহ-অধিনায়ক), অভিষেক শৰ্মা, তিলক বাৰ্মা, হাৰ্দিক পাণ্ডিয়া, শিৱম ডুবে, সঞ্জু চেমছন (উইকেটকীপাৰ), অৰ্শদীপ সিং, ৰিংকু সিং, হৰ্ষিত ৰাণা, কুলদীপ যাদৱ, বৰুণ চক্ৰৱৰ্তী, যশপ্ৰীত বুমৰাহ, ৱাশ্বিংটন সুন্দৰ আৰু ঈশান কিষণ (উইকেটকীপাৰ) ।
লগতে পঢ়ক : টি-২০ বিশ্বকাপ ২০২৬ৰ বাবে বি চি চি আইৰ ৫টা ডাঙৰ সিদ্ধান্ত… যিয়ে আচৰিত কৰিছে সকলোকে
