ভাৰতীয় মহাকাশ সংস্থাৰ পৰিকল্পনা
চলিত বিত্তীয় বৰ্ষত আৰু ৭টা উৎক্ষেপণৰ পৰিকল্পনা কৰিছে ইছৰোৱে । ইছৰো তথা ভাৰতীয় মহাকাশ সংস্থাই ২০২৭ চনত প্ৰথমখন মানৱ মহাকাশযান প্ৰেৰণৰ বাবেও প্ৰস্তুতি চলাইছে । ইছৰোৰ অধ্যক্ষ ভি নাৰায়ণনে এক সাক্ষাৎকাৰত কয় যে ইছৰোৱে বিজ্ঞান, প্ৰযুক্তি আৰু উদ্যোগৰ সামৰ্থ্য বৃদ্ধিৰ দিশত দ্ৰুতগতিত সম্প্ৰসাৰণ কৰি আছে । নাৰায়ণনে কয় যে ইছৰোৱে চলিত বিত্তীয় বৰ্ষৰ শেষৰ পূৰ্বে আৰু ৭টা উৎক্ষেপণৰ লক্ষ্য লৈছে, য’ত এটা বাণিজ্যিক যোগাযোগ উপগ্ৰহ আৰু কেইবাটাও পিএছএলভি আৰু জিএছএলভি অভিযান অন্তৰ্ভুক্ত কৰা হৈছে ।
২০২৮ চনত চন্দ্ৰযান-৪ অভিযান উৎক্ষেপণৰ লক্ষ্য-
ইছৰোৰ অধ্যক্ষগৰাকীয়ে উল্লেখ কৰে যে প্ৰথমখন থলুৱাভাৱে নিৰ্মিত পি এছ এল ভি উৎক্ষেপণ ভাৰতীয় মহাকাশ কাৰ্যসূচীৰ বাবে এক মাইলৰ খুঁটি হ’ব । ইছৰোৰ মুৰব্বীগৰাকীয়ে কয় যে চৰকাৰে চন্দ্ৰযান-৪ অভিযানত অনুমোদন জনাইছে । এইটোৱেই হ’ব ভাৰতৰ বৰ্তমানলৈকে চন্দ্ৰ অভিযানৰ আটাইতকৈ প্ৰত্যাহ্বানমূলক অভিযান । ভাৰতীয় মহাকাশ সংস্থাই ২০২৮ চনত চন্দ্ৰযান-৪ অভিযান আৰম্ভ কৰাৰ লক্ষ্য লৈছে । চন্দ্ৰযান-৪ অভিযানৰ জৰিয়তে ইছৰোৱে চন্দ্ৰৰ পৰা নমুনা ঘূৰাই অনাৰ চেষ্টা কৰিব । বৰ্তমান কেৱল আমেৰিকা, ৰাছিয়া, চীনেহে এই কৃতিত্ব অৰ্জন কৰিছে ।
ভাৰতীয় মহাকাশ সংস্থাৰ আন এটা ডাঙৰ অভিযান হ’ল জাপানৰ মহাকাশ সংস্থা জাক্সাৰ সৈতে যৌথ অভিযান লুপেক্স । লুপেক্সৰ লক্ষ্য হৈছে চন্দ্ৰৰ দক্ষিণ মেৰুত থকা পানীৰ বৰফৰ বিষয়ে অধ্যয়ন কৰা । ক্ৰমবৰ্ধমান মিছনৰ চাহিদাৰ সৈতে খোজ মিলাবলৈ অহা তিনি বছৰত ইছৰোৱে মহাকাশযানৰ উৎপাদন তিনিগুণ বৃদ্ধিৰ কামো কৰি আছে ।
মহাকাশ কেন্দ্ৰ নিৰ্মাণৰ দিশত দ্ৰুত গতিত চলি আছে কাম-
নাৰায়ণনে কয় যে ইছৰোৱে ভাৰতীয় মহাকাশ কেন্দ্ৰৰ কাম আৰম্ভ কৰিছে, যিটো ২০৩৫ চনৰ ভিতৰত সম্পূৰ্ণ কৰাৰ লক্ষ্যৰে লোৱা হৈছে । তেওঁ কয় যে ২০২৮ চনৰ ভিতৰত পাঁচটা মডিউলৰ ভিতৰত প্ৰথমটো কক্ষপথত স্থাপন কৰা হ’ব । পাঁচোটা মডিউল পৃথিৱীৰ কক্ষপথত স্থাপন কৰাৰ পিছত ভাৰত মহাকাশ কেন্দ্ৰ পৰিচালনা কৰা তৃতীয়খন প্ৰধান দেশ হিচাপে পৰিগণিত হ’ব । আমেৰিকা নেতৃত্বাধীন আন্তঃৰাষ্ট্ৰীয় মহাকাশ কেন্দ্ৰটোৰ জীৱনৰ অন্ত পৰাৰ ওচৰ চাপিছে আৰু চীনৰ টিয়াংগং মহাকাশ কেন্দ্ৰটো সম্পূৰ্ণৰূপে কাৰ্যক্ষম হৈ উঠিছে । ইছৰোৰ মুৰব্বীগৰাকীয়ে কয় যে প্ৰধানমন্ত্ৰী নৰেন্দ্ৰ মোদীয়ে ইছৰোক ২০৪০ চনৰ ভিতৰত ভাৰতীয় মহাকাশচাৰীক চন্দ্ৰলৈ প্ৰেৰণ আৰু তেওঁলোকক সুৰক্ষিতভাৱে ঘূৰাই অনাৰ দিশত কাম কৰিবলৈও নিৰ্দেশ দিছে ।
লগতে পঢ়ক : গগণযান অভিযানৰ দিশত আৰু এখোজ… ইছৰোৱে লাভ কৰিলে বৃহৎ সফলতা
