ইণ্ডিয়া ৱান এয়াৰৰ এখন বিমানৰ শনিবাৰে জৰুৰীকালীন অৱতৰণক কেন্দ্ৰ কৰি আতংকময় পৰিস্থিতিৰ সূচনা হয় । ঘটনাত ৯ জনীয়া বিমানখনৰ সন্মুখভাগ ক্ষতিগ্ৰস্ত হয় ।
ওড়িশাৰ আঞ্চলিক সংযোগ শক্তিশালী কৰা ইণ্ডিয়া ৱান এয়াৰৰ এখন বিমানৰ শনিবাৰে জৰুৰীকালীন অৱতৰণক কেন্দ্ৰ কৰি আতংকময় পৰিস্থিতিৰ সূচনা হয় । ভুৱনেশ্বৰৰ পৰা ৰৌৰকেলালৈ যোৱা বিমানখন মুকলি এলেকাত জৰুৰী অৱতৰণ কৰে । অৱতৰণৰ সময়ত ৯ জনীয়া বিমানখনৰ সন্মুখভাগ ক্ষতিগ্ৰস্ত হয় । কাৰিকৰী সমস্যাৰ বাবে পাইলটজনে অৱতৰণ কৰিবলগীয়া হোৱা বুলি জানিব পৰা গৈছে । এই ঘটনাৰ সময়ত জাহাজখনত দুজন ক্ৰু মেম্বাৰকে ধৰি প্ৰায় ৬জন লোক আছিল । সকলো যাত্ৰী আৰু ক্ৰু সুৰক্ষিত আৱস্থাত আছে বুলি জানিব পৰা গৈছে ।
ইণ্ডিয়া ৱান এয়াৰৰ চেছনা গ্ৰেণ্ড চি২০৮বি বিমানখন ভুৱনেশ্বৰৰ পৰা প্ৰায় ১২:২৫ বজাত ৰাওনা হয় । প্ৰায় ১:১৪ বজাত ক্ৰুৱে ৰৌৰকেলা এয়াৰ ট্ৰেফিক কণ্ট্ৰ’ললৈ MAY DAY বাৰ্তা প্ৰেৰণ কৰে, য’ত জৰুৰীকালীন পদ্ধতি সক্ৰিয় কৰিবলৈ কোৱা হয় । প্ৰায় ১:২০ বজাত বিমানখনে ৰৌৰকেলা বিমানবন্দৰৰ পৰা প্ৰায় ১৫ৰ পৰা ২০ কিলোমিটাৰ দূৰত্বত অৱস্থিত কানছৰৰ ওচৰৰ মুকলি ঠাইত জৰুৰী অৱতৰণ কৰে । সেই সময়ত বিমানখনত আছিল চাৰিজন যাত্ৰী আৰু দুজন ক্ৰু মেম্বাৰ । অৱশ্যে এঘ ঘটনাত কোনো যাত্ৰী আহত হোৱা নাই ।
ঘটনা সন্দৰ্ভত তথ্য লাভ কৰাৰ লগে লগে স্থানীয় প্ৰশাসন আৰু উদ্ধাৰকাৰী দল ঘটনাস্থলীত উপস্থিত হয় । যাত্ৰীসকলক উদ্ধাৰ কৰি প্ৰাথমিক তদন্ত আৰম্ভ কৰা হয় । ইফালে অসামৰিক বিমান পৰিবহণ বিভাগ আৰু সংশ্লিষ্ট সংস্থাই এই ঘটনাৰ কাৰণ সন্দৰ্ভত তদন্ত আৰম্ভ কৰিছে ।
লগতে পঢ়ক : অন্ত পৰিব পথ দুৰ্ঘটনাৰ পিছত চিকিৎসাৰ চিন্তা ; কেন্দ্ৰীয় পৰিৱহণ মন্ত্ৰীৰ ডাঙৰ ঘোষণা
