ওড়িশাৰ এছচিবি মেডিকেল কলেজ এণ্ড হাস্পতালৰ ICU ত ভয়ংকৰ অগ্নিকাণ্ড সংঘটিত হয়। এই অগ্নিকাণ্ডত ১০ গৰাকীকৈ ৰোগীৰ মৃত্যু হয়।

সোমবাৰে পুৱাই ওড়িশাৰ কটকৰ এছচিবি মেডিকেল কলেজ এণ্ড হাস্পতালৰ ট্ৰমা কেয়াৰ বিভাগত এক ভয়ংকৰ অগ্নিকাণ্ড সংঘটিত হয়।এই শোকাৱহ দুৰ্ঘটনাটোৰ ফলত ১০ জন লোকৰ মৃত্যু হৈছে।

জানিব পৰা মতে, নিহত লোকসকলৰ অধিকাংশই ৰোগী,যিসকলক ট্ৰমা কেয়াৰ আই চি ইউত ভৰ্তি কৰা হৈছিল।পুৱা প্ৰায় ৩ বজাত এই ঘটনা সংঘটিত হোৱা বুলি জানিব পৰা গৈছে,যেতিয়া ট্ৰমা কেয়াৰ জৰুৰীকালীন বিভাগৰ প্ৰথম মহলাত হঠাতে অগ্নিকাণ্ড সংঘটিত হয়।

অগ্নিকাণ্ড সংঘটিত হোৱাৰ লগে লগে ততাতৈয়াকৈ তিনিখন অগ্নিনিৰ্বাপক বাহিনী  ঘটনাস্থলীত উপস্থিত হৈ জুই নিয়ন্ত্ৰণ কৰিবলৈ চেষ্টা কৰে।অগ্নিকাণ্ডৰ ফলত ৰোগী আৰু আত্মীয়ৰ মাজত হাহাকাৰ পৰিস্থিতিৰ সৃষ্টি হয়।

পৰিস্থিতিৰ প্ৰতি লক্ষ্য ৰাখি আই চি ইউত ভৰ্তি হোৱা ৰোগীসকলক লগে লগে নিৰাপদ স্থানলৈ স্থানান্তৰ কৰা হয়।সংকটজনক অৱস্থাত থকা ৰোগীসকলক চিকিৎসালয়খনৰ নিউ মেডিচিন আই চি ইউলৈ বদলি কৰা হয়।সম্প্ৰতি অগ্নিকাণ্ডৰ সঠিক কাৰণ এতিয়াও স্পষ্টকৈ জানিব পৰা হোৱা নাই।

ঘটনা সন্দৰ্ভত তথ্য লাভ কৰাৰ লগে লগে ৰাজ্যৰ মুখ্যমন্ত্ৰী মোহন মাঝিয়ে ততাতৈয়াকৈ চিকিৎসালয়লৈ গৈ ঘটনাস্থলীত পৰিস্থিতিৰ বুজ লয়।তেওঁ নিউ মেডিচিন বিল্ডিং পৰিদৰ্শন কৰি জুইৰ ফলত ক্ষতিগ্ৰস্ত ৰোগীসকলৰ লগতে তেওঁলোকৰ পৰিয়ালৰ সদস্যসকলৰ সৈতেও সাক্ষাৎ কৰে।

লগতে পঢ়ক: নতুনকৈ হোৱা নাই কোনো হিংসাত্মক ঘটনা, পশ্চিম গাৰো পাহাৰত দুদিনৰ বাবে বৃদ্ধি সান্ধ্য আইন

আৰম্ভ ভগৱান জগন্নাথৰ ৰথযাত্ৰা

আজিৰে পৰা আৰম্ভ হৈছে পুৰীৰ ভগৱান জগন্নাথৰ ৰথযাত্ৰা। ওড়িশাৰ পুৰীত উদযাপন কৰা অন্যতম আধ্যাত্মিক উৎসৱ ৰথ যাত্ৰাই সমগ্ৰ বিশ্বৰ ভক্তসকলক আকৰ্ষণ কৰি আহিছে ।

প্ৰতিবছৰেই আহাৰ মাহত অনুষ্ঠিত হয় ওড়িশাৰ পুৰীৰ ৰথযাত্ৰা ৷ ভগৱান জগন্নাথ আৰু তেওঁৰ জ্যেষ্ঠ ভাতৃ বলোভদ্ৰ আৰু ভগ্নী সুভদ্ৰাৰ প্ৰতি ভক্তি নিবেদনৰ হেতু প্ৰতিবছৰে ৰথ যাত্ৰা অনুষ্ঠিত কৰা হয় ৷

আজি পুৱা ৬ বজাৰ পৰা ৰথযাত্ৰাৰ বিধি বিদান আৰম্ভ হৈছে, যিটো গোটেই দিনটো চলি থাকিব আৰু তাৰ পিছত বিয়লি ৪ বজাৰ পৰা ভক্তসকলে ভগৱানৰ ৰথ টানিবলৈ আৰম্ভ কৰিব। ইয়াৰ পিছত ভগৱান জগন্নাথে গুণ্ডিচা মন্দিৰত উপস্থিত হ’ব আৰু তাতেই ৭ দিন বিশ্ৰাম ল’ব।

এই ৰথযাত্ৰাৰ বাবে প্ৰশাসনে কটকটীয়া নিৰাপত্তাৰ ব্যৱস্থা কৰা হৈছে।গোটেই চহৰখনতে কেন্দ্ৰীয় সশস্ত্ৰ বাহিনীৰ ৮টা কোম্পানীকে ধৰি প্ৰায় ১০ হাজাৰ নিৰাপত্তাৰক্ষীয়ে দায়িত্ব ল’ব।

এই অনুষ্ঠানত দেশ-বিদেশৰ লাখ লাখ ভক্তই অংশগ্ৰহণ কৰিব।শ্ৰী জগন্নাথ মন্দিৰ প্ৰশাসনৰ মুখ্য প্ৰশাসক অৰবিন্দ পদ্ধীয়ে কয়, মহাপ্ৰভু শ্ৰী জগন্নাথৰ আশীৰ্বাদত শুকুৰবাৰৰ পৰা শান্তিপূৰ্ণভাৱে ৰথ যাত্ৰা অনুষ্ঠিত কৰাৰ বাবে সকলো প্ৰস্তুতি সম্পন্ন কৰা হৈছে। আমি সেৱক সকলৰ পৰা সম্পূৰ্ণ সমৰ্থন পাইছো আৰু সকলো ব্যৱস্থা সম্পূৰ্ণ হৈছে।

সকলো ৰীতি-নীতি সম্পূৰ্ণ হোৱাৰ পিছত ভাই-ভনী তিনিওজন ভগৱান বলভদ্ৰ, দেৱী সুভদ্ৰা আৰু ভগৱান জগন্নাথৰ ৰথ টানি অনাৰ কাম আৰম্ভ হ’ব আবেলি ৪ বজাৰ পৰা ।দেশ-বিদেশৰ পৰা পুৰীত উপস্থিত হৈছে লাখ লাখ ভকত।

আৰক্ষীয়ে দিয়া তথ্য অনুসৰি, বৃহস্পতিবাৰৰ সন্ধিয়ালৈকে প্ৰায় এক লাখ লোকে পুৰী পালেহি।তেওঁলোকৰ মাজৰ কিছুমানে ‘নৱ্যৱন দৰ্শন’ৰ সৌভাগ্যও লাভ কৰিলে, য’ত স্নান অনুষ্ঠানৰ পিছত প্ৰথমবাৰৰ বাবে দেৱতাসকলক দৰ্শন পোৱা যায়।

১১ জুনত স্নান অনুষ্ঠানৰ পিছত ৰাজহুৱা দৰ্শন বন্ধ কৰি দিয়া হৈছিল। বিশ্বাস কৰা হয় যে গা ধোৱাৰ পিছত প্ৰভু অসুস্থ হৈ পৰে আৰু দুসপ্তাহ ধৰি ‘অনাসৰ ঘৰ’ (আইছ’লেচন ৰুম)ত ৰখা হয়।

এই ৰথ যাত্ৰা কেৱল ওড়িশাৰ বাবেই নহয়, সমগ্ৰ ভাৰতৰ লগতে সমগ্ৰ বিশ্বৰ লাখ লাখ ভক্তৰ বাবে এক গুৰুত্বপূৰ্ণ ধৰ্মীয় আৰু সাংস্কৃতিক অনুষ্ঠান।

এই উৎসৱত তিনিখন বিশাল, সজ্জিত কাঠৰ ৰথত তিনিওজন দেৱতাৰ মূৰ্তি শোভাযাত্ৰা কৰি উলিয়াই অনা হয়। হাজাৰ হাজাৰ ভক্তই ৰছীৰে এই ৰথবোৰ টানে। ৰথ যাত্ৰাৰ এই বিশেষ দিনটোত তেওঁলোকক বিশেষভাৱে পূজা কৰা হয়।

ভগৱান জগন্নাথে মাহীয়েকৰ ঘৰত ভাতৃ-ভগ্নীৰ সৈতে বিশ্ৰাম ল’ব আৰু ৫৬টা প্ৰসাদও উপভোগ কৰিব।প্ৰচুৰ খাদ্য খোৱাৰ পিছত প্ৰভু অসুস্থ হৈ পৰিব আৰু তাৰ পিছত তেওঁক ঔষধ দিয়া হ’ব।

৭ দিন জিৰণি লৈ ৰথ যাত্ৰা পুনৰ জগন্নাথ মন্দিৰলৈ আহিব। আহাৰ মাহৰ শুক্ল দ্বিতীয়াৰ পৰা আৰম্ভ হোৱা এই ৰথযাত্ৰাৰ সামৰণি পৰিব চলিত বৰ্ষৰ ৫ জুলাই অৰ্থাৎ দশমী তিথিত।

লগতে পঢ়ক: ‘নিশা কামাখ্যা মন্দিৰলৈ নাহিব কোনো লোক’; ৰাজ্যবাসীলৈ আহ্বান মুখ্যমন্ত্ৰীৰ